تحميل رواية «ماء مغلي» PDF

..♣️🩸 ماء مغلي 🩸♣️..

٢٠١٥ / تموز

ساعه ١١ الظهر بنص الازدحام والسياره تجوي وبوخه .. تبريد عاطل والعرك ينزل من شعري لركبتي و وره اذاني

عيوني جمرت من حراره السياره

اطلع راسي من الجامه بس بوخه ولهيب

هوا شرجي حار يلهب بالوجه

صوت الهورنات سطر راسي ورجلي راحت من تحويله البانزين والبريك وبالكوه يمشي السير ..

امسح وجهي بالكلينس واهفي بي وعيني على التقاطع شوكت ينفتح ويفضنه ..

عمرها بغداد ماتهدأ وتصفى ..

اذا كل هذوله بشر هنا چا هالنجف الماليتهه الكبور ياهوالنايم بيهه !!!

ازدحام دومهه ازدحام ..

هسه اني ماعرفت اشتغل الا هنا !!

سمعت صوت تلفون اخذته وجاوبت ...

- هااا سيد شلونك

- هله هله بالعضيد وينك اليوم ما مريت

- طالع اسلم شغل لواحد بغداد

- هاا وين بغداد

- بغداد جديده

- هاا زين ،، ماحجيتلي شصار على سالفتنه شو لاحس ولا نفس نسيتنا شني!

- لااا بويه ماناسي وعلي بس مالكيتهه شسوي فريت عكه ومكه وماجاي الكاهه متكلي شسوي

- شدعواك عصبي اليوم

- من هالازدحام خرب بيومهم شوارعهم دود يروش بيهه

- هههههه ولك حيدر استعجل اذا مادبرهه خليني ارجع للرجال ويشتغلهه من يمه صار شجم سنه انتظر بيك متكلي شوكت تفضهه

- سيد شبيك يعني شجم مره كال الرجال ماترهم سالفتهه مو يمي لزكتله انته شبيك عوفه لخاطر الله اني من يمي بزعت

- شسوي يلا عندك غير حل ! اضل صافن وحاط ايدي على خدي ! شسوي فهمني

- كلتلك هي ماكو غير هاي الي بالي بس هي تكدر وعوفني ادبرهه ان شاء الله اصبرلي هالشهرين وبلكت احصلهه

- هاي اخر مهله تره

- رحمه لجدك يعني لو خلصت شسوي تبطل !!

- شبطل ولك جان بطلت من زمان بس غير مغلوب على امري من الله لايوفقهن

- ههههه اصبر اصبر ماضل الا القليل اصبر بحيل الله تدبر

- الله كريم يلا انتبه على دربك مع السلامه

-الله وياك

سديته وشمرت تلفون على الكشن هو بليه شي انه كاره روحي والنوب يجيبلي طاري هالسالفه .. شاغت روحي

كضيتهه ادك هورن لحد ماعبرت التقاطع

اريد بس اوصل وانزل من هالسياره حركتني حرك .. اريد اغسل بوخت ودبكت من العرك

طبيت بغداد جديده وخابرت ابو البيت

يدك يدك وميجاوب

رجعت خابرت ويرفضني ردت اكسر التلفون

متعني من الصبح لحضرته ومسموط بالحر وهو ميكلف نفسه يخابر !!!

وصلت منطقتهم وخابرته جاوبني ..

- خويه ماتكلي وينك رحمه لاهلك

- يابه طالع اني طالع اعذرني ماجاوبتك ردت اخابرك هسه

- خويه البيت وين دليني انه طبيت منطقتكم وين اروح هسه تطلعلي توصفلي فهمني

- لاا لاا مو اني طالع كلتلك

-ايييي نسيت وشلون بشغلنه ؟

- راح اوصفلك البيت وروح انته بس ارفع السركي مال باب من جوه وفوت وباب المطبخ تلكى مفتاحهه فوك الميزانيه افتحه وفوت كمل شغلك واني ماتاخر شغله ساعه واصير يمك

- خويه شلون حجي هاذ يعني شلون اطب البيت ومابي احد

-عادي عادي ماعدنا شي اخذ راحتك والاهل طالعين البيت فارغ و كمل شغلك براحتك

- اضل انتظرك لحد ماتوصل ماعندي مشكله تره حتى ادليني تفهمني شلون اشتغل على عمى عيني

- يااابه مو كلتلك فوت شتسوي سوي اني مفهمك على كل شي المهم اريد اشوف وين تحطهن حطهن بكيفك

- يلااا ماشي ماشي

اخذت وصف البيت وسديته  وضليت استغفر ربي شجابني لهالشغله التعبانه !!!

وصلت واني وياه على الخط وطبكت سيارتي ونزلت فتحت الباب من جوه وطبيت كبل للمغسله حطيت راسي جوه المي وغسلت نكعت تشيرت وايدي ورجلي سبحت سبح

بالمي وتالي يلا اخذت مفتاح باب المطبخ

وطبيت اخذتلي فره بالبيت وشغلت المبرده وضليت كاعد كدامهه اتبرد

بعدين تمددت ريحت راسي شويه واخذتلي فوك النص ساعه اتبرد بعدين كمت شربت مي ثلج وخليت البطل بايدي وافتر بالبيت

اباوع لكل زاويه وافحص قواعد الكلوبات

اريد اضبط الاماكن الي اشد بيهه الكاميرات

لجناب الدكتور ...

رجعت لسيارتي نزلت الغراض المشتريهن

وحطيتهن يم الدرج وبديت اشتغل

كملت دواخل البيت وصعدت للسطح ربطت الخارجيات على الستاره ونزلت هم غسلت

انسمطت بالشمس هالظهريه انشويت شوي

كعدت ارتاحيت وجعت كلش باوعت ساعه اربعه الا ربع وهاذ لهسه مارجع !!

خابرته ميجاوب .. ضليت متمدد على البروده واكول اكوم اكلي شغله لو ميصير عيب ؟

جوعااان فد مره صار العصر و اني على الريوك من ساعه سته ونص صبح

اطلع شلون اعوف البيت مفتح واذا هو رجع شلون ؟ اكوم اكل عيب شلون اخذ بدون علمهم ؟

ضليت للاربعه ونص  اتكلب تالي رجعت خابرته جاوبني وصوت هوسه يمه كلتله ..

-خويه صار العصر اريد امشي لاهلي شلون ابات هنا انتظر بيك

- حيدر ماكدر ارجع عندي مشكله والله ومتورط ورطه بس الله يعلم بيهه

-خير خويه تريدلك فزعه كول هسه اجيك

- لاا مو مال فزعه رادلهه عقل

- هسه شلون

- انته كملت كلشي

-اي خلصتهن بقى بس تجي حتى اربطهن لحاسبتك وشوف اذا تريد تضيف غير مكان

- اني واثق بيك مادقق بعد وراك شسويت انته هاهيه كافي

- ان شاء الله يفيدنك

- اي اي ان شاء الله هسه اني اطول تريد ترجع انته ؟

- اي والله يادوب الحك اوصل كبل ماتظلم تعرف طريقي بعيد

- وعفتك بدون غدا والله ياخويه حقك عليه

بهذلتك وياي وماقمت بواجبك اعذرني

-معذور خويه معذور هسه بس فهمني شلون اعوفهه غير يوم نكمل لو شلون

-لااا يابه دفضهه اليوم روح اخذ حاسبتي واشتغل

- ههههه خويه هيج مأمن بيه

- والله من لا جاره هههههه شسوي مضطر

-هههه لاا لاا سدك امين اطمن انه مو خوان

- لاا والنعم منك كد الثقه ان شاء الله

روح اخذهه من غرفتي بجنطتهه تلكاهه

وهسه ادزلك باسوورد برساله

و كملهه فدوه  لعينك خلي بالي يرتاح

- يلا ماطول شغله نص ساعه بالزايد

- انتظر اتصالك

سديته ورحت اخذت الحاسبه وكعدت اربط

و اروح واجي اضبط الصوره لحد ما كملتهن

خابرته ..

- هااا خويه كملن وكلشششي ضبطته

-عاشت ايدك مشكور تعبتك وياي

- ادلل خويه هسه ماترجع تشوفهن

- يمعود شيرجعني اني انحصرت حصره

من هاي الزينه

- وين انته شصاير وياك

- متعارك ويه وحده وهسه طلعلي فيلق وراهه وتعال شوف حالي راح اروح بالرجلين

- خويه اجيك بس دليني وينك

- تعال اي بربك تعال اقلها واحد وياي كلشي يصير  وهم انطيك فلوسك

- عوف الفلوس هسه كلي وينك

- من توصل شارع ابو نؤاس ادليك وين بالضبط

-ماشي يلا اقفل البيت واجيك

سديته ولميت الغراض ورجعت كلشي لمكانه

وقفلت وطلعتله .. كلت هذا امني على بيته ووثق بيه وهو بضيق لازم اوكفله ..

طلعت بسرعه امشي لحد ما وصلت شارع ابو نؤاس خابرته ودلاني مكانه ..

طبكت ونزلتله جان واكف يم سيارته

سلمت عليه وكعدنا بسيارته كلتله ..

- شو هنا چا وين اهل العركه

- اصبر اصبر جايين

- هي شنو سالفه فهمني

- يابه احجيها الك من الاخير

اني اجيتلي هنا بهالنادي كم سهره ويه جماعتي ومره من هالمرات رافقتلي وحده منهن تعرف بعد ميز وسهره وجو يعني واحد يتسرسح بكيفه واخذت راحتي وياهه

ليش ما تطلع صاحبتهه مصورتنه

ويعرفن بيه دكتور و كل يوميه جايتني من صفحه تجيب هالكد لو انشر

تدفع لو ادزهه لمرتك واهلها

تجيبلي هالشي لو اشاركه بفيس مرتك واشهرك بينهم ، خبلني وسحبن فلوس وارصده وتالي طكت روحي اجيت عليهه هنا اريد اخصمهه صارلهه خمس شهور جيب ماجيب مابقت عليه فلس

- ايي و شفتهه تفاوضت وياهه ؟

- هي هنا المصيبه اجيت اريد افوت مايخلوني فهمتهم السالفه يمعودين بس هالبنيه اريدهه يكولون ماكو مو هنا

تالي لتلاثه اجني كلهن بسياره ونزلت هي وياهن رحت جريتهه وكلتلهه بيعي الي هسه ونخصم السالفه ماترضى كلمه منا ومنا تعاركنا وهي ضلت تلعلع لمت الحرس

عاد كلتلهم اريد جبيرتهن ولحيت عليهم هاي من سديته منك بالاربعه لحد قبل شويه اني اتعارك وياهم وانتظر بيهه تجي

- هاي راح تفيدك يعني لو خاف تطلع انكس منهن

- تفيد ماتفيد هاي بعد اريدهه منهه

- تعرفهه انته شايفهه ؟

-شايفهه شلون لعد هاي بلوه مو مره تكتل

-هههه يمعود جوز عاد ماشفت تاليها شلون

- لك هاي شايفهه شنووو من جسم شنو من شخصيه هاي معروفه هنا باسم ريري

منهم يسموهه داده ريري لان مسؤوله على البنات ومنهم يصيحولهه الست ريري

- هالله هالله شدعوا بويه كلهه خلك .. استغفر الله

- لك هاي صح وحده كاوليه وام دعاره

بس موكفتهم على تك رجل

شايف هذني البنات الي يلعلعن بالشارع ومايهابن شي بس خلي تصيح على وحده بيهن يروحلها ركض ويخنسن

عدها بيت وسياره ومالكه هذا النادي وعدها بيت ثاني مكعده بي البنات وعايشه وحدها

و نص هالولد مثل الخدم جوه ايدهه مشيتهم

فد وحده شخصيه ولسان ماكو مثلهه والله شكد شايف نسوان بس مثل هاي ماشفت

- وحده كبحيه غير ولسان مترين والناس تتجفى شرهه

- هي مال كبحيه اي كبحيه بس هسه توصل وشوفهه بعينك شلون يركضون ركض كدامهه

- زين يصير بين ماتوصل نروح ناكل شي

تره بطني حتتكطع من الجوع ضال على الريوك من السته

- هههه والله يابه حقك حتى اني جوعان

امشي ناكل ونرجعلهه

-اييي رحمه لاهلك

شغل سيارته وطلعنه .. مانزلنه بمطعم اخذنه سفري وضلينه ناكل بالسياره ورجعنه لنفس المكان ..

وره ماوصلنه بعشر دقايق هي وصلت

طبكت سيارتهه سوناتا نيلي تلمع لمع

و ركض واحد من الولد راح فتحلهه الباب

وهي تأشرله ينزل غراض ..

نزلنه احنه ورحنه عليهه .. اباوعلهه

طويله جسمهه مربرب .. كتوف عريضه وصدر وارداف مشدوده و بارزه.. لابسه بنطرون اسود وقميص وردي فسفوري مخليه نص منه بالبنطرون ونص عايفته .. شعرهه

شادته صفح ومنزلته على كتوفهه مبين مصبوغ جوزي .. والوجه يلمع اكثر من السياره .. حاجب مرفوع وعيون بس رموش

بارزه وحلك منفوخ وردي يلمع والركبه بيضه تلمع.. 

جنت اباوع لكل شبر بيهه وناسي هالولد شيحجي وياهه مانتبهتله ..

بس صارت عينهه بعيني وخزرتني وكبل نترت وكالت ..

- خييير شبيك ماشبعت تبصبص

فكيت عيني وابتسمت كلتلهه ..

- لا كافي

- ديلا امشو

- وين ؟

هي هزت ايدهه ومشت كدامنه والولد كالي..

-شبييك انته انثولت مو صار ساعه نحجي

وكالت نفوت جوه نتفاهم

-هااا اي مانتبهت

- مو كلتلك حلووووه تكتل

- هاي شدعوا هيج كلشي بيهه مصبوب صب

- شدراني دمشي امشي

مشيت وياه وجانت اول مره اطب هيج مكان

اباوع ظلمه بس ضوايات صفر مشتغله بكم مكان .. حتى من كد ماظلمه كلشي مشفت بس الطريق الكدامي امشي وياهم ..

طبينا بغرفه جبيره وبيهه بس قنفات ومرايه

جبيره وبيهه اضويه .. ضلينه واكفين وهي تخابر وتعدل بشعرها ..

سدته وراحت كعدت واحنه هم كعدنا وره شويه طبو البنات خمسه كلهن لابسات برمودات وبديات ربع ردان وشعرهن مهوس وبس يتمعلجن ..

وكفن وحده بصف اللخ وساكتات هي كبل صاحت بيهن ...

- ذبببببي العلج

كلهن راحن لسله الزبل ذبن علوجتهن ورجعن لنفس وكفتهن ..

كالت  ..

-  ياهيه منهن الكعدت وياك

الولد اشرلهه عليهه وكاللهه ..

- هاي كعدت وطلعنه بس الصورت ماعرفها

وهي تكول مو عندي عند البنيه الثانيه

باوعت لوجوهن وكالت ..

- ولجن ياهيه الصورت اني مو كايله تلفون مينفتح هنااا

عينك عيننننك تصورن وتجيبلي بلاوووي

ياهيه الصورت تحجي يلااا

ضلن ساكتات وهي وكفت يمهن كرصت زند هاي الطلعت ويه الولد وهي كبل كلتلهه على البنيه .. جرت تلفوناتهن كلهن وخابرت واحد وصته يجر تلفون وحده من البنات من ايدهه ويجيبه الهه هسه ..

كلبت بتلفوناتهن بدون ماتطلب منهن رمز هي تفتحهن واحد واحد .. تكلب وتشمر بالكاع

الي تفصخ والي تفطرت شاشته والي راح جوه القنفه وهنه ساكتات مانطقن بحرف

وبعدين الولد جاب التلفون الوصته عليه

واخذته كلبت بي وطلعت الفيديو كلتله

-هذا مو ؟

- اي هو

لزمت التلفون من النص وكسرته وشمرته بالكاع كالتله ...

-يلا خلصت سالفتك توكل

- شيضمنلي بعد ماكو

- هاي مو شفت كلهن تكسرن بعد شتريد

- خاف هم تطلع بعد وحده مصوره

- عيني اني اعرف اوادمي ومن اكولك خلص يعني خلص

يلا عندي شغل راح اطلع ماضل مكابلتك

وانته هالمكان بعد لاتعتبه اذا تريد تستر على روحك  زين .

اخذت جنطتهه و مشت  شويه وكالت  للبنات ..

- لليل حسابجن امشن نظفن يلاااا

دفعتهن وطلعن بره واحنه هم طلعنه وهي قفلت الغرفه ومشت كدامنه .. صعدنا بسياره وهي لبست نظارتهه وحركت سيارتهه وطلعت ..

الولد كال..

- همزززززين خلصت يا يابه التوبه بعد

اتورطلي ويه وحده

- ايي ديربالك بعد

- شفتهه شلونهه هاي هسه زين هاديه وحبابه

لو تشوفهه بالليل فد شخصيه مسيطررره

باشاره اصبعهه تمشي السهره والناس

- اكلك هي شلون عرفت اكو غير تلفون بي البلاوي ؟

- تعرف هاي مفلستهن تفلس وماسمعتهه كالت اعرف اوادمي يعني تعرف منو الي تسوي هالدكايك

- هااا زين هاي بشكد تطلع ؟

- هاي متطلع

-شعجب

- بس للروس الكبار على الطلب يلا يعني مال واحد يكعد وياشر يريدهه تحط رجلهه بحلكه وتفركه فرك واطلعه دفرات

- روووح عمممي مسترجله هاي

- حييل

- زين هالروس شلون يطلبوهه

- مبين عاجبتك وادورهه

-ههههه لاا بس هيج سؤال

- هاي عدهه واحد هو رقمه لهالسوالف

من خلاله يوصلولهه

صفنت شويه  وهو كال ..

- شكد انطيك اتعابك

-مادري كيفك

-شبيك حيدر شكد تريد فهمني شكد صار سعرهن شكد شغل ايدك

- اكلك وين بيتهه ؟

-هههه صدك تحجي انته !!!

- والله عن الشقه وين بيتهه اريد احاجيهه بسالفه

- لك ياسالفه كلتلك متطلع هااي متطلع

- ماريدهه تطلع اريدهه بسالفه بس حجي يعني

- بيتهه بالبتاويين بس ماندله بالضبط سامع هناك بيتهه بس هيج

- يعني اذا اسال اندل

- يجوز ! هي طاشه وين متصيح ريري يدلوك

- زين خلي الحكلهه

- وييين يمعود يجوز مو هناك

ماسمعتهه عدهه شغل

- اجودر بابهه اليوم لو للفجر

نزلت ورحت لسيارتي وهو ورايه يصيح ..

-الفلوس ولك

صحتله ..

- حولهن حوولهن

كبل شغلت سياره وطلعت للبتاويين ..

بالي تتردد صورتهه وصوتهه .. هاي النباهه

واحساس يكلي .. هاي الي اريدهه ...

طبيت البتاويين واسال كل شويه واحد وطلعت ماشاء الله مثل شاره على علم

كلهه تندل بيتهه .. ووصلوني لباااب البيت

ومن زين حظي جانت هي هناااا ...

طابكه سيارتهه بالباب ..

اخذت نفس وقريت ايه الكرسي لتسهيل امر

ونزلت اعدل بشعري ودكيت الباب ..

بعدني ادك الباب ودك تلفوني .. جاوبت بسرعه...

- حيدر وينك غربت الدنيا ماترجع !

- سيد لكيتهه

- شلكيت ولك !؟

- ريري

- شني ! شني هاي

- البنيه لكيتهه يلا بعدين بعدين نحجي

- ولك انته وييين احجي

- هههخخ انه بالبتاوين

- حييددرررر شصخم وجهك وداك هناك

- رحت اجيبهه

- شتجيب ولك شعرفك بيهه حيدر شعرفك بمصخمات هالمنطقه

- عرفتهه صدفه وحك علي هسه اصبر خلي احاجيهه  راح اطب لبيتهه بعدين نحجي

- لك شلوووون اطب لبيتهه لك هاي منووو فهمننننني

- كالولي هاي الراس الجبير بينهن هذني بنات الكحاب الي هنا يسموهه داده مدري شنو

- لك من شوكت انته تعرف هالسوالف شوداك على هالكحاااااب حيددددر ارجع اررررجع لاااتسوددددنننني ارجع اكلك

اررجع

- والله ماارجع بلياهه هاي حصلتهه بعد مااهدهه لو مو انته تكول

- لك اتريد تفضحنه انته ! تريد تصخم وجوهنه جايب  ام الكحاب على بيت ساده !!!

- مالكه احسن منهه سيد وماعدنه بعد وكت

- عوووفهه خلي ايطبهه مرض لبنتي خليهه تموت موووت الكرفهه وكرفك وياهه ولا تجيبلنه هيج بلوه وتصخم وجوهنه حيدر وحك علي مااخليك تعتب الباب لو جبتهه

- اذا انته متريد بنتك اني اريدهه ووصيه اختي حالف يمين لو على كص لوزه هم احققهه واجيبهه لريري اجيبهه تريد تزعل ازعل جيب البنيه يمي وروح مالك شغل بعد اطلع انته من السالفه وعوفهه بركبتي

سديت الخط بوجهه وقفلت تلفوني وضليت ادك بالباب .. ماسمع بس صوت الجلب ينبح

شويه وانفتحت الباب ..

ضلت رافعه حاجبهه ومتخوصره وتباوعلي كلتلهه ..

- السلام عليكم

- هلا

شرايد ؟

- اريد احجي وياج بفد موضوع عندج مجال

- شنو احجي شتريد

- مو مال هيج وكفه

- اكولك لا تضل تماطل كول شتريد

داتعشى وانته مكومني من اكلي على شنو شعندك ؟؟؟

- اا هوو الصراحه سالفه طويله ماعرف منين ابديهه

- تريد بنات تعالي باليل هناك

-لاا ماريد

- ماشتغل لدرب الولادي تره

- بووويه شسالفتج ياولادي

-لعد جاي على صخام وجهي !!

شتريد ابيعلك خضره !!!

احجي فضني شكو شتريد

ضليت افرك بكصتي وبعدين كلتلهه ...

- تعشي انتي براحتج وانتظرج هنا شوكت متكملين كليلي ونحجي

تاففت وطبكت الباب بوجهي ورجعت لسيارتي كعدت واحضر بالحجي اسولف ويه نفسي واكول هيج وابدا هيج وايدي شويه ترجف متوتر .. هالناس غريبين عليه واحسهه خطوه جبيره وخطره بس لازم تصير ماالكه احسن من هالفرصه بعد ...

حسبت ثلث ساعه ضبط يلا فتحت الباب وصاحتني ..

رحتلهه واول ماعتبت باب البيت الجلب اجاني .. جلب بوليسي اسود ولسانه بطوله

ويفتر يم رجلي واني ارجع لوره وهي جرته وراحت اخذته ربطت سلسلته واشرتلي اطب للبيت ...

طبيت البيت وجانت هيج غرفه مفتوحه على المطبخ بيهه قنفه وحده لون كريمي وطبله كزاز عريضه وكبالهه مرايه طويله معلكه بالحايط وتلفزيون يم الشباك ..

كعدت وهي هم كعدت حطت رجل على رجل

وجرت باكيت الجكاير وصارت ادخن واني اباوعلهه ومتردد احجي لو انسحب ؟؟؟

كالت ..

- لك والله دقيتني شتريد دحجيي  مو بطيته لكلبي

- ها اي هو يعني

اريدج تساعديني بشغله انسانيه

- اي شنو تريد فلوس ؟

- لاا مو فلوس بس مساعدتج انتي يعني

وجودج

- اكلك احجيلي طك بطك شتريد يلا ورايه طلعه ومالي خلك سوالف

- اي حقج اي

احمم

شوفي هو صحيح طلب غريب وراح تستغربينه بس صدكيني محتاجه وشغله حياه او موت يعني لا تستهزأين بسالفتي

- هي شنوووو غير افهم

- اريد تجين وياي لبيتنه تساعديني

-بشنو ؟

- احم ااا هو .. بيتنه بي سحر

- هههههههاااااايييييييي شنو شنووو

سحر ! شكلولك عليه اشمشم السحوره اني !!!

- لاا بس اسمعي مني جايتج السالفه

-كبل متكمل انته منين ؟

- من النجف

- شسمك

- حيدر

- اي كمل شبي بيتكم

- بيتنا بي كوارث الدنيا

مسكون ومسحور وراحلي من وره هالشي اربعه من الاهل وهسه ابويه وامي واكعين بنفس المرض ونفس الشي رجعلهم

ماريد اخسرهم بعد وحاير بزماني

يشهد الله عليه مامجذب بحرف ولا عندي فد مصلحه وياج ولا اعرفج كبل اليوم هاي اول مره شفتج بيهه العصر وبس

كلت هاي تكدر تساعدني عدهه جرأه متخاف ونبهه وتكدر تجي وياي للبيت متحرره يعني

صار كم سنه ادور وحده مثلج من لكيتج ماصدكت بس احجيلج واقنعج

- اي واني شعليه بكل هالخريط هذا

واذا بيتكم مسكون مسحور اني شكووووو

- ادري متهمج السالفه بس هي شغله انسانيه كتلج حياه او موت

- ما فيدك اني شغلي لفوك راسي مالي خلك هالسوالف ولا عندي وكت

- اترجاج ست فكري بس فكري بيهه شويه

شوفي شكد متاذي من هالشي وجاي اطلبه بهيج طريقه منج

- ولك بابه اني شعليه بيك هسه قابل بس انته متاذي من السحوره شو نص العراق مسحور هم اروح ادورلهم مدري شنو

وبعدين اني شمفهمني بهالسوالف اني شغليييي واضح ومفهوم ماعرف هالدروب

- ادري متعرفين ادري

وانه هم ماعرف صدكيني ماعرف شي عنهن يعني انه جربت ادور انتبه على كل واحد يطب لبيتنه حاولت بس ماعرف شادور وشاريد ماعرف والله لو شكد مااوصفلج حالنه قليل بس خلي يكون بعلمج اني خسرت اخويه الجبير ومرته واختي الجبيره ومرت اخويه الثاني وهسه الحبل بعده ع الجرار بسبب هالسحر والبلاوي الماعرف منين تجي

- عليهم الرحمه

بيعو بيتكم وفضوهه

- بعناه وكاعدين بيت جديد صار سنه ونص

ونفس الشي وكعو ابويه وامي وبنت اختي هم هسه هذوله حال الضيم حالهم ماكدر اضل اباوعلهم شلون يموتون واحد وره الثاني

- يعني هسه شسويلك اني فهمني شتريد بالضبط

- تجين وياي للبيت ونشتغل اني وياج لهالسالفه

- تاخذني  لبيتك شنو هيج اهلك كلجيه !

- لااااا شسالفه اجيبج هيج بصفتج زوجتي

-هههههههيييييييي الدور زوجتك !

- اي غير شي مضبط تره صار فتره انه افكر لهالشي ومحسبهه شبر شبر بس وافقي كلشي مخطط

- دروح بابه روووووح

زوجته وصخام وسحر ناقصني بلاوي اني بيه مكفيني

- ست ريري فكري اترجاج وشتريدين حاضر فلوس شكد متردين انطيج شتطلبين يصير والج الامان يشهد الله مااخلي يمسج شي بس عينيني بامري

- حيدر تره مافارغه اني للرايح والجاي

وانته بيك بخت جماعتي مايعرفوك جاي لبيتي جان نعلست بس اني اليوم مزاجي زين وفوتك لبيتي دافهم شعندك وجهك يتبجبج

- هسه فهمتي كليلي شنو ردج

- روح لاهلك وكابل الساده اني شعندي كشاف واشغله واطلع سحورتهم

والله بطران

- كتلج محسب لكلشي بس وافقي بعدين نتفاهم بالتفاصيل

- ماوافق روح يلا كافي لحيت تره

- انطيج الي تريدي والله مو رجال اذا اخلف بكلمتي

- شكد تنطيني يعني شكم مليون

- عشره

- ههههيييييييي عشررررره !! كلفت روحك

تريد هسه اطشهن عليك

دروح بابه روووح انته لا تفيدني ولا افيدك

- انطيج اكثر عشرين خمسين شكد ماتردين

والله لو ما ضايك المر فلا اكعد هالكعده واتوسل بيج انتي متعرفيني ولا تدرين بحياتي شلونهه بس افهمي جايج انه من بيت ساده علويين ومجازف هيج وراضي بكل مبلغ تطلبي حتى اخلص من ضيم الي جرى علينه

لا تستهزأين بيه لان ماضايكه هاللوعه

- اييييي شخبصتنا

لوعه وضيم عادي ياهو هسه ممتلوع وكاتله الضيم شنو الجديد يعني تحمل كلمن وقسمته

- استغفر الله ربي واتوب اليه

اعتبريها لوجه الله هالخدمه يابويه

- عيووونييييييي ماعندي سوالف مبجله انيييي لا وجه الله ولا اشراف النبي ذني طكطكهن يم العلويين   مو يمي

- استغفر الله

- باوع كل الاكدرله انطيك وحده شاطره اخذهه وروح شتسوي سوي حط فلوسك واخذهه ولاتشوفوني خلقتكم بعد

- بس انه اريدج انتي لو رايد وحده جان كلتلج دبريلي

- واني مااااورط نفسي علمودك

شدراني شكو من مصايب عدكم اجي احط خشمي بالنص وابتلي منو يفيديني بوكتها امك ابوك انته !!

ياروح مابعدج روووح

تريد ادبرلك وحده نتفق بالفلوس هسه ووكت اجيبهن انطيك البنيه اخذها وروح

متريد دير وجهك واطلع يلا دوختني هواي

- مااااريد بناااات رايدج انتي مثل مواصفات الي اريدهه انتي تكدرين وانتي اطلبي وحاضر

- اكولك شوف اني سالفتك كلهه على بعضهه ممقتنعه بيهه فلا تحاول وياي

وكفت وراحت اخذت من كارتونه كلاص مي

شربته وشمرتلي واحد وكالت ..

- يلا هاي ضيافتك  بعد شوفنا عرض جتافك

- اطلبي شتريدين انطيج

هم لابد واكعه بشده بيوم واحتاجيتي مساعده لخاطر الله فكري بيها واطلبي اي شيي يجرالج والفلوس ادبرهن شكد مايصيرن

بس خلصيني الله يخلصج من جبير همج

وكفت كدام المرايه ورفعت شعرها وبعدين كالتلي ..

- اذا كدرت تقنعني افكر وكتها بسالفتك واعدل عليها ماامشي بخططك اني امشي بالي يناسب مزاجي

- مااشي اقنعج اكدر سهله هاي

- اي تروح هسه وترجع بعد ٣ ايام الك بس ٣ ايام يوم الثالث اذا مااجيت بعد بس توصل هنا اخلي اهلك يدوروك بالمستشفيات ومايلكوك

لان صراحه انته تغث واني ماتحمل هالنماذج الغثيثه تضل تنك فوك راسي

ف لو تجي بيوم الثالث وتقنعني لو لتجي بعد

مفهوم. !

كالتهه وجانت واكفه يمي ورافعه حاجبهه

كلتلهه ..

- يوم الثالث من الصبح تلكيني بالباب

وراح اقنعج ونكعد نتفاهم والي تردي يصير

.

.

يتبع 💕

احزرو لو تقدرو تحزرو

شلون راح يقنعها ؟؟؟؟

مسائكم خير وسعاده يا ورود مملكتي 🌷

كل الهلا بمتابعيني الجدد

والفين هلا ومرحبا بمتابعيني الاعزاز الي من البدايه وياي خطوه بخطوه

اعتز بيكم والله 💜

اريد احجيلكم شويه عن القصه

قبل مانبدأ ..

* التنزيل كل يوم ساعه خمسه العصر

* اكو كلمات تلكون كتابتهه شويه غريبه

هاي مو سحكه 😄 تره اني ادقق البارت قبل ماانشره ونادراً تطلع سحكات مادري عنهه

بس هاي ' اللهجه النجفيه '

حتى من تقرون تلفظون نفس مايلفظون همه تصير شويه احلى بتنويع اللهجات

والي ماتفهمه تكولي حتى اوضحهه

* القصه تضل مستمره ويمكن تطول بتفاعلكم تحسوهه خفيفه ان شاء الله

* من يجي البارت الي اكتبلكم بي

لا تقرون بالظلمه ولا تأجلون البارت لليل

اسمعو الكلام 😠 حتى لا تكعدون الليل كله تتخيلون وتطير نومتكم

ولذلك اني خليت التنزيل العصر

* اكو كلمات شويه +١٨

وحجي مو خوش 😄 خليتهه نقاط حتى تناسب الكل وبدون احراجات بعد انتو افهمو

لان اني لا اكدر مااحجيهن

ولا اكدر احجيهن صريح

هذا صار احسن حل

* القصه سحر & دعاره

كل جزء منهه اله تفصيل وتوضيح فلتستعجلون الاحداث كلشي اله يومه وينذكر

* وضلو دائما شاركو القصه رجاءاً

*. اي جديد او توضيح

راح ينزل بقناه التلي

و اذا صادف شي كلش مهم

انزله هنا اضافه لهذا البارت

هسه استمتعو 💜

..♣️🩸   ماء مغلي  🩸♣️..

ساعه ١٢ بالليل ..

طبيت البيت ،الكل بغرفهم ، مريت على غرفه اهلي همه يخلون الباب شويه مفتوحه

ومشغلين الضوا ..

فتحت الباب وامي اندارت وباوعتلي

دنكت عليها بوست راسها وكلتلهه..

- ها علويه  شو كاعده

- انتظرك ترجع يمه مو طولت اليوم

- جنت بغداد رحت بشغل

-شنو هالشغل؟

- قبل فتره راسلنه واحد دكتور من بغداد ويريد يشد كاميرات لبيته وصاحبي انور هايجه عنده كلياته ومابيه حيل يطلع كالي اراقب الشبكه بدالك وروح انته لبغداد

- هاا زين عاد حصلت خوش فلوس عليهه لو ماتسوه روحتك

- ههه لاا تسوه تسوه باجر يحولي الفلوس

وخوش مبلغ ادفع منه للسلفه ان شاء الله

- اي ان شاء الله يمه بحيل الله يجعل هالسلفه خفيفه عليك

- بدعواتج علويه .. الحجي اشلونه اليوم

- نفس الحال هالنايم ويذكر الله

- ماعليه شي ان شاء الله اتطمني ونامي

- ماتنام يمنه ع البروده هنا شعندك صاعد بالحر

- يلا هسه ابدل واجي لتكومين

اني من اجي افرش نامي انتي نامي

طلعت وصعدت لغرفتي بالطابق الثالث

ماعندي بيهه بس جربايه ام نفر حديد

وكنتور ابو بابين ومرايه معلكهه بصف الكنتور ومبرده داخليه اليوم كله طافيه والغرفه صايره حمام مبوخ من الحر

بدلت ونزلت غسلت ورحت فرشت بصف امي وبديت اغفي ع البروده هنا مبردتهم تثلج غرفتهم صايره جوه وعليهه فَي كبل تبرد ..

نمت وره جم ساعه اكعدت .. حسيت على ابويه يتقيء وامي تسمي عليه وتغسله

رحتله و كمشت   جتوفه وهو يرجف ويون

مسحت وجه بالخاولي وضليت كاعد يمه

وهو متمدد ويتشاهد ...

كل يوم ينعاد هالشي اربع او خمس مرات

امي حتى لو تنام بالهه صاحي ويه ابويه

رغم هي هم منتهيه بس شاده حيلهه اله

ضليت للفجر وياه كاعد واشوف امي مخليه هالسجاده ورافعه ايدهه وتدعي .. مافهم من دعائها شي  بس دموع  ...

صليت الفجر وبعدين كعدت يم ابويه وخليت التربه بايده وهو صار يصلي على كعدته

بس مايكدر يدنك .. بايده التربه يرفعها لكصته ويصلي ..

كمل صلاته وكالي ..

- طلعني اشم هوا مابيه نفس بني ادم

جريت السكملي يم جربايته ووكفت وخليت ايدي جوه جتوفه  وكعدته  عليه

ابويه فقراته من نص ظهره لجوه  متصلبه لا يكدر يحرك رجل ولا ينحني ...

طلعته للهشتي (الطارمه) وكعدت بالكاع يم رجليه وصرت افرك رجليه واحرك اصابعه

وهو يكلي..

- ما يفيد بويه لا تعب روحك هذني ميتات

- لااا حجي كول يالله

شده وتزول بأذن الله

بعدين هم لازم تحركهن شويه يمشي بيهن الدم

- ماينشالن يابويه بايدات

- هسه انه اشيلهن الك ولا يهمك حجينا

هااا اهاا

شلت رجله شويه بس رفعتهه وحركتهه يمنه يسره وفوك جوه ورجعتهه واخذت الثانيه هم نفس الشي .. اشوف ملامحه مبين عليهه الوجع بس ساكت .. ماضغطت عليه رجعتهه

وضليت افرك بالطول على رجله ..

سمعت صوت الحجيه ام حميد تصبح وتسبح الله .. لبست شحاطتي وطلعتلهه ..

جانت كاعده على الرصيف ومخليه يمهه

صينيه الجبن والكيمر وطاسات الروبه

صبحت عليهه واخذت ربع جبن وطاسه روبه

ومشيت شجم خطوه وجبت صمون ب الفين

حتى الكل تتريك بي ..

رجعت للبيت وشفت امي تتوجى بعوجيتهه

وتريد تاخذ صونده ترش الكاع ..

عفتهه واكفه ورحت للمطبخ خليت الجاي على النار وحضرت الصينيه ..

شيفت خيار وطماطه امي تحب تاكلهن ويه الجبن وخليت الروبه لابويه يشتهي دايما يتريك منهه .. طكيتلي بيضه عين وخليته وياهن وصبيت الجاي واخذت المفرش

فرشته واباوع لامي واكفه ترش بالحايط

هي تحب تشتم ريحه التراب المبلل من الصبح ورشت الكاع ..

فرشت وخليت صينيتنه وبعدين جبت صينيه ابويه الصغيره خليتهه بحضنه

اخذت بايد امي وعاونتها تكعد بالكاع ومددت رجليهه ورحت اخذت الماسحه مسحت الكاع شويه تنكعت وضل باب الشارع كلت اكل وارجعله

كعدت اكلت ويه امي وفكري كله بالست ريري .. حتى ماستطعمت الاكل شلونه

اكل وبالي مو هنا .. اتذكر شلون شفتهه

وعينهه الجادحه احسهه باي لحظه يمكن تهجم وتفترس .. عين عباره عن نار تحسهه كبل ماتشوفهه ..

صوتهه عالي وقوي يطبع بالبال

بيهه الجرأه الاحتاجهه وبيهه النباهه

تعرف تقرا الوجوه ، قويه و مسيطره وحدها

كل هالاشياء جنت سنين ادورها وبالاخير لكيتها بكحبه !!!

هالنقطه تلاشي كل الي فرحان بوجوده بيها

رجعت احاجي نفسي ..

' شلون اجيب كحبه مثل هاي واكعدهه بيت الساده ؟؟ '

شي ما يشبه شي !!!

رادت مني اقنعهه بس بعدني لازم اقنع نفسي بالاول هالخطوه صحيحه وماتندم عليها بعدين ..

حسيت امي فهمتني من كالتلي ..

- استخير  يمه استخير

ابتسمت بوجهه وبعدين شلت الصينيه وخليتهه بالسنك ورجعت اخذت ابويه للحمام

حضنته وكومته من السكملي وكعدته على الغربي وطلعت ضليت واكف انتظره بره

واندكت الباب قوي ..

فتحت وشفت ابن عمي السيد حسنين

يفر بسبحته ومدلغم الوجه .. كلتله ..

- صباح الخييييير

- ياخير ولك ياخير من وليت وهجمت بيتنا هم ضل خير

-شبيك سيد اذكر الله

- لا اله الا الله

جبتهه ولك وكسرت وجوهنا !

- ههه لاا بعد بعد فد يومين ان شاء الله

- ولك لا طلعني عن ديني لتسودني

- اوكف هنا هسه راجعلك ونتفاهم

رجعت لابويه  وغسلتله

واخذته يم امي وطلعت بره للسيد

ضلينه واكفين وهو شايط اعصاب كل شويه ويريد يضربني واتلافاه .. اخر شي كلتله ..

- هسه شبيك انطي صبر جايني هداد ياهو مشيشك عليه

- ياهو مشيشني !!! ولك هو انته خليت براسي عقل من غروب امس لليوم ادك عليك وغالق هالتلفون غير مثل الاوادم وتفتحه وتجاووب

- نسيته طافي

- ولك حيدر قسم بالله

-هييي اوكف اوووكف لاتكمل بروح جدك

بس اسمعني اسمعني

- ماااسمعك سالفتك عوجه وماتجيبلنه غير سواد الوجه

- سيد هسه انه رايد افتحلي مكوده هنا

جايبهه شغل وحك علي

- لك انته مسووودن والحسين مو صاحي

ولك هاي شتعرف انته عليهه وركضتلهه

شدراك شني ماشني

ماكلت تجيبلنه بلاوي ازيد

هو احنه ناكصيييين !!

- سيد كلشي باتفاق ماجيبهه عمياوي

- مااااتجيبهااا ولا تعتب هالباب ياحيدر

- خويه نضل كاتلنه الضيييم و نكوم نتشاهد نكعد نتشاهد !!! هم روحنا بزعت

خلي نخصهما بالله العظيم تفلت المر من هالعيشه

- حيدرررر الشرررف ولللك الشرررف

ولك ياعيشه يااامر يااا ضيييييم ولك هذا شرف شرررررف

هذا بيت ساده ولك هنا نسوانكم علويات

تجيب خلك كحبه تكعدهه بينكم توكل وتشرب بيهه ! ولك تريد تفضحنا بين الوادم

شني سالفتك تضل مضمومه ! كلشي اله يوم وينكشف ساعتهه شنكول شنحجي وين ننطي وجوهنا

- والله ادري والحسين ادررري ادري صعبه ادري بيهه كسره وجه افهم افهههم بس محتااجهه شبيك سيد نسييت الصاير بينه

هيج انه يعني كاتل روحي عليهه واركض ادورهه !!! غير من ضيم كلبي

هينه عليه هاي شوفه ابويه كلساع تنعصر احشاه ويتراجف وضال على منيه ولده يعينوه بكعدته !!!

هاذ ماتحسبه ماتخليه بعينك !!!

- ولك انه ماااحسب !! ولك مو الي بيتي امر من بيتك مو القهر شيب لحيتي

ولك هاذ يهون قدر وبلاء وربك يرفعه بس لو صارت الساده تاكل وتنام ويه كحاب شيهونهاااا ولك شيهونها هاااي

- سيد الي يريد شي يعوف شي

-ولك عوف روحك ولا تعوف شرف وطهر هالبيت

- هالبيت مهجوووم وانه رااايد اصلحه رايد اعيش اهله ولو مو بالكحاب لو بالشياطين

هم اجيبهم واكعد اكل واشرب ويه شيطان كبااال عيني اشوفه واعرفه ولا هالضيم الفوك راسي يدك كل يوم

- خلي الله يكلبهه بينه بسوالفك هاي

- ااانه اتحمل كلشي ان جان بيهه ذنب بركبتي ومسؤول عليهه امام الله الي يجرى على هالبيت هم بركبتي بخيره وشره

انته الك الصافي

- زين بيتك وانته مسؤول بي

وبيتي شلون هم تريد اهجمه فوك ماهو مهجوم !؟

- خويه انته ليش ماتشوف الجانب الزين من جيتهه ليش ماتتفائل شويه

- لك هي بيهه زين ولك مو جايه من الجيفه

يازين الي بيهه متكلي يازين !!!

- بس اسمعني

خلي افيدك اسمع

- احجي شعندك

- شوف خويه احنه شمحتاجين هاا

شمحتاجين ! وحده ملعبه تعرف كل الدروب

تلكطهه هي طايره مووو صحيح

-ايي

- اي ونريدهه سبعه ماتخاف وماوراهه ظهر

وما تفضح سرنا

وهاي كلشي الي نريده بيهه لا عدهه اهل ويسألون عليهه ولا تخاف ولا تهاب

وحده كبحيه و الي تلزمه تعلجه علج بحلكهه

ومتمكنه وقويه ذكيه عدهه بيتين وسياره اخر موديل ودرزن بنات جوه ايدهه وكلهن دايرتهن وموكفتهن تك رجل وهي بعدهه صغيره شوف شنو من مره هاي الكدرت تسوي كل هاذ بهيج بيئه !؟

موصحيح حجيي ؟؟

مو رادلهه وحده ميت كلبهه وجنهه لبوه تخوف ماتخاف

- وهسه هاي هيج من صدك لو بس تقنعني

-لاا وحك علي صدك شبيك سيد من شوكت اجذب عليك !

- بس تبقى ماتشرف

-هي ماتشرف ماتشرف منتهين منهه بس غير الحال مر ياخويه

- حيدر مااااتنبلع ويااااي لااا وحك الحك

وحك داحي الباب ماتنبلع وياي سالفتهه

مااال اتكعد بين العلويات وحده كحبه

وتجي اطب وتطلع لبيتي وتاكل من زادي

واكابلهه واسكت ! ماااتصير لااا والله ماتصير

- استغفر الله استغفر الله

سيد تريد احرك روحي واحرك هالبيت واخلص !!

فهمني شلووون شسوي

جاي اكلك شغغغغل شغللللل وعيني عليهه

شبيييك سيد لا تعلكم ريكي من هالصباح

دخيل جدك ارحمني

ميصير هالشي بالله العظيم ميصير كل واحد يجر من جهه شصيرلكم انه شصير فهمني

شسوي واخلص واعيش مثل هالناس

اريد اناااام مرتاح اريد احط راسي على مخدتي مافكر و اختم بالاذكار واتلفت كل ساعه

اريد اشوف اهلي واكفين على حيلهم

اريد اخذ ملوكه بيدي لمدرستهه

سيد اريد اشيل ثوب السواد الي لابسه هالبيت

ياتعيني وتشور عليه بشي يا تخليني اتصرف

ضل يباوعلي وينفخ هالنفس بعدين عافني ومشى ..

رجعت طبيت للبيت وشفت اخويه عادل

واكف يغسل .. صبحت عليه وكالي ..

- وين جنت هم يم هاذ الاكرع

- خويه جفي الشر تونا صبحنا

- ماجوز منه انته ماعندك قدر لاهلك

لو تحسبلي حساب ماتضل رايح راد عليه

- لا اله الا الله خويه الرجال صاحبي ومن اهل الله لو اشوفه مايستاهل مارافكه

- الاكرع المنغولي يستاهل واخوك الجبير ميستاهل

يجيك يوم وتتندم وترجعلي خايب واتشمت بيك وكتها يالغبي راكضلي وين ماكو زباله شاد بيهم الظهر

عفته وطبيت جوه شفت نسوان اخوتي

بالمطبخ كبل سلمت ومشيت صعدت لغرفتي

ضليت متمدد وصافن بالسكف ..

افكر بهالسالفه وشلون دبارتهه !!؟

نمتلي ساعتين وكعدت على صوت الجهال

يم راسي ..

- ولكم شجابكممم هنا

كمز ابن اخويه عادل يمي على الفراش

وضل يمط بوجهي وانه اجر بي وهو يكهكه

واخوه الثاني يبحوش جوه جربايه

كمت وشلت هذا على ظهري وجريت الثاني ونزلت .. هذوله لو يضلون يهجمون الغرفه ومايخلون عليه غرض ..

نزلنه جوه وجلبو بالتلفون عفته بايدهم

ورحت اشوف ابويه .. لكيته نايم وامي مكابلته وكاعده تسبح ...

اجيت خليت راسي بحضنها وكلتلهه ..

- علويه ما تنشريلي شويه احس روحي مخنوك

حطت ايدهه على عيوني والثانيه على شعري وضلت تنشرلي بهالايات وتمسح بوجهي وصدري وبعدين ضلت بس تثاوب وادمع

وكلتلي كوم ..

رحت غسلت وجهي واجيت كعدت يمهه فركتلهه جتوفهه وهي وصتني امر على بيت اختي اشوف جهالهه شلونهم وما عليه بحجي عادل واضل اواصلهم ..

سيد حسنين هو ابن عمي ورجل اختي المتوفيه ...

اجاني ابن اخويه عادل ( مجتبى )

شايل التلفون ويكلي ..

-عمو هاذ صار اسود

اخذته منه وشفته منطي اعاده ضبط مصنع

ضليت ادك على راسي راح التلفووون ..

ضليت مكابل تلفون وانتظر يكمل وهو كاعد يمي كل شويه اسمطه بكفخه على ركبته

وهو يضحك .. لو اشيله وادكه بالكاع هم يضحك وياي ولا يزعل ولا يخاف ..

فتح تلفون وفارغ مصفر من حركه كلبي جريته عضيته من ايده وطردته

بعدني هسه طلعت من الغرفه ورجع مجلب برجليه ..

اصيح ولك وخر ولك هدني خلي امشي مايفيد

الا شلته وخليته بالهول ورحت صعدت بدلت

وطلعت مريت على بيت السيد ..

فتحلي ابنه ( مؤمل ) عمره ١٢ سنه

من اول ماشفته خبصني خالو نت ضعيف

مافكيت منه الا بالف ياعلي ..

كعدت بالهول والسيد كعد يباوعلي ويدير وجهه ويرجع يباوعلي جان يصيح لابنه

يجيب الغدا ...

كعدنا تغدينا وبعده هسه اذن الظهر احنه وناكل اذن .. رحت غسلت بره ورجعت

للهول صليت و كلتله ..

- هااا مالكيت حل ؟

كعد يمي وكالي ..

- حيدر سالفتهه عوجه واليرحم اهلك لا تكربهه انته مو هيج اعرفك مو يم هالدروب شوداك بس فهمني شودااك الهه

- صدفه والله هيج رحت اشتغل مو كلتلك

وهناك صارت عركه وشفتهه وحجايه منا ومنا عرفتهه

- اي زين شحجيت وياهه

- ماحجينا هواي هي ماتنطي مجال وماقتنعت بسالفتي

-اي

- اي كالت الك ٣ ايام اذا قنعتني افكر بسالفتك ونتفاهم واذا ماتكدر لاتجي بعد

-وتتشرط بنت ، استغفر الله كمل كمل

- هو بس هيج

-فهمني شناوي بالضبط شلون ترتبهه

- اجيبهه هنا شغله سنه بالزايد نكمل شغلتنه

بعون الله وارجعهه

اتفق وياهه على كلشي نسويهه مثل تمثيليه يعني وانطيهه فلوسهه بالاخير وهاي فضت وراحت

- شكد تنطيهه

- مادري بعد ماتفقنا بس هي تضرب بالعالي

-وانته منينلك

- ادبرهه اشتغل ماضل كاعد واجمعهن فلس فلس وانطيهه بس تخلصني

- زين هاي تجيبهه هنا شلون شتكول لاهلك شتسوي

- افكر اكللهم متزوجهه بالسر

- يابويه ياصخام الوجه هاي من اولهه

- مادري يجوز اعدل هالحجايه بس هي هيج

- حيدر شغله تخوف ولك

-اي والله حيل بس هالمره لازم نجازف سيد والله تعلكمت روحنا مامليت انته كلي مامليت

- مليت شلون ممليت

-اي خلي نجازف هي تمثيل اجيبهه هنا بس تنفذ اوامري اخليهه بس عين مفتحه بينهم

وبس تخلص سالفتنه ارجعهه

سيد هيج وحده احسن شي نستغلهه

هاي تنطيهه فلوسهه وتروح بعد متشوفك وجهه سالفتك تروح بروحتهه

غير وحده تشهرنا شهيره

- هي هم صدك بس صعبه صعبببه

- هسه انه اروح وفد يومين امرلهه واشوف شيصير واكلك

- حيدر لايغرنك ويعجبك ذاك الدرب ضل اذكر الله

- سيد عيب هالحجايه مو انه التجرني هيج دروب انه اعرف وين رايح وشرايد اوصل

- انبهك ياخويه هذني مايتأمنن كلشي يسون

- اخوك ذيب لا تخاف

سلمت وطلعت اتمشى لراس الشارع

ركبت بالكيه ونزلت بعدين يم السوك

هناك المحل الاشتغل بي ...

هذا المحل بي ٣ شركاء .. انه واثنين ولد

محل انترنت وحاسبات ..

كلنا نعرف نفس الشغل بس مقسمين كل واحد عليه شغله لان بالجديد تعلمنا ربط الكاميرات

وهم صارت شغلتنه وضلينه نتناوب بالشغل

ضليت لحد ساعه ثمانيه ونص بالليل بالمحل

وبعدين عزلنه .. رجعت للبيت هالمره اتمشى

ماركبت كيه .. اريد افكر براحتي هيج وانه امشي ...

ضليت احسب لهالسالفه من كل زاويه

شلون احجي لاهلي وشلون اجيبهه

شلون اقنعهه .. لحد ماوصلت البيت

باوعتله وكلت ..

' ربي انته العالم بالحال يسرها يارب عسرت علينا هواي '

سميت باسم الله وطبيت البيت .. كعدت ويه اخوتي بالهول  وبعدين رحت تطمنت على اهلي وصعدت لغرفتي

فكرت استخير احسن .. وكعدت استخير بكتاب الامام الصادق .. كتاب صغير للاستخاره عندي هنا مخليه التجىء اله بكلشي

وهالمره كررتها ٣ مرات وبكلها يطلعلي

افعل بصيغ مختلفه  ..

نمت عاد مرتاح البال وختمت هالقرار عندي

على نومتي وحسيت على صوت الباب انطبكت قوي .. فزيت وباوعت ماكو احد هنا

والمبرده مدفوعه لنص الغرفه واصله وهي جانت بالباب عايفهه ع الهوا ..

ضليت اردد لا اله الا الله ومشيت فتحت الباب

مالكيت احد مثل كل مره ...

رجعت لغرفتي طبيت وسديتهه للباب وحتى المبرده طفيتهه وضليت صافن بهالحال المايخلص ...

ماتعدي ليله بلا هالفزه ولا نايم مثل الاوادم

طار النوم من عيني وضليت سهران ع الحاسبه لحد ماطلع الصبح ونزلت لاهلي وانعاد نفس الروتين بس هالمره انتظر اليوم يخلص واحسبه ساعه ساعه ...

من رجعت من المحل مريت على بيت السيد

واخذت سيارته ..عرف بيه رايحلهه وحاول يشيل هالفكره من بالي بس انه صممت عليها

ومادرت بال لحجايته ..

سبحت بالليل وحلقت لحيتي وصعدت لغرفتي احضر الحجي ويه نفسي .. اريد انام ماكدر

بس افكر بساعه مااشوفه واقنعهه وطلعت وره صلاه الفجر لبغداد ...

بالطريق اخذتلي كلاص جاي وبسكت فكيت ريكي بيهن وكضيت الطريق كله اناجي ربي يسهلي الي ماشيله ...

ساعه تسعه الا ربع صرت باب بيتهه 

طفيت السياره ودكيت الباب واجاني صوت الجلب هرج المنطقه بصوته ..

سمعتهه كالت ..

- منو

-  حيدر

-هاا ابو النجف

-اي اي

- دنتظر  يمك عندي شغله بعدين افتحلك

-يلا ماشي

ضليت مرتجي ع السياره وانتظر بيهه

وهي ماكو .. اروح واجي يم السياره

واباوع للساعه و ساعه ضبط يلا فتحتلي الباب ..

شفتهه لابسه بجامه رصاصيه وكل جسمهه مقسم بيهه شي اوضح من شي ...

طبيت وراهه واشوف شعرهه مبلل بعده ينكط

يعني جانت تسبح ...

كعدت ع القنفه وهي هم كعدت وترفع بشعرهه .. كالتلي..

- هااا هم تاخذلك صفنه

- ههه لاا

-لعد دفضني احجي

- اا هو انتي مامصدكه بسالفتي

-اي ممصدكه

- جبتلج هذا تسجيل صوت يفهمج كلشي

طلعت تلفوني القديم  ' دوز ' ضامه من زمان   وفتحته على التسجيل ومديتلها التلفون ..

صارت تسمعه وصافنه ..

من خلص كالتلي ..

- شفتهمت هسه اني ؟

- شوفي هاي اختي جانت مريضه وعلى فراش الموت دزتلي هالبصمه ومن يومها انه حلفت انفذ وصيتها وهي وعتني على الغافل عنه بيتنا ومن وكتها صرت اشوف الاسوء يوميه وانتي تخيلي شكد مكبوت بالبيت حتى اجي اطلبج بهيج سالفه صعبه

رجعت باوعت للشاشه وعرفتها تقرا تاريخ

وشغلت التسجيل مره ثانيه وعلت الصوت كله

رجعت اسمع لوصيه اختي ..

الي مضمونها ...

' ياخويه ياحزام ظهري

يا حيدره اخيتك تنخاك بشدتهه لا تردهه

خويه اهلنا كلهم راح ينامون بفراش المرض مثلي ومايصحون منه

خويه بيتنا بي كلشي نجس احنه بينا عايش شيطان خويه منا وبينا الي ياكل لحمنا ويتلذذ بلوعتنا

احلفك برب العزه ماتجيب طاري هالحجي لاحد ، اختاريتك لان ادري كلبك على اهلك وتكدر تخلصهم خويه اعتمد عليك ناخيتك

لا تغفل عن هالبيت

انه شفت بعيني سحاره مادري جنيه مادري انسيه ،شيطان مادري شنو هويتها بس هي مره خويه شفتها وشافتني وتكابلنه وجه بوجه

وجنت بعدني عفيه وبحيلي ورايحه لبيت اهلي

اداري امي باول وكعتها وسهرانه بالليل ماعيني اخذت نوم وحسيت برجل بره تمشي من باب المطبخ لباب الحمام والبيت اظلم جان

وانه فتحت ضوا التلفون ومن فتحه الباب

ضويت واشوفهه ياخويه '

هنا نكطع التسجيل الثاني على صوت بجيهه

وفتحت التسجيل الثالث ...

' خويه شفتهه وشافتني بهاي عيني ياحيدر شفتهه واكفه يم الدرج

جسمهه جسم مره بس طولها مو طول بشر

طويله حيل وجتافهه عراض وضخام

مامبين منها بس وجه اسود والعيون حمر خويه حمر تجدح من بعيد من شافتني والضوا صار بوجهه اجتي عليه ركض ومن خوفي سديت الباب وقفلته وضليت اصيح لامي تكعد

حاجيتهه كلتلهه يمه هيج شفت ماصدكتني

وحجيت للسيد ماصدكني يكلولي ليل وظلمه تتخايلين بس وحك هالشده الواكعه بيها شفتها بعيني خويه ماتخايلت ومن يومها  ماصحيت بعد من ساعه الشفتها راحت عافيتي ياخويه

وهاي بيتنا موجوده كل مرض اهلنه منهه

خويه اوصيك على بيتنا امانتك بركبتك صار بعد هذول اهلنا مايدرون بالماي من جواهم

ومن احجي مايصدكون بس انته ادريك كلبك على كلب اخيتك وتصدكني اريدك ما تخلي هالشي يضل بيتنا لا يموت الصغير كبل الجبير

حيدر حاطه عليك اهل بيت النبي ياخويه لا تتهاون بهالشي وصيتي الك هالمره طلعهه من البيت لا تهجمه وتموتكم واحد واحد

امانه الله ورسوله هاي ياخويه امانتي الك لا تنساهه امانه الله حاطتها بركبتك ياخويه اهلنا راح يضيعون ومثل شدتي يوكعون بالك عليهم ياحيدر وبالك على روحك منها '

انسد اخر تسجيل وهي شمرتلي تلفون وكالت ..

- انته كلت اختك مريضه وبفراش موت يعني يجوز متوهمه وضاله تهلوس

- لااا اختي ماتهلوس ولا تتوهم هاذي اعرفها ماتجذب هاذي علويه اخيتي ورفعه راسي

حجايتهه عندي سند

- اي عندك سند عندي اني مااتسوه شي وماصدكهه

- حقج متصدكين بس انه هم كتلج وره هالحجي صرت انتبه بالبيت وشفت عجايب

ست ريري ماجذب عليج انه وحك امير المؤمنين مامجذب ولا عندي غايه وياج

جايج من ضيم كلبي الي بينه مايتسولف

- شوف هسه فرضاً كول صدكت سالفتك

وكول قنعتني هي صدك وماعندك غايه وياي

كول صدكت بيك

-اي

- شيجبرني اعوف شغلي وبيتي واجي وياك !؟

يعني هاي حياتي طول وعرض اعوفهه وامشي اصلح حياه اهلك ومادري شلون هم اصلحهه

ليش يعني شنو اليسوووى واعوفله كلشي واروح وياك !؟؟؟؟

ضليت صافن بحجيهه وحاير شجاوبهه

كلتلهه ..

- اعتبريهه صفقه شغل على كل شهر احسبلج مبلغ معين وانتي حددي

- ماعايزه على فلوسك اني عندي الي يغطن طولك

ماعايشه بفكر وانتظر المصباح السحري منك

تغنيني بي

- فهميني شتريدين بالضبط وانه حاضر

- كلتلك ماكو شي يسوى واعوف كلشي واروحله

دتفهم انته هاي حياتي كلهه تريد اعوفه واجي لبيتك

يعني بيتي وشغلي وناسي كلهه اعوفه ليش ؟

شنو اليسوى وهيج اعوف كل ملكي علموده

حقي لو لا !؟

- حقج اي والله  حقج

-اي من تجي وداك صدرك وتكول حاضر

اول شي شوفني اليسوى من سالفتك شنو !

شستفاد اني غير الفلوس !؟

وين المهم بسالفتك واكول اي خوش شغله هاي وخلي اروحلهه

شو بس حجي ومن مره ميته واذا وصيه

الوصيه حملها عليك مو عليه انته حير بنفسك

بس من جايني وتريد احط ايدي بايدك وامشي

كون عندك شي يستاهل ويقنننننع ازيد من هالخريط مالهه

هيج اني شموازيني اروح وياك شكو اليستاهل اجازف ؟

.

.

يتبع 💕

..♣️🩸 ماء مغلي 🩸♣️..

رجعت للمره الثانيه خايب ودايخ بأمري

ومن كثر حيرتي بسؤالها ماطبيت البيت

ولا شفت احد من اهلي ضليت كاعد بالفلكه

اتصفن بالشارع و افكر ..

شنو اليسوى ويستاهل تجازفله وياي هالمره الغريبه ؟؟؟

ساعه اخلي نفسي بمكانها وافكر شحتاج واستغلهه فرصه من هيج شغله ؟

وساعه اكول هي ما محتاجه فلوس شنطيهه واقنعهه تجي بالبدايه ؟؟

كلشي جنت افكر بس مال اعوفهه وامل من المحاوله وياهه ماوصلتلهه ابد .. هاي عندي حرب لازم اربحهه .. لو اربحهه واعيش لو ارضى بموتي هذا ...

صارت ساعه ٢ بالليل وانه اتمشى بفرعنه

ماكدرت اروح لبيتنه بهالوكت مالي خلك هبطات اريد اضل مصحصح ومركز بسالفتي

دكيت على ابن عمي السيد حسنين و هو طلع فتحلي بابه .. كبل تمددت بالاستقبال وضل هو كاعد يمي .. كالي ..

- مخلصهه صفنه بصفنه شجاك شخبلك ماتكلي

- سيد بروح اهلك ماتشور عليه ،تنصحني شي

- بسالفتك العوجه النصح هم اعوج يصير

- استغفر الله هم رجعنه

خويه لاتحجي شي عوفني انام

- شجاريلك ماتكلي شجاريلك مبهذل روحك

- هاااه هاي انته تسألني هالسؤال !؟

چا شخلينه للغربه

- لك حيدر مو كلتلك هااااي دربهه اعووج

خلينه نفكر بعقل خويه هالتجفص مايفيد

- يله وينه العقل خليه كدامه يله

احجيلي بي

جيبلي سالفه منه عدله وتفيدنا احسن من سالفتي مال المخابيل

- لا اله الا الله نام هسه ناام والصبح نتفاهم

- لا صبح ولا عصر انته ماعندك حل ومتريد حلي فخصم الحجي عوفني اتصرف وحدي والك الصافي

- حيدر هي مو بس حجي

الي الصافي شني !

غير وياك بكلشي انه

تتورط اتورط وياك خويه احنه اثنينه مشكلتنه وحده

- مدامهه هيج خليك وياي بخبالي زين خويه

العقل هنا لو يفيدنا جان فادنا من زمان وكعد ويانه يم هذا وذاك تذكر ايام ماجنه نفتر من منطقه لمنطقه على هالعقول

شفادتنه !

عوفنه هيج مخابيل ومعذروين بخبالنه زين خويه

- زين هسه انته دبرتهه لو بعدهه تجر وتعر وياك

- بعدهه

-شتريد ؟

- تريد شي يسوى تجازف اله وهذا حقهه

وكلامهه منطقي

- هم تعرف بالمنطق هاي !

- سيد حجايتهه عدله

المره تجي على شنو ؟ تعب نفسهه وتجازف

وتعوف بيتهه وشغلهه ومنطقتهه وتكعد ويه ناس غربه بنص هيج ضيم

غير فد شي قوي يسوى وتجي عليه !

اذا هي شابعه فلوس شكد ماكللهه انطيج تضحك ومتريد

-ادري شتريد !!! هو شكو غير الفلوس

شتقنعها بيمن ! لا هي التعرفلهه عم ولا خال منا حتى لخاطر من خاطر

ولا هي الترضى بفلوس

شلوون حلهه ؟؟؟

- مادري سيد مااااددررري دايخ بالله العظيم مسطور راسي وماعرفت حلهه وين

- نام هسه ارتاح وربك يفرجها

اذا بيهه صالح تدبر واذا مابيهه صالح من هالسالفه وراح تكطع بعد وتصير سبابه لدفع البلاء

-الله كريم

راح جابلي غطوه ، تغطيت ونمت

وثاني يوم اخذت ريوك ورحت لاهلي تريكت وياهم واشوف امي شلون متعوب حالهه

وابويه ماضال بوجهه قطره دم

تفطر كلبي عليهم

ونخيت جدي علي .. نخيته وانه متيقن نخوتي ماتنرد .. واعرف شوكت ما اصيح

' جدي ياعلي المدد '

يجيبني حتى لو بعد حين ..

طلعت لشغلي والافكار براسي مثل الروج

ماهدت .. لحد ما رجعت للبيت بالليل

وضليت كاعد ويه اخوتي والجهال

بالهول ونباوع تلفزيون اجتي بالي فكره ..

كلت هسه انه ليش مدوخ روحي وافكر بالبعيد ، خلي اشوفهه كلشي وبعينهه هي تحكم وبلكي كلبهه يلين وترضى ..

فتحت تلفوني وبديت تصوير فيديو

وطبيت لغرفه اهلي ..

بدون ماخليهم يدرون فاتح تصوير صرت

احاجيهم واصور ..

وكفت يم ميز المرايه ومثبت الكاميرا على ابويه النايم وذبلانه روحه ..

وامي جانت تشرب دواهه كلتلهه..

- علويه مانسوي ثواب لروح اخوتي هالجمعه

- سوي يمه سوي

- توصين جناينج لو اجيب شوي

- لا يمه اشويلك سمجات وجيبهن مابيه حيل

فلانه وفلانه

- وهم تطلع علينه الاكله مزوهره من ايدهن

-اي جيب انته يمه هم خلف الله عليك تذكرهم باللكمه

من يومك حنين على اهلك

- اخوتي هذوله شلون ماذكرهم يشهد الله مامفاركين بالي

- الله يرحمهم برحمته الواسعه

راحو شباب

بنيتي المثل نبعه الريحان كطفهه الموت

وخله المايسون ترابات الغاطياتهه

- امر الله هذا

واخيتنا ضاله بكلوبنا عايشه

علويه هسه ماردت ارجلعج القهر دخيل الله لا كلشي وبجيتي

- يايمه كطعتين من هالكلب دفنت

شيوكف يابجي عليهم !!

ماكول غير حسبي الله ونعم الوكيل هو عالم وكادر على كل شي

رحت يمهه مسحت دموعهه وبوست راسهه

وكلتلهه ...

- علويه خلي احجيلج فد سالفه بالي ناويلهه

- ان شاء الله خير

- خير باذن الله لو صارت

ناوي اتزوج

امي فرحتهه بهالحجايه ماتكدر تضمهه

كبل جرت راسي وباستني وكالتلي..

- يمه عرس المهنى ان شاء الله يصير عرسك

بس يمه ماريد اكسر فرحتك

- ادري ادري مو وكتهه

- اي يعني لاكيلك بنيه يمه كلي

-اي بالي وحده

- منين اهلهه ؟

- بعدين احجيلج عليهه هسه بس ردت اخذ رأيج بزواجي شتكولين ابدا ارتب اموري

حتى منا لوكت ماتطلع دوره السنه للمرحوم

اتزوج

- يمه والبيت شلون ؟ اخاف هم تصير مذابح وكلوبنه خلصانه

- يعني ماترديني اتزوج هنا يمكم

- والله ياساعه المباركه واشوفك انته وعويلك بينا بس اريد راحتك يمه

من هسه دبر امرك واعزل اخذلك مشتمل ايجار وراتبك زين يكفيك وهم نعينك من التقاعد واكعد واستقر بيتك وحيدك

- شلون اعوفكم واطلع ! لا بالله ماطلع الا وانتو وياي

- مانكدر بدون ابيتنا هذا وعينه على هالجهال

انتو هم عرسان واكعدو براحتكم يمه هسه احنه مانطير

- لا علويه انه المره اريدهه تضل يمج اداريج واداري الحجي ماطلع واعوفكم

راح ابدا ارتب اموري واجهز غرفتي وهنا اتزوج

-يمه والمشاااكل مو جزينا منهه

- مرتي عاقله وام بيت معدله مو مثل هالنسوان هجامات البيوت

- صدك ! لو لانهه مطبعه بالك تمدحلها

- هههههه وحك عينج يمه

المره الي اختاريتها مامثلهه مره

-شبيهه مختلف

- كلبهه طيب هو احنه شنريد غير هالشي

-اي والله صدكت

غير طيبه الكلب مانحتاج بالبني ادم

الله ييسرلك هالزواج يابني ويرزقك بالمال والعيال وراحه البال

- بدعواتج علويه

بوست ايدهه وطلعت وانه بعدني فاتح التصوير .. حولته سيلفي وصعدت لغرفتي

من طبيت وشغلت الضوا .. صرت اصور الغرفه وكلت ..

- هاااي غرفتي

شوفي انسان بسيط على كد حالي مالي عزوه بهالدنيا غير اهلي

تمددت بفراشي وضليت مخلي الكاميرا سيلفي واحجي ..

- صارلي من ساعه الطلعت من بيتج افكر بسؤالج ودخت بي

ماعندي امور فخمه بحياتي واغريج بيهه

انه رجال بسيط هاي يسموني حيدر ابو النت

وهم البرج مو مالتي شريك بمحل

انه ادري مايهمج هالحجي كله بس حرت

بيمن اقنعج

كلت خلي اشوفج حياتي اشوفج اهلي

هذوله ابويه وامي شفتيهم

ابويه مريض مقعد وامي هم حالهه تعبان

ماتمشي الا تتوجى واسمعهه تون من ظهرهه

ساعه ماتندار وكلشي بفحوصاتهم نظيف

مابيهم اي عله بس حالهم منتهي

هسه صح شفتيهم بس مو مثل ماهنا وياهم

وتشوفين علتهم من صدك

اكو شغلات ماكدر اسولفهه هيج يرادلهه شوفه عين

ست ريري ماعندي غير اهلي يسوون تجازفيلهم مثل ما جازفت واجيتج

هاي انه كل مااملك همه و شاركتج بيهم

سديت التصوير وشويه ارتاحيت من حجيت هالشي و ضليت شويه صافن شسوي بعد

وكلت اروح لبيت السيد هم اصورلهه

ونزلت بسرعه طلعت من البيت ورحتلهم

طبيت سلمت شربت جاي وكلتله ..

- سيد سويلي طريق اريد اشوف ملوكه

راح وره شويه صاحني .. طبيت لغرفتهه

وكعدت يم راسهه .. شاقيتهه شويه وضليت احاجيهه وانتظرت السيد طلع وفتحت تلفوني

صورت وياهه فيديو وسديته بسرعه

بقيت اتعلل يمهم وكبل ماطلع كلتله ..

- سيد اريد السياره بلا زحمه

- هااا رايحلهه

- ماصبر بعد اريد اخصمهه

- شفكرت ؟

- رتبت خوش حجي اروح احجيلهه ونشوف

-حيدر هاي اخر مره ترجع لهالمكان

- ان شاء الله الاخيره

اخذت السياره وطبكتهه باب بيتنه ورحت نمت .. ومن الصبح بس تريكت ويه الاهل

طلعت لبغداد ...

هنا من اطب هالمنطقه يستلموني تحقيق كل خطوتين .. منين جاي و ين رايح .. المن تريد ! وواحد يضل يتفحص بالسياره خاف مخلي كاميرات ومن اكللهم لبيت ست ريري

يروحون وهم امشي شويه ويجوني غيرهم وارجع لنفس الحجي لحد مااوصل بيتهه ..

طبكت بابهه ونزلت ادك الباب وكالعاده يرحب بيه جلب البيت ويهرج الدنيا بصوته

فتحتلي هالمره وهي وجهه احمر وعركانه

وخاوليهه بايدهه ..

ابتسمت بوجهه وحكيت راسي وهي كالتلي..

- هم انته !

لك بابه روح شجلبت

- نتفاهم هسه انتي مو كلتي كلشي بالعقل

هاي جيتج نتفاهم مثل ماتريدين

- ياتفاهم شبيك انته !!

اكوله روووح بابه ماورط نفسي وياك لو تصبني ذهب هسه مالي خلكك روح احسن مالم عليك المنطقه واخليهم يطلعوك سحل منا

- بس اصبري شبيج

هسه هنه حجايتين

- لك دروح شجلبت مافيدك لزكت خماك لزكت ولي منا بزعتني

- هسه مو جاي احاجيج باحترام

- دنعل ساس الخلفك امشششييي وووولي يلاا روح منا

سدت الباب وطبت ..

ضليت اصبر بنفسي عليهه وصرت اروح وارجع يم بابهه .. ورجعت النوب دكيت الباب وما طلعت .. ضليت بالساعتين انه اروح وارجع ادك بالباب وما تفتح ...

تالي ضليت كاعد بالسياره وصافن على الباب

وافكر شسوي ؟شسوي؟

شفتهه فتحت الباب وطلعت متكشخه على اخر حبه ... وشايله بايدهه الجنطه والمفاتيح

نزلت ورحت يمهه .. كلتلهه..

- بس اسمعيني دقيقتين والله مااخرج

- لك شلحيييت يالكائنات شبييييك شكو بعد شكووو شتريد فضني احجي شكووو

- بس شوفي هالفيديو كلشي بي مااحجيلج شي انتي شوفي واحكمي

فتحت الفيديو وانطيتهه تلفون كالتلي ..

- ماسمع زين هيج

- ماجايب سماعاتي والله

- دتعال خلي اشوف تاليهه وين وياك

رجعت فتحت الباب وطبينه للبيت

كعدت وضلت تباوع للفيديو وانه ساكت بس اباوعلهه ..

خلص الفيديو وكلتلهه ..

- افتحي الثاني هم شوفي

فتحته وشويه وغيرت كعدتهه ..

استرخت وخلت ايدهه وره راسهه وضلت تتمعن بالفيديو الي بي ملوكه ..

كالتلي ...

- هاي ليش هيج مشدشديهه بهالاحمر

- هاي من رايه ابو الفضل العباس

مخليهه للحفظ يعني ابوهه شادهه على راسهه

-هااا وشبيهه هاي ؟

- مريضه ماتمشي وحجي هواي بعد اذا تريدين تسمعيه احجيلج

- هاي بنت من ؟

- بنت اختي الميته هاي اسمهه ملاك

عمرهه ٨ سنين

جانت بيدهه بعدهه المفاتيح شمرتهن على القنفه وكامت وبيدهه التلفون ..

راحت للمطبخ تشرب مي وتباوع بالتلفون

وراحت لغرفتهه وهم بايدهه تلفوني

وانه ضال كاعد وساكت بس اباوعلهه ..

وره شويه اجتي كعدت وكالتلي ..

- شكد راتبك

- ٦ اوراق بالشهر احصلهه من النت واي شغله اسويهه بايدي الي ربحهه اذا تصليح حاسبه او كاميرات

- هم تنصب كاميرات !

- اي والله شغله سهله وتعلمنالهه

ضلت حاطه رجل على رجل وتهز بيهه

وصافنه .. ضليت انه ساكت انتظر ردهه

وهي وره وين يلا كالتلي ...

- اهلك شسالفتهم بالضبط

- يعني رضيتي !

- تكدر تكول اقتنعت شويه

-هم نعمه

- لا صدك احجيلي شسالفتهم ؟

- شوفي هاي قبل ثمن سنين راح احجيلج الصار ويانه

- اي سولف

- جان بيتنا هادي وما بي شي

بيت ساده ناس اطب وتطلع علينه ومايفرغ بيتنا من الخطار

جان عدنا مضيف اكبر من بيتج هذا

خاص بس للخطار

ابويه رجال فقير من اهل الله صايم ومصلي

بعمره ما مسموع منه كلمه تغث

غير ذكر الله ابد ماينسمع من لسانه

وامي هم علويه والمنطقه كلهه تحبهه وتشورهه وهي اللكمه الي بحلكهه تشيلهه وتنطيهه لليدك الباب

احنه جنا اربع ولد واثنين بنات

انه اصغر واحد بيهم

اخواني كلهم مزوجين

خواتي هم تزوجن ولد عمنه وحده كاعده بالكوفه ووحده يمنه بنفس المنطقه اخذهه ابن عمي اللح وتوفت

ارجعلج على اخوتي

الجبير منهم اسمه هادي متزوج وعنده بنتين و ولد .. هذا اخويه توفى هو ومرته

- شلون توفو؟

- هو منا بدت السالفه

اخويه جان عسكري نقيب

وره ماترقى باسبوع صار عنده مثل صرع

ينشمر هيج على غفله وناخذه لدكاتره يعالجونه باغلى الادويه ويصير زين

بس كم يوم ويرجع ينشمر

وجان مياكل اي شي ولا حتى تمرايه يكدر يبلعهه بس مي عايش على المي والمغذيات

مرته هم صارت بيهه نفس هالنوبات بس هاي شنو تشوف يمهه بزازين وتتخبل تضل تصرخ وتملخ بروحهه

جانت تكول كل بزون يمهه تجي بطول الباب

و ضلت منين ماتتلفت تشوف شغلات عجيبه

وتصرخ

اخذناهه لبيت اهلهه بلكت نفسيتهه ترتاح

وهناك هم نفس الشي مخبله اهلهه وياهه

وتصيح رجعوني لهادي

وجبناهه يم رجلهه الي جان بس عيون مفتوحه حتى حجي ميحجي مانحس عليه الا ساعه الساعه جسمه يغتض وينشمر

وهي ضاله مكابلته وتبجي

امي وابويه ليل نهار فاتحين هالقران بالبيت

ويندعولهم ومرت اخويه تتخبل من تسمعه

تصير زركه وتضل ادك على راسهه وتهلس بشعرهه وخواتي جانن يلزمنهه يجتفنهه اتجتف وهي تنفض بجسمهه وتصرخ

عرفناهه ملبوسه جن وامي جانت كلشي تعرف واكثر من النعرفه بس ماتحجي

صار ابويه يرقيلها على مي يشربهه

ينومهه يمه ويحجي وياهه بالهداوه والعقل

وهي فصلت فد مره

ضلينه حتى قران مانفتح نخاف عليهه

امي تبخر البيت تبخرهه تلبسهه حجاب

مافاد كلشي مافاد لا زيارات ولا رقيه

ولدهم دزيناهم لخوالهم حتى لا يشوفون حالهم

لان حتى اخويه الي جان من شهور ساكت

وبس نوبات الصرع تخلينه نحس عليه

صار يصرخ مثلهه

الفجريه يصرخ ويريد يكوم من فراشه ومابيه حيل

انه واخوتي نلزمه نصلي على النبي نذكره بالله وهو مايسمع منا شي بس يأشر هنا وهنا

لحد ما بوحده من الليالي انشمر شمره موت

بحيث جسمه نصين انقسم وهو يضرب بنفسه بالكاع

جانت ايدي ترجف وانه احاول اسيطر على دموعي من اذكر اخويه وحالته وشلون جنت كاعد واشوفه يموت كدامي ..

اخذت نفس قوي وكملت حجيي ..

- دفناه بعد صراع عشر شهور ويه هالمرض

وضلت مرته ماتدري بالدنيا شبيهه مابيهه

بناتهه يجن بحضنهه يبجن ويكللهه ابونا مات

وهي بس صافنه وفاتحه حلكهه جانت امي ملبستهه شلون صدريه الطفل هاي مال الاكل

مثلهه هيج وحده مخيطتلهه وملبستهه بركبتهه

لان على طول لعابهه يسيل وحلكهه ماينطبك

ابد وشعرهه كله واكع حتى حواجبهه رموشهه واكعات ووجهه اختفى بياضه

لونه اسود على زراك

جانت امهه وياهه كاعده الليل والنهار تبخرلهه وتسبحهه بماي مرقى وتنذر لاشراف النبي بس ترجع عافيتهه

و امي رغم هي جانت ترقي للنسوان صارت ادز على غيرهه بلكت تشوف علتهه وين وتعالجهه واشكاااال العلاج والبخورات والاحجبه و رايات الائمه والنذوره

ماخلو شي ماسووه وهي نفس الحااال

وصلت بيهه مرحله تعض بجسمهه

تلزم ايدهه وتعض بيهه الا ادميهه يلا تكعد تضحك وامهه تجر بيهه وتصيح علينه نعاونهه بس ماينكدرلهه جانت سنونها كلهه تغرزهه بنص لحمهه

هاي اذا بالليل غفلو عنهه شويه ونامو من تنام

هي تفز وتضل تعض برجلهه باصابع ايدهه

والي تحس عليهه تتلاحكلهه

صرنا نربطهه ايدهه ورجلهه كل وحدهه من جهه كامت تعض بلسانهه ويضل الدم يكت من حلكهه

صرنا حتى حلكهه هم نخلي بي وصله ثخينه ونشدهه وتضل هي بس تصرخ وتعض بالوصله ..

امهه نضربت جلطه من وره حالهه

وهي ماطولت وره وفاه اخويه باربع شهور

ماتت وامهه وراهه بسنه هم ماتت

- هذا كله من السحر لو من البيت المسكون لو شنو بالضبط ؟

- مادري بالضبط ياهو منهم السبب بس هذوله جانو اول ضحيه لهالشي

- زين انتو مو بيت ساده ورقيه ومدري شنو

منين تجيكم هالسوالف

يعني شلون بيتكم يصير مسكون !

- مادري والله شلون صارت مادري

احنه بيتنه ما بينا واحد مايصلي ويقرا قران

و كله جان مليان ايات قرانيه على الحياطين

وابويه كل يوم الصبح يرش عتبه الباب بمي ورد مقري عليه الليل كله هو يسهر يقرا قران ويرش عتبات البيت منه الصبح

واهلنه نظيفين بشكل وماناكل من غريب

حتى اغاني بالبيت عمرنا مافاتحين بس شلون صار هالشي مااادري

- شوف منو دك الناقصه وياكم وجابلكم هالشعوذه كلهه

- بالله ماعدنه عداوه ويه احد لا قريب ولا غريب اهلي ناس مسالمين واخوتي كلهم صايمين مصلين جانو حتى اليلاغيهم بالحجي يكلوله روح انته وربك احنه مامعلمين نتطاول باللسان على احد

- تطلع السالفه تطلع يكولك هي كل مااطول تجيف وسالفتكم مدامهه طولت هسه تطلع

- بلكت الله

- ايي وبعد شعندك

- بعد عندي هوااي حجي هواااي لليل مانخلص

- هاا بس كولي منو بعد مات بهيج شي

- اختي ومرت اخويه ثاني

- هم نفس المرض والخبال

- مرت اخويه الثاني اي نفس الشي بس هاي ماطولت ووصلت نفس حد هذيج الاولى

لا هاي جانت هم تتشوف شغلات وتصرخ منهه بس ماطولت اربع شهور وماتت

هي خنكت نفسهه لكوهه مزلغه ركبتهه باظافرهه وطابكه ايدهه اثنينهن على بلاعيمهه ماردتهن مرد

- عليهم الرحمه

شجانت تشوف هم تحجيلكم

- تكول بزازين فوك راسهه يكعدن ويخرمشنهه والبزون جبيره بكبر الباب ضخمه تكعد فوك راسهه وتخلي ذيلهه بوجهه وتخرمش بيهه

- وصدك تلكوهه مخرمشه !

- لا مابيهه شي بس جانت المكان الي تأشر عليه مخرمش يطكع اسود

ويصير عدهه نزف من خشمهه واذانهه

كل يوميه وبس تتقيء وتنكلب سوده ترجعلهه ساعه ساعتين طبيعيه وترد تضرب بنفسهه وتركض من غرفه لغرفه واحنه وراهه نريد نهديها نلزمهه ابويه يضل يعلي صوته بالقران وهي تكوم تتقيء دم على حاله وتتخربط

وهم شكد حرنا بيهه بمستشفيات وائمه واكو ساده من معارفنه صارو همه يجون بس يريديون يطيبون علتهه وماكدرو يغيرون شي

ومالحكولهه موتت نفسهه بنفسهه .

- خطيه

- اييي بعد هاي جزء حجيتلج من الصاير ويه اهلي

اريد هسه اسمع منج

موافقه تعاونيني ونشوف بيتنا شبي ؟

بس تعالي ويايه اكو شغلات ماكدرلهه وحدي احتاج وياي مره مثلج

طكت اصابعهه وباوعتلي ..

- اوافق اذا وافقت بشروطي

- بكلشي تريدي حاضر بس امشي وياي

والله تعبت وانه اتوسل بيج تقنعين

- لعد اسمع الشروط حتى اذا وافقت بيهن من صدك نكمل حجي ونتفق واذا لا بعد لا تشوفني حتى خيالك لان بعد مااستخطيك

واشوفك ريري منو بوكتها وشتسوي .

مفهوم !

- اسمعج احجي شروطج شنو

.

.

.

يتبع

..♣️🩸 ماء مغلي 🩸♣️..

طكطكت اصابعهه وباوعتلي ..

- اوافق اذا وافقت بشروطي

- بكلشي تريدي حاضر بس امشي وياي

والله تعبت وانه اتوسل بيج تقنعين

- لعد اسمع الشروط حتى اذا وافقت بيهن من صدك نكمل حجي ونتفق واذا لا .. بعد لا تشوفني حتى خيالك لان بعد مااستخطيك

واشوفك ريري منو بوكتها وشتسوي .

مفهوم !

- اسمعج احجي شروطج شنو

صارت تلعب بشعرهه وتكول ...

- اولاً .. كل مصرفي عليك شكولك تجيبلي تجيب

- سهله هاي ادللي ماقصر وياج

- ثانياً .. اني ادخن باليوم باكيت فانته تجيبلي كل يوم باكيت جكاير او تجيبلي تكه كيفك بعد

- ماشي اجيبلج

- ثالثاً .. اني شرابه عرك وماكدر بلياه

فتجيبلي كل جمعه كميه تكفيني اسبوع

وبكيفي بعد النوع الي يعجبني كل مره اوصيك نوعيه شكل

-هنااا لااا تعذرينييييي

ماكدر اجيبلج هالمنكر واطببه لبيتنه

- غصبا عليك تجيب هاي شروط بعد ماداخذ رايك تره

- ست ريري هالشي صعب والله احنه نستحرم هالشغلات افهميني

- بابه الحرام عليه مو عليك زين

وبعدين هاي شروطي ترضى بيهه اهلا وسهلا ماترضى كوم روح ممجلبه بيك اني

- استغفر الله

- ايي نكمل رابعاً .. ماتدخل بحياتي وتتأمر

اني اسمع كلامك باليعجبني وحجيك على الشغل الي نسوي اوكي بوكتهه ماناقش بس بغيره ماتخلص من لساني

- ماشي عمي راضين

- خامساً .. ٣ ايام بالشهر شكولك تسويلي بيهن ، وتتحملني بخبالي ، يوم ٤ و يوم ٢٠ ويوم ٢٨

هنا لو اكولك تاخذني للمريخ هم تمشي تاخذني للمريخ وانته ساكت اوووكييي

- ماشي ماشي

- سادساً .. كل شهر تخصصلي يومين ارجع بي هنا واشوف شغلي شبي مابي واذا صارت فد مشكله وردت اجي كبل تجيبني متطلعلي اعذار لان هذا شغلي مثل ماذاك شغلك

اني ماخرب شغلي وحياتي واعمرلك وتالي ارجع هنا كاعده ع الحديده

مثل مااعاونك تعاوني

- ماشي عمي ماشي ماخربلج شغلج ولا ادخل بيج

- سابعاً .. اخذ كانيور جلبي وياي

- لااا هنا صدك لااااا

- ليش لاا لعد وين اعوفه !

- عوفي وين ماجان بس صدكيني ماكدر اخليه بيتنا والله ماترهم ابد اهلنه يتنكسون منهن ماكدر افوت الجلب للبيت

- لك هذا اعز من روحي ماكدر بلياه

- ست  ريري والله ماكدر شفتي كلشي بيني وبينج قبلت بي واسويه الج بس هذا كدام اهلي ماكدر والله وروح اخوتي ماكدر اجيبه للبيت

وبعدين هو بيت مسكون ماتخافين عليه بي ؟

- يبووووووووه روووح لعد ما اجي وياك

- لاااا يالله

- ماكدر هذا روحي ماعوفه

شهور ماشوفه اتخبل غير

- اجيبج كل شهر مو كلتي ايام اطلبين بيهه وايام اجيبج للشغل وشوفي بيهن

- ومنو يدير باله على كانيور ! وين اخليه !

- دبريلج واحد خلي يمه مؤقتا

خلي يم البنات الي عندج

- ههههه هذني يخافن منه يرجفن رجيف

غير يسويهن وصل

- فكري بحل انتي ادرى بناسج

و وعد عليه اجيبج كل شهر تشوفي

- ديلاااا زين

بس شايف اذا ماجبتني اشوفه اعوف كلشي وارجع وحدي وطز بالاتفاق والشغل حتى فلوس ماريد منك بعد

- لاا والله كلمه رجال بعد

اجيبج تشوفيه كل شهر

- زين وباقي الشروط كلهن يتنفذن

- مال الشرب مابيهه مجال بس من تجين هنا

- لااااا تعال بعد انته اكعد اتشرط بدالي

كلشي لا لااا لعد وين الحاضر وادللي

شو من هسه كلبت

- بويه راضين راضين

كل شروطج موافق بيهن

- غصبا عليك توافق لو هم يرادلك عفيه !

باوعتلهه صفح وهي تفر برجلهه ..

اخذت نفس وكلتلهه ..

- زين هسه انه اطلب منج جم شغله

- كول

- اول شي خلي بينا احترام

- انته لتجفص اني ماجفص

- زين بويه زين

ثاني شي .. اريد ادارين ابويه وامي همه هناك محد يداريهم غيري

انه اسويلهم الريوك واسبح  وانطي الادويه

اجيبلهم الاكل وابويه حركته اكثرهه عليه

اخواني قليل يهتمون بيهم والجناين عدنه بس للبيت مايدخلن باهلي فهمتيني

- ايييي بس خلي بالك شغله

- شنو

- اني ماعرف اطبخ

-لا والله ! صدك تحجين !!

- اييي شبيك اخترعت

ماعرف اطبخ عايشه ع المطاعم فيعني لا تكولي اوكفي سوي غدا لابويه وامي لو سويلي عشه تره بيضه ماعرف اسوي

ولا افهم شي بالمطبخ

- هم لازم تتعلمين فد طبخه مايعجبج تاكلين من ايدج

- لا ميعجبني وكت الي اشتهي اكله اروح اكلهه بالمطعم لو اوصيهه شعندي متعبه نفسي

- زين هسه هاي سهله ندبرهه بعدين

-انته تعرف تطبخ ؟

- اي اعرف هو شيرادله طبخ

- اي زين لعد هاهيه دبرت ضل انته اطبخ

- هههه والله جنج راح تلعبيني ع الحبلين

-هه انته متعرف ويامن تورطت

كلشي يجيك من ايدك انته جلبت بيه وهاي اني تتحملني

- راضي بكل شي بس كون نشتغل شغل مرتب بي فايده

- حسب خطتك بعد الي مخططلهه

- اي هاي نتفاهم بيهه من تجين لبيتنه ان شاء الله هسه كليلي شكد المبلغ الي تطلبيه لهالشغل

جرت باكيتهه وصارت ادخن وكلتلي ..

- شلون بالك الحساب يصير شهري لو دفعتين

- مابالي شي انتي قرري

- باوع اني اذا اريد اطلب هسه مبدئيا بالي فد دفترين مقدم

- سالمين بويه شدعوا هيج

- لعد شعبالك !

راح تكعدني من شغلي وعايفتلك حياتي كلهه

تريد تقنعني بمليونين مثلاً!!!

- مو هيج يعني لا كلش بالعالي ولا فد مره قليل خلي حد وسط

- شوف هسه اني ماريد فلوس

لاتنطيني شي هسه

خليهه بالاخير نتحاسب

اذا كدرت على شغلتك بوكتهه شكد ميصيرالحساب تدفع

تضل تجر بظهرك طلقتين بصدرك احطهن وادير وجهي وامشي

اييي لا تصفن بوجهي هيج

هاي عايفتلك حياتي وعايفه كانيور ورايحه مدري شيصير ميصير بيه بيتكم  تالي متالي ماحصل شي يسوه !

اموتك بساعتهه ماتعب نفسي واناقشك

اني وكت الفلوس ابويه ماعرفه

- ماشي بويه ماشي شكد ماتطلبين انطيج

بس كون نخلص شغلتنه كلهه يلا مو ع النص وتبطلين وتردين كل الفلوس

- ماعوف شغلي ناقص لتخاف اني من احط براسي شغله اجيبهه اجيبهه وشغلتك خلي افتهم المطلوب مني عدل واكعد افكرلهه زين

- اي يالله هذا خوش حجي

هسه المطلوب منج بس تحضرين نفسج

شوفي شلون ترتبين شغلج و هذا كانيور دبريله مكان وحضري غراضج هم وانه ارتب اموري هناك واجي عليج اخذج

- شكد يعني وتجي

- بس ارتب الغرفه واكملهه اجيج

ماعرف شكد بالضبط

بس لازم نضل نتواصل يعني رقمج بلازحمه

- انطيك الفيس وراسلني

اني رقمي مانطي

- ماشي براحتج انطيني الفيس

فتحت تلفونهه وطلعتلي حسابهه اخذتله صوره وكلتلهه ..

- هسه ضلت شغله وحده ماتفاهمنه عليهه

- شكوووو بعد !!

- احم

اسمعي .. انه بعمري ما طاخ الحرام

و ماكدر اخذج بيتي واكعد وياج نفس الغرفه

وانتي محرمه عليه

- يعني تريد عقد !

- اي زواج بس سيد

لان انتي حتضلين وياي نايمه وكاعده ومكشفه كدامي ماكدر انه اضل تنحسب عليه حرام شمهما يكون اضل كاشف على ستر مره ونظرتي عليهه حرام وانه وحك علي ما لي شغله بالبنات من يوم يومي اروح واجي بدربي

نسوان اخوتي ما حاط عيني بعينهن

وهنه بحسبه خواتي بس هم مبتعد

فماريد اخر هالعمر اوكعلي بحرام مادري شكد يطول

اخذج وياي بالحلال حتى اتصرف براحتي وياج

- شتصرف براحتك يعني !

تره لا عبالك انطيك شي جايه شغل غير شغلي لتحلم بالنومه وياي

- لاااا وعلي ماقصدت هيج

بويه مااكربج والله بس قصدي يعني احنه حنتصرف مثل مزوجين لابد يصير بينه موقف او لزمه ايد او حتى ضلتنه بنفس الغرفه هاي قصدي والله

- اي زين 

ديلا خلي اشوفك شكد تتحمل على هالحجي

خاف تطلع مثل ذولاك اهل المتعه يحللهه منا ويمارس منا و الضمير مرتاح

- هههههه ااانه وين وانتيي ويييين

بويه انه حاير بهمي وزماني حتى خلك لهالسوالف ماعندي والله

- دنشوف  بعدين شيصير

بس خاف تفكر مثلهم وحلالي ومرتي وهالتمضرط تره ماكووووو

ايدك اذا مديتهه اكسرهه الك مو تشوفني ام دعاره وتستغل مدامني وياك تتونس بيه

تره اسوي عيشتك سم

- شدعواج هيج هسه انه حجيت شي 

جبت طاري هالسالفه

- ماتكولهه بس تفرفر براسك هالسالفه

باوع اني ماستشرف براسك

اني الي يعجبني واشوفه بي خير اخلي ينام ويايه والي ميعجبني انعل سلفه سلفاه بس يحجي ويريد

فمن هسه اكلك انته اكطع نفسك

واذا صار وعجبك تتونس بليلك كولي واجيبلك بلاش من نجي هنا اخذك عليهن واختار حتى لو كل ساعه تبدل وحده كيفك

بس وياي لتفك حلكك

- ههههههه هسه تعاشريني وتعرفيني زين

لا اريد منج ولا من بناتج ومااوصلج والله

انه بالي غير الي بالج

- ديلا زين لعد

بعد عندك شي لو اطلع ؟

- لا هاذ هوه

نضل نتواصل ومن اكمل الغرفه اجيج هنا نعقد ونطلع بنفس اليوم

- زين

بس من هسه اكولك

لبس شغلات منا منا كلهه عليك

اهلك شلون نسوانهم تلبس انته اشتريلي نفسهم اني ما فارغه افتر بالسواكه

شلون تريد امثل انته دبرلهه وكلشي يجيني ع الحاضر اووكييي

- ماشي سهله هاي احضرلج كلشي بالغرفه

- اوكيي يلا لعد خلي نطلع عندي موعد

وكفت وانه اضحك واحمد ربي واشكره

كدرت اقنعهه واتفاهم وياهه

يعني هسه بدا الشغل الصدك ....

رجعت للبيت وانه كلي طاقه وكبل مريت لبيت السيد ..

اول ماشفته حضنته وهو كالي ...

- هااا ولك هاا

- سيد فرجت علينه  فرجت

- خير يارب ...

شلون فرجت !

- اتفقت وياهه بكل شي وراح اجيبهه

- صدك تحجي !

- وروح الاعزاز

- شلون ولك اكعد احجيلي

كعدت حجيتله كلشي بس ماجبت طاري الشروط كلت احفظ ماي وجهي كدامه

على الاقل ...

وهو بالاخير كالي ..

- حيدر بعد اخوك هاي صارت صدك السالفه وجنها تخوف ولك

- مو اكثر من العايشينه سيد

- بس هاي حتكعد بين العلويات ولك شلون نرضاهه !!

- سيد مضطرين وانه اضل وياهه وياهه ماخليهه تسوي شي بدون علمي وهي شعدهه وياهن خما تفضح نفسهه كدامهن وتحجيلهن بالسوالف المكسره !

- لك خويه جاي نمشي اعوج والله ضميري ممرتاح لهالدكه

- كلهن جم شهر وتروح

لازم نسويهه هالسالفه سيد بعد مامنهه مهرب

- حيدر كلشي يصير بينه من وراهه انته المسؤول ولا تكول شعليه بوكتهه

لان انته دكيت رجل وجبتهه

كلشي يطيح براسك

- اااانه اتحملهه بزينها وشينها وخطيتكم بهالركبه كلشي يصير ااانه اتحمله واتصرف بي

- زين

- هسه رايد تفكر وياي شلون افاتح اهلي بالموضوع

- هي هنا المصيبه شتكللهم !! 

- شتكول .. اكللهم اريد اتزوج وحده من بغداد ومستعجل عليهه اخذهه هالشهر

- اييي وياهو الي يجي وياك بالمشيه !

تروح تكابل ياعم يا اب يا خال

- هم صدك ماتنفع هالسالفه

ضليت افكر افكر وتالي كلتله ..

-اصلا جيتهم وياي كلهه ماتنفع لان وين اخذهم بنص البتاويين !

- چا تجيبهه بعباته وتجي !

- شسوي عندك غير حل ؟

- وتخلي اهلك يصفكون بايدهم

ابنهم جايب المره وجاي لا ابو لا عم وياه

زين مايكلولك اهلهه منين وين شلون رضو بهيج زواجه !!!

- خويه اكعد اسفطهه جذب

شنسوي بعد هاذ الحال والوعد

- اويلي عليك ياحيدر هم اول زواجه وهم معلعله

- بس خلي تصير هسه حتى لو اشبع مسبه بس خلي تفكني

- ههههه شوكت ناوي تحاجيهم

- باجر بأذن الله

- اكلك لا تجيب طاريي بالسالفه

حتى لا اخوك يتخبل علينه

كله السيد هم مايدري بشي وقنعه زين

- اي اي

تمددت وضليت صافن افكر شحجي لاهلي

وماحسيت الا عليه مخلي صينيه الاكل يمي

كعدت اكلت وشربت جاي وبعدين طلعت بوجهي للمحل .. كملت شغلي ورجعت هالمره بالعشره للبيت ..

شفت اهلي نايمين وبس الجهال كاعده

صعدت لغرفتي واخذت ملابس نزلت سبحت

وسويتلي اكله خفيفه اكلت وصعدت

تمددت واول شي سويته ..

دزيتلهه طلب صداقه بالفيس ..

وضليت اكلب بمعارض الاثاث ادورلي غرفه اخشاب بسعر زين بس كلهه غاليه ولو زواج يسوه اجيبهن بس مايسوه حرامات هالصرف

سديت تلفون ونمت .. وره وين حسيت على صوت دك وادبج بالسطح ..

ماتعبت نفسي وكمت من مكاني

ادري كلشي ماشوف

ضليت على نومتي بس مفتح عيني وضال

اسمع لهالدبيج فوك ..

ساعه عبالك واحد يركض وساعه عبالك صوت تشمر مال حجار وانه ضال اتاني شوكت يملون ويخلونه نام !!!

وطولت سالفتهم ...

حطيت سماعات بالتلفون وشغلت قرآن وعليت كل الصوت وغمضت .. ضليت اردد ويه الايات لحد مانمت وهو مشتغل بعده ..

ثاني يوم جان جمعه .. رحت تسوكت وشويت اربع سمجات .. اخذت وحده لبيت السيد

و ٣ اخذتهن لبيتنه .. عزلت سمجه الفاهيه لابويه وامي قسمتها بينهم و وصيت من يخلون السفره للغدا يخلون حصه امي يمهه

سبحت ابويه  .. و اخذتهم للهول

وكعدنه تغدينا .. ابويه صينيته يمه على الطبله

واخواني ملتمين همه وعوايلهم ..

انه كاعد يم امي افلسلهه واكل شويه وارجع اندار افلس سمج لابويه ..

كملنه اكل وصار ابويه يقرا الفاتحه واحنه وياه ... هدينا هالثواب لروح اخوتي ونسوان اخوتي اثنينهن وعمتي وللي لم يذكره ذاكر ...

جابولنه الجاي .. ماشربته  وافكر احجي هسه لو بعد ؟

اباوع للساعه ما ضل وكت هم ورايه طلعه للمحل وبالليل مالحك عليهم كلمن بغرفته ..

انتظرت ساعه مرت وره الغدا ودزيت مجتبى يصيح اهله ..

انتظرت اخوتي  كعدو ونسوانهم هم

وطلعت الجهال بره الهول وسديت الباب

وضليت واكف يم التلفزيون .. يكلولي احجي شكو وانه بس احك بكصتي وطفيت تلفزيون

وسويت تلفوني صامت وضليت اخذ نفس

بعدين كلتلهم ...

- اريد احجيلكم سالفه بس بروح الاعزاز

لا تزعلون مني بالاخص انتي علويه دخيل الله تفهميني ولا كبل تزعلين وتبجين

ضلت امي مخليه ايدهه على حلكهه وتباوع لابويه وابويه كال ..

- مسويلك فاينه ولك

- صارت بعد حجي

- بس لا متورط بحرام

- لاا اعوذ بالله

حجي انه

احم احم

رفعت عيني بوجهم ومخلي ايدي بجيب البجامه وكلتلهم ...

- انه متزوج

اباوع بالوجوه كلهه فاكه عينهه وساكته

ضحكت بوجههم واخويه عادل كال ..

- صدك تحجي !

- اييي صدك مامجذب عليكم

- ماصدكك والله

ابد مو شكول واحد متزوج انته

- كيفك خويه انه عليه كلتلك متزوج

وهسه فاتحتكم بالموضوع لان اريد اجيبهه هنا

اخواني عدلو كعدتهم وابويه كال ..

- ولك شو مستخف انته

ياازواج هذا حيدر يازززواج المتزوجه ورانه

- حجي صارت بعد جنت مستعجل و خفت اخسرهه فتزوجتهه بسرعه

- واحنه هنا مخلينه مضحكه !

ماتحسبلنه حساب

بكيفك هي تتزوج وتجيبهه بيتنا شمعرفنه اصلهه من فصلهه وجايبهه بينه !!

هيج انته ماتحترم ابوك وتشوره !!!

- لا حجي انته على هالراس والله بس انجبرت اتزوج هيج

- مو حجي هذاااااا مو حجيييي

انجبرت شنو. انجبررت لك رجال انته رجال شطولك شنو تنجبر تتزوج

- حجي بس خلي افهمك الصار وياي

- لااااتفهمني ولا اريد اسمع منك كلمه النوب

ولد اليضم عن اهله وهو كاعد عينك عينك بينهم ماااحترمه ولااا اريد اشوف وجهه

- لاا يالله

بويه دخيل جدك اسمعني بس اسمعني

ربات ايدك انه بويه ماغلطت والله بس هالزواج صار باستعجال

ضل داير وجهه عني وانه كاعد يم رجليه

واحاجيه وهو ساكت ..

امي كضت  جتفي وكلتلي ..

- هذاك اليوم ماكلتلي متزوج ليش كلت تريد تتزوج

- جنت اجس نبضج علويه اعذريني

والله اعرف سالفتي عوجه بس اعذروني

نجبرت اتزوجهه بسرعه وجان الوكت مو خوش وكت بيتنه مو مال افاتحكم بموضوع زواج

- وتروح تتزوج وتعرس وحدك وتااالي تذكر تحجيلنه ! ليش يمه ليش مو جان حلم بعمري احضر عرسك واباركلك واشوفك عريس

كعدت يم امي وبوست راسهه وايدهه وكلتلهه

- اعذريني علويه بالله العظيم نجبرت جان الوضع مو مال زواج بيتنا وماكدر بس اعوفهه اخسرهه وهالبنيه انه رايدهه

يعني لو مامتزوجهه بوكتهه ورايحه من ايدي اتخبل ماضل صاحي

واطك واموت بقهري وحسرتي عليهه

ضلت امي تبجي ودايره وجهه عني

جريت راسهه حضنتهه وضليت بس اتعذر منهه .. سمعت صوت اخويه عزيز الي نادراً مايحجي ويانه .. كالي ..

- هسه احجيلنه بالمهم

منين هاي المره شلون عرفتهه شوكت تزوجت

- هاي من بغداد

- هاا شوداك لهناك

- بعد قسمتي يمهه

عرفتهه كبل كم سنه وردتهه ورادتني

هي بنيه طيبه وحلوه واخلاق

بس يتيمه عايشه ويه خوالهه وجانو عمامهه يردوهه لواحد من ولدهم وتحجيلي تكلي لازم نخطب عمامي كل يوم داكين الباب وانه اصبر بيهه بس هالشهر وبس هالشهرين

جانت بعدهه دوره السنه لاخيتنا بعدهه مطالعه والبيت بعده مكلوب بالحزن ماكدرت

اجيب طاري زواج وانه هم نفسيتي بوكتهه مو لهيج شي عاد رحت لاهلهه حاجيتهم

وانه اعرف خوالهه معرفه شخصيه يعني

وخطبتهه منهم بس قرايه فاتحه

ومن سمعو عمامهه دك مشاكل صارت

ضليت وياهه وياهه لحد ما كبل خمس شهور

صارت عركه جبيره عدهم وخوالهه هم تعبو مني كالو ياتتزوحهه هالاسبوع يا تروح بعد مالك عدنا مره

انجبرت اتزوجهه بسرعه حتى ماعقدت محكمه بعدني

ابويه كال ...

-من رحت وخطبت وتزوجت اهلهه ماسالوك وين اهلك !

شلون انطوك مره وما وياك مشيه !!

- جنت مفهمهم على وضعنا وهمه يعرفوني الولد اصدقائي وعذروني

وهمه اصلا بينهم وبين عمامهه مشاكل يعني ماصدكو يخلصون منهم

- وانته شجابك شوادك على هيج ناس

اذا بينهم ما متصافين شلون تريدهم يتصافون ويانه !!!

شعبالك الزواج بس انته وهي !؟

مو عشيره بطن عشيره صارت شدراك ما هم يتمالخون فد يوم ويانه !!

شنكول ساعتهه ولك منين هذول طلعو!؟

- حجي كول يااالله كول ياالله

كبل اخذتنه على العشاير والمشاكل

ناس زينين واعرفهم احسن معرفه

هسه تشوف المره وتصدك بحجيي

- لاااا تجيبهه يمي اخذهه وامشي

ماراضي بزواجك ولا اباركله

- حجي دخيل جدك لا هيج وياي

انه بدون شي متمرمر لا تزيدهه عليه

بروح الاعزاز بويه افهمني

- ماافهمك ولا اباركلك

دامك ماحسبتلي حساب وحتى بينه ماجبت طاريهه وماكلت بويه هالشكل مشكلتي

شور عليه ! هالبنيه رايدهه انه وراح تروح من ايدي

ماامشي وياك واخطبهه الك واوكفلك بالوجه بينهم !! بس انته تمشي بشور راسك

وشيصير خل يصير

- حكك عليه بويه والله ادري غلطان

بس وكتها جنت منا وضع البيت والمصايب

ومنا مشاكلهم و هي خايفه لا اعوفها

و انه كلبي محترك وخايف لا يدكون الناقصه عمامهه وينهون عليهه عاد استعجلت واخذتهه

وهسه اهلهه يردون يسافرون وانه ماريدهه تروح وياهم وصار لازم اجيبهه واعيش وياهه مثل الاوادم

اخويه عادل كال ..

- هم طلعت نجر وبيك البله

تتمعشك وتتزوج ولا يبين عليك

ضحكت بوجهه ورجع كالي ..

- هذاك الاكرع هم يدري بيك مو اكيد اخذته وياك

- لااا مايدري ماكايل لاحد

هاي اول مره اجيب هالطاري

بس عندي صديق هو ومرته وكفولي بوكتهه

- ماكلتلي واوكفلك مو اخوك انه لو ماعجبك

-لا خويه على هالراس بس فهمتكم الصار

ولو حاجي جان السالفه طولت وجان كل واحد حاير بهمه

- زين هاي تروحلهه بيت اهلهه لو عندك بيت

- لا بيت اهلهه ماشوفه غير كل اسبوعين مره

- والله عمي زين راضين عليك

شلووون اهل هذووول مادري

- ناس يعرفوني كلش زين ومأمنين بيه

ضلو ساكتين كلهم .. واخر شي اخويه عزيز

كال ..

- ولو متأخر بس بالمبارك عليك خويه

الله يهنيكم جيبهه بعد زحمه كعدتهه هناك

وخلف الله عليهم صبرو عليك كل هالوكت

- تسلم خويه الله يبارك بيك

بعد خلي اسمع الاهل شيكولون

باوعت لابويه وهو ينفخ بالنفس وعصبي

جان يكول ..

- ياااحيف ذاك الزمان راح

ياحييف والله حيلي راح وصرت لا اخوف ولا انهاب

- حجي كول يالله

انته الخير والبركه وانه من ايدك هاي لايدك هاي شتطلب وشتأمر حاضر بس ارضى عليه لخاطر الله حجي لا تصعبهه عليه والله شبعت مشاكل وضيم وحركان كلب يلا صارت

ضل داير وجهه عني وانه رحت بوست راسه دفعني كلتله ..

- بويه ماتريدني اتهنى ماتريد راحتي !

يهون عليك ابنك يضل متبهذل بزواجه وراحته بايدك !

باوعلي ورجعت دنكت بوست جتفه وكلتله..

- بويه سهلهه دخيل جدك والله تبهذلت

هواي خلي استقر عاد وارتب حياتي

والله بس تشوفهه تعذرني ليش ركضت ركض واخذتهه

- هي يتيمه من صدك لو تضحك علينه ولك

-للاا يتيمه يتيمه اهلهه راحو بانفجار

خطيه وتكفلوهه خوالهه مارهمت بعيشتهه  ويه عمامهه هذولاك ناس غاوين مشاكل

ويوم يطردوهه ويوم يردوهه 

- هااا

- اي حجي هسه شنو بعدك زعلان مني

ضل يباوعلي ويرجع يباوع لامي ..

كلتلهه ..

- علويه ماتحجيلج شي

ماتوكفين وياي ! هم ما تردين مرتي ؟

- لا يمه لا ماكسر بخاطرك

هي بعد ان رضينه ولا مارضينه انحسبت علينه مره

- علويه لا تزعلين مني بروح ابوج

اريدج تفرحيلي وانه بعدني ماعقدت محكمه

هسه اعقد هنا وتشوفيني عريس وهم بايدج تحضرين جهاز غرفتي

كعدت يمهه واحاجيهه ..

- والله انتي بايدج تجهزين كلشي واعتبري بعدني خاطب

وشني الي بنفسج ومفكرتله لعرسي سوي

حتى صبغ الغرفه بذوقج بس لا تضلين مقهوره مني والله والله ماتحمل زعلج وقهرج مني

بوست راسهه وهي كضت  ايدي كالتلي ..

- بالمبارك عليك يمه عساهه تصلح وياك

وتبيض وجهك دنيا واخره

- بدعواتج ياعلويه مايصيرلي شي بدون دعواتج الطيبه

- شسمهه مرتك الماكو منهه

-هههه اسمهه

اسمهه

شسمهه ؟؟ انصدمت بهالسؤال ويه نفسي

شسم ريري الحقيقي ؟

كلتلهه ..

- انه اسميهه ريري بس هي اسمهه

روان

- ههههه والله عليك سوالف

ريري شني هاي ريري !

- سهل بلساني ومشت عليهه بعد

- ماتشوفني صور عرسكم

- هاا مو انمسحن

غير حفيدج المشيطن هذا فرمت التلفون

هذاك اليوم وكلشي راح

هسه بعدين اكللهه ادزلي واشوفج

- انتظر اشوف شلون جان عرررسك

- بسيط علويه بسيط بس بين اهلهه

- اريد اشوفهه شلونهه هاي الركضتك هيج

- هسه   اخابرلج اياهه كاميرا لو تريدن بس صوره تشوفيهه

- لااا اشوفهه صوره وصوت

- صااار ادللي بس ارجع من المحل اخابرهه وشوفيهه براحتج اشبعي حجي وياهه

هي لسانهه ينكط عسل وتحبج خابصهه بالحجي عليج وحبتج على محبتي

ضلت امي تضحك وانه اسفط حجي

وابويه يسوي نفسه ممهتم لحجيي بس هو ادري بي مركز وياي ..

وضليت اقنع بيهم واسفط جذب واجاوب كلشي يسألوني عنها وبعدين تحججت بالشغل وعفتهم وطلعت للمحل  .. وهناك راسلتهه

كتبتلهه ..

- شلونج ست ريري

اليوم حجيت لاهلي على موضوع زواجنه

وتفاهمت وياهم بس امي رادت تشوفج

اذا عندج مجال بالليل ساعه تسعه اخابرج وافهمج الي حجيته الهم وهم حتى تحجين ويه امي

انتظر ردج

ماطولت شويه وردتلي ' اوكي ' ..

اخذت نفس وبديت اشتغل .. هسه صار كلشي بالعلن لازم انتبه واركز بكل حجايه ..

جذبت هواي اليوم ومتعجب من نفسي شلون سفطت كل هالحجي ورتبته هيج ..

بس الحمدلله مشت السالفه وخلصت من اكبر عرقله بطريقي وقنعتهم ....

صار لازم ابدا ارتب غرفتي ..

ومحتاج فلوس !!! شلوون بيه ؟؟؟

خلصت شغل من وكت وترخصت من الولد ورجعت للبيت ساعه تسعه الا ربع ..

وكفت بالشارع وخابرتهه ع الفيس ..

ماجاوبت ..

ضليت ادزلهه رسايل اكتبلهه انتظرج

وصارت ساعه تسعه ضبط هي خابرت ..

جنت متوتر ماحاجي ويه بنات كبل بالاخص هيج تلفون وسريات .. كلتلهه..

- شلونج ست ريري

- هلااا

- احم ااا

هو كلتلج حجيت ويه اهلي اليوم

-اي شسفطت من جذب

- كلتلهم متزوجج من خمس شهور على اساس وانتي يتيمه وعايشه يم خوالج

ولان صارت مشاكل ويه عمامج استعجلنه بالزواج وانه هاويج و على اساس بيني وبين خوالج صداقه وهيج دبرت ماشي

حفظتي هالحجي

-اييي بعد شجذبت

- هو بس هيج

ها سالوني على اسمج كلتلهم روان ماعرفت شسميج صراحه ماعرف اسمج غير ريري

- ايي اجتي عدله

-ها يعني اسمج روان؟

-اي اي هو ياهو اليسمع ريري يسميه روان

عادي ضبطت وياك لتخاف

- اي زين بس يعني مو اسمج الحقيقي !

- هسه كلتلك ضبطت شكو تلح

- يلا يلا زين

-اي كمل بعد شنو

- هسه راح اطب للبيت واخابرج امي تريد تفتح وياج كاميرا

حضري نفسج واذا سالتج على اهلج شلون ماتو كولي بانفجار وخوالج نايمين طالعين اي شي رتبيهه بعد انتي

- زين ديلاا استعجل ورايه سهره

جانت هالكلمه مثل موس حاد وشك بلعومي

المره الي راح اخليهه على ذمتي هي من رجال لرجال تتنقل !!

طبيت البيت ورحت لامي سلمت عليهه

وباوعت لابويه هو كاعد بس داير ظهره عليه

عفته براحته حقه يزعل مني ..

رجعت اتصلت بيهه و فتحت الكاميرا وعليت الصوت ..شفتهه كاعده بغرفتهه وفاتحه شعرهه .. همزين ممخليه مكياج وملابسه دلع

بس حلوه .. وجهه متفح يجذب العين ..

كلتلهه ..

- ريري هاي امي العلويه تحاجيج

خليت تلفون بايد امي الي جانت بس تبتسم

و هي صارت تكللهه ..

- هلو عمه شلونج شلون صحتج

- هله يمه هله الحمدلله بخير

- شلونه عمو

- عمج زين الحمدلله

- شكد جنت منتظره هاليوم اشوفج واحاجيج

كولش احبج عمه لو تدرين شكد حيدر يحجيلي عليج

كل ماخابره لااازم اسأله عليج ويحجيلي خطيه كولش يحبج

- اي هذا ابني الحنين كلبه على كلب امه

- حيل يحبج خطيه وبكلشي يذكرج

امي تباوعلي وتضحك وانه بس ارفع بشعري وابتسم ... صارت امي تكللهه ..

- خوش صيده لاكيله ابني حقه يتخبل ويخاف عليج

- هههههههههه

- شوكت نشوفج بينا ونسويلكم عرس الزين ونفرح بيكم

- لا عمه مايحتاج عرس وهوسه هاي بس تباركولنه كافي اهم شي نكعد بينكم

- لاااا شلون غير هذا عرس الغالي هم يسألونه عمامه وخواله شلون تزوج وليش ماعزمنا والكال والكلت يايمه ماتخلص

- وداعتج عمه كولشي ماريد اني بس اضل ويه رجلي كووولشي ماريد بعد

هو عندي يسوى الدنيا ومابيهه

- يمه الله يخليه الج ويديم محبتكم وراحتكم

- اي عفيه عمه ادعيلنه فدوه لحجياتج شلون حلوه ماينشبع منهه

- شلون مادعيلكم غير هالحيدر لبه كلبي

وبعد صارت عدنه مريته هم بنيتنه صرتي

واضل ادعيلكم كل فجر ومسيه

- فدوه لكلبج عمه كون يمج هسه واشبع بسوالفج الحلوه واكابل هالوجه النوراني

لو امي موجوده جان هم هيج بعمرج وهيئتج هاي كولش اشوفهه بيج واتحسر عليهه

- الله يرحمهه برحمته الواسعه

بعد انه بحسبه امج شتحتاجين كليلي وانه وياج بكلشي لا تكولين عمتي وماتحبني تره انه احب خلك الله كلهم وماكرهن احد بس كود ما يعيل وياي ويطعن بظهري ذاك الوكت حوبتي ماتتعداه

- علويه بعد تشورين هههههه احبج عمه وادري بيج تحبيني على محبه حيدر ولو تدرين شكد متشوقه اشوفج

اريد ارجع احس عندي ام

- ماضل شي ان شاء الله كلهن جم يوم وانحضر غرفتج وجهازج واسويلكم ذاك الغدا الزين بايدي انه اوكف اطبخلكم

- فدوه لكلبج ياعيوني انتي لاتعبين نفسج عمه وداعتج كولشي ماريد وحيدر يعرفني نفسي طيبه ومااطلب هواي شتحطيلي اقنع بي

ومايهمني غير راحتكم لتعبين نفسج امانه عليج

- لاه يمه تعب الي لوليدي راحه انتي هسه ديربالج على روحج وسلميلنه على اهلج

وهم شوكت مايصيرلكم مجال خابرونه

- ايي عمه بعيني ادللي

- يلا حبيبه هذا حيدر وياج

- سلميلي على عمو هواي هواي وديربالج على نفسج عمه حبيبتي اشوفج بخير عيوني

- الله يسلمج حبيبه يلا انتي هم سلميلنه

اخذت التلفون من امي وطلعت .. كبل صعدت لغرفتي وكعدت احاجيهه وبعدنا فاتحين كاميرا .. كلتلهه ..

- عفيه عليج خوش حجي حجيتي

- اعجبك باللواكه

- بس تدرين استخطيت امي والله

خطيه فرحناتلي من كل كلبهه وانه اجذب عليهه

- دسكت لا يسمعك احد وتفضح روحك من هسه

- ماكو احد وحدي فوك كاعد

- اي ميخالف انتبه

هسه بعد شنو شعندك

- ماكو شي هاي تسلمين

- زين لعد خلي اكوم اتحضر ورايه سهره

- اا بس ردت اكلج شغله

- شنو

- شوفي صح انه كلتلج مادخل بحياتج

بس اريد تحفظيلي نفسج يعني بعد جم يوم تصيرين على ذمتي ويشهد الله كل مافكر بحياتج ووكعدتج بين هذا وذاك اكره روحي

يعني غيرتي ورجولتي ماترضى المره الي صارت لاسمي بعد هي تسهر ويه هيج ولد

جاي تفهميني يعني ماكدر احجيهه بالمعنى الصريح بس اوضحلج يعني واتمنى تفهمين قصدي

- ههههههههه بله هسه اني شحجي !!!

- شوفي كلشي تشرطتي بي كلتلج حاضر

وشتريدين فوكهن هم حاضر بس لا تنطين نفسج لاحد احفظيهه الي مدامج على ذمتي الله يخليج لا تخليني مثل بلاع الموس بشوفتج هيج ادري بنفسي اجيت عليج وانه اعرف عيشتج شنو بس ماكدر اتحملهه وانتي محسوبه عليه مره جاي تفهميني ست ريري

- افتهمك اي مو ثوله اني فهمت زين

بس خلي اريحك شويه واكولك اني ما نام ويه هالزبائن اووكي

يعني من هالناحيه اطمن اني اروح شغل عندي وهو كل شغلي بالليل سهراتي تبدا من العشره للفجر

كلشي اشوف بهالسهره و احجي ويه كومه رياجيل كبار وصغار

مشاكل كوووومه افوت بيهه هاي لازم كل يومين عندي فد مشكله مال يز وقهر

فيومي يمشي بكلشي طلعات سهرات مواعيد بالنهار تلفونات ماتسكت وها يعني داحجيلك بكل هذوله ولد اوووكييي حتى يكون بعلمك يعني

احجي واطلع واتواعد واتغدا ويه فلان واتعشى ويه فلان بس ما توصل للنومه

- ابد ماتوصل ولا مره !

- لاااااا مو هيج عاد

مو كلتلك اني انام ويه اليعجبني مو الي هو يجي يطلب ويسعرني هذا اجفص بنص بطنه لو حجى

بس مزاجي من يعجبني والكالي واحد يسوه يلا اطلع وياه

وصار هواي ماعاجبني احد

ههههههه بيني وبينك طاكني جفاف هالايام جنهم خلصو البشاوات مدري وين ولو

ضليت اباوعلهه وساكت .. شأريد احجي بعد

هي هاي عيشتهه ومصخمه بحياتهه لحد ما شابعه .. كالتلي ..

- ديلا لازم اتحضر تاخرت

وها راح اسويلك الي تريده

يعني ماطلع ويه احد واضل الك باعتبارك رجلللي المحترم الموقر راح ادير بالي على نفسي علمودك يابن الماما الحلوه

- كافي عاد

-هههه شبيك يمه ضجت !

دنشاقه اوي شكد عكره

هاي شلون راح اعاشرك اني مادري

- ست ريري روحي كملي شغلج نحجي باجر ان شاء الله

- ديلا باي

سدت الخط وانه ضليت افرك بوجهي

شلون راح اعيش وياهه !!!

انه بيمن ورطت نفسي !!!

يابويه ماتنحمل حجيهه يجرح والله هاي وحده بايعه ومخلصه ذره مستحى ماعدهه

وانه اخجل من نفسي .. شلون راح نتراهم

شلون نتفاهم ونشتغل بهدوء مااادري !؟؟؟

ضليت ادور بالنت على غرفه سعرهه زين

وسألت جماعتي اذا يعرفون منا منا وكلهه تكلي نردلك خبر واندورلك ...

ثاني يوم طلعت لشغلي من وكت فتحت المحل

جنت منتظر ولد وكعدت وياه اكمل شغلته

وخابرني واحد من جماعتي لاكي غرفه مستعمله وسعرهه رخيص ..

دزلي الصور وشفتهه تركيه بس محلوه وضخمه حيل متكفي غرفتي ، عفتهه وطلعت العصريه بنفسي ادور بالمعارض ..

لليل ضليت افتر من مكان لمكان وتالي لكيتلي وحده تركيه بيضه ساده وبس مرايات بيهه وحجمهه صغير ماتخنك الغرفه وسعرهه

جان ٩٨٠ الف كبل حجزتهه ...

وصورتهه ومن رجعت للبيت شوفتهه لامي

وابويه يباوع للصور وساكت ميحاجيني

اخذت من امي دين وكملت الفلوس العندي

وثاني يوم .. من الصبح انه وعادل فرغنه الغرفه وصبغت الشباك و نظفت البنكه والحياطين وللعصر خابرتهم للجماعه

حتى يوصلون الاخشاب وصارت جيتهم

بالليل ...

تعاونه وشديناهه واجتي فيت القياسات

الحمدلله ..

ضل لازم اخذ فراش وبردات واشتريلهه ملابس .. كلهن اجلتهن للراتب ...

خمس ايام انه انام جوه يم ابويه وامي

وامي تكلي كمل غرفتك استعجل عيب المره ضاله هناك وانه اكللهه بس هاليومين واجل بالسالفه للراتب تالي هي فهمتني و كالتلي

انه اخذلك البردات والفرشه هديه لغرفتك

اختي من سمعت بالخبر اجتي تعتب عليه

وبالف ياعلي خلصت من عتابهه وراضيتهه

من غير تلفونات العمام والخوال كل شويه واحد سامع ويخابر يكلي ..

صدك متزوج واحنه ماندري ! ومنين وشوكت وليش ؟؟؟

وانه ارجع اعيد واصقل بالحجي نفسه

حتى الجذبه صارت وياي مثل الماي كل ساع حاجيهه ومرتبهه زياده ...

استلمت راتبي واشتريت نواقص كلهه

اخويه عزيز اخذلي ثلاجه صغيره هديه

واخويه عادل مبرده خارجيه والحمدلله ترتبت الغرفه وصارت صدك غرفه عريس ...

ضل لازم اخذلهه ملابس وجنت محتار

رحت لامي كلتلهه ..

- اكلج علويه

مرتي من تجي هم تلبس الاسود ؟

- اي يمه چا غير بعدنه حزانه

وهي صارت منا وبينا لازم تلبس الاسود

- اي بس ردت اتأكد

- هي هم صدك بعدهه عروس وتحب تلبس وتتكشخ بس شنسوي يايمه خلي تصبر لنهايه السنه وانه اخليهن كلهن يذبن الاسود

- لا علويه ما بيهه شي

لا يضل بالج انه بس ردت اتاكد لان هي سألتني من تجي تلبس اسود لو لا

بس انسي انسي لا تخلينها بالج عادي هي شنسوي احنه هي تسوي مثلنه متضوج

- اي يمه الحمدلله مرتك قنوعه وترضى بالحال

- اي علويه اي قنوعه فد قنوووعه ماكو مثلهه الحمدلله حصلتهه

- الحمدلله

طلعت وكفت باب الشارع وخابرتهه

وهي سنه يلا ترد .. اضل انتظر وادز رسايل وارجع اخابر يلا تجاوب ...

- هلو ست ريري

- هلا كول شعندك

- هو اعتذر على هالسؤال بس انه رايح للسوك واريد اخذلج دشاديش وماعرف قياسج شكد

يعني بس كليلي ولو محرج سؤالي

-هههههههههههه لك انته شكد فطير نيال امك عليك

-ههه اشكرج

- اني البس ٤٢ او اكس لارج شوف انته بعد شلون قياسهن عندك

- ماشي راح اخذلج بس لون اسود لان اهلنه بعدهم بحزن

- واني شكو !!! ماحب الاسود مالبسه

- ست ريري بس منا لل ١٢ وياهن لازم تلبسين الاسود شيكولون عليه مرته محزنانه على اخوته !

- يبووووو بدينا عااااد

- هسه ؟

- جيب يلا اي شي بس فضني

- ماشي زين محتاجه بعد شي اخذلج غير الملابس ؟

- ماعندي حجابات تره

- اي ادري محسبلهن

- اي لعد ممحتاجه شي اني غراضي الباقيه اجيبهن وياي انته بس دبر لبسكم شلونه اشتري

- ماشي واذا اذكرتي شي خابريني

-زين ديلا باي

سدته وانه طلعت بوجهي للسوك افتر بالمحلات واختارلهه دشاديش سود و اشوف القماش الثخين والميلزك واخذتله عبايه و حجاب وجواريب

وجفوف وبوشي كله اسود وثخين ..

رجعت للبيت وشوفتهن لامي وهي تعجبت شلون انه رايح مشتري ملابس نسوان

وكلتلهه ماتعرف الي اريده وعلى طبعنه

بالليل ضليت ارتبهن الهه بالكنتور وعزلت غراضي بخانه وحد عنها وخابرتهه ساعه

١١ بالليل ترفض الاتصال ..

وره نص ساعه دزتلي رساله ..

' شعندك دز رسايل ماكدر احجي '

عرفت بدت سهرتهه كتبتلهه ..

' خابريني من يصيرلج مجال '

ماردت بعد وانه نمت .. تالي حسيت على صوت تلفون يدك ..

كعدت اباوع للشاشه هاي ريري تخابر

وساعه اربعه الفجر !!!

جاوبتهه وانه النومه بعيني ..

- هلو ست ريري

- هااا ولك نايم

- اي نايم والله

- مو سيد وخبصه وتجيب وتسفط بحجي الحلال والحرام ماتكعد تصلي شو جنك من ذوله الساده الكلك

- لاا والله اصلي بس بعد ما مأذن بعد ثلث ساعه

- عبالي بس تهمبل عليه

- لا والله شعندي وياج

لا اجذب عليج ولا اهمبل وهسه تجين وتشوفيني زين وتعرفين طبعي

- ديلا نشوف

- شنو هسه رجعتي لبيتج؟

- اي لو مرايحه احسن ضجت حيل اليوم الشغل مو خوش

- ممبين عليج

- مو تعاركت شويه فمرتاحه

-ها اليتعارك يرتاح !؟

- اني اذا ما صيح واخبزلي فد وحده اثنين

مارتاح

وهنه يموتن ع الاهانه خوش بيست بيهن اليوم

بحيث هسه بلعومي مجرح احسه من الصياح الصيحته

- ههههه شدعواج عمي متكليلي شدعواج هيج

- هيج احسن لعد تريدني اصير فاهيه ويضلن يلعبن شاطي باطي !

اذا مو كل وحده ادمغهه واسحلهه سحل ما يمشن عدل

- يابويه تخوفين

- اي ديربالك مني اعض

انعديت من كانيور

-هههههه صدك شخباره

- هذا وينه بحضني مثل الاسد كاعد يخبل فدوه لطوله

- هاا زين فكرتي وين تبقيه ؟

- ايييي اسكت لتجيب طاري هالسالفه خلي انام مرتاحه لتحرك كلبي

- اسفين عمي اسفين مانجيب طاريه

- اي خلي بالك تره كانيور اعز من روحي

انتبه لا تجفص بالحجي عليه وتكول جلب وتحجي عليه تره انكلب عليك شيطان من هسه اكولك اصخم عيشتك اكثر من صخامهه هذا

- بويه انتي وكانيور وعشيرته معززين ومحترمين عندي زين هيج

-اي زين

ديلا كولي شردت خابرت بالليل

- هاا ردت اكلج حددي يوم حتى اجي اخذج

كملت كلشي هنا رتبت الغرفه وجهزت غراضج وكلشي حاضر

- هاااا زين ماكلتلي شكد مده شغلنه اطول؟

- مادري بعد يم الله وشطارتج

- من هسه اكولك اذا عبرت سنه الحساب يثكل ونحول بعد كله شدات

- بعد شغله يمج اذا دبرتيهه باقل من سنه

انه انطيج الشدات بدون متطلبين واذا طولتي وصارت خبيصه علينه لاااا هنا نختلف

- شنختلف ؟

- اي نختلف لان جاي تاخرين شغل انتي ومستفاديت شي ليش ازيد فلوسج ؟

من ادبريهه وباسرع وكت انه بساعتهه حاضر شكد تردين انطيج

- هم ملعب انته ابو سوك معدل

- هذا حك

- هااااي فلوووس عيني فلوووس غصبا على الواحد يفتح عشره عشره من يحجي بيهه

- اي جا اجيبهن بالهين ! راح اجمعهن بدم كلبي

- واخذهن وامشي اتلفسهن هنا

- حلال عليج يصيرن بس اريدج تشغلين عقلج وتفتحين عينج على الرايح والجاي

- لتوصي اني بدون شي اقره البشر قرايه مووعاد وياك وبهيج شغل

بس شنو اريدك تكعد تفصلي بيتكم تفصيل

عشيرتكم واحد واحد تنفضه نفض كدامي

كلهم خليني اشوفهم وعوف الباقي عليه

- اكيد كلشي احجيلج من تجين اعرفج على كلشي هنا بس ماوصيج باهلي وشلون ما حجيتي ويه امي هذاك اليوم بهيج لسان حلو وتحببيهه بيج هيج اريدج تضلين

- اووكي اللواكه يامسهلها

اكولك

- كولي

- شكد تحطلي مهر ؟

- مادري بعد

- شنو متدري !!خاف عبالك تمشيهه عليه هيج تره زواج هذا زواج اوووكييي

دتتزوج ريري انته مو ياهي الجان

تفكر عدل وتحطلي مهر مرتب والذهب واكعلك ماريد بس حلقه بس الفلوس ماتنازل عنهه

- مو راح انطيج بالاخير حسابج شكد ميصير بعد شكو المهر

- لااا عيني لاااا لتعلب وياي بهالسوالف

ذاك وحد والزواج وحد

هذا اتفقنه وكت جانت سالفه بس شغل

ماكلتلي اتزوجج يعني حاجزني انته ومطير مني ملايين غير بيها تعويض !

تحط مهر مثل الاوادم اتزوجك ماتحط الغي سالفه الزواج اووكييي اني متهمني سوالفك حلال وحرام ومدري شنو بالحالتين اني عندي نفس شي

- سطرتي راسي يابويه ... احطلج مهر والله احطلج لتخافين مالعب عليج وحك علي

- اي هسه تعجبني

- زين شوكت اجيج ؟

- اسبوع وتعال

-مو هواي

- لااا مو هواااي اريد احضر نفسي ارتب شغلي يادوب الحك

-يلا يلا ماشي اسبوع واني يمج

-خابر قبل يوم اوكي

- اي اكيد انطيج خبر

يلا انه اترخص صارت الصلاه

- روح يلا باي

سدته بسرعه وانه ضليت افكر بحجيهه شلون لسااان يابويه شلون راح اعاشرهه من هسه خايف من عشرتهه لا تعبني وتنكلب عليه السالفه واطلع بالخساره ...

فتحت الباب ونزلت اتوضى بالحمام الي بالطابق الثاني بعدين صعدت لغرفتي

واسمع ركعه باب السطح طلعت رأساً

اباوع للباب واشوفهه مفتوحه على وسعهه

وانه نزلت جانت مسدوده شفتحهه!؟؟؟

سميت باسم الله ورحت للسطح اباوع ماكو احد .. رجعت قفلتهه ورحت صليت وبعد عيني ماخذت نوم ضليت كاعد افكر بسالفه ريري وافكر شسوي بكل خطوه ولحد ماصارت ساعه سته طلعت اريد انزل

وجان انتبه لباب السطح مفتوحه شويه !!

رحت عليهه وكضيتهه انه قفلتهه بايدي كبل ساعتين شفتحهه !!!!

احنه سطحنه صاير درج ونصعدله يعني هاي الباب كبل تصير بوجه الدرج .. فصعدت اشوف شكو فوك .. باوعت من كل جهه

مالكيت شي .. بس هدوووء تااام هنا

تعوذت من الشيطان ونزلت .. قفلت غرفتي ونزلت لامي صبحت عليهه واخذت ابويه صح مايحاجيني بس ماعفته .. اداريه واجيبله الاكل واحاجيه بكل صغيره وجبيره وهو ميردلي شي بس يباوعلي وساكت ..

تريكنا وامي سألتني شوكت اجيبهه لمرتي

كلتلهه السبت اجيبهه .. فرحت بيهه بس ابويه بعده مثكل وجهه عليه وماكال شي ..

طلعت مريت لبيت السيد شفت الجهال

وكعدنه نسولف انه وياه .. كالي ..

- اكلك هسه انته شلون راح تامن بيهه بيتك وتطلع لحد هسه ما مستوعب الجاي يصير

- خويه شتريد تسوي يعني !

-كلشي تسوي بنت شارع هاي شلون تامنلهه

- مجبور امن بيهه وهي جايه وتعرف شغلهه زين وتدري وراهه كومه فلوس تخسرهن لو عالت وياي فتجر عدل متسوي شي موزين

- بلكت الله صدك

- اي ان شاء الله تطلع ادميه

- شوكت تجيبهه !

- السبت

- ماضل شي وعلي

- اا خويه فد طلب عندي يمك

- كول خويه كول

- اريد اخذك وياي السبت

-ليش

- تعقدلنه بعد اخوك

- شننني !!!! اااانه اعقدلك عليهه !

- اي ماأمن بغيرك ولا اعرفلي احد من بغداد واخذه وياي وبعدين انته مو تعقد للناس شتغير هنا !

- حيدر من صدك تحجي انته !

شكو متزوجهه ولك تريد تورط روحك بيهه

- سيد خما اجيبهه هنا بالحرام

الله يعلم شكد راح اضل معاشرهه وكاعده يمي ونايمه وكاشف عليهه شلون مو كل هذا حرام !!!

- لك ادري حرااام بس هاي ورطه بعد اخوك

ورطه ماتطلع منهه هاي تجلبلك بعد

- چا شون !

- والله حيرتني بزماني بمصايبك هاي

- خويه ترضالي اعاشر مره بالحرام !

- لااا مارضاهه الك

- چا اعقدلنه وخلينه نريح هالبال

- اااااخ ولك اااخ ياحيدر

تااالي عمري اروح اعقد لكحاب !!! ولك ولك وين فريتني بزماني

- تحملني خويه چا شعندي غيرك

- بلوه ابتليت والله لو ما هالبنيه الكاسره ظهري ماخليك تسوي هالشي لو اعرف اكص راسك هم ماخليك تاخذهه

- وانه مو متغاوي بيهه سيد تره جارع المر سكته بس غير الي بينه جزعنه منه ومالنه غيرحل

- امرنا لله

- والنعم بالله

صرت اكلب بتلفوني وهو كالي ..

- اكلك .. هي شلون قنعت تجي ؟

صفنت بوجه وضليت رافع حواجبي واسأل نفسي صدك هي شلون غيرت رايها بسرعه ؟

شلون قنعت هيج ؟

.

.

.

يتبع

..♣️🩸 ماء مغلي 🩸♣️..

صفنت بوجه وضليت رافع حواجبي واسأل نفسي صدك هي شلون غيرت رايها بسرعه ؟

شلون قنعت هيج ؟

- مادري

- شني ماتدري !

-مادري والله شلون اقتنعت بس هي قبلت من شوفتهه الفيديو لاهلي يمكن تأثرت يمكن محتاجه فلوس مادري والله

انه بوكتهه ماصدكت قبلت كلشي طار من عقلي ساعتهه

- وراهه سالفه هاي ماصدك تأثرت او لان كلبهه عليك اكيد حاسبتلهه فد حسبه ماتخطر بالبال

- اي اكيد عدهه فد مربح من جيتهه غير الفلوس

- ديربالك منهه حيدر هاي ملعبه وبس الله اليستر منهه

- مخليهه على الله خويه شكدر اسوي يعني

- الله اليستر

اكلك محتاج فلوس

-لااا تسلم

-لاا والله كلي اذا محتاج ادري هواي صارت عليك مصاريف وهو هالراتب عندك

- لا الحمدلله كفى وضلت بس السلفه اجمعلهه بعد جم فلس وادفعهه وكلشي ماعندي بعد

- انطيك شكد محتاج تدفعلهه بعد

- لاا خويه مشكور انه بشغلي اجيبهن

- امانه بركبتك شتحتاج كلي ماتوكف بينه فلوس ولك

- ماتقصر سيد مشكور

تغديت يمه وطلعت بوجهي للمحل فتحت

وكعدت على حاسبتي اشوف شغلي بين مااجوي الولد ...

ثاني يوم طلعت انصب كاميرات لعماره

بنفس الحي وانه اخذت هالشغل من الولد حتى اجمع فلوس السلفه وحجيتلهم على زواجي الصار مستعجل وبعد اسبوع لازم اعرس

ومحتاج فلوس فصارو الشغل كله ينطوه الي

تيسير امر ..

نصبت كاميرات باربع اماكن وحصلت خوش مبلغ يكفيني باقي الشهر ويخلصني من السلفه

لحد مايجي الراتب اموري مضبطه ..

الخميس نزلت لسوك الذهب اخذتلهه حلقه

بوكتهه من جاي اختار احتاريت بالنوع

وتذكرت ايدهه مدبدبه رادلهه حلقه عريضه وتبين ثكيله هم ماريد تكول عليه بخيل

فاخذتلهه وحده صب ملمعه

والقياس جنت اقيس على اصبعي واخمن تكفيهه لو لا .. اخذتهه عليك يالله كلت بعدين ابدلهه اذا جبيره لو صغيره بس خلي اخلص ..

ضليت ضامهه بجيبي طول اليوم لحد مارجعت لبيتي وخليتهه بالمجر وكل مااطب للغرفه اروح اباوعلهه واشوف ذوقي شلونه

وافرهه منا ومنا اشوفهه حلوه لو ابدلهه !؟

اول مره اكضلي قطعه ذهب بعمري مامشتري شي لخواتي لو امي هيج

ولا مدخل بسوالف نسوان هاي اول مره من كل شي يصير وياهه ..

الجمعه الصبح كلت لامي باجر اروح اجيبهه

وهي كالتلي كلشي محضرين بس جيبهه وتعال ...

دزيتلهه رساله هم انطيتهه خبر بجيتي

عليهه باجر الصبح وطلعت لشغلي ..

وبرجعتي مريت للحلاق رتبت شعري ولحيتي وبعدني اول ما طبيت البيت هي خابرت وصار بوجهي اخويه عادل

يباوع للتلفون وانه حطيته بجيبي

كالي ..

-هاا سمعت باجر تجيب مرتك

-اي ان شاء الله

- تروح وحدك لو تاخذ احد وياك

-لا وحدي شكو ماخذلي فزعه

- اييي بالخير عليك خويه

كالهه وطلع وانه بكل خطوه ادعي يارب جيتهه خير تصير بهالبيت وتبيض وجهي كدام اهلي ...

صعدت خابرتهه وتفاهمت وياهه على وكت جيتي باجر وسديته ..

ماعرفت انام براحه هالليله بس اتكلب وهذول المادري منو يدبجون بالسطح سطروه لراسي

عبالك حصونه يتراكضون فوك روسنه ...

صليت الفجر و بدلت تكشخت زين ونزلت

امي تبوس بيه وتدعيلي وابويه ماكالي غير

' انتبه على دربك '

فرحت بحجايته وياي كل قليل منه يعادل الدنيا بعيني .. اجيت اطلع وتذكرت الحلقه والعبايه

ماخذتهن .. كبل رجعت وركض صعدت لغرفتي اخذتهن بعلاكه وقفلت الباب ونزلت ..

مريت لبيت السيد لكيته متحضر وكاعد ينتظرني .. كبل صعدنا بالسياره وتوكلنه لبغداد ....

اخذنا الدرب سوالف وهو ينبهني على شغلات وانه اطمن بي كلشي ميصير والامور تمشي عدله بس انه كلبي لاعب ...

اكبر واخطر خطوه بعمري هسه جاي اخطيهه وبس الله اليستر من تاليهه ..

وصلنه بيتهه بال١١ و بعدني ما داك الباب

والجلب رحب بيه خوش ترحيب

السيد تفاجىء وضل يسأل شكو شصار

وانه صارت عاديه عندي هالسالفه

ضليت ادك الباب وهو ينبح .. لحد مافتحت الباب الست ريري ...

جانت لابسه بنطرون اسود وقميص ردان اسود و متمكيجه شويه ورافعه شعرهه

باوعتلي من فوك ليجوه ورجعت باوعت للسيد وكالتلي ...

- تعال فوت

حتى ماردت السلام وكبل طبت جوه واحنه وراهه ..

السيد بس يستغفر ويباوع للبيت

جابتلنه قواطي ببسي ومي خلتهن على الطبله

وكعدت يمي ..

كالت ..

-ارتاحو واشبعو بروده وبعدين نتفاهم

اوكي

- ماشي

اخذت تلفونهه وطلعت تخابر والسيد كبل كالي ..

- لك هاي شكداتهه يالله

- چا عبالك ماخذلي اربعينيه !

- متأكد هاي الراس الجبير بينهن خاف وحده منهن ومتيه ولك

- لااا سيد هي جبيرتهن هاي سيطهه ما يتيه

- شوكت كبرت شوكت صارلهه سيط والله عمي ذني نسوان لو بله اسود وحدتهن من مرضعهه مشيطنه

- كلمن ذنبه على جنبه سيد مالنه دخل باحد

جايين لمصلحتنه كلشي نشوف ونسكت

- اوووف اووووف

امشي صيحهه يلا خلي نفضهه ونمشي

- هسه هي تجي اصبر

ضليت اشرب ببسي واتبرد على السبلت

وهي اجتي راحت لغرفتهه ورجعت راحت النوب للمطبخ اخذت علاكه جبيره من ثلاجه

وطلعت فتحت باب الشارع وجان يطب ولد

اسمراني ومدحدح اخذ من ايدهه العلاكه وراح وره شويه هم رجع عليهه

وهي واكفه وحاضنه جلبهه الي هو بطولهه ويمكن اثكل منهه .. حاضنته وهو يفر براسه بركبتهه

عجبتني ولعبت نفسي منهه من شفتهه

تبوس بايد الجلب و يم اذانه وعيونه عبالك تبوسلهه بجاهل مو جلب !

تبوس بي وترجع تحضن وهو مندمج وياهه

اشوفهه تضحكله وهو ينبحلهه وترجع تبوسه

وين يلا انطته للولد وطلعت وياه

وتالي رجعت طبت غسلت بس ايدهه ونفضت ملابسهه و راحت لغرفتهه وجان تصيحني

ترخصت من السيد ورحتلهه ..

كالتلي ..

- هذا منو ؟

- ابن عمي الحاجيلج عليه هذا ابو ملوكه

وهو يعقدلنه سيد وعادي يدري بكلشي

- زين بس اني جوعانه خلي نتغدا وبعدين نعقد ونطلع اوكي

- خليهه نتغدا هناك هم ينتظرونا امي محضره غدانا

- اي هم نتغدا مره ثانيه شكو بيهه

اذا ميعجبكم تاكلون كيفكم بس اني راح اكل

- اكلي انتي براحتج واحنه ننتظرج

- شوف ابن عمك خاف جوعان

لو تستنكفون تاكلون وياي

- لااا والله مو هيج

بس مو ورانه غدا وانه اذا اكلت هسه بعد مااكل للعشه

-متشوف روحك مملوص

دروح اكعد يمه واني راح اكل براحتي بعدين اجيكم

-اي بس استعجلي لتنسين ورانه طريق

-اووكي اووكي فهمتتت

رجعت يم السيد وكلتله ...

- تريد تاكل جوعانه

- متصبر هناك تتغدا يم اهلك

- هم تتغدا عادي عدهه

- واحنه نضل مشتولين هيج

- هسه هنه خمس دقايق ماتطول اصبر شويه

بعد اخوك اصبر

اخذت صينيه مليانه مسلفن وراحت لغرفتهه

وسدت الباب .. واحنه ضالين بس نتصفن

وننتظر بيهه تكمل اكلهه ..

نص ساعه ضبط يلا طلعت وراحت غسلت

واجتي يمنه كعدت .. كالت ..

- يلا شلون نتزوج ؟

باوعت للسيد وهو صاير احمر وبس يستغفر

ويفرك بوجه .. كلتله ..

- يلا سيد اعقدلنه على بركه الله مثل مافهمتك

باوعلهه وكال ..

- بويه البسيلج شي يغطيج

رجعت هي باوعتلي وانه كلتلهه..

- جايبلج عبايه هنا اخذيهه

ضحكت بصوت عالي وخلت رجل على رجل وكالت ..

- وشعندي لابسه العبايه ! شنو مستحيه منكم ! لو من الحياطين !؟

صار ساعتين افتر بطولي كدامكم ماستحيت وماصارت عيب الا من نعقد اتكبع واكعد يم جناب الساده !

جان كلتو من قبل ماتكصوني بعيونكم

لو بعد ماشبعت العين .. عرك الجبين

السيد صار ينافخ ويريد يكوم

كلتلهه ..

- هاي عمي كيفج ضلي لا تلبسين

ماصار شي زين يلا اعتبري ماحجينه شي

- ايييي ديلا فضونه عاد مو خبصتني مستعجلين يلا عاد

باوعت للسيد وكلتله ..

-خويه يلا رحمه لاهلك اعقد وخلي نمشي

عدل كعدته السيد وكاللهه ..

- ماعندج ولي امر عليج هنا شلون اعقد بدون اهل احد وصي عليج

- بطرك روحي عايشه ابن عمك ماكالك يعني !

باوعلي السيد وكلتله ..

- خويه مو فهمتك چا هي كلساع نعيد

- استغفر الله زين جيب شهود

باوعتلهه وكلتلهه..

- ست ريري احد هنا تعرفيه نجيبه يشهد

- شتريد ولد بنات !

- ولد ولد.

- خلي اشوف منو موجود

كم واحد تريد !

-اثنين

جرت تلفونهه وصارت تخابر وبدون لا سلام ولا استأذان كبل كالتله ..

- دبرلي اثنين ولد مو من المنطقه هسه اريدهم

لبيتي جيبهم بسرعه يلا مايطولون شغله خمس دقايق

يلا انتظرك

سدته وباوعتلي كالت ..

- هسه جايين

- زين

- اكولك بعد عيني السيد

يا مذهب تعقدون انتو ؟

- الجعفري

- ماريد بالجعفري اني اريد بالحنفي

السيد شاطت اعصابه وضل يخوزر وانه كلتلهه ..

- ست ريري هذا مذهبنا مانكدر نعقد بغيره

احنه شيعه علويين مانحول للحنفي

- بس اني اريد بالحنفي

ماتعجبني سوالف الجعفريه

- بويه مو مال مزاجيه هي هذا مذهبنا تردين اغير مذهبي !!

- اهوووووو

- هسه شيضرج لو بالجعفري كل حقوقج تاخذيهه اول وتالي بعد شكو

- اني بالي شي واريده يصير وهو يمشي بس بالحنفي واريد تعقدلي بالحنفي

هالسيد مايعقد بهالمذهب هسه اخابرلك واحد

يجي يعقد بالحنفي

- لا اله الا الله

ضليت افرك بوجهي والسيد وكف وكالي ..

-امشي حيدر خلي نرجع يلا كافي مصخناهه هواي

- سيد اكعد بروح اهلك خلي نتفاهم

- شنتفاهم بعد !! كوه لزكناهه تلزك لحد ماجينه والنوب ضلت بالمذهب هم تريد نلزكهه !!!

تجي وياي لو اعوفك وامشي

- سيد بس اصبر لخاطر الله وصلت للحلك لا تخربوهه

صاحت من يمهه ..

- محد خربهه غيركم انتو جايين على اعصابكم

واحدكم رادله بز وينفجر

تره مجابرتكم عليه انتو جيتو توسلتو

هاي اني مايعجبكم ذااااك هو الباب يكفي طولكم امشو اطلعو

وكفت ولزمت ايد السيد وكلتله ..

- خويه بروح العزيزه بس تهدا كلشي تحملنه لخاطرهه بس اكعد وانه اتفاهم وياهه بس اكعد

- حيدر كلمه الثانيه منهه احطهه اجفص بطنهه والله وقسم بالله ماسكت بعد فهمتتت

- بس اكعد وانه اتصرف بس اهدا اهدا

خليته يكعد وضل داير وجهه للشباك

وانه رحت عليهه كلتلهه...

- كومي خلي نحجي جوه

جرت باكيتهه والتلفون ومشت لغرفتهه

سديت الباب وضليت واكف وياهه كلتلهه..

- بس فهميني شنو الي تريدي من الحنفي

وانه اسويه الج بمذهبنا والله بس كولي

اخذت نفس من جكارتهه وبعدين كالت ..

- اريد شغله بس ماكولهه الك هسه

اريدهه بعدين وره منكمل شغل

-اي كولي شنو خلي افهم

- لااا ماكولك متسويهه هسه ادري بيك

- چا شون ؟

- اسمع

تكتب بالعقد بخط ايييدك انته

تتعهدلي تنفذ اي شي اطلبه منك من نوصل للطلاك

لو جان العقد بالحنفي جان ماتشرطت هيج بس انتو غير شكل وتعقدوهه هواي فأريد تتعهدلي بوكتهه شطلب يتنفذ

- ادري بس فهميني شبي الحنفي وماعدنه

هو كل حقوقج تاخذيهه بالطلاك الغايب والحاضر اثنينهن انطيهن الج بعد شكو

- اااني بالي شغله واريدهه مالهه دخل بهذني

هسه تتعهد لو نخرب كلشي ؟!!

- هي شغله بيهه فلوس ؟

- اي بيهه

- انطيج بويه على الفلوس سهله

ميخالف اتعهدلج بس بالمقابل تتعهدين انتي هم اذا ما دبرتي شغلنه تتنازلين يا من المهر

يا من فلوس الشغل

- شنووووه !!

-اي چا تردين كلشي الج

مثل ماتاخذين لازم تنطين وانه ماريد منج بس اتكملين شغلج للاخير كون ماطلعين من بيتنا الا وكلشي خلصااان وراجعين لعافيتنه

بذاك الوكت كل فلوسج تاخذيهه

انطيج وانه الممنون ..

- اووكي تمام متفقين هيج

بس لاتنسى قبل الطلاك الي اطلبه يتنفذ بدون نقاش

- وحك علي مااخلف بكلمتي وياج وشتطلبين حاضر بس كملي شغلج بالمضبوط

- اووكيي لعد يلا امشي نعقد

طلعنه وكعدنه شويه ننتظر الشهود

واندكت الباب .. راحت هي فتحتهه واجتي ووياهه اثنين ولد شباب .. سلمو وضلو واكفين وهي كعدت يمي وكالت ..

- يلا عاد شتنتظر بعد

-اي يلا هسه

باوعت للسيد وكلتله ..

- يلا سيد على بركه الله توكل

- انطيني هويتك وهويه المره

-اي لحظه

طلعت هويتي وخليتهه بايده وهي راحت جابت هويتهه .. اخذتهه ونطيتهه للسيد

وصار يسجل المعلومات واسماء الشهود

وبعدين بدا يعقدلنه على حسب مذهبنا

و سألها ..

- يا روان عفيف أترضين ان اكون وكيلك على الزواج من حيدر خضر على مهر معجلهُ

٣ مليون دينار و مؤجله ٤ مليون دينار

فأذا رضيتي به زوجاً قولي نعم انت وكيلي

رادت تحجي اشرتلهه تسكت ورجع هو ردد مره ثانيه وثالثه واشرتلهه تحجي يلا كالت ..

- نعم انت وكيلي

باوعلي وكال ..

- زوجتك موكلتي روان عفيف على المهر المعلوم .. قل قبلت التزويج

- نعم قبلت التزويج

- مبروك الزواج حيدر

وقع هنا

اخذت الدفتر وقعت وانطيتهه هم وقعت

وبعدين وكفت سلمت على الولد وهي وكفت يمي شاورتني ..

- ورقلهم ديمشون يلا

- ها اي لحظه

طلعت محفظتي وكل واحد عشره حطيت بايده وطلعو .. سديت الباب وراهم ولكيتهه واكفه وشايله دفتر العقد والقلم كالتلي ..

- يلا تعال اكتب حتى نلبس الحلقات ونطلع

- يلا ماشي

السيد كبل كالي ...

- ولك شتكتب بعد !!

- شروط سيد اتفقنا عليهه

- حيدر تورطك هاي لا تسمع كلامهه

- لا سيد تفاهمنه وما بيهه شي بس هيج للامان يعني

كعدت يمهه كالتلي ..

- اردلك واكتب

-يلا كولي

- اكتب هنا يم توقيعك

اتعهد لزوجتي بتنفيذ طلبها المؤجل لحين انتهاء الزواج وبكامل قناعتي وامام خالقي والشهود

كتبتهن و كلتلهه ..

- ان شاء الله مايطلع طلبج يكسر الظهر

- لتخاف مو طامعه بيك ولا رايده اهجم بيتك

بس لازم اخلي ضمان لنفسي بهالزواج

- وانه مااكل حقج ولا اظلمج اطمني كل حقوقج تاخذيهه

-اي زين

- اكتبي انتي يلا تعهدي تتنازلين عن قسم من الفلوس اذا ما دبرتي شغلج

- ادبره واخذ كل فلس من عيونك

- هذا الحجي الزين

كتبت تعهدها واخذت ورقه العقد من الدفتر وراحت لغرفتهه واجتي شايله علبه صغيره .. ضلت واكفه وانه اباوعلهه كالتلي ..

- يلا كوم شبيك صافن

- اي اي لحظه

اخذت علبه الحلقه من العلاكه ووكفت يمهه

واباوع للسيد جان يهز بايده ومستهزء بوضعنه ..

مدتلي ايدهه ولبستهه حلقتهه وهي هم جانت مشتريتلي حلقه فضه لبستهه الي وكالت

..

- تره غاليه وراقيه هالحلقه مو تشمرهه

- لا ليش اشمرهه

تسلمين

- يلا هسه شنو

- ماعدنه شي بعد جهزي نفسج حتى نطلع

- ماعندي شي جاهزه بس طلع الجنط

- اا البسي حجاب والعبايه جبتلج هنا بالعلاكه اخذيهن

- يلا اوكيي

اخذت العلاكه وراحت لغرفتهه وصاحتني

رحتلهه وكالتلي ..

- هاك السويج واخذ الجنط وخليهن بالصندوك

- سيارتج تاخذيهه!

- لعد وين اعوفهه !

كومه فلوس هاي تريد اشمرهه يم هذوله الهمج يطربكون بيهه بكيفهم !

- شكول لاهلي منين جبتهه

- كللهم سياره مرتي شكو بيهه

واني بعد راح اخليهه بايدك مو زين راح اصعدك ارقى سياره وبالبلاش

- هو راح نضل جذبه تجر جذبه

- عادي يا مسهل الجذب

اسفطلك بي تسفط شوكت متريد بس كول

- ههه ماتقصرين

اخذتهن وطلعت والسيد وياي كبل صعد بسيارته وانه خليت الجنط بسيارتهه

ورجعت اخذت البقيه وانتظرتهه قفلت البيت

وطلعنه ...

السيد طلع بسيارته كدامنه وانه اسوق سيارتهه و الطريق كله ساكتين ..

بس اخويه عادل يخابر كل شويه ويسأل وين صرتو ..

من وصلنه محافظتنه صارت تكلي ..

- مو تعوفني بنصهم وتروح

خليك يمي دافتهم شسوي شحجي وياهم

- اي اكيد ماعوفج

- زين شسوي بالبدايه احجيلي

- ست ريري تصرفي عادي مثل هذا اول يوم زواجج وتشوفين عيالج خليج طبيعيه لا تبالغين

- بطلهه للست حتى اخذ راحتي بالحجي وياك

هيج اضل لازم احترمك

-هاا ليش بالج تشيلين الاحترام بينا !

- باوع خلينه عاديين نحجي نتشاقه نجفص بالحجي اووكيي لا تضل كلشي و تتزعل ومدري شلون تصير

تره اني اتخبل من الناس العكره ودمهم ثكيل

لتصير منهم حتى ماعوفك واشرد

- ههههه وين تشردين بويه بعد مامنهه مهرب

- اشرد لو حمضت على كلبي باسلوبك

اعوفك واشرد شتكدر تمنعني !

- امنعج طبعا

بيناتنه ميه اتفاق

-اعوفك انته وفلوس واتفاقاتك اهم شي مزاجي مايهمني اكبر واحد

- هسه انه كايلج مالي دخل بيج بس خلي بينا احترام واسمعي كلمتي

احفظيني كدام اهلي وراعيهم وشتريدين بعد يجرالج بس هذني لاتنسيهن

- اووكيي بس خليك فري وياي لتصير معقد وعكره

-ماشي ماشي بيناتنه كلشي مسموح بس كدام اهلي لا كلشي بحدود واحترام

-اووكيي

اكولك

- شنو كولي

- اهلك شمسوين غدا ؟

-هههههه

- دحجي شكو تضحك

- مادري شمسوين هو انه عايفهم من الصبح

شمدريني شطابخين

- تره سألتك لان داشوف سويت زين من تغديت بيتي لو لا

اني احب اكل هواي وكلت هسه تضل عينهم عليه ومااخذ راحتي بالاكل واذا ضليت جوعانه مزاجي يضرب و لازم هاليوم اضل مركزه وبكامل هدوئي

فأكلت حتى ازيد شويه من عدكم بس كون اكلكم طيب ويسوه

- ههههههه اجيبلج اكل شكد متريدين

اهم شي مزاجج

-ايييي هسه انته ورررد

- والله باوعي لتخلين هالسوالف تأثر عليج

بعد هو بيتج وتصرفي براحتج انه اريدج تنبشي نبش اخذي راحتج بي وبالاكل لا يهمج شي شيعجبج كولي واجيبلج بس ضلي مفتحه عشره عشره

- اددددللل بس من هسه اكولك لا تجيني بدون علاكه بايدك

- هههه ماشي والله حاضر تدللين

- خوش تسوق حويدر طرت بينا طير

- حويدر شنو !

-هاااا بدينا بالعكره !!! موكتلك خليك فري

- بس مو حويدر رجال شكبرني تسميني حويدر !

- حوووويدر يعجبك مايعجبك اسميك حويدر

مو زين ادلعك اسمك شثكله

- استغفر الله

- بدت المغثه بدت

هاي اذا اضل هيج انته تزرفهه لمرارتي بحموضتك

- ولج هسه انه شحجيت شكلت

شبيج بويه بعدنا هستونه كلنه بسم الله

- ايييي لتعكر وياي مو كلت بيناتنه كلشي مسموح لعد هاي بس كتلك حويدر كبيت بوجهي لو اريد احجي بعد شتسوي ؟

تكوم تاخذلك راشدي

- هاذ هو بويه كيفج احجي بكيفج بس لتخرطين هيج بهالنبره مره وحده تخليني اتيه دربي

- اي عفيه هيج خليك شويه سبورتي

شوف هسه اني علمودك ماشغلت اغاني هالمره لان بعدنا جدد بس مره ثانيه اشغل وانطرب بكيفي مو تكلبلي خلقتك وكتهه

- هي ضلت ع الاغاني شغلي كيفج

- اي عفيه عفيييه بحويدر خوش زلمه

هههههه

- مادري انتي فطيره مادري كاعد تتمضحكين عليه والله مادري شسالفتج

- شوف خلي احجيلك فد شغله حتى متستغرب بعد

-اي كولي

- شغلتين اذا مالكيتهه فد يوم بريري فمعناهه صايره فد كارثه

اول شي اذا مااكلت

ثاني شي اذا سكتت

هذني اذا اني سويتهن هنا تعجب مني لان معناهه اني مو ريري اووكييي

- خوش معلومه

اي عفيه هيج ضلي عرفيني عن نفسج

- اي كافي هاي انطيتك الزبده

- صدك اتذكرت

-شنو

- طلع اسمج روان من صدك يعني

چا ليش دوختيني ذاك اليوم من سألتج

- كيفي يعجبني ادوخك

- هااااا بس اكلج شغله مو تزعلين

-لا مازعل كول

- اسمج مالايكلج

والله شكلج ابد ممناسب لاسمج

باوعتلي وابتسمت وكالت ..

-لعد شنو اليناسبني

- شكلج مال هذني الاسماء الجدد

سامعتهن هذني لارا ، مارا

-هههههههه ولك هذني مال مايعات واني مو مايعه

- بس شكلج مثلهن هم هيج ماعرف شوصفج بس من نفس الشكل انتن

- وتكووول ما شايف بنات ولا عارفهن

شو طلعت مفصلهن تفصال

-ههههه هسه ماشايف بالصدك بس بالتلفون كلشي الواحد يشوف

- هم بيك البله انته ماصدك تطلع جويهل

نظيف اكيد بيك فد لوله

- يلا اذا انتي سباعيه اكتشفيهه

-هااااا تراهن

- اراهن

- من شكد تراهن

- من غدا

- هاهيه لعد الا اطلع لولتك واخسرك غدا شرط طبخ ايدك ماتقشمرني بدجاجه من بره

- مااشي واذا مالكيتي بيه لوله انتي اطبخيلي الغدا

- ماعرف اطبخ اني ادزلك شتريد

- لااااا انتي كلتي طبخ ايد بعد لازم تطبخين

- تقبل اتعلم براسك وشتطلع الطبخه تاكله

-اي ميخالف اهم شي اخسرج طبخه

- يلاااا هاهيه متفقين

- يلا شكد وتلكيهه

- بالزايد شهرين

- خلي نشوف سباعيتج شلونهه

- نشوف حويدر نشووووف

- يلا عدلي كعدتج وعباتج راح انطب منطقتنه

- اكولك احط حمره لو عدله زين لونهه

باوعتلهه وجانت حمرتهه ورديه فاتح كلتلهه..

- زينه لا اطوخين اهلنه ينتقدون

-هاااا يعني عكره كلكم

- هسه هاي شجابه بهاي

- يبووو ياحيدر يبوووو

- مبين جعتي مو

- اييي

- عرفت من نفرزتج جنتي شبعانه هاديه شحلاتج

- ديلا وصي اهلك يستعجلون بالغدا مو يكضوهه سوالف تره لاحكين عليه

- هههههههههه راح اطب اصيحلهم الحكونه بالغدا ياهل الغيره

- بشرفك سويهه

- ثكل شويه ثكل بعدنا عرسان جدد

- لازم نصير خجلانين مابيهه مجال نضرب ميانه كبل

- لااااا ريري ميانه بس وياي كدامهم

ثكاااال ومحترمين وخجلانين بعد سوالف العرسان معروفه كلهه طبقيهه زين

- اووكيي

طلعت من جنطتهه ريحه ورشت على عبايتهه و ضلت تعدل لحد ما طبكت بابنه

ونزلت فتحتلهه الباب و كالتلي ..

-ولك شو صدك خجلت من هسه

- ههه اي زين زين عيشي الدور

- ضل يمي بس تتحرك تره الحكك

- ماعوفج والله اضل كاعد يمج لتخافين

جيبي ايدج يلا

كضت ايدي ومشينه .. فتحت الباب وطبيت

لكيت امي فارشه وكاعده بالطرمه

كبل ضحكت وتريد تكوم بالكوه تشيل نفسهه

عفت ايد ريري ورحت عليهه عاونتهه

ومن وكفت حضنتهه وكلتلهه ..

- شمكعدج هنا علويه مو حاره عليج

- لاا يمه غير انتظر بيكم

وخر خلي اشوفن مريتك

وخرت منهه وجتي ريري يم امي بس تبتسم

وسلمت عليهه وامي كضتهه تبوس بيهه وترحب .. وبعدين صاحت لابن اخويه انطاهه جيس الجكليت وضلت اطش علينه

جكليت ...

وضلت كاضه ايد ريري ماعافتهه

طبينه للهول واجني نسوان اخوتي

سلمن عليهه وكعدنه ..

شاورتهه كلتلهه ..

- هاذي المره الطويله هي ام سيف مرت اخويه عادل والثانيه السمينه ام فاطمه مرت اخويه عزيز

ام سيف تصير عمه ام فاطمه يعني صله القرابه بينهن وبعدين اكملج عليهن

- زين وين اخوتك

- هسه يجون

باوعت لامي وكلتلهه ..

- الحجي نايم كاعد ؟

- كاعد هم باله عليكم بس ضال بفراشه

- زين علويه رحمه لاهلج توصيهن بالغدا

يستعجلن

- اي يمه هسه نتغدا سويه

- هااا ماتغديتو بعدكم

- لاا بس انه ضليت ماتغديت كلت ناكل سويه

ابوك غديته و كلمن غدت عويلهه

- يلا همزين راح ناكل وياج علويه

اباوع لريري عينهه على المكان وتباوع للجهال واكفين يم الباب يمدون راسهم ويشردون .. صحتهم كلهم و وكفتهم يمنه

كلتلهه ..

- خلي اعرفج ولد اخوتي

هذا مجتبى اكثر واحد يحبني وشالع كلبي

ابن اخويه عادل

وهذا اخوه صادق هم خباثه شويه

وهاي اختهم زنوبه الحبابه تغسل جواريبي مهمتها هاي

جرتهم ريري وبوستهم واحد واحد وسألتني..

- لعد وينه سيف

- اكيد نايم هذا واحد انطوائي نادراً ماتلكيه ينزل ويكعد ويانه هو بالاعداديه هسه صار رابع

- اممم زين

- وشوفي هالكرفش هذا حسن ابن اخويه عزيز هذا اصغر واحد بيهم احبه حيل

وهو بس يكطع بشاحناتي وين ميلكاهن

-هههههه فدوه شلون شعر حلو

- وضلت فطومه واختهه العرمه حوراء

مدري وينهن هذني بنات اخويه عزيز

- بس هذوله عنده

-اي

- و بنات المرحوم هادي وينهن؟

-بعدين نحجي

- هاا اوكييي

- راح انزل الجنط واجي

اخذت مجتبى وحسن وياي وضلو يسألوني

عمو منينلك هالسياره ؟؟

وانه اكللهم مال المره ديربالكم اطخوهه

وهمه بدل ما يعاونوني ضلو يتفحصون بالسياره ويفترون داير مدايرهه

صحت عليهم وسحبو جنط وياي للبيت

وصلتهن للدرج ورحت كعدت يمهه

جاي اكللهه نكوم نسلم على ابويه

وام فاطمه جابت الصينيه

و هم اخوتي عادل وعزيز اجوي سوه

سلمو وضلو يباوعون لريري وبعدين

ترخصو وراحو . .

ضلينه بس انه وياهه وامي بالهول

كبل مانكعد ناكل كلتلهن ..

- خلي ناخذ الصينيه ونروح يم الحجي

هم نسلم عليه ونسولف وياه خطيه ضال وحده

امي كبل باستني وكالت ..

- شوفيه يايمه شوفيه وليدي شلون حنين على اهله هيج كود اصيرين مثله حنينه

ضلت ريري بس تبتسم وتهز براسهه

وانه شلت الصينيه ومشيت كدامهن

رحت لغرفتهم ..

طبيت وصحت السلام عليكم وحطيت الصينيه بالكاع ..

مشيت لجربايه الحجي ودنكت عليه بوست راسه وهو يباوعلي كلتله ..

- شلونك حجي

- الحمدلله

- شوف هاي مرتي حجي

تريد تسلم عليك

اجتي ريري تباوعله وتبتسم ضلت واكفه يمه وبس تباوعله وابويه هم عينه بعينهه

استغربت بكميه الهدوء الي بصوتهه من كالتله ..

- شلونك يابه

ابويه باوعلي وحسيته مصدوم مثلي

ورجع باوعلهه وكال ..

- هله بويه هله بيج

دنكت بوست راسه وكالتله ..

- ما مرتاح لجيتي ؟

- لاا بويه لا

- ادري مراضي عليه بينكم بس بلكي بالعشره تعرفوني زين و اكدر اكسب رضاكم

- ان شاء الله بويه تكسبين رضانا بزين اعمالج ونيتج

ضلت تهز براسهه وبكل هدوء راحت كعدت يم امي وانه كعدت يمهه وصرنا ناكل

ونسولف انه وامي بس هي ساكته ومااكلت مثل ما جان مبين عليهه جوعانه وماتخلي شي متاكله ..

شاورتهه ..

-شبيج ريري معجبج الاكل

- اي طعمه مدري شلونه

- مابي شي زين

-لا بي ملوحه غريبه منو الطبخ ؟

- اكيد امي

- هاا اكولك يلا مانصعد لغرفتنه

- بس نشرب جاي ونصعد

اخذت الصينيه وديتهه للمطبخ ومالكيت

وحده منهن هنا .. صبيت جاي بنفسي

واخذته انطيت لامي ولريري وشربنا

بعدين كلت ...

- علويه من رخصتج نصعد نرتاح شويه

- روح يمه مرخوص

- يلا ريري

طلعنه وانه اخذت بس جنطتين صعدتهن وياي للغرفه ..

اول مافتحت الباب وطبينا كالت ...

- عزااا يمه عزااااا بيتكم شكد يخننننننك

- هاااا چا شحجينا !!

.

.

يتبع

..♣️🩸   ماء مغلي  🩸♣️..

-طلعنه وانه اخذت بس جنطتين صعدتهن وياي للغرفه ..

اول مافتحت الباب وطبينا كالت ...

-عزاااا بمه عزااااا ببيتكم شكد يخنننننننك

-هااا جا شحجينا!!

-لك عزززااا ماكو هيييج عبالك كاعده بكهف بيتككم يكبت كبت على الروح لك هاي شلون متحمل تعيش هنا ؟؟ انته هم تحس هيج مثلي لو لا ؟!

- احس طبعا احس جا ليش جبتج!

رحت شغلت المبرده و كفيت البرده شويه وكلتلهه ...

- هسه هذا البيت مهمتج تخلي يشرح الصدر والكل بي مرتاح

صارت تكف قميصهه وتكلي ...

- بس خلي افهم  خطتك وعشيرتك شلونهه واكعد اصفنلهم زين واكلب البيت على بطانته

- ايي عفيه عفيه , هسه ارتاحي غسلي نامي بكيفج شتسوين سوي المهم ترتاحين وبالليل نكعد نحجي

- زين حمامكم وين؟

- اكو واحد بالطابق الثاني وواحد جوه يم غرفه اهلي

-زين غرفتك ليش بالطابق الثالث ! قصدي مااخذتلك وحده من هذني الغرف مو اكو اربعه ليش مجنكل هنا !

-هذني ماخذيهن اخوتي الهم ولجهالهم وانه صار نصيبي هنا ,شبيهه ماعجبتج؟

- لا حلوه مرتبه عاشت ايدك بس هيج سئلت

-زين انه راح اسبح و اصعد وياي باقي الجنط  وانتي بدلي على راحتج

اخذت ملابسي ونزلت سبحت وتوضيت صليت الظهر والعصر فاتتني وبعدين اخذت جنطها وصعدت دكيت الباب وفتحتلي شفتها بالدشداشه وضحكت وهي كبل كالت..

- لما سألتني وكلتلك اكسسسس لااارج رايح جايبهه بكبر الكونيه شبيييك!!!

-شفت القياس صغير وضيك ميفيد

- وتخليني اطلع مثل واحد مطهرينه!شبيك متوهم بقياس امك انته !

-هههههه ولج قماشه كصيف يلزك شسوي يعني هسه ماعجبنج ! اجيبلج غيرهن !

- لااا لااا ابببببد التتتوبه بعد اذا اوصيك على لبسه

تروح تجيب وين الي جنه ثوب بيبيتك وتجفني بي

اااني اشترري لنفسي بعد ماثق بذوقك

-بويه هسه كل هاي لان عريضه ! كصفيهه شويه بايدج

ولو انه ماريدهه تبرز شي من جسمج لان عيب منا اخوتي وماريد تجيج حجايه 

-صدددددك ذكرتني باخوتك

- شبيهم؟؟

- هذوله من كل عقلهم متزوجين هذني !

-هه ايي

- لا لا يعني همه صاحين ميه ميه لو هم لايحهم خيط خبال شويه من البيت

تمددت ع الجربايه وهي واكفه تعزل بغراضهه وتحجي ..

- هاي امك اختارتهن !

- شبيهن احجيلي

- لك كول شنو المابيهن

مصخمات وصخات و هذنيييج وينهن مبينات وجوهن تنكط سم

- تره اخوتي متفاهمين وياهن

-  وفوكاهه كل واحد عنده درزن جهال منهن

هذوله شلون ينامون وياهن ! لك معطر جسم مايحطن وحدتهن شاربهه ينحلف بي

هم حاسبيهن نسوان !!

شو ساكت ؟ ماعجبك حجيي انغثيت لان احجي عليهن ؟

- لااا مايهمني هنه بس ماعرف شكلج

مادري صراحه شلون معاشريهن اخوتي

انه هم تلعب نفسي منهن واكرههن

هنه صدك مسمومات بس اخوتي يحبوهن

- بالسحوره عاميتاهم ليش ميحبوهن

- تتوقعين هنه يطلعن ساس البله ؟

- سبعين بالميه هنه

وراح اضل حاطه عيني عليهن

لك عيني ماكو هيج هاي لو اني بدال اخوتك وعندي هيج مره لاطلكهه بليلتهه

اصلا حرامات هيج اخوتك مزوجيهن

واحدهم شحلاته مرتبين و ذاك الوجه والعيون الحلوه والطول الهيبه ونسوانهم جنهن عتاوي

- هههه ولج والله ماجانن هيج من اخذوهن

بس من كبرن هملن نفسهن وصارن هيج

- مو عذر عيني هي الوصخه وصخه لا سالفه جبيره ولا صغيره

- هسه يغارن منج وينعدلن

- هههههييييي دصبرلي وشوف الا مااخبلهن

حتى اخوتك هم اخليهم يحسون على نفسهم شويه ويتكافشون وياهن

- عوووفي اخوتي على جهه معليج بيهم

- عليه ونص لعد شلون احركهن غير برجولتهن

- ريري لتوصلين يم اخوتي

غير السلام لتحجين وياهم

- شوف  هذا !!!

لك يا حجي بابه شبيك هيج اني ثوله واضربلي ركن ويه اخوتك واكهكه !!

- چا شناااويه !!

- اصبر وشوف بعينك شناويتلهن

احجيلي وين بنات هادي ؟

- يم خوالهم

- ليش ؟

- من ماتت امهن هنه ضلن يم خالاتهن

لان بيتنا جان هوسه و هم خايفين عليهن لان بنات عاد بقيناهن  هناك وضل بس اخوهم

يمنه ، هم خفنه عليه امي جانت تخاف يلوحه شي من البيت وكالت خليه يم خواله وخواته

منا لما نبيع البيت ونجيبهم

همه خوالهم يصيرون ولد عمتنه اللح

يعني مرت هادي الله يرحمهه جانت بنت عمتي ، فكعدتهم يمهم عادي يعني مأمنين عليهم

وره ما توفت عمتي بسبب الجلطه الصارتلهه

من مرض  بنتهه ..جبناهم يمنه وضلو لحد ماطلعت الاربعين  يمنه بس شنو مامرتاحين

واحدهم يلوب بالبيت مايكعد

البنات بس يتباجن بحضن امي والولد يلوب

يا صاعد لغرفه ابوه يا نازل يم خواته

يطلع بالشارع لازم يتعارك يضل بالبيت

يتعارك ويه سيف واحدهم عدو للثاني

صرت اخذه وياي من اطلع للشغل وهو مايعجبه شي شسويله شنطي مايعجبه

يريد يرجع لخواله وابويه مايقبل يكول عيب اندز ولدنا لخوالهم يربوهم

والبنات هم يردن خالاتهن هنه بعمرهن يعني بعدهن شابات وممزوجات وقريبات عليهن

وضلن يردن يروحن لخالاتهن

اخذناهن كم يوم ورجعناهن بس من تمرضت مرت اخويه عزيز الله يرحمهه خفنه عليهن

حيل وامي كبل لمت غراضهن وغراض اخوهن وكالتلي وديهم لخوالهم هنا يلوحهم من شر مالاحنا

واخذتهم عاد من يومها خفنا على رجعتهم

وضلت الاحداث بيتنا شي يجر شي مانطتنه مفكه ننتبه عليهم ونرجعهم هنا وامي كل مايحجي ابويه بطاري رجعتهم تكله هذني بنات حديثات هنا مو زينه عيشتهن تصير

ونخاف عليهن خليهن بعيدات من هالبيت

- يعني امك تدري كولش زين البيت مسكون

- تدري امي كلشي تدري بس متحجي وتكول هيج وهيج اعرف لاا تضل ساكته وتدعي

- هااا .. زين هم تروحولهم

- اي طبعا نروحلهم وامي متكفله بكل مصاريفهم .. دراستهم كلهه لبسهم هاي كل شهر اتروح بنفسهه تنطيهم مصرفهم وتاخذلهم الملابس والحلويات وحتى ذهب تصوغلهن للبنات من ينجحن بالمدرسه

والولد هم اخذناله دراجه وتلفون انه اخذتله

ارصده احوله مامقصرين عليهم بشي يشهد الله نذكرهم بكلشي بعد ولدنا هذوله

وبأذن الله بس يرجع حال بيتنا زين

ارجعهم هنا كدام عينه اخليهم

- ايي زين تسوي

تره الخوال يجيهم يوم يصيحون هذوله لحمكم

فديربالكم

- بعد ضلت يمج

انتي بشطارتج تخلين هالحجايه ان شاء الله ماتنحجي

- اييي اوووكي فهمت

-

اكولك يعني هسه هاي ام فاطمه مرت عزيز الثانيه !

- ايي

- وشوكت اخذهه وشلون وجهاله من الاولى وينهم ؟؟

- مرت عزيز جانت بنت خالهه لام فاطمه

احنه ماعدنا ناخذ غريبه هاي انه اول واحد يكسر القاعده

- هااا انتو من جماعه بطتنا بطت بطن بطتكم

-هههههههههههه خررررب لج والله عليج سوالف

-اييي هو يعني ناس ماخذه من ناس

-ايي كلنه كرايب مابينه غريبه لان اهلنه كلهم لو شغلهم سوه لو بيت بصف بيت

من اجدادنا هم جانو هيج ومشت بعد

-ايي

- خلي احجيلج على عزيز وضيمه

شوفي اخويه هسه هو متكأب والله لا تشوفيه هيج يشتغل ويروح ويجي تره حالته النفسيه صفر

نادراً ماتلكينه يحجي ويه احد

- ليش هاي كله علمود مرته الماتت!

- مو بس هيج

ابنه الوحيد منها هم مات

-عزااا صخامات شموته !!!

عافت غراضهه وكابلتني وكعدت وصرت احجيلهه ..

- مرته الله يرحمها جانت كل ماتحبل اول شهر الها وتسقط الطفل وهالولد الوحيد الي ثبت بطنهه بعد كومه علاجات ونذوره

واخويه صرف عليهه دم كلبه بس حتى يجي هالولد بسلامه و ولدته بسلامه بس شنو

الولد ماصارله ست شهور وامه بدأ مرضهه

بعده ما قبط عمره سنه وهي ماتت

اخويه تخبل عليهه بوكتهه حاله يبجي الصخر

اخويه عزيز جان حيل زنكيل

هو استاذ جامعي و عنده محلات مال ادوات احتياطيه للسيارات مشغل بيهن جماعه و راتبه خير من الله وكلنه جان عدنا فلوس وحالتنه زينه

فهو مايصرف بس اله ولمرته فجمع هواي فلوس بس سالفه الجهال دمرته خلته يصرف كل فلس جمعه علمود الجهال وبطلعان الروح يلا حصل هالولد وكبل اجته وكعة مرته وموتتهه شبع قهر بوكتهه وصارت روحه بهالولد ماينزله من ايده

هو يسويله الممه وهو يبدله ويسبحه كلشي بايده يسويله ومايرضى احد يطخه حتى دوامه عافه قدم اجازه وضل مكابل الولد وكاعد

كبر الولد صار عمره سنتين ونص وهو مايمشي وعزيز متخبل عليه من دكتور لدكتور يفتر بي واشكال الحجي يكلوله

كل واحد يكله لا هذاك فحص غلط سوي جديد ويسوي وهم لو يطلع فحصه نظيف لو يطلع عنده نقص كالسيوم لو كساح لو يكلوله

خلل بالاعصاب وهو متخبل على ابنه

يفتر بي بضريح امير المؤمنين وينتخي

وهو شلون ولد حلو يضحك للهوا وعنده غمازه باليسره ويشبه ابو عيناً نسخه منه

هالحجي هو يبجي بجي عليه ومن يطلع لدكتور شايل جنطته بيهه الحليب والادويه والخاولي والاشايع والتحاليل كلهن جامعهن

بيهه ولابسهه وشايله على جتفه مايرضى احد يعاونه بي بس انه اروح وياه حتى اخذله الدوا اوكف بالسره بداله وهيج يعني

- ايي وتالي شصار بهالمكرود

- الصار هالولد صارت رجليه تسود

-شلون تسود؟

- نكلبت لونهه اسود جفوف رجليه واصابعه

سووود صارن والدكتور يكول مايمشي بيهن الدم وبعدين صار جسمه يطكع احمر

ظهره وبطنه نصلخن صلخ والولد يبجي مايسكت

وهو يبجي وابوه شايله ويبجي وياه

هالحجي اسبوع واحد هو جسمه ينكلب من لون للون .. اظافره كلهن تشلعن ووكعن

وحرارته ماتنزل من الاربعين وضالين نايمين بي مستشفى خاف ينشمر من الحراره

وهو هالاسبوع عاشهن بمرار وصبح مابي نفس

- اوووويليييي عليه

- مات الولد وعزيز شحجيلج عليه بذاك اليوم

مادري يعني يمكن لو امه ميته ما يبجي عليهه مثل مابجى على ابنه

شك ثوبه صرخ وبجى بجي ماصاير

هو حيل تعلق بي وماجابه الا بدم كلبه

وهاي من ساعه ماتوفت مرته هو عايش بس ويه ابنه صارت روحه بي

وجان يشوفه ينازع بالموت كل يوم

تسودن عليه ومن وكتهه عزيز مارجع ذاك الاولي

كلشي عاف .. لا يكعد ويه صديق ولا ويه اهل ولا شغل و حتى الوظيفه عافهه ضل حابس نفسه بغرفته شهوور هو مايطلع على كد الحمام ويرجع وامي تاخذله اكله لغرفته

اخذله فتره تمرض بس مرض عجيب غريب

- شنو شصارله يعني

- شوفي هو جان ضعيف رايحه روحه من القهر حتى وجهه هذا الفج بارز من الضعف

فجأه هيج هو تمرض ضل بس يلوب من راسه ينزل يفتر بالبيت ويصيح راسي راسي

اخذناه كلشي فحص حتى مال نظر ومابي شي موزين يعني ضعف وفقر دم بس هذني

ومن وكتهه صار عزيز يسمن

- صار سمين !!!

- اي هو نكدر نكول انفخ

مادري شلون هو كلشي مياكل امي تتوسل بي يلا ياكل من ايدهه خاشوكتين بس ويه الايام صار عزيز ضخم من كد ما سمين

بطنه صارت عباره عن كرش هالكبره

وجهه بس خدود صار هالعرضه وهاي ايده مو هذا جف الايد صار مدبدب

رجليه مابيه حيل يمشي من ثكلهن

جف رجله منفوخ حذاء ميكدر يلبس رجله منفوخه ومن يمشي يلهث بالنفس من وزنه

حتى هسه كولي لام فاطمه تشوفج صور عرسهم وشوفي شلون جان

- زين هذا ليش هيج ؟ مافحص هرمونات

شي ؟

- شلون مافحص

جانو يكلوله هاي حاله نفسيه تخلي الجسم يفرز هرمونات تزيد وزن وتنفخ جسم

ومنهم يكلوله هاي احتباس سوائل وخلل بالكلى

وضل متعلعل بالدكاتره لحد ما هو بنفسه

كال اريد اتزوج

- هو كااال متاكد !!

- اي والله هو

كال تعبت من العيشه وحدي وكبرت

اريد يصيرلي جهال افرح بشوفتهم وانسى

وامي كيفت بهالحجي منه وكالتله المن تريد ازوجك كاللهه كيفج انتي اختاري اهم شي

يصيرلي جهال

- ومنو اقترح عليكم هاي الططوه

- ههههه الططوه هاي اجتنه صفح

ام سيف جانت هستوهه جايبه والنسوان يجن يتحمدلهه بالسلامه وامي على نياتهه ادور بنت الحلال لابنهه والي تجي من الكرابه

تسألهه فلان شعنده بنات وفلان ينطي بنته فلانه وهيج عرفو نريد مره لعزيز ومدري شلون امي عرفت ام فاطمه وشافتهه لان هي ماتجي علينه ابد ماشايفيهه بس مادري شلون امي طلعت شايفتهه وتعرفهه كلش زين

واهلهه طيبين وناس خيره وجلبت بيهه لان ام سيف تصير عمتهه وعاد اخذهه عزيز

- هاي امك فاهيه شوف منو حجت براسهه وقنعتهه وهي على نياتهه استغلنهه

-اي والله استغلنهه النوب هذني اثنينهن طبكن سويه وشاخن علينه

- زين اكولك هاي من اجتي ضل هيج اخوك مريض

- اي ضل شهور هو هيج منفوخ جسمه والمصيبه هو متبع حميه غذائيه واكله كله لو سلك لو شوي قطره دهن ماياكل بس يسمن بالزايد

- لعد شلون ضعف هيج

- هيج من وحده ضعف

صار عنده حوراء وبدأ يضعف ومن شاف بدا وزنه ينزل وبي مجال بعد يضعف صارله واهس بالرياضه وضل يشترك ينزل وزن

لحد ماوصل هالجسم وبطل

- عفيييه يفتهم هذا اخوك معدل

اني هم جنت سمينه وضليت العب رياضه لحد هسه بعدني العب واريد اضعف

- صدك جنتي سمينه !

- يبووو جان وزني ٧٦ هالحجي قبل سنه وشهرين اني جنت كارهه جسمي مطايقته

من سمعت فتحو قاعه نسائيه قريبه منه كبل رحت سجلت و ضليت رياضه ومشي وركص وعدلت اكلي ونزل وزني بس شنو جسمي بقى مشدود ماخليته يترهل

- ايي مو اكول ممبين عليج

-غير تعبانه عليه هذا ابو الخبزه

-كومي كملي غراضج احسن

راح انام شويه بعدين نكمل حجي

انداريت ونطيتهه ظهري وضليت بس اسمع طركعتهه بالغراض وبعدين اجتي تمددت

يمي وشويه واندكت الباب ...

رحت فتحت و طلع هذا صادق يكول

بيبي تريدكم جوه ..

وكفت امشط شعري على المرايه وكلتلهه..

- ريري البسي حجابج خلي ننزل نكعد يم

امي تريدنا

- اكولك تره جعت حيل

ليش متطلع للمحل تجيبلي حلويات كرزات شي اتلهه بي

- ماشي هسه اجيبلج

- واريد وياك فستق وحب هواي لليل

واريد ليز ابو الكتشب الجبير جيبلي اثنين

و علج جيبلي نعناع كون قوي ريحته

اريد ادخن لحد هسه مدخنت لان معندي علج

- ماشي بس هذني

-لااا هذني بس لليل مال العصريه انته شكلي من كل شي مابيه حيل اعدد بس كثر حلو

و موطات

- صار صار هسه انتي اكعدي ويه امي وانه اشتريلج ماتأخر

- ومن ترجع فوت السياره وياك

- زين زين

- وبالليل نكمل حجي على عزيز بعد بالي كم شغله اسألك عليه

- اي ماشي

نزلنه وعفتهه يم امي شويه وطلعت اتمشى للمحل اشتريلهه كلشي رداته واخذت علاكه وحد للجهال ورجعت للبيت ..

انطيت للجهال وبعدين ضليت كاعد يمهه وامي بسد ريري كاعده وتباوعلنه وتضحك

انطيت موطه الكلاص بالحليب لامي هي تحبهه واخذت وحده لابويه والباقي كله لريري ..

رحت لغرفه ابويه .. ضليت احاجيه وهو بعده زعلان مني .. قنعته وكومته من فراشه

واخذته بره يمنه .. خليت موطه بحضنه

وضل ياكل واحنه كاعدين سويه ..

ريري مفرشه العلاكه يمهه تفتح جيس جبس وتمدلي اخذ شويه وهي تكمل الباقي

وتحول للنساتل ونفضت نص العلاكه  وهي تسولف مدري صدك سوالفهه مدري جذب وتسفيط بس ماخذهه الواهس بالحجي ويه امي ...

صار الغروب وكمت طببت السياره وكبل ابويه سألني ..

- منين هالسياره ؟

- حجي هاي سياره المره

- هاااه

-والله سيارتهه

ضل يباوعلهه وهي كلتله ..

- يابه اني من شغلي جمعت واشتريتهه

وجنت اروح واجي بيهه لدوامي وهسه بعد صارت لحيدر هديه مني اله

باوعتلهه وانه متفاجىء من حجيهه الرزن

المسفط .. ابويه كاللهه ..

- شتشتغلين بويه ؟

ضلت تباوعلي وماحجت وانه كلت بدالهه ..

- حجي ريري محلله جانت تشتغل بمختبر

وشغلهم خير من الله

- ايي يابه هو جمعتهن من راتبي وخوالي خطيه ماقصرو وياي شايلين مصرفي كوله واني اجمع واجمع لحد ماسويتلي هم سلفه

ومن استلمتهه خليتهن ويه العندي وخالي اختارلي هالسياره شنو رأيك بيهه حلوه ؟

ضل ابويه يباوع للسياره وانه كعدت يمهه شاورتهه ..

- مو كتلج ماناخذهه

- شلون مناخذهه لعد بيمن نروح ونجي نحتاجهه

باوعت لابويه وكلتله ..

- حجي خير شو جنك ممرتاح

- سالفتك ياحيدر ماداخله براسي خايف منك

- كول ياالله حجي قابل شعندي يعني

المره وسيارتهه بعد انه شكو خايف مني

- خير ان شاء الله خير

اخذني اصلي يلا

اخذته جوه و جبتله المي يتوضى وعفته يصلي ورحت يم ريري جانت واكفه تغسل

كلتلهه..

- ابويه خايف منه ادري بي مامقتنع وتضل عينه عليه

- عوفه عليه اني ادبره

- شتسوين ؟

- كتلك ادبرهه معليك

هسه هو ميحاجيك وزعلان مو

-اييي ماراضي على سالفه زواجنه

- يلا هم ادبرهه

اكولك تره نعست فد مره طفيت اريد انام

- خلي وره العشه نامي هسه وكت غروب مو زين

- منو يسوي العشه ! هذني العتاوي

-هههه چا اكو غيرهن !

- ماااكل من ايدهن هسه لو عيشتي على لكمتهن تصير

اييييع لك تلعب نفسي منهن

جيبلي من بره فد لفه

- ريري عيب شيكولون علينه اخوتي

- يطبهم مرض شيكولون خلي يكولون

- لتغلطين على اخووووتي صار ثاني مره انبهج اخوتي عوفيهم على جهه

-ايييي ديلا فهمت

راحت صعدت وانه توضيت وصليت بالهول

ورحت لامي كلتلهه ...

- علويه راح اجيب عشه من بره ماريد اكلف احد

- لاا يمه خير من الله عدنه وهسه ام سيف تمد سفرتهه لا تجيب

- لا علويه خليهن ماريد اتعبهن ويضلن يحجن مابينه حيلهن

راح اجيب النه اربعتنه وصيهن لا يحسبن حسابنه بالعشه

- كيفك يمه

اخذت سياره وطلعت .. اخذت لفات كص النه وكباب بدون ملح لاهلي

و بطاله لبن و مقبلات ورجعت للبيت

لاكاني اخويه عزيز بالباب .. نزلت الجامه

وسلمت عليه وهم سألني ع السياره وكلتله هاي هديه من المره ..

كلش فرح من سمع هالشي وكالي

نيالك عليهه من كلشي معدله ولاتضيعهه من ايدك داريهه زين

فتحلي الباب وطببت السياره ونزلت اخذت الاكل ورحت لغرفه امي .. جنت تعبان مابيه حيل اصعد اصيحهه عاد خابرتهه ع الفيس

ماعدهه نت ..نسيت بعدني ممكنك الهه

رحت صعدتلهه وهالمره كبل فتحت الباب

وطبيت ...

واشوفهه ذابه نفسهه ع الجربايه كدام المبرده

و لابسه ثوب كصير وصلوخ ونومتهه

على بطنهه ..

ضليت احك بحواجبي واحمحم وهي ماكو ماتحس .. رحت يمهه ودغيتهه بظهرهه

ضليت اكعدهه وهي كبل صاحت ..

-ووجع  شكوووو شبييك

- وجع اليوجعج اضل اعيدلج واكول احترمي

- اووووف اووووف

كعدت وتلم بشعرهه وانه كلتلهه ..

- ريري لا كل حجايه وتغلطين عيب هالشي

انه محترمج ومقدرج واحاجيج بهدوء لاتضلين تنترين من تحاجيني

- ماعرف اني اذا ماصيح ولساني زفر

تعود عليه

-ماتعود عليه غصبا عليج تحترمين مدامني محترمج

-لتحترمني ضل جفص عادي

-هااا تحبين الاهانه

- انااا بموووووووت بالشتييمه دا

ضحكت وضلت تمدد بجسمهه وكلشي منهه طالع وانه ادير بعيني منا اشوفهه بالمرايه منا

عاد كلتلهه ...

- كومي البسي خلي ننزل نتعشى

-كلتلك ماكل من ايدهن

- جبت لفات والله ادري متاكلين بس انزلي

-اييي عفيه عفييه برجلي خوش يداريني

كامت ووكفت كدام المرايه وتفر بجسمهه منا ومنا تباوعله وكالتلي ..

- حيدر جسمي زين لو سمينه

باوعت لجسمهه من فوك ليجوه

حلو مربرب وابيض ومابيه ولا شعره

كله يلمع .. كلتلهه ..

- لا زين

- يعني اضعف بعد لو كافي هيج اثبت وزني

- لا كافي هيج حلو شكد وزنج هسه؟

- جنت ٦٤بس رجعت صعدت هسه صار

٦٧

-اي كلش زين مناسب ويه طولج يعني مامبين سمينه

- يعني اضعف بعد لو لا !

- لااا كافي هيج زين

- تحب المربربه هاااا

- ههههه هسه شكو هالحجي

- مبين من وجهك المحومر عجبك اللحم

- خرررب ولج البسي عاد خلي نتزل ناكل لا تضلين تجفصين بالحجي

- ههههيييييي شدعواك واكف على اعصابك

ضلت تستفز بالحجي وهي تلبس وانه مطنشهه اخر شي من لبست حجابهه كلتلهه ..

- جيبي تلفونج خلي اكنكلج

انطتني تلفونين واحد كلكسي وواحد ايفون

كنكنتلهه ونزلنه ...

شغلت تلفزيون بغرفه ابويه ودرته على الاخبار وضلينه ناكل وهي تسولف ويه امي

يتشاورن مادري شيحجن بس مندمجات

و بعدين كملنه اكل والكعده طلبت كلاص جاي واستحي اكللهه كومي سويلنه جاي

خاف تفشلني بحجيهه الحلو

ضليت ساكت بس ابويه ما سكت

وكال ..

- بعد عمج سويلنه استكان جاي

كبل باوعتلي هي وانه اشرتلهه اي كومي

عاد اخذت العلاكه وكامت ..

ضلت عيني عليهه واريد اروحلهه واستحي من ابويه هسه يكول لاحك مرته وين متروح

انه ادري نسوان اخوتي بالمطبخ وهي هناك

وطولت يمهن .. عاد ضل بالي هناك يمهن

ما هديت ولا ارتاحيت الا من اجتي وجايبه وياهه الجاي ..

انطتهم الجاي وكعدت يمي وخلت الصينيه

بالكاع .. كبل شاورتني ..

- سم كون سم بكلوبهن

- شكو شصار ولج

- يكوللي شعاجبج بحيدر و موتي نفسج عليه هيج واخذتي سكتاوي

- ايي

- عاد كلتلهن حبيته و وين اكو مثل حيدر بهالدنيا شلون مااموت نفسي عليه

جان هاي ام فاطمه تكولي خاف غلطان وياج

بهالحب وطمطمتوهه بالزواج سكته لان سالفتكم ابد متخش بالراس

كلتلهه مبين خبره بالحب واغلاطه حتى عرفتينا شمسوين

-هههه  استغفر الله لج ليش هيييج

- هالادبسزز تكولي علويه اني تاج راس بنات بغداد المهيلكات والزمي لسانج اعرفي ويامن تحجين عاد كلتلهه

شوفي لساني ولازمته وبيتي و ناسه محترمته

بس اليدوسلي على طرف ادوسه كوله

وبيج خير اوصلي لمستوى بنت بغداد المهيلكه وتعالي حاجيني

- ريري بربج هسه وكت مشاكل

بعدج ليله ما معديه بهالبيت وكبل تكافشتي وياهن

— خلي يولن لعد تريد اسكتلهن وهنه يضبطن براسي امهات الوصخ

يرحن فدوه لنعالي

مو زين حجيت بهدوء و جريت خلك

- نصي صوتج امي انتبهت علينه

سكتت هي وانه ضليت اشرب الجاي

وريري بس تتأفف وتجر بحجابهه من ركبتهه

عاد امي كالت ..

- روح يمه اصعد لغرفتك ارتاح ونام

- لاا علويه كاعدين بعد وكت ع الصعده

- لاا يمه روح روح احنه هم راح انام

مانمنه الظهريه اليوم وكاعدين من الفجر

باوعت لريري وهي كالبه خلقتهه

عاد كمت انطيت دوا لابويه و جبت العلبه مال ادويه وكعدت يم ريري وصرت اعلمهه كل نوع شوكت تنطي وشيسوي هالدوا

وبعدين اخذتهه وصعدنه ..

اول ماطبت الغرفه نزعت حجابهه وشمرتهه وضلت تروح وتجي يم الجربايه

كلتلهه ..

- شجاج ريري شبيج

- لك اني ماعرف اسكت والحجايه اضل ادك بكلبي

شلون سكتتلهن هذني وماكفشتهن وخليتهن يترافسن جوه ايدي شلووووون

- بويه اهدي اهدي

هسه انه جايبج تتكافشين !!

لااا هواي اشتغلنه اذا اضلين هيج اعصاب وبكلشي تهيجين وتتعاركين

- حيييدررر اسكت اسكت لا تفور اعصابي

عوفني لتحجي شي

عفتهه وتمددت وهي واكفه يم ميز المرايه

وادخن بحركه وصافنه بعدين دك تلفونهه

ومن شافت اسم المتصل كبل طفت جكارتهه

وضلت تباوعلي وترجع تباوع للتلفون

كالتلي ..

- اطلع شويه داخابر

- شكو اطلع متحجين كدامي

- اييي متطلع شويه شيسموهه هاي

- يسموهه تخابرين كدامي بعد يعجبج مايعجبج

جان مبين عليهه متوتره وبس تفتر وتباوع للتلفون ونكطع الاتصال وهي باوعتلي

ورجع دك تلفونهه كلتلهه ..

-منو هذا ؟

-  عمي

.

.

يتبع

💕💕

لحد هسه هاي مقدمات بسسسس

راح يبدا الصدك بالبارتات الجايه 👍🏼🌷

..♣️🩸   ماء مغلي  🩸♣️..

جان مبين عليهه متوتره وبس تفتر وتباوع للتلفون ونكطع الاتصال وهي باوعتلي

ورجع دك تلفونهه كلتلهه ..

-منو هذا ؟

- عمي

- عمج عمج لو هيج

- عمممي شنوه الهيج داكولك عمي

- ومتجاوبين شكو خايفه

- لتضل تتسمع عليه التهيلك بشي

هزيت بيدي وضحكت وهي ضلت واكفه

وتخابر .. سلمت عليه واجتي كعدت بمكانهه

ع الجربايه وضلت تنصي صوتهه بالحجي

بعدين سمعتهه كالتله ..

- اي اتفقنه نصين الفلوس بس بين مايدبرهن

ينطيني النص الاول

بعد ماحددت خلي اشوف شكد

اي اليوم رحت وهسه هو يمي كاعد

لا زين على كد ايدي

اي عمو رتبت كلشي وانطيتهم فلوس ووصيته على البيوت وكالي اعتبريهن ماينشافن بعد

مادري ادبرهه لهذاك اليوم بس لا ماعوفهه

اي عمو صار ادلل اي ماخذه احتياطي

اي اكوله صار

هلا بيك عمو

سدته وضلت صافنه على التلفون وانه كلتلهه

- شبيج شو نكلبتي مية درجه

- وشعليك انته

لتكلي رجلج اني وكلشي لازم ادري

تره حدك تعرفه لا تدخل بشي احسنلك

- وتاااالي وياااج

تضلين متحترمين !!!

- محترمتك هسه شكو سبيتك لو حركت اهلك وهيج كبيت عليه

- لاااااا عايززز والله بس تسبين وتغلطين

شوفي ريري

لحد أسا ماشي وياج مثل متردين ومحترمج ومخليج على راسي

اذا تضلين هيج وياي تره كلشي يتغير

انه مو جاهل وتعيطين وتجضين بيه

ماحاطه احترام للزواج مو مشكله

بس احترمي لان اكبر منج ومحترمج ومراعيج

فهمتتتييي !!

- هم طلعلك لسان وتهدد

عبالي فويهي وتصير بيدي مكفخه

طلع عندك ريشات تنفخهن عليه

- شوووف ياالله

چا  اااانه شحجيت !!!

- ايييييي هسه شكلت !

داعبرلك على الي بالي

بعدين اني مو كلتلك لتصير عكره

اضل كلساع اعيد !!

- هذااا احترام ريرررري مو عكره

-لااا عكررره ونص

اصلا انته واحد تغث من اول مشفتك كلتلك انته واحد غثيييييث وتحمض ع الكلب

كلتلك صير فرررريييييي دااجرعك شويه

- هاااا يعني ترديني اسكت وانتي تجفصين بمصاريني يلا اصير زين وياج وفررري مثل ماتفضلتي !

- لاااا ولك لتصير مكفخه

بس خليهه عادي عندك من اجفص بالحجي

تره اني لساني زفرررر مو زين لحد هسه اني احجي بأدب وياك

واكول بعده جديد عليه وخلي اركز وياه بشغلنه

بس لباجر بعد مااضمنلك شيفلت لساني من حجي كدامك وشتسمع تسكت لاتضل تنطنط بكل حجايه مثل هسه

اسمع وغلس

- ريري بالله العظيم ميصير هيج شويه كضي  لسانج واحترمي أسا ( هسه)  لخاطر شغلج وفلوسج مو لخاطري

- فلووسي وتجي غصبا عليك تنطيني لان اني حشتغل عدل واجيبلك العجايب

بس لساني بعد تتحمله

هاي اني مو غريبه عليك

تعرف كلش زين منين جايبني

اني بنت شارع ملعبه مسقطه وكواده

شتريدني احجيلك يعني درر !!!

لسااااني طوله امتاار و اذا فكيت حلكي بعد ماسكت و شكو حجي جايف اني احجي بي

افتهمت لو لااا

حجي المثاليات هذا لتحجي يمي ولتدوره بيه

تتحملني هاي اني تعرفني زين من اجيتني مو غشيم بيه

مثل مااخذتني وراضي بيه تضل راضي هسه وساكت لو اغرد للصبح هم تسمع وتسكت لان انته جبتني وانته كتلت نفسك حتى اوافق

مو اني اجيت عليك

ضليت اباوعلهه وحاير شأرد عليهه

وهي كلبت شويه بتلفونهه وكالتلي ..

- تره كلتلك هيج حتى لا كل يوميه تضل تعيدلي بهالقوانه مالتك اووكييي

بس داذكرك يعني

لتكلب خلقتك

- هو انتي شخليتي بعد ماكلبتي

- صوجك انته الي بديت

عمي وصاني اكولك ديربالك عليه

ولتستهر

-  استهتر شنو ؟

- مادري بس هو هيج كال

- انتي كلشي حجيتيله

- ايي كلشي مااضم عليه شي اني بس كلتله الفلوس ع اساس نصين اخذهن

- هااا زين صدك ترديهن هيج ؟

-  لا بالاخير اقبض كامل بس هاي سوالف تخصني معليك انته المهم خاف يصير حجي كدامك يعني تعرف شحجيت

- اي ماشي براحتج زين  هو وينه عمج؟

- عايش بره

- واهلج وينهم ؟ ليش ماعندج احد

- ماعندي اهل ميتين

- هاا الله يرحمهم

يعني عمج هو رباج

-اي

- ليش عافج هنا وسافر ؟

- خصوصيات هاااي شكو تدخل

- جاي اسأل هسه شبيهه يعني

- اي لتدخل بهالسوالف ولطوخ بأسئلتك

- يلا يلااا ماسأل بعد

ذبت تلفونهه وكامت للثلاجه طلعت بطل

عرك وكلاص وجابتهن وكعدت يمي

كلتلهه ..

- اوووكفي اووكفي

- شكو

- شوكت جبتيهن شوكت حطيتيهن

شو يمي تشربين شسالفه عمي شبيج

- لعد تريد اشرب يم ابوك !

- خررب ولج يعني من اطلع اخذي راحتج

مو عينك عينك

- هااا تستحرم بعد ط.....ي

- ريرررري

- شكوووو شبيك كلبتهه عليه سم

- شهالحجي هذا شبيج انتي شبيج

- يبوووووووووو

ساااااعه السووووده الكابلتك بيهه

لك ابن الاوادم تخليني هسه اسب مااخلي

ولك مو كلتلك لساني زفر مو خرطتلك حجي مااااجنت تسمع منطرررش من حجيت

- استغفر الله

الله يجيبج ياااطوله الباااااال

- هسه كل هالهوسه على شنووو

نضل يعني كلساع نتعارك

كلتلك لسانك المؤدب لتدوره بيه اوووكييي

وبعدين شكو جفلت من شفت البطل

مو بعد كم يوم تكوم انته تجيبلي شلون بله تغمض عينك وتشتري !!!

ضليت افرك بوجهي واستغفر ربي

ورطت نفسي ورطه بس الله يعلم بيهه

كلتلهه ...

- اشربي شتسوين سووووي هي مليوصه مليوصه

- ايييي هسه خووووش

د هاك الزم الكلاص خلي اطك البطل

اخذت الكلاص وهي صارت تفتح البطل

وبعدين اخذته مني وصبت شويه كلتلهه..

- هاي حتى كلاصج جايبته وياج

- اي محسبه حساب كلشي

- زين زين

- ديلاااااا حدوره احجيلي على هالمصخمات

- حدوره شنووو النوووب لج لا تخبليني

- لك شبيك بابه شبيييك

شكولك ويعجبك

اسمك شثكله منين مارهمه تنط متخبل

- لا ترهمي كولي نفسه هسه عاتب عليج

- اكولك هي ضلت بس حيدوري وهاااي ماكولهه لو تطلع نخله براسك

- عوفيهن كلهن خرررب عوفيييهن

كولي حيدر وبسسسس لا تلزكين وياه ولا حرف

- ديلاااااا فهمتتتتتت حيددداااااررر

- ريري خايف من تاليهه وياج لج بعدنا يوم واحد سوه و راح ننجلط

- باااوع اني حياتي اكشن بااكشن

فعادي عندي لو نتعارك سبعين مره ونتفاهم مره باليوم كوووولش عااادي ماهتم

بس انته دبر نفسك شويه شيل الحساس مالتلك

حتى نعيش

- شوووف شلون راح تدبر

- اكولك تحجيلي لو اخابر يلا تره ضجت

- المن تخابرين

- شغل

- هااا خابري خابري

باجر نحجي هسه نعسااان بعد طفيت

- د كوم علي المبرده انسمطت وهي تفلتي توصل ابعد من هواهه

ضحكت ورحت للمبرده زيدت سرعتهه للاخير وعدلت الشباك حتى يوصللهه هوا

ونزعت تيشرت واجيت تمددت وانطيتهه ظهري

ضلت تخابر وكلشي تحجي بهدوء وكد كلمتين تحجي مو ازيد بعدين صارت

تاكل جبس وتكركط يم راسي وانه افر مخدتي منا واندار منا وهي كلساع لو تكركط لو ترزل بالتلفون تالي بزعت كلتلهه ...

- كافي عااد نامي وراج كعده من سته الصبح

تكومين مطفيه !

- صخام بعينك شعدنه من السته كاعدين

- هااااي احنه نكعد من السته فطفي ونامي

وخليني اعرف انام

-ديلااا هسه بس اخر مكالمه

- ريري مابزعتي ماتعبتي من الالو كل شويه

- تره محجيت شي

بس داطمن واشوف شكو ماكو

- هاااا مبين تلفونج مايسكت

- متشوف شايله تلفونين

- نامي احسن نااامي

-اييي ديلا فهمت لتلح

- ريررررري

-هاااااااااا

- لمي الهوسه وياج وطفي الضوا

- ايي ادري

ضليت انتظرهه كامت طفت الضوا واجتي نامت ..

انه تعبان جنت فكبل نمت ماحسيت بعد الا

على ايدهه حاره بظهري ..

انداريت اباوعلهه مكشفه ونص مصلخه

وعايفه الجربايه بعرضهه ومدحوسه بظهري

باوعت الساعه سته الا ربع .. فاتتني الصلاه

كمت نزلت غسلت ورجعت للغرفه اصلي

وادعي ربي يهديها وياي ويصبرني عليهه

ضليت بنفس كعدتي على السجاده واسبح

وهي كعدت وكالتلي ..

- هااااااا يالسيد ابن السيد

ماجاوبتهه وكملت تسبيح وكمت شلت السجاده واجيت كعدت يمهه .. باوعت لجسمهه كلشي طالع وهي ممهتمه تكلب بتلفونهه وتفرك بعينهه .. كلتلهه ..

- هاي شوكت بدلتي

- شوكت يعني غير من نمت

- اخر شي شفتج بالدشداشه

- هو بس نزعتهه ونمت

- شكو تنزعيهه ضلي بيهه احسن

- هااااا تريدني انام مكمطه بيهه

-هههه ايييي

- انته تبصبص اني شكو اخنك نفسي علمودك

شويه الزم روحك لا بكلشي احمريت

- بلشنه عاد

كومي وعوفي الحجي يلا

- اريد اسبح ميته حرررر

- يلا انزلي اسبحي حنتظرج هنا وننزل سوا

ذبت تلفونهه و راحت للكنتور وانه تمددت

وكلتلهه...

- ريري اسمعي

لا تخلين شعرااايه وحده من شعرج تبقى بالحمام

- ليش

- بعدين اكعد احجيلج ليش بس أسا  انتبهي

هالشي علمودج حتى لا يصيرلج شي

-ايي

- اي لا تبقين شعرايه وحده

و صابونتج لا تبقيهه بالحمام إخذيهه من تطلعين ولا تخلين اي شي من ملابسج يبقى بالحمام كلهن اغسليهن وهنا تعالي شريهن على المحجر هنه ساعتين بالزايد ينشفن وارجعي سفطيهن بكنتورج

- اووكي

- والماي لا تطلعين الا تنشفي كلش لا تبقين قطره بالكاع واذا عندج ليفه جايبتهه استخدميهه واذا لا اجيبلج وحده اليوم بس لا تستخدمين الموجوده ابد كلشي لا تستخدمين بس غراضج وكلهن طلعيهن وياج

- عندي ليفتي وصابونتي وغسولاتي كلهن جايبتهن

- اي عفيه وانتبهي شعرج والماي لتنسيهن

- اووكييي فهمت

راحت وانه ضليت اكلب بالتلفون لحد مارجعت .. كلتلي ..

- اكولك هاي شفتلي واحد مدلغم واسمراني

شو هذا بس كلتله هلو يكولي منو انتي شجابج هناا

- ههههههه طويل

-ايي واحد مبين مخبل

- هذا سيف شبيج

- هاا اييي صدك سيف الماشفته

بس شدعواه هيج همجي

- مو همجي بس هو هيج معقد

- ليش شو اخوته مو هيج

- بصراحه مادري

هو كلش معقد وانطوائي مانشوفه الا هيج بالصدفه

بالدوام بس يقرا وبالعطله نايم مايطلع من غرفته الا نادراً

- هاا يلا هم اصفنله واحط خشمي بحياته

اشوف شكو ماكو

- اي عفيه عفيه

خوش نشاط اليوم مبين متحمسه

- حيييل اريد بس انهد عليهم

- بعقل ريري بعقل ماريدج تنزلين هداده

- ديلااا احجي شسوي فهمني

ذبيت تلفوني و رحت وكفت يمهه وهي تمشط

كلتلهه ..

- اول شي سويتي الوصيتج عليه

- اي بس مافهمت شكو هلكد خايف عليهن

- مو هذني يلعبن بالواحد لعب لو عافهن

- شلون يعني

- ريري الواحد من يريد يأذي يستغل هالاشياء الي تخص هالشخص يعني شعره

ملابسه اشيائه الخاصه كلهه تأثر عليه

وانه اخاف عليج اريدج تنتبهين ماريد يصيرلج شي من ورايه

- زين هالحجي يعني انته شاك بنسوان اخوتك

هنه يستغلن هالاشياء

-اي اكيد شاك بيهن لان منو يوصل لهالشغلات الا واحد من البيت

- اي صح بس هنه ليش هالكد مسمومات

انتو بينكم مشاكل ؟

- لااا اصلا بيتنه كلش هادي مابي بس هوسه الجهال هاي بس صوتهم ينسمع بيتنه

احنه من مصيبه لمصيبه كضيناهه

صرنا واحدنه ماله خلك روحه مو عاد يكعد يدور مشاكل

كلمن ملتهي بنفسه

امي هسه لو تحركين البيت مالهه دخل

ساده بابهه وكاعده ويه ابويه اداريه

واخواني ماسمعتهم فديوم متعاركين ويه نسوانهم ولا طالع صوتهم كلش متفاهمين

بينهم

- لعد هذني شبيهن متخبلات من وحدهن

- بعد انتي دوري جواب انه عليه احجيلج على بيتنه وانتي نبشي بكل صغيره وجبيره

- زين اووكي

- يلا البسي حجابج خلي ننزل نتريك ويه اهلي

صارت تلبس حجابهه وتكلي ..

-منو يسوي الريوك

- ههههه انه وياج

- قصدك انته وحدك اني كلشي ماعرف اسوي

- لازم تتعلمين

طلعت كبلهه وهي قفلت باب الغرفه وحطت مفتاح بايدي ونزلنه ..

رحنا لغرفتهم وصبحنا عليهم

اخذت ابويه يغسل وعفته كاعد بالهشتي

ويه امي واخذت ريري للمطبخ ..

كلتلهه ..

- ريري هنه بيضتين اسلكيهن وخدري الجاي والجبن موجود بس خلي بالصينيه

- اي سويهن انته يلا شكو واكف

- استغفرر الله يعني حتى الاكل اااانه اسويلج

چا شكو جايبج ؟؟

- جايبني اشتغل مو اطبخ

بعدين اني ماكل بيض سلك سويلي غير شي

-لااااا الله عليج !!

- يبووو بدينا بالعكررره

- استغفررر الله ريري تعالي نتعاون يلا

لتضلين واكفه

-ديلااا شسوي كولي

- خدري الجاي

عفتهه تغسل القوري ورحت فتحت الثلاجه

كلتلهه ..

- شتاكلين مدام

- اريد حليب ماشرب جاي صبح اني اوكيي وجبن كيري وقشطه ومربى وبسكت اريد اغمسه ويه الحليب من اشبع شويه

- ماشاء الله كلهن من المحل

- اي دروح يلا جيب

- رايح رايح هو انه ادري ماوراج بس الخساره

- كلتلي شتريدين حاضر بعد شكو هالتمسلت

- لسااااانج

- درووووح عااد

- اجي الكه الصينيه حاضره والبيض مسلوك والجاي مخدر زيييين

- اييييي بس روح

طلعت للمحل اخذتلهه كلشي تريده واخذت صمون ورجعت لكيتهه تفتح بالكاونتر وادور

كلتلهه ..

-هااا شدورين

- كلاصات وينهن اريد جدد

- ليش وهذني

- اووي تلعب نفسي اريد جديد الي

طلعتلهه من الملحق سيت كلاصات جديد

وهي اخذت اثنين وكلتلي ..

- هسه بديت استفاد منك

طولك يفيد

- هم مامقصره بالطول انتي

- مو مثلك جنك نخله راسك يطخ بالملحق

- هههه

- شدعوا هالكد طويل وضعيف

- من الله

- بله شكد طولك

- مااكول

-لييش

-تحسديني

-ديلا ع اساس ماشايفتك اني

-ههه

-لاا صدك شكد طولك

-١٨٨ضبط

- عزاا بعييينك هاي جيناتك متسلقه

تره طولك اوفر

- انه مرتاح بي انتي شكو مغثوثه منه !

- عشتو شكو انغث

ضليت واكف يمهه انتظر البيض ينسلك

وهي تفور الحليب الهه كلتلهه ..

- ريري حضري نفسج اليوم نتغدا بيت السيد

- يبووو حشوف عكر بعد خاف انته بيك مجال تنهضم هذااااك يضل موغف على

صدري

- أسا  انتي شدعواج هيج روحج بخشمج

- سويج اني معليك بيه

تره احجي بس عادي اروح بس يعني ماكدر اذا ماحجي واعلق عليكم سوله زفره بيه هاي

- هااااا اي هيج كولي من البدايه

حتى ماديرلج بال من تحجين

-مديرلي بال شنو !!! تركززز وياي من احجي جرب بس اطنشني والا اسوي ساعتك سم عليك

- عمي لا اطنشج ولا احاجيج مالي دخل بيج

-اييي عفيه هيج اريدك حدوره

- راح اعلكج بالبنكه لتضلين تلحين بهالكلمه

- يمممه خوفتننني اوووي عيني لك شكد قاسي انته لك شنو هالكلام الجارح

لاا لاا ماتحمل هيج بجيت بجيت

- ههههههه خررررب ولج رحميني

كاافي

-هااا شبيك يوجع ؟

-شنو اليوجع ؟

-هذاك الواحد من ذاك الواحد

-ريري مو الي بالي ؟ مو !

- بالك زفر اني شكو تباوعلي هيج

عفيه عقوووول تلوووب لوووب

بس انته فد واحد فضيحه صدك انقهر عليك

- ليش ولج

- وجهك مرايتك

وانته افهمهه بعد

خاف احجيلي شي وتطلع لسانك هالطول

- اااحم اي هو على نياتي

يلا حاخذ الصمون

اخذت الصمون وضليت كاعد يم امي

و خجلااااان من نفسي ..

شلون بين عليه هيج ؟؟؟

اجتي خلت الصينيه وكعدت يمي

تباوعلي وتضحك وانه خجلان بالكوه ارفع عيني عليهه ...

كملنه ريوك ووكفت يمهه بالمطبخ

اقنعهه تغسل مواعين وتعزل مطبخ وماتسوي مشاكل ويه احد تضل ساكته ..

كعدو اخوتي بثمانيه ونزلن النسوان

استغليت كعدتهم يم ابويه واخذت ريري

ورحت بغرفه ابويه ..

سديت الباب وكعدت يمهه .. كلتلهه ..

- شوفي أسا  خلي نضل نحجي

ماعندي شي الصبحيه كلهه بس من الظهر وره اضل بالمحل بعد مارجع لليل

- شوكت ترجع بالضبط

-مو سوه مرات بالتسعه مرات بالعشره ونص

بس ماتاخر اكثر من هيج

-يعني متتعشى هنا

-لا ناكل بالمحل

- لعد اني ويامن اتعشى

- ريري بعد كلشي انتي وامي وابويه

داريهم الله يخليج

والله هذوله روحي من الدنيا شتريدين انطيج

بس خلي عينج عليهم

- اووكي اداريهم بس ماعرف اطبببببخ

ليش متصدكني سبعين مره كلتلك ماعرف

- تعلمي عندج نت وطلعي

- ماعرف حيدر كلشي ماعرف

اذا اكولك بهارات ماعرفهن شنو هنه

تصدكني ؟

- مو هيج عاد فد مره

- شوووف متصدك بس اني من صدك ولا طكه بالطبخ

انطيني بس اكل اعجبك بالاكل

بس بالطبخ كلشششيييي مااااعرررررف

سمعت زييين

- سمعت وانطرشت وفهمت

يلا ندبرهه بعدين

- اووكييي احجيلي يلا شكو ماكو الجهال شلونهم

- هههههههه لج انتي سينما

- انته عقده من اول متصبح ماد بوزك هالطول همزين ما مربي لحيه واصبح بيك وانته لازم سبحتك وتهزهز براسك

يمممممه جان انتحرت

- هههههههه تره اسوي لحيه بس مادري ليش هالمره عجبني اخففهه

- اييييي رادلك هلهوله على هالانجاز

لك شكد فااااهي دحجيييي مو بطيته لكلبي

لو اني جان خرطتلك حتى حياه ابويه وجدي

- هو انتي ساكته وانه ماحاجي

- ديلا سكتت

- اي ضلي ساكته بس اسمعي زين

شوفي أسا انه حجيتلج على نسوان اخوتي

وحجيتلج على اخويه هادي الله يرحمه

ضل بعد

- ابوك وملوكه واختك وعمك وخالك كلهم احجيهم يلا استعجل هيج البكهن لبك

- اي اييي

ركزي وياي

من ماتت مرت عزيز شضل بالبيت بس ام سيف وهاي هم لاحهه شي من البيت

اخذتلهه فتره هي تون من راسهه شلون ماجانت مرت عزيز بالبدايه هاي هم هيج

كام عادل وكال ابيع البيت بعد هالبيت مو خير علينه ومسكون و امي هم ايدته بس ابويه

ماقبل جان هالبيت بانيه هو وتعبان عليه

وبيت جبير حيل ومنطقه زينه وناس تعرفنه

وضل اسبوعين عادل يقنع ابويه وهو ميقبل

يبيع .. ابويه بوكتهه جان بعده بحيله

جان عدنه خمس محلات  بالسوك

اثنين منهن كلهن مجمدات وبرادات هاي للحوم وهيج

و واحد مال بقوليات وبهارات وهالاشياء يعني و واحد مال مفروشات زوالي وهيج  والاخير مثل مخزن صاير للمفروشات

الحاصل .. هالخمسه احتركن بشهر واااحد

- صخاااام شحركهن خمستهن !

- الله اعلم .. بس هو بالبدايه احتركن هذنيج الاثنين مال مجمدات جان بينهن اربع محلات وهنه صايرات طرفيات وبادي الحرك بواحد منهن وماخذ للاخير حتى هالاربعه الي بالنص هم احتركن

وكلهم ابويه دفعلهم تعويض كل محل ١٠ ملايين همه مقبلو ياخذون شي بس ابويه كال عيب وحرام هذا رزقهم وراح بسببنا ودفعلهم كل واحد عشره

المحلات راحن بقن بس هيكل

الجماعه رجعو رتبو محلاتهم واحنه عفناهن

ابويه كال نبيعهن هذني منفوسات من يومهن

وعرضناهن للبيع بعدنا عدينا اسبوعين

ونفس الحرك رجع بواحد من هذنيج المحلات

يصير شورت  فجأه وياخذ المحل كله

وهالحجي كله بالليل بحيث من يوصلنه الخبر ونروح نلكه الامه محتركه

بحيث هالمحل الاخير اخذ وياه بالسبع  محلات من ضمنهن الاثنين مالاتنه البقيه

تخيلي انتي بنفس الشهر خمس محلات

وبضاعتهن الي بالملاييييين صارن رماااد

حتى مالنه حيل نروح نظف المكان

عفناهن واحتارينه باهل المحلات الي تضررت هم دفعنالهم تعويض بس هذوله على   اخموسطعش (١٥)  لان جانو اهل ملابس ومفروشات وهم استحو ياخذون من ابويه

كلهه تعرفنه بيت الساده واثرنا طيب بينهم

وكلهه تكول قضاء وقدر ومقهورين على وضعنه بس ابويه حط بيد كل واحد منهم اخموسطعش مليون تعويض

يكول خطيه يضلون بركبتي خطيتهم ورزقهم الراح

المهم بدينا نفلس او فلسنا اصلاً

اخويه عزيز بوكتهه جانت نفسيته مو خوش

وكلشي مادخل ضال بغرفته

وكلهه براسي وبراس عادل نركض هنا وهنا

عادل جان يشتغل بمحل المفروشات هو خريج اداره واقتصاد بس مامتعين جان كل مايقدم ماترهم وياه فصار يشتغل بالسوك

وخسر شغله صار مسودن  رسمي

و يكوم ويكعد يصيح كله من هالبيت النحس

ابويه كال بيعو البيت بعد ماتسوه كعدتنه بي

و بعناه واشترينه هالبيت بنفس منطقه بيت

عمي الي اختي جانت مزوجه عدهم

كعدنه اول شهرين زين يعني مرتاحين

ام سيف صارت زينه وعادل رجع شويه عقل

لان باع المحلات وابويه انطاه كل فلوسهن

مال خمستهن حتى يفتحله محل جديد بالسوك

ويسترزق منه فارتاحت نفسيته وكدر يشتريله محل وهم رجع سواه مال مفروشات وهسه ديشتغل بي

شصار هنا عزيز راد يتزوج هاي من حجيتلج الصار وياه

-ايي

- اي بعده هستوه خطب جان امي توكع

مريضه وصلت للموت

انفخت بطنهه صارت فد مره جبيره

وجسمهه كله مورم ويذب جراحه حتى وجهه

دمامل تطلع بي وتنفجر ويضل وجهه يصب دم وجراحه

فريناهه شكو دكتور نعرفه وعلى اليوصفونه

ويضلون متعجبين من حالهه

بهالفتره اختي امل الله يرحمهه اجتي كعدت يمنه حتى اداري امي وهي بيتهه قريب

منا بينه وبينهم فرعين  بس

فتكمل بيتهه طبخ وتنظيف وتجي هنا تبات ولل١١ ثاني يوم ترجع لبيتهه

اختي جانت تجيب ملوكه وياهه وتعوف ابنهه مؤمل يم ابوه

ملوكه جانت بعدهه عمرهه خمس سنين

ومجلبه بامهه ماتهدهه وهي امل روحهه بيهه

فتجي ملوكه مو تشوف امي شلون مريضه

تخاف منهه وتضل تبجي

فتوصيني اختي اخذهه يمي شويه بين ماتنظف جروح امي الي بوجهه ورجلهه

وتحطلهه الدوا

جنت اخذهه واجمع ولد اخوتي البقيه واكعد العبهم حتى ماتبجي على امهه

و مره من المرات المغربيه مكعدهم بالهول

واندكت الباب طلعت افتحهه وجانو جايبين ثواب انه اخذت الصينيه واجتي ملوكه تركض وتصيح خالو شعري شعري

وتبجي من خوفي عليهه ذبيت صينيه بالكاع وكابلتهه وكعدت واشوف شعرهه كلشي مابي

اسألهه ملوكه شبي شعرج ؟ تكلي يجرون شعري

منو يجره ؟ تكلي بيبي تجره

- امك !!! هي مو مدده مريضه ويمهه اختك؟

- هي هنا رباط السالفه

امي بغرفتهه واختي اداويهه وامي من ورمهه ماتكدر توكف على رجلهه

وملوكه تلعب عفتهه ويه ولد اخوتي

واجتني تبجي ومتخبله على شعرهه حتى ماراحت لامهه ضلت مجلبه بيه

- عزااا عزااا يمه عزااا

ايييي وشصار بعدين

- الصار ضليت اليوم كله اسألهه منو جر شعرج تكلي بيبي هيج تجره بايدهه وتشلعه

كلت هاي من خوفهه منهه تتخيل هيج

عفتهه محجيت لامل

بس الصار كل ما ملوكه تشوف امي تكوم تعيط وتصيح راح تموتني راح تاخذ شعري

تصيحلهه موتي لتجين عليه موتي

امي خطيه تبجي من تسمعهه

وامل صارت تضربهه من كد ما تلح بهالحجي كدامهه

كمت اخذهه وياي ماخليهه يمهن

وهي تكلي بيبي كل يوميه تجي لبيتنه تفتر ورايه متحبني تريد تاخذ دندوشتي

هاي عدهه قراصه وحده لازكه بيهه لان بيهه دناديش ملونه وهالكبرهه فامهه تضفرلهه وتخليلهه القراصه هاي

وهي تكلي بيبي تريد تاخذهه وانه اضحك عليهه اكول عقل جهال كلشي يسفط حجي

بس هي لحت بهالسالفه لايوم ولا يومين

امي كامت من تجي تغطي وجهه بالبطانيه حتى متخوفهه منهه وهي ملوكه تجر بامهه متقبل تروحلهه تكللهه تموتج هاي تموتج

عوفيهه مو خوش بيبي هاي خلي تموت احسن عوفوهه

بهالمره ابويه سمعهه وضل يستفسر شنو

الصاير وحجيتله كلشي عليهه

جان يكلي هسه تاخذهه لابوهه ياخذهه هالليله يبات بيهه بضريح الامام علي (ع)

اخذتهه وخابرت السيد كلتله جايك انه وهيج وهيج يكول الوالد جان يكلي انه طالع ومارجع اليوم خليهه باجر اخذهه

خابرت ابويه كلتله هيج وهيج

كالي انته اخذهه

- واخذتهه ؟

- اخذتهه وياريتني ماخذتهه وماعشت ذاك اليوم

- شصار

- ملوكه عدهه عبايه صغيرونه ومخيطه عليهه علك اخضر بالركبه صاير

مارضت تطلع الا تلبسهه وساعه انه ادور عليهه بالكنتور يلا لكيتهه واخذتهه لبستهه

وطلعنه نفرات

بعدني هستوني عبرت التفتيش وشايلهه بايدي

جان تصيح بيبي اجتي بيبي اجتي

وترفس برجلهه وتتلفت

وكفت احاجيهه وافهمهه ماكو بيبي هناك عفناهه وبس احنه وهي تكلي لا بيبي هنا ورانه تمشي

اتلفت اريد اشوف شتشوف هي كلشي ماكو

المهم ضليت امشي واخابر ابويه وهو يوصيني اقرا هالدعاء وهالتسبيحات

و ضل مخليهه يم الشباك وانخى جدك علي الهه وهالحجي يعني

وهي تتلفت ماهدت .. من دخلنه الحضره

نزلتهه وخليتهه تمشي وضليت كاض  ايدهه

شايفه عتبه الباب الذهبيه هاي الي ادخل للضريح

- اي

- بس عبرتهه وانه اسبح ولازم ايدهه

جان تضل تصيح وكرفصت نفسهه بالكاع

كعدت يمهه احاجيهه وهي تضرب على راسهه حتى عباتهه جرتهه ذبتهه

الناس يباوعون ويمشون وانه حاير بيهه

جريتهه شلتهه تزحلك بنفسهه من ايدي وتنزل تكعد بالكاع وتضل مكرفصه

حضنتهه واحاجيهه ملوكه شبيج كومي نشتري كومي ناخذ دندوشه جديده كومي نزور جدو وهي تبجي وتصيح مامه

جريتهه من ايدهه حيل وكومتهه ومشيت بيهه للضريح جان تنشمر بايدي

ريري منظرهه ماانساه حتى وانه بكبري

كاض ايدهه ومشيت خطوتين بيهه وصارت رجليهه ترفس رفس وركبتهه ترعش وايدهه تنشمر منا ومنا وكل جسمهه يغتض بوكفتهه

كلهه كامت تصيح الله اكبر وانه كاضهه  اضرب بوجهه اريد احاجيهه هي بس بياض بعينهه وجسمهه يغتض ويرعش

كبل شلتهه وطلعت اركض بيهه مادري وين اروح وهي خشبه صارت بايدي

طلعت ركض بيهه ادور سياره وابن خير

تلكاني واخذني كبل للمستشفى وانه تلفوني بقى بالامانات وارجف رجف عليهه

وهي الطريق كله تجفل وتشهك نفس وترجع تخنس وتضل صافنه بوجهي وشويه وترجع هم ترفس وتجفل وانه بس اسمي عليهه

والمصيبه الدكتور يكلي ماعدهه شي مو زين براسهه كلشي نظيف

ااانه لو كايلي ساعتهه بيهه فد مرض اهون عليه من هالحجايه لان ادري مرارهه شلونه

- اووويلييي يمه شلوون قسمه كشره قسمتكم

- الحمدلله على كل حال

بوكتهه دكتور حتى مقبل ينومهه بالمستشفى يكلي كلشي مبيهه وتعاركت وياه اكله جان ماتت بايدي يكلي صارت زينه اخذهه لامه احسن

كلشي مانطاهه بس ابرتين مادري مال شنو

وكالي روح

اخذتهه اغسللهه واحاجيهه وهي بس تكول اريد مامه وتبجي

رجعتهه للبيت وماتتصورين شلكيت صاير

هناك

- اييي

- جان البيت مكلوب كلاب

من باب الشارع اسمع هوستهم

انه شايل ملوكه وطبيت ركض والكاهم متجمعين بغرفه ابويه وامل كاعده بالباب

وتلطم انه كلت امي ماتت على الهوسه الجانت صايره بالباب

خليت ملوكه بحضن امهه ودفعت عادل وطبيت للغرفه واشوف امي بس تتشاهك

وتنتفض بمكانهه جسمهه يغتض

ردت ادنك عليهه  وابويه صاح بيه

ماقبل كال عوفوهه لحد يدنالهه وانه اكله

خلي ناخذهه للمستشفى شمنتظرين وهو يكلي انه اطيبهه معليكم لاتدخلون

ريري منظرهه لامي هيج يكطع الكلب

انه احبهه والله روحي بيهه واشوفهه هيج

تنازع كدامي وحالهه يخوف ماندري الي جاي يصير شنو ؟؟؟

بجيت عليهه وكابلتهه وكعدت وهي

شيكول ابويه من ذكر الله تردد وراه بس بالويل يلا تنطق

صارت شفايفهه تتفطر وتنزف وكل جسمهه يرجف وهي بدون شي مورم جسمهه والدمامل هاي تارسه وجهه وركبتهه وكلهه تذب جراحه وابويه مايرضى نمسحه او نغسللهه كلشي مايرضى احد يطخهه

- زين شنو هاي ابوك جان يطلع منهه جن يعني ؟ مو هيج يسوون لو غلطانه

- لاا لاا احنه نعرف هالجلسات بس هاي غير شكل مو هيج مال جن

- اي وشصار بعد

- الصار ابويه اخذ حفنه ملح وكض  راسهه

وداره كله بحلكهه و كالي اجيبله صندوك ماي من المحل ورحت جبتله الصندوك و بس رقاه

وانطاهه تشربه

جبرهه تشرب سبع بطاله جره وحده

وامي تبجي وتصيح ماكدر بعد اختنكت

وهو بايده يشربهه بطل وره الثاني لحد ماصارن سبعه وجان امي وراهه

ضلت تتقيء بس كل الي ذبته مي اصفر

كركم

لحد نص الليل واحنه مكابليهه وكاعدين

وهي راحت روحهه من كد ما تقيئت

وهالحجي انه نسيت ملوكه بعد مادريت عنهه

وناسي تلفوني بالامانات هم

كلشي تيهت من شفت امي هيج

-اي حقك لعد الام هينه

- جنت احس وجعهه بيه

متستاهل الصارلهه والله ابد متستاهل امي مره فقيره من اهل الله بس ولد الحرام اذوهه هواي

- ادور الدنيا وترجع اذيتهه عليهم

هاي علويه مو تشور

- هههه تشور بس بعد ماطلعت حوبتهه

بلكت الله وعلى ايدج تطلع

- ماطلع حوبه احد اني عليه بنفسي

شغل وفلوس لدخلني بهالمعمعه

- كلشي عندج فلوس !

- طبعااا لعد شنو اليستاهل غير الفلوس

كمل يلا شصار بعد

- الصار بعد امي بدت تصير احسن

يعني كعدت الصبح بيهه حيل تصلي

جانت راسهه مترفعه من الفراش

واكلت هم وابويه من نسأله يكول جنت انتظر اشاره لعلتهه والي نخيته ماردني

دلاني علتهه وين

من بعدها امي يوميه استمرت تشرب سبع بطاله ماي دافي من ايد ابويه وكله تذبه

وضلت هالشكل شهر كامل ورجعت عافيتهه شويه

جانت اختي امل الله يرحمهه هي تطبخلهه

وهي تسبحهه تعبت وياهه وعافت بيتهه علمودهه والحمدلله امي صارت زينه

ورجعت لحيلهه الاولي

بس وكعه امل وبنتهه هي الرجعت وكعت امي

- هاي من اختك شافت الجنيه

- ايييي هاي شوكت صارت وشافتهه

من وره هذاك اليوم الي بدينا نعالجهه بي

يعني من صارت حالتهه شويه احسن

هي ضلت تبات يمنه بس بنتهه تبقيهه يم ابوهه فهنا من شافتهه هي ماطولت اسبوع يمكن وراهه ووكعت مريضه دكتها صخونه

قويه اول ايام بحيث وجهه طكك من الحراره

حلكهه ولسانهه كله مفركس ومفاصلهه كلهه تون عليهه

وهي جانت تحجي للسيد تكله اهلي بينهم شيطان حاجي اخوتي فهمهم مايسمعون مني ميصدكوني

وهو يحجي ويانه بس جانو عادل وعزيز يكولون تعبنه شنسوي يعني مسلميهه بيد الله

وابويه يكول كلشي سويت والقران خاتمه على هالبيت واهله شبيدي بعد

المهم محد سوه شي واخذ حجيهه بجديه

وضلت اختي ماتكدر تمشي اسكطت رجليهه

شلون ماابويه هسه حالته من نص ظهره وجوه ميت هي هم نفس الشييي

شكد تعب عليهه السيد افتر بيهه دكاتره

وجلسات علاج طبيعي ومافاد لان ظهرهه

يكولون تسكط والا عمليه بالخارج

وكالو ناخذهه بس هي ماقبلت كالت علتي علاجهه مو بيد دكتور

وضلت بس تعالج نفسهه بالقران والتسبيحات

وهنا اخويه عزيز تزوج عرسه بسيط لا هوسه ولا زفه كبل من بيت العروس للفندق

حتى عشه ماسوينه

ملوكه جانت تجي يمنه هواي لان تعلقت بيه

فكل ماروح لاختي اسلم عليهه هي ترجع وياي

انه جنت حاجيلهم الصار وياهه هذاك اليوم

وابويه كال هذا زين صارلهه ينبهنه عليهه

البنيه رادلهه تحصين وانتباه وخلو عينكم عليهه وضلينه منعوفهه من ايد لايد

بس الي عرفته بعدين هاي روحتي وياهه

للزياره جانت اكبر غلط سويته بحقهه

- ليش ؟؟

- بعدين افهمج ليش وشلون

خلي اكملج الصار بعد

-ايي

- اختي بدت تودع

حالهه جان يبجي الصخر

رجليهه صارن يسودن وكل اصابعهه تذب جراحه والدكاتره يكولون لازم نكص رجليهه

راح يتسمم جسمهه

وهي تبجي بجي من تسمعهم يردون يبترون رجلهه

ومااستعجلنه بيهه اخذناهه لاكثر من دكتور

وينطوهه مراهم وابر التهابات بس ميفيد

كلشي ميفيد وياهه اصابعهه انأكلن اكل

ووصل الحال بيهه جف رجلهه كله انتهى

بعد ضل بس جراحه ولحم متليف ومتقرح

لا اظافر ضلت لا جلد

جان الشاش الي لافين رجلهه بي من نفتحه حتى نبدله الهه تضل تصرخ من الوجع

يلزك باللحم من كد ما متروس جراحه ودم

صرنا عاد منلفهه نعوفهه بس نغطيهه

وهم مافاد الى ان كصو رجلهه

- اوووويللييييي يمه كصوووهه !!!

- اييي كصو رجليهه اثنينهن لحد الركبه

ادمرت حالتهه بوكتهه وكلنه ادمرنه عليهه

بس جان حالهه مابي مجال تاخير بعد

هالالتهاب اكل رجلهه لحد نص الساق

وهي تعذبت هواي فماكدامنه غير هالحل

امي شبعت قهر عليهه وصار عدهه ضغط

من وكتهه وابويه يبجي على امل هي جانت مو بس بنته جانت شلون امه اخته بكلشي تلكيهه يمه وابويه معلمهه كلشي يعرفه من دين من فقه حتى بالعمره من راح اخذهه وياه

يحبهه وهي كلش مطيعه اله

لو سامعه حجيهه وياه من يصيحلهه شلون تردله باحترام وكله عيني يابه وصار يالغالي

و متنام الا ما تبوس راسه وتجيبله طشت الماي تغسله رجليه وتفركله وتكوي ملابسه بالليل حتى من يكعد الصبح يلبس دشداشه مرتبه والاكله تتنغصهه اله

ماكو مره مثل امل بطيبه كلبهه وديانتهه ..

المهم صارت عيشتنه مُره واحنه نشوفهه هيج كدامنه خاويه روحهه وزادهه مرار من تمرضت ملوكه وهبطتنه

ملوكه تمرضت نفس مرض امهه بالبدايه

هم صخونه ووجع راس بس وياهه جانت

تشوف الحيايه يم فراشهه يلتمن وتتخبل بالصياح تكلب البيت بصوتهه

- يبوووووو نفسسسس البقيه هم لاحهه

- اي هم وكعت نفس وكعتهم

متتخيلين نفسيتنه شلون صارت بوكتهه

الخوف دمرنه عليهه

الكل اعصاب ليل نهار ويتراكضون بيهه

بالدكاتره بس يخفضون حرارتهه هاي كل اليكدروله وياهه

صارت رجليهه لينه ماتكدر توكف عليهه

شلون الخيوط صارت وضعفت

لثتهه تنزف و سنونهه وكعت

ايدهه كلهه فراكيس بين الاصابع وباطراف الاظافر

ذبلت كدام عيونه وامهه تبجي عليهه

تسودنت من تشوفهه هيج تضل تعيط علينه

على اخوتي وتحجي على نسوانهم

وتلوم بينا لان ماسمعنالهه

وكلهه جانت تعبانه من الجاي يصير

والمشكله احنه ماقصرنا بشي الهن

الصرف الصرفناه عليهن بالدكاتره مصاير

وابويه وعمي مكابلينهن وكاعدين الليل كله يسهرون يقرون قران يمهن ويرقولهن

يلا كدرو شويه يخففون من ملوكه ويسيطرون على الشغلات الي تشوفهه

بس امل حالهه من سيء لاسوء

مادري من الي بيهه مادري نفسيتهه تعبت بعد ماتحملت واستسلمت مادري والله بس هي

كطعت حتى الحجي ويانه

حتى جهالهه عافتهم متريدهم

يجي ابنهه يمهه حتى يقنعهه تاكل متهتمله

اضل دايره وجهه متباوعله لحد ميروح

حتى انه متحاجيني

منشوف بس الدموع بوجهه منا لحد ما

صارت تختنك متكدر تتنفس

اخذناهه مستشفى وكالو صاير عدهه مي بالرئه وضلينه منوميهه بالعنايه خمس ايام

وماتت

ضليت ساكت واحس صدري انقبض بعد

ماكدرت اكمل حجي ..

وانفتحت الباب هنا وطبت امي تفاجأت بكعدتنه هنا ..

كلتلهه ..

- علويه تجين ويانه نتغدا بيت السيد ونشوف ملوكه شلونهه

- لا يمه روحو انتو وسلمولنه

- يعني تضلين هيج ماتتغيرين بعد

- هيج احسن يمه احسن

اخذت دواهه شربته وطلعت وريري كبل كلتلي ..

-شبيهه امك ! شنو متروح لبيت اختك ابد!

- اي متروحلهم من وكت الراحت امل هي ماطبت البيتهم

-ياااا ليش هيج متريد تشوف الجهال

-هي علمود ملوكه متروح

- ها بعدهه تخاف منهه ؟

- ايييي ملوكه من ماتت امهه هي تكول بيبي موتتهه واخذتهه مني

وطردتهه من البيت متريدهه وتتخبل بس تسمع بطاريهه

ملوكه من ماتت امهه لهاليوم هي متمشي

الدكاتره يكولون عمودهه الفقري زين مابي شي وكلشي بالدماغ زين بس هي اذا نوكفهه خطوتين توكع رجليهه لينه حتى ضعاف بس عظام

راحت كل حياتهه كلشي ماشافت من عمرهه

هالبنيه لا مدرسه لا طلعت ولعبت مثل هالجهال لا حظت بامهه لا فرحت بعيد

محبوسه بهالغرفه من ذاك اليوم لهاليوم

ابوهه دم كلبه صرفه عليهه وهي على هالحطه ضاله

شفتي لحد هسه شكد قهر وضيم جرى على اهلنه وبعد هالحال نفسه رجع على ابويه

هم نفس المرض الصار بأمل رجع صار بابويه بس هو اخف منهه الحمدلله ضل لحد هسه قوي ومتمسك بصلاته والتسبيح هنه الصبرنه لهاليوم

هاي من غير فلوسنه الي راحت وصارت رماد و المشاكل الصارت بين اخوتي وولد عمي

صارو واحد عدو للثاني

جان عادل وسيد حسنين روح بروح

همه نفس المواليد ٧٨

من همه صغار سوه ما افتركو حتى بالكليه

وبالعسكرية هم سوه بس وره السقوط حسنين صار يدرس  بالحوزه وكمل بهالنهج هو جان من كبل عنده تعمق بالدين كلش بس الاوضاع تخوف جانت وضال مغطي عليهه

المهم هو وعادل  ضلو يتواصلون وهذا يبات يم هذا وسهراتهم وطلعاتهم سوه

ومن كبل ماتتوفى امل همه تعاركو وضلو لهاليوم ميتحاجون وعادل يكره حسنين

يشوف دم سنونه ولا يشوفه

واذا سمع بيه رايحله بعد شيخلصني من لسانه

يضل يحجي ليش تروحله وليش متزعل لزعل اخوك وهو هيج وهيج ويعيد نفس الحجي كل مره وجيب اليخلصني منه

- هاااا

زين هاي عركتهم بيهه سبب قوي لو هيج

مال كبرياء

- لاا والله هيج عركه عاديه

حتى لحد هسه مفهمت عادل شكو هيج كارهه لحسنين بس هو يكول ميستاهل وخاين عشره

ومن هالحجي

- وهذاك شيكول

- يكول هذا اخوك صاير سويج عوفه شيريد يحجي خلي يحجي المهم انه ممأذي وضميري مرتاح عليه

- اممممم هم وراهم سالفه لازم احط خشمي بيهه

- اييي حطي خشمج بكلشي لتعوفين شي

- زييين هسه اكولك

رباااط هالسالفه وييين ؟؟؟

-رباطهه سحر اسود

- متأكد !

- مليون  بالميه متأكد

.

.

يتبع

..♣️🩸   ماء مغلي  🩸♣️..

- رباط هالسالفه شنو ؟

- رباطها سحر اسود

- متاكد ؟

- مليون بالميه متأكد

بس كومي هسه تحضري حتى نروحلهم

هذوله غداهم قبل الصلاه

- شو انته وحدك تعزم نفسك وتتغدا

غير يخابرك يكولك ،انته تنطي خبر

- معليج هذا عادي انه عايش يمهم

بيتنه كلشي ماكل بس ريوك لان اسوي بيدي

وهمه محسبين حسابي دايماً

- يعني كبل تجفت عليهم ويحطولك الغدا

-هههه اييي بس بادب شويه

- نهجم بيتك يالسيد

-عايز بعد ينهجم هو شضال بي

-اكولك صدك شوكت ناخذلنه فره بي

- بعدين من نكعد نخطط واعلمج على

كلشي اريده

-اووكييي

صعدنه لغرفتنه وعفتهه تبدل وضليت واكف يم الدرج .. من فتحت الباب يلا طبيت بدلت

وهي تكلي ...

- لك انته ليش هيج مملوص

شبيك القهر ماكلك !

- ايييي ماكلني اكل

- لااا من صدك شبيك خاف هم مريض

- لا الحمدلله بصحتي

-لعد شكو هيج جسمك عظام لا شحمه لا لحمه

صدك انته الي يسمونه عوده مطريجي

- ولج هالعظام المعاجبتج وزنهه يعادل وزنج

- جااان استحيت على نفسك

شااااب شطولك شكبرك وزنك بالستين

- شسوي انفخ نفسي

هو انه شايف دربي حتى افكر اسمن والله بطرانه انتي

- بس جسمك ويه طولك حيل اووفررر

شوفلك جاره تره غير وحده متقبل بيك ولا تكلبك

-ليش ناقصني ايد رجل

- ناقصك عيني ناااقصك ولتسأل شنو

خلينه حبابيب هسه اوكيي

- هههههههه انتتتي تجفصيلج جفصه وياي ادري بيج

- لا هسه مزاجي مو مال تجفص

هسه اني جوعاااانه واذا بيت عمك اكلهم مو خوش تحسب حسابك لفتين من نرجع

- هاي جعتي بس كعدتي تسمعيني

- التركيز ياخذ طاقه شمعرفك بالجوع انته

لو تجوع مجان هذا حالك هسه

-البسي  لتلحين بالحجي  يلا خلصينه

-لبست يلا امشي

- ووووين جواريبج بوشيتج الجفوف وينهن

  چا شكو اشتريتهن للكنتور !!!

- شنوووووووووه !!!

جفوف وبوشيه !

لووووو تموووت مالبسهن

- رييررري لا تبدين بالعناد

هذا لبس نسوانه متطلع هيج

- مو حتكبع بالعباه ومن هالبيت لهالبيت شكو بعد هاللغوه الزايده

- ميخالف حتى لو شبرين بره البيت تلبسيهن

- اكولك لا تضبط شرفيات براسي

تره زين جارعتلك هذني

يعجبك هيج يعجبك

ميعجبك منروح نبطل ونكعد اوووكيي

- استغفر الله

هسه انتي جاااايه تسمعين كلامي لو تمشيني على مرااامج

جاااي اكلج هاااي عيشتنه الجبتج عليهه

تمشين بيهه نفس ما هي لااا تضلين بكلشي معلكمه ريكي

جبتج تعينيني  مو تزيديني قهر وشلعان كلب

البسي وانزلي ولتحجين حرف واحد

تتندمين

عفتهه ونزلت كبل شغلت السياره وفتحت الباب وضليت ادك هورن لحد مااجتي

ولابستهن كلهن ..

صعدت وساكته وانه ضليت ساكت

لحد ماوصلنه بيت السيد وكلتلهه قبل مننزل ..

- لترفعين بوشيتج بس من تكعدين ويه النسوان

موجوده امه واخته ارمله ديربالج لتسأليهه شلون مات رجلج هاي بسرعه تبجي

وملوكه لترحيلهه الا من اجيج ماشي

ماردت عليه بس اخذت جنطتهه وفتحت الباب ونزلت .. جريت خلك وياهه وطفيت السياره

ونزلت فتحت  الباب وهمه مخلين برده بالكراج مغطيه على شباك المطبخ

وباب الاستقبال صايره ع اليمنى كبل دكيت الباب وطلع السيد سلم وطبينه ..

راحت جوه يم النسوان وضليت كاعد وياه

نسولف وشويه وجاب ابنه الغدا

اكلنه وشربنه الجاي وهو يسألني عليهه

وكلتله بعدني بس احجيلهه على حياتنه

كلتله يسويلي طريق حتى اشوف ملوكه

وضليت واكف يم الباب انتظره لحد

ما اجاني ورحت لغرفتهه وكلتله روح خلي نكعد انه والمره هنا يمهه

وبس راح خابرتهه وكلتلهه تجي

وجابتهه مرت عمي سلمت وباركتلي وراحت

باوعت لريري واشوف وجهه مليان مكياج

كبل جضيت بيهه ...

- شمسويه برووحج ليش هالكد متمكيجه

جايه لعرس شعندج

باوعتلي صفح ورفعت حاجبهه وراحت على ملوكه .. تبوسهه وملوكه توخر منهه

انه بالي بعده ويه ريري كلتلهه ..

- تره عنادج ميفيدج وياي

ومكياجج هذا عيييب جم مره نبهتج وكلتلج ماعدنه هيج احنه

وعفتج شحلاتج شكو لغمطتي ونزلتي

- مو مبوشه بعد شكو

- واذا مبوشه هسه هالنسوان شيكولن عليه

مطلع مرته بهالوجه وجايبهه يتفرجون عليهه

ليش متحسبيلي حساب متفهمين تصرفج كله ينعكس عليه

- وشعليه بيك اني بنفسي اسوي اليعجبني

اووكيي كافي انطيتك مجال طلعلك لسان عليه

- غصبااا عليج

ريررري لتلعبين بالنار لتشوفيني جار خلك وياج وعلى مرامج جنت وهادىء وتستضعفيني تره متعرفين اعصابي شلونهه

واانه ماجايبج اتعارك ويااااج واتصايح كل شويه تفهمين كلش زين شنو وجودج

وياي فاسمعي كلمتي لان هااااي عيشتي وانتي جااايه تشتغلين بعيشتي زيين لتنسين هالشي ثبتي براااسج

ووكت اطلكج روحي شتسوين سوووي

هنااا تضلين وياي تطيعيني وتبيضين وجهي كدام اهلي وناسي 

ضلت مخليه عينهه بعيني وساكته وبس انداريت هي طلعت ..

ضليت استغفر الله وطلعت وراهه شفتهه راحت للحمام .. رجعت كعدت يم ملوكه

وهي هم ساكته وتباوعلي ...

ضل بالي عليهه تأخرت وملوكه كلتلي ..

- خالو خطيه زعلت

- لا متزعل متزعل

- حلو وجهه والله حلوه ليش تحجي عليهه

- اخاف عليهه واحجي خالي ليضل بالج هسه تجي مابيهه شي

ضلت عيني ع الباب اتانيهه تجي

وتالي من اجتي جانت مغسله وجهه

واجتي كلتلي ..

- كوم خلي اكعد يمهه

كمت وعفتهه تكعد يم راسهه وضلت تشاور بيهه وملوكه بس تضحك وتباوعلهه

تالي عافتهه وضلت تباوعلي كلتلهه..

- اي ريري شفتي ملوكه شلون محبوبه

- تخبل فدوه لعمرهه تنحط بنص الكلب

- اريد تصيرين صاحبتهه شتكولين ملوك

خوش صاحبه مرت خالج لا

ضلت تباوعلي وترجع تباوع لريري

وساكته جان ريري تحضنهه وتكول ..

- غصبا عليهه نصير صاحبات لعد اني منو الي هنا ماعندي احد اعرفه غير هي تضل وياي تونسني اذا اضل عليك اشبع قهر

ريري حلوه نبرتهه من تحجي وتتفاعل بالكلمه بملامحهه وحركاتهه ..

وهاي ملوكه

تضحك بسنونهه المكسره وتحضن بيهه

رجعت كلتلهه ...

- ملوك يعني بعد اعرف مرتي يمج

تره تكرع راسي هاي وحدهه بالغرفه تضل

وانه اطلع للشغل شيخلصني بعد منهه

اعوفهه يمج تقبلين

ريري تكرص بوجهه وتكللهه ..

- كولي اي ولج دكولي اييي خلي نتونس سوه

دكولي

ضلت ملوكه حاضنه ريري وتكلي اي

ضحكت وكلتلهه ...

- ايي عفيه خالي خلصيني منهه خليهه يمج بعد ضلن وحده مكابله الثانيه واشبعن اكل وسوالف زييين

- هاااا مبين راح تطلع

- هاا شفتي ملوكه شفتيهه

ضلت تضحك وريري تكلي ..

-وين رايح بهالظهريه وعايفني 

- افتح المحل واشوف شغلي وانتي بعد مو يمج ملوكه شتسوين بيه عوفيني خلي اطلع

باوعتلي صفح وكالت ..

- ديلااا رووح اووكي

- ديربالج عليهه ريري

-ايي فهمت

- لتطلعين منا ضلي بس يمهه وشتريدين صيحيهم زين

- ايي

عفتهم وطلعت لشغلي وهناك اريد اراسلهه ماعدهه نت وماعندي رقمهه نسيت اخذه

وضل بالي عليهه شسوت وشحجت وشلونهه ويه ملوكه ؟؟

عفت الولد بالمحل ساعه ثمانيه ونص ورجعت لبيت السيد ..

جان السيد طالع وبس كعدت مرت عمي صاحتلي ريري واجتي كعدت يمي

شاورتهه ..

- ضل بالي عليج

احجيلي كلشي زين هنا لو صار شي

- لا زين

خلي نرجع يلا

- خلي اشوف ملوكه ونرجع

- نامت عوفهه امشي رجعني يلا

- شبيهه صارلهه شي ؟

- داكولك نايمه البنيه شبيييك توهس

- مو ادري بيهه متنام هيج وكت

بس يلا امشي نتفاهم بيتنا

نزلت البوشيه على وجهه وانه صحت على مرت عمي سلمنه عليهه وطلعنه

من وصلت لبيتنه ونزلت افتح الباب حتى افوت السياره شفت دراجه ابن اخويه هادي

( احمد )

كبل ضحكت هالولد ويه روحي روحه

فوتت السياره وهي كبل نزلت وضلت واكفه تنزع حذائهه وانه سديت الباب واجيت فتحت باب الاستقبال وشفت احمد مجمع الجهال

ويلعبهم  محيبس  ..

سلمت عليه وبعدني حاضنه واسمع شهكته

انداريت وشفت ريري رافعه البوشيه وتباوعله صفح ورافعه حاجبهه

وهو كالي ..

- سمعت صارت عندك مره مو حوريه

- ااااشششش لتمسلت اسكت اسكتتت

- بويياااي

جريت راسه وسحلته وهو يكلي ..

- خلي نسلم اوكف عمي شبيك

- وصل سلامك وصل

-لا بروح ابويه اصبر شبيك بس كلمتين

بعدني مجتفه واسكت بي وهي كالت ..

- حيداااار

باوعتلهه وهي تأشرلي باصبعهه ..

- اصعد لو انتظرك

- اصعدي اصعدي

كبل هذا فلت من ايدي وراح وكف كدامهه

ويوزع ابتسامات وهي تضحك بوجهه

كاللهه ..

- مرت عمي شلونج

- هلوو عيني هلا بيك

- هلو هلو

هههه اسمي احمد ممعقول ماحاجيلج عمي عليه

- لاااا شلون محاجي  عليك

غير مخبله انته بسوالفك يكدر ميحجي بيك

- هههههه اييي شويه الاشيه

غير عمي الصغيرون

- انته الصغيرون عيني عمك طول وهييه

- ههههههههههههههه بس سؤال سؤال

بربج شلون قبلتي بي

ضلت هي تضحك وانه جريته جتفت ايديه وكعدته وكلتلهه تروح تصعد وهو يكلي

- شايفتك هي كبل

شلون قبلت بيك !!

عمي بس كلي كلي شايفه صورك مواعدهه

كبل

-لك اسكت شهرتنه اسكتتت شجاك تسودنت

اسكت

- هههههههههه بينت بيييينت

مشايفتتتتك هههاااايييي الااا احجيلهه اصبرلي

الا اشوفهه شكو صوره الك كبل.

- احمد ولك صير طباب خير احسنلك

- خليت الخير الك عمي

- انطيك كارت ابو العشره ع الراتب زييين

- ولاااا حتى ابو الخمسه وعشرررين

مااااساوم بالفضايح

ماااساااوم لتحاول وياي لترشيني

- فلوس بانزين مال شهر بس اسسسكتت

- مااااكوووو افضحك افضحك

- خااااب دروووووح

ولي يلا شتريد تحجي احجي

- هاا مخايف تعوفك وتشرد

-متعوفني هاي لو شمتسوي متعوفني

- كالوهه كبلك شكككد

كلهم لازمين سره بالمحكمه طالك ما طالك

- هههههه لاااا هاي ام بيتي ماطلكهه

- تحبك هي لو هيج اخذتك عمياوي

- هسه انته شكو حاط خشمك بالنص

- چااا غير نفتهم شبيهه مسودنه بيك لو ماعدهه ذوق لو اهلهه شامريهه عليك

-ولك شو مستهزء بيه

شبيه مو بعينك ولك

- لا عمي لاااا انته تارس عيني وعابر لشعري وبيك زياده بعد

بس اكول هيج استفسسسر

كفخته على ركبته مرتين وجان اسمع صوتهه

تصيح ..

-حيداااار  تعال شويه

وهو كبل نط من يمه وكال ...

-العععععععب

صوتيش هاذ يالحمزه

-انجججججب لك

- كوم روحلهه حيدر عيني الله ربك

صمت صمت وفطرتلك على بُنيه تلهث لهث

- شعبالك غير عمك ذواااق

- اي شي من نسل هالذوق احطه على راسي

بعد انته عمي الحنين ادري بيك متقصر

كمت وكلتله ..

-لو تموووت

رحت لريري جانت يم الدرج كلتلهه ..

-ها كولي

- اريد جكاير خلصت روح جيبلي

ضليت فاك عيني عليهه وبس ارمش

واكول هاي صارت صدك ياحيدر

كلتلهه ..

- بس جكاير

-اي اريد ايزي كبسوله الازرك ولتتاخر جيبلي هسه وضل كاعد ويه ابن اخوك

- زين شفتي امي خاف محتاجه شي

- اهلك يباوعون تلفزيون واخذو دواهم وكلشي ميردون

راح اصعد يلا بسرعه روح

راحت وانه مشيت من باب المطبخ طلعت

و اخذتلهه الجكاير والحلويات للجهال

و كلت هسه بعدهه مطنكره اخذلهه علاكه مشكله تعدل مزاجهه بيهه

ورجعت سلمت الحلويات بأيد احمد وصعدتلهه ..

جانت نايمه على بطنهه وصافنه

خليت العلاكه ع الميز وكلتلهه..

- شبيج شو ممرتاحلج ؟؟

ماحجت شي بس كامت اخذت الباكيت من العلاكه وراحت يم المبرده فتحت الشباك الثاني وضلت واكفه ادخن هناك

وتغيرت نبرتهه ونظرتهه وصارت تكلي ..

- اسمع حيدر

صوتك يعلى مرة الثانيه عليه اخزيك واعزيك

لتشوفني سكتتلك وعبالك جريت  بوشي بصوتك ونفختك

تره اني شارب بشارب اشده و اتملعب عليه

متخوفني بشي فهمت

لا بعصبيتك ولا شروطك اني من اسوي شي وياك اسويه بمزااااجي زييين

خلي يكون بعلمك اني مارضيت اتزوجك

الا لمصلحتي  ولا اني ماميته على فلوسك

الي عندي يغطن طولك وبالشهر اطلع بكد المهر الحطيته مرتين

فلا عبالك تذلني بهالسالفه وكل شويه اطلكج واطلكج تره متخوف جلبي

خاف على نفسك لا ااااني ابطل واعوفك انته واهلك وفلوسك وشروطك و رجال اليوكفني

بوكتهه

فركت وجهي بعصبيه وكلتلهه ...

- كلشششي باتفاااااااق صار بينه

بعد هاللغوه الزايده شكووو

- كول لنفسك انته الي بديت

- انتي كلشي عندج عناااد شكلج تعاندين

وانه اليوم روحي مطايقهه

- على نفسك

شسويلك يعني !!

- ريري وتالي شلوووون فهمينييي شتاليهه وياج

- تعدل اسلوبك وياي نشتغل مثل الاوادم

تضل بهالاسلوب من باجر اعوفك وامشي

- ياااسلوب ريري هو انه شحجيتلج !!

مو بكلشي هادىء وياج ومحترمج

- وصياحك عليه شنووو؟؟؟

مالك خلك وعصبي اني شكوو

تجي تطلع حركتك بيه

- لج هنه حجايتين على اللبس هسه كفرت حجيتهن

- حييييدددررر افهم بس افهههم

اني سوالفكم هااي مااااا اعرررررفهن

مافتهمهه لبسة البوشيه والجواريب والجفوف والعباه هذني ماعرفهن

شمعرفني بيكم اذا طلعت الايد تتخبلون !

شمدريني المكياج عدكم مصيبه وينزل الروس ويضيع الشرف والهيبه !!!

-بس انه كلتلج هيج وهيج حياتنه بعد شكو

-ايييي شفتني ماقتنعت تحاوووول وياي

مو تجي تصيح وتتامر

اااانييييي محد يتأمر علييييه اووووكييييي

بيك خير اقنعني لتجبرني

لتكرهني بيك من هسه وتخليني اسمط ابو ابوك بالعيشه وياي

تره راسي يابس ومن اعاند ويه الاكرهه

اطلع رووووحه واسمم عيشته وماعوفه

فهمممتتتتتت

اعديهه بمزااااجي هالمره لان بعدنا جدد ممتافهمين وبعدنه محد يعرف شي عن الثاني

بس هسه بعد وضحححتتت

خلي نجر عدل

- جري عدل انتي

انه ماعندي شي وياج واشتريهه شرايه

هداوتج مادور مشاكل

- اني مو هاديه

طبعي حار اذا هديت معناهه اكو مصيبه

راح اسويهه

بس وياك ماتلاغى بعد

وانته شوفلك طريقه تتفاهم بيهه وياي غير هاي الطايح حظهه

- ضبي لسانج بالبدايه وبعدين تعالي احجي وعاتبي

-لساني زفر واكطع نفسك منه

بعدين اني مغلطت ولا جاوزت عليك

شكو نطيت

- ريرررري ريررري دخيل الله كافففييي

تعبان والله كافي اسكتي كاافي

كعدت وضليت افرك براسي وشويه وسمعتهه تكول ..

- ادري مقهور على اختك وضاله غصه بكلبك عليهه

بس تره عادي تعود الحجي مرات بالقهر ينراد

لايضل كلبك رجيج بعدك باول الطريق

شد حيلك

و حق اهلك اني اجيبه لتخاف حتى لو انته متكدر تكمل اني اشيل سالفتهم وحدي واخلصهه

ضليت اسمعهه ومنداريت عليهه

ورثت جكاره ثانيه وضلت بمكانهه

واكفهه ..

تمددت وكلتلهه ..

- ليش قبلتي تجين وانتي ممحتاجه فلوس؟

- شعليك انته

- سألتج جاووووبي

مثل ماتعرفين ليش عايش وياج لازم اعرف عيشتج وياي على شنوووو !!!

احجي حقي اعرف شنو غايتج وياي

مو اضل وياج عمياوي

- خايف اغدرك يعني !

-اي خايف من كل شي خايف وياج بس جازفت لان محتاجج

قدري هالشي واحجيلي خلي اعرف من هسه حتى مااعتب  عليج بعدين من تبين سالفتج

اجتي كعدت يمي و ورثت جكارتهه الثالثه

وكالت ..

- عمي جان يريدني اسافر واني ماريد

واجيت انته واستغليتهه فرصه حتى ماروح

- ليش هيج ضايجه من السفر

- يريدني اتزوج هناك بايران يمه

مدبرلي عريس عمره بالستين

- عمج صاحي !

- اكثر مني ومنك

عمي مو. رجال بلوه

عقل اكشر

- ليش يريد يزوجج لهذا ! علمود فلوس يعني

- لاا بس فد سوالف مال تأمين وهيج

سوالف ادوخك عوفهه

المهم اني حجيتلك حتى تشيل هالخوف من راسك

تره اني ماغدر كلشي عندي طك بطك

بس شو من صفنتلهه وياك وشفتهه تفيدني قبلت

- هااا الحمدلله يعني نيتج صافيه وياي

-اي

- زين وهذا التعهد الخليتيني اكتبه مال شنو بعدين شتاخذين مني

- مو كتبناه لبعدين

يعني يبقى لبعدين

- بي فلوس

-اي بي كلشي بي لتلح كافي خلصنه حجي

- اكلج

هواي ادخنين شبيج حاركه روحج هيج جره وحده

- بكيفي مرتاحه هيج

- انتي مزاجج بالثانيه ينكلب ياستار منج

- وانته خلكك طويل تتحملني

ضليت اباوعلهه وهي تجر نفس من الجكاره

كلتلهه..

- عمج زين وياج لو يدك بيج الناقصه فد يوم

- لا زين وياي

- چا ليش متفاهمتي وياه بسالفه السفر

- جان يحجي لمصلحتي بس اني معجبني

اكره الرياجيل الكباااار تلعب نفسي منهم

كلتله لو تكولي تعالي سممي وموتي اجيك بنفس اليوم بس مال تخليني اكابله واكعد

ويضل يزن براسي ماااسويهه لو اموت

- هااااا

زين شعجب قبل تتزوجيني

- سوالف خاصه بيناتنه كم مره كلتلك لتدخل بالخصوصيات

- انتي تحجين اليعجبج وتسكتين

متكملين السالفه

- احسن

- جبتلج موطه هسه ماعت خليهه بالثلاجه

راحت اخذت العلاكه كلهه دحستهه بالثلاجه وضلت واكفه تفرك راسهه وكلتلي ..

- متنزل ؟

- ليش تريدين تخلصين مني

- اي وياريت لو تستعجل

- ههههه جذابه

كعدت وضلت تباوع لنفسهه بالمرايه

كلتلهه..

- شبيييييج

- انزل عاااد يلا اريد اخذ راحتي

- عايفج ورايح يلا ارتاحي

نزلت وضليت كاعد ويه احمد وامي وابويه

نسولف وهو يضحكهم بسوالفه

صارت ساعه ١٢ عفت احمد ينام وصعدت

لكيتهه هم نايمه ..

بدلت ملابسي ونمت يمهه ..

حسيت عليهه تكعدني فتحت عيني وركزت بوجهه ..

- شكو شبيج

- كوم شوف شكو بالسطح

خاف وكع شي دكوم متسمع انته محسيت بهالصوت

- عادي هاي مال هذوله المدري منو

- هههههه لك شبيك تمسلت دصحى ولك ركز وياي

-ولج صاااحي بس همه مدري منو

شسميهم يعني

كايلج بيت مسكون وهاي دايماً هيج يدبجون بالسطح جنهم حصونه

- عزاااا وانته متختخ ونايم وهمه فوكك يدبجون!

- اي شسويلهم ! ينشافون همه واصعدلهم دك بالصونده يعني!؟؟؟

هاي جايبج تخلصيني منهم

- واني اصعد اربطلكياهم بحبل !؟

وهيج متأمل بيه ؟!

- بعدين نحجي ريري خلي نكمل نومتنه هسه

- يابرود كلببببك ولك يانوم هذاااااا الضل بالعين والجن فوك راسك يطربكون

- متعود معليج عوفيني انام

ضلت تحوص بالغرفه تالي فتحت الباب

وطلعت .. رحت وراهه وشفتهه تريد تصعد

للسطح جريت ايدهه وهي كمزت وبس شافتني ضلت تضرب بايدي

خليت ايدي على حلكهه وجريتهه للغرفه

كلتلهه..

- شودااااج هناااك

- غير داشوف شكو شكومك انته شجابك

- شتشوفين ولج لتبليني بيج

انطي صبر وبعدين نكوم نشوف سوه

- يبووو ياطوله خلكك

شوكت يعني شوووكت تره بزعت روحي

- مصارلج يومين وبزعتي

شحال انه الصارلي سنين

- حيدر شنسوي احجي هسه

هذول شنو منو شنسويلهم خلصني احجي

باوعت الساعه بالاربعه الا عشره كلتلهه..

- حروح للحمام اتوضى واجي بين متصير صلاه نحجي شويه

- ويين عايفني

طفرلي واحد هسه شكول شحجي

- چا من نزيتي عليهم ماخفتي يطفرلج واحد

- ااا اجي وياك

- للحمام !

-ايي

- ههه امشي امشي

اخذتهه ونزلنه للحمام ضلت هي واكفه بالباب

وانه طبيت وهي ادك بالباب ويلا ويلا

فتحتلهه وضليت اغسل وهي واكفه تتلفت

وتباوعلي وانه اتوضى واضحك عليهه

طلعت جان تكلي .

-اوكفلي هنا

- يلا روحي شبيج خايفه

- مخايفه بس هيج اجيت ع الواهس

- مبييين حييللل

عفست وجهه وطبت للحمام ضليت واكف انتظرهه وشفت سيف طلع من غرفته ويتلفت

صحتله وهو مارد عليه ورجع لغرفته

طلعت ريري وصعدنا كلتلهه..

- هذا سيف كاعد يمكن هم خايف وسامعله شي

- شلون ميكعد على هالهوسه اصلا متعجبه باخوتك شلون مكعدو

هاي كل يوميه هيج !

- اي نادراً مايكعدون ويشوفون شكو

الا بالمراات القويه كلش من تصير جوه هم يعني ميصعدون للسطح ابد

- ليش هم تصير جوه شغلات !

- اشكااال ريري اشكااال

اكو ساعات يهيجون بيهه

بحيث مره انثبر البيت بالتركع واخذنه الجهال وطلعنه بالشارع بنص الليل

- وشرجعكم لهالبيت صخام بعينكم ماهجيتو منه

- وين نروح متكليلي

شعبالج سهله كل يوم واحد شايل لبيت

هاي كضيناهه قران على بخورات وكعدنه وسكتنه

- بعد هم رجعت هالبلبله لو بس مثل هاي بالسطح

- لا ضلت بس بالسطح

مادري شيجيبهم هنا احنه بيتنا نظيييف

واهلنه كلهه ملتزمه بصلاتهه والقران

والبخورات  وابويه الف مره يسوي تحصين للبيت ونفس الشي ياخذله  فتره بيت هادىء

بعدين يرجعون يحيرون شيسون

- لاااازم اكو فد سبب

- خلي اصلي واحجيلج شنو العرفته

صليت ورجعت تمددت يمهه وهي

نايمه على بطنهه وتباوعلي ..

كلتلهه ..

- من وكت ماتوفت امل وضلينه محتارين بملوكه و وكعه ابويه هم كلهه التمت سوه

فمخبوصين بيهم وما ضل بالنه بعد اي احد غيرهم ،

عم ابويه رجال جبير شاااايب ومتقي الله

كاف خيره وشره عن الناس كاضيهه بس عباده وهذا وجهه نوراني من تكعدين وياه مابودج تكومين ولا تلتفتين عنه

هو عايش بالكوفه متعودين نروحله كل شهر لااازم احنه يمه

هو جان يدري بالصاير ويانه وهم جان يرقي دبات مي ويوصينه نغسل بيتنه بيهه ونسويهه

ونفس الشي يرجع المهم

اخذنا فتره فوك السبع شهور احنه مرحناله وسلمنه عليه جان هو يجينا

هو جبير عمره بالتسعين سنه ومايطلع على احد من شفناه اجانه فد استحينه منه وضلينه بس نتعذر منه لان كاطعناه هالفتره

هو شاف الوجوه كلهه متكأبه ماحجه شي

حطوله الغدا مااكل وشسوه

كالي اخذني على بيت عمك اسلم عليهم وارجع كبل ماتظلم

جان وياه حفيده هو جايبه بسيارته بس مو كلش يندل

فاخذته لبيت عمي الي هو بيت السيد

كعد وتغدا يمهم

عاتبته كلتله حجي ليش ماتغديت يمنه

كالي انه ماتغديت حتى اطلع واحاجيك مو كصور منكم بس ردتك تجي وياي

كلتله خير حجي

كالي طلع الولد خلي نحجي

وترخصت منهم وطلعو ضلينه بس احنه

عاد كالي ..

بس بيك أمن على اهلك وراح احجيلك شغلتين تسويهن ولاتخجل منهن

كالي اول شي تروح ادورلك واحد سحار

كون من هذوله التوب

تروح تكعد تحجيله سالفتكم وهو يحلهه

كلتله حجي اروح اسوي سحوره لبيتي واهلي وانه من اهل الله !

كالي مثل ماحجيلك تسوي

تروح تحجي سالفتكم اله وتنطي شجم فلس

وهو راح يكلك هاي شبيكم مابيكم

لان احنه ساده نعرف ونفهم هذا عمل شيطاني نكس ونكدر نعالجه للغير ومعالجينه صار سنين ليش يم اهلنه توكف شغلتنه ماتنجح !!

الاا اكو واحد مفتهم الي نسوي ضده ويرجع يزيد فوكه

وهالشغل اليشتغله محد يعرفه شنو

وشلون جاي يصير الااااا ابو الانه نفسه

وهذوله همه واحد يفهم ع اللاخ

فتروح تسأله شجاي يصير وشنو نوع العمل اليسوي هيج اعراض وهيج شغلات بالبيت

وهو يفهمك كلشي

- عجبني هالشايب يفتهم

وديني عليه اشوفه مو تنسى

- اي اخذج اله بس يصيرلنه مجال اخذج

- ايي كمل شنو الشغله الثانيه

- الثانيه كالي فتش بيتكم الغراض الملابس

الحديقه السطح كلشي فتشه ولو تلكالك بسمار

هم جيبه وتعالي

- ولكيت شي ؟

- الصراحه مادري اذا هو اكو وانه مافهمه

لو ماكو وانه اوهس

مادري بس ضليت ادور على الاكدرله

لان تعرفين البيت مايفرغ واخذ راحتي بي

ولا اكدر افتش بغراض احد

ضليت بس الفوك الفوك ادور بي وكلشي عادي مالكيت شي يسوه واخذه اله وجنت احجيله هالشي ويكلي ضل دور

بس انه مليت وعفتهه بعد التهيت بغير شي

- بشنو التهيت ؟

- باهل السحوره التهيت والله

- رحتلهم يعني

- ايي رحت هو هنا بديت افهم واخذ حذر

اسمعي

حجيت للسيد هالسالفه وهم عنفص عليه وسواهه شكبرهه ومخالني اروح عاد عفته

ورحت وحدي ادورلي فد واحد مضبوط

واكو منطقه معروفه بيهه بيوت السحارين

رحت هناك وسألت ياهو اضبط واحد بيهم

ودلوني عليه رحت حجيتله مقبل يساعدني

يكلي شأضرب انضرب وماخاطر بشغلي

عفته ورحت لغيره ونفس الشي ميقبل لو يريد بالملايين حتى يحجيلي حجايتين يمكن بالخمس بيوت فريتهم ومستفاديت شي

وربج هيج صدفه كاعد اباوع باليوتيوب

مقاطع على هذوله اليدورون بالمقابر السحر

ويفتحوه وبالتعليقات عرفت اساميهم للولد

كلت خلي احاجيهم بلكت استفادلي شي منهم

وحاجيت واحد منهم بعده شاب صغيرون

هو ابو القناه وانطاني رقم صاحبه الي

بالتصوير طالع وخابرته حجيتله هيج وهيج

كالي تجي تطلع ويانه وتشوف بعينك وتفهم

انه ماكدر اكلك هاي هيج وهيج بيكم لان انه مو ابو سحوره انه بس افكهن واقراهن منهه

افتهم شنو هاي نوعهه وشيسون بيهه

كلتله هاذ هوه وياك

وضلينه نتواصل لحد ما طلعت مره وياهم

للمكبره

- عزااا بعينك رحت ادور سحوره بالمكابر !

- اي رحت چا شسوي غير اريد افهم شنو اليسونه وشلون

- اييي وشلكيت سويت احجيلي كلشي كلشي

- لكيت عجاااااييييب ريري عجاايب

من يومهه وانه المااي الاشربه اشك بي شي

وماخطي خطوه الا اسمي باسم الله والشي الاخذه من احد اقرا عليه يلا اكله او اشربه

وضال مبتعد من كلشي هاي الكاع الادوسهه

انتبهه عليهه خاف بيهه طكعه وتروح تبليني

اشكااال شفت

مااصدك بعد اكو ناس تحب ناس

كلهه تكره وتكيد على الي شفته ماكووو بعد ناس خيره وكلهه منافقه وكايده وحقوده

-ايييي هسه يلا دريت هاي اني اعرفهن

من طولي شبرين

- يجوز انتي عشتي بينهم وشفتيهم بس انه

عيشتي تختلف عنج

انه عايش كأنما بنص حضره امام هيج

جانو اهلي مسوين جو البيت

ومتعلمين كلشي على حب الله نتعامل بي

متخيلت اكو هالكد نااااس تكره وتأذي

يعني جنت كلش كلش اكول يمكن يطلع

واحد من بين ميه مثلا

بس طلع ويييين

يمكن هالميه بيهه خمسه زينين وخمسه وتسعين منهم شياطين

-اني عندي حاسبتهه

بالميه واحد زين وتسعه وتسعين راضعين نذاله

- كلشي يصير بعد الشفته كلشي اتوقع

ويجوز حتى هالواحد يطلع هم مثلهم فد يوم

وتكمل الميه مشيطنه

- اييي ليش لااا

شفت هناك احجيلي

- شفت بلاااوي

مينحجن بس وعيت هواي من مشيت ويه هالولد

تعلمت شلون احصن نفسي من العمل الي افكه

وشلون افك العمل وابطله

تعلمت انواع السحر واشكاله وهذا لشنو وشلون يصير وشنو شغله

عرفت الشغلات الي يستغلوهه بالسحر

و اكثر مره تأثرت بيهه من فكيت سحر

جانت لعائله كامله ١٢ نفر كلههههم خاطيلهم

وجامعين اوراقهم وشغلاتهم كلهه بلفه وحده

هذوله جان مكتبولهم تفريق بين واحد وواحد

يعني يمكن همه تسع اخوه كلهم مكتوب تفريق الهم بين فلان وفلان لكيت تسع اوراق الهم حتى هذا يكوم يكره هذا ومو بس هيج

كره الولد لابوهم ولولد غيرهم وكره البنات لاخوتهم مدمريهه للعائله قاضين عليهه

كلش تأثرت بوكتهه وكلت هسه احنه هم

صاير بينه نفس الشي

هم مدفون بمكان اسامينه مثل هذوله !

حيييل اختنكت بوكتها وطلعت الدنيا من عيني

- يلا بلكي مثل مافكيت لهالعائله يجي غيرك يفك لعائلتك

- رادلهه حظ وبخت

-شبيك مو سيد انته ماعندك بخت !

- ههههههه ممستفاد منه الصراحه

- يعني متشور انته؟

- مادري جربي اذيني وشوفي اشور بيج لا

- تروح تطلع تشور وتعال شيخلصني

خليني بعيده وسعيده احسن

- هههه خواافه انتي ولج وين راحت سباعيتج

-تطلع وكت الصدك

كمل يلا حتى انام

-شتنامين بعد ننزل نتريك

-ماريد بديت انعس تره كلشي منمت

- يلا ميخالف ناميلج ساعتين واكعدج

خلي احجيلج بالمهم هسه

- ايييي

- شكد بقيت ويه الولد سنه و٣ شهور

ضبط انه اطلع وياهم للمكابر القديمه

كله من الصبح نطلع نفتر لنص الظهر نكعد نرتاح ونلزمهن واحد واحد نفكه

فد يوم واحد معلق على فيديو منزلينه بالقناه

وكاتب ..

لتعبون نفسكم بهالسحوره القديمه

هي من وحدهه باطله تعالو ادليكم مكان كل شبر منه مدفون عمل وكله جديد..

- صدددك يعني القديم يبطل !!

- لاا مو كله بس فد انواع

واكو منهن اصلا مو سحر هيج بس لململه شغلات يضحكون بيهه ع الناس وهي كلشي متسوي

- لعد شنو قصده هذا ؟

- هذااا قصده اكو شجم شغله هنه مايسون واحنه تعبنه نفسنه عليهن الظاهر هو من شايفهن يعرفهن ميشتغلن

المهم هذا جان واحد من اهل السحوره

سحار اباً عن جد وكاتب هو اسمه بالمعنى الصريح

كاتب اعمال وكذا وكذا ومخلي رقمه والفيس مالته وكال تواصلو وياي

والولد دزوني كالو هذا بعد يفيدك واجتك عدله روح خابره

وخابرته حجينه بالبدايه على سالفه الفيديو

وفهمني شجم شغله هو يعرفهن ميفيدن

كلتله زين ليش تعلمنه هالشي وتروح تسوي للغير ؟

كالي .. شوف محتوى قناتي وتعال خابرني

رحت كلبت بقناته كلللللهههههه فيديوات

تعلم السحر

بالخمسين مقطع يمكن يشرح بيهه كل نوع شلون وشنو الشغلات اليحتاجهه وشيكتب وشيرسم كلشششي بالتفصيل حاجيه بيهه

وجان بالمقطع يكول ..

انه اعلمكم حتى لا يضلون يضحكون عليكم ويسحبون منكم فلوس بالملايين تره الشغله كلهه متكلف بالزايد خمسه الاف دينار

بس هالفلوس كلهه يضحكون عليكم وياخذوهه للجيب

طلع هذا شويه نص ستاو

يعني ينصح منا ويجفص منا مينفهم شبي

المهم خابرته مره ثانيه ماكلتله ليش هيج تنشر وتعلم ولا شبيك متناقض بس سألته على مكانه وكلتله اريد نحجي وجه لوجه

عندي سالفه طويله وهم منهه تدلينه على المكان الكلت عليه ونتشكرك

كالي تعال ونطاني عنوانه

ثاني يوم من الغبشه طلعتله وجنت متواعد ويه صاحبي هم كال اروح وياك ورحناله

جان عنده مكتب بعماره هناك رحناله

مو للبيت .. بعده صغير يعني يطلع ٣٦ عمره هيج بالحدود ومتأنق ومكتبه شكبره شكده

وشقايجي

كال انه متابع مثلكم هواي باليوتيوب

والي اكله تعال ادليك يخاف مني عباله اضحك عليه بس انتو خوش متخافون

سألناه وين المكان جان يطلع خارطه

لمكبره وادي السلام وكعد يرسم مثلثات

على شجم مكان ويكول هاي الاماكن احنه

ندفن بيهه وعدنه جماعه مخصصين بالدفن

وهنا وهنا يدفنون اذا ترحون تلكوهه ملضومه

لضم بس شرط تمشون بشكل المثلث هذا

وتلكوهن كلهن

- هذا من صدك يحجي لو يضحك عليكم

-لا من صدك هسه فد شويه اشوفج قناته

صاحبي بوكتهه كاله ليش تدلينه على شغلكم

شنو غايتك !!!

كاله متأذي منهن واريد اخلص بكل طريقه

واكو جماعه همه يريدون تطلعوهن حتى يرجعون يشتغلوهن من جديد ويربحون اكثر عليهن وطلعو نص منهن بس بعد اكو كومه

روحو انتو هاي شغلتكم وطلعوهن والكل مستفاد

كلناله متخاف نخبر عليك الشرطه

نكول هالحجي للناس بقناتنه ويروح سوكك

كام يضحك ويكول اذا تريدون هسه افتحو تصوير واحجو عليه وانه هم احجي وياكم

والشرطه هسه لو يجون للباب ويشوفوني اشتغل هالشي بعينهم هم مياخذوني

كال ادري بيكم راح تضلون تستفادون مني

ومتسوون شي انتو حدكم تنبشون كبور

مابيكم خير علينه

- ههخخخخخخخ قصفكم

- ههههه ايييي صدك احنه مانندك بيهم

- بس خوش سحار هذا سبورتي

- مو شلون ماجان

يمكن زهكانه روحه من السحوره

بحيث هو يخابر ويسال ها شحصلتو اليوم

وشخلصتو يامكان وكال هالمكان الي تروحوله كل الاعمال الي بي شغاله ماكو عمل منهن مال فهاوه كلهه دسمه

وصدك من رحنه هيج نلكطهن تلكط

-شلون تندلوهن

- مبينه هي

كل كبر نشوفه مفطر شويه او بي فد طابوكه تتحرك لو زايحه من مكانهه شويه هاي معناهه اكو شي هنا

واكو نركز عليهن مثل كبرين متقاربات

لو فد اربعه صايرات اثنين بالنص واحد فوك واحد جوه لو الغرف الي بيهه يحطون فد خمس ست كبور هاي لازم نلكه بيهه لاازم

واكو هاي الكبور العاليه يبنوهه عبالك مناره

هاي اغلبهن نلكاهن محفورات من جوه

ومدفون بيهه اكثر من واحد والبقيه نشك بيهن من نضل نباوعلهن يمنه يسره نلكط فد زرف

ونحفره شويه ويطلعن

-يمممه شلون خلك خلكم

هاي هيج كلوبكم ميته!

- مو شغله ميته كلوبنا

بس هي ع الواهس تصير حماس وحاسبيهه شلون مغامره نحس فد انجاز نسوي من نلكالنه واحد

فيصيرلنه واهس نكمل ونطلع اكثر

وانه جانت روحي بهالسالفه اريد افهم كلشي بيهه فذبيت حيلي عليهن

- زين متخافون لا يصيرلكم شي منهن

- ماخذين حذرنا مانجفت عليهن عمياوي

كلمن مسويله تحصين والي نفتحه الا يتنكع بمي وملح

ونلزمه بوصله لو نلبس جفوف

وهو هذا الولد ابو الاعمال كال لتخافون

العمل يلوح صاحبه بس وحتى لو فرضاً لاحكم شي فهو خفيف ميأثر بس تقرولكم سورتين تسبحون بميهن يروح

- هااا زييين هذا اجاكم نعمه

كلشي علمكم

- اي تدرين هو هسه طلع بي سرطان

بالبلعوم وكاضيهه كيمياوي

- شوووف شلون رجعت علييييه اعماله

- هو كالهه اذني هواي واريد اخلص منهن

يمكن جان يدري بنفسه مريض

بس انه ادعيله بالمغفره دايماً بكل صلاه

خدمني هوااااي هواااي ولحد هسسسه هو وياي اسأل عليه ويسألني شصار وياي

وشككد يوصيني ادعيلي وحتى مرات يكلي جيب الولد وتعالو تعللو يمي

بس همه ميقبلون يرحون ومرتين اخذت

صاحبي عباس هذا رحت وياه اول مره

ورحناله جان ماخذله جرعه كيمياوي

ورحنه سلمنه عليه

- اي شكو بيهه رجال يريد ينصلح

هاي بس دلاكم وعلمكم عليهن تسوه ذاك الحساب

-اي والله ودلاني بيج هم

- اااني. ! شعرفه بيه ولك ؟؟؟

-ههههههههه ميعرفج بس خلاج بالي

- شلوون احجيلي من البدايه شكالك

- مو صار بيناتنه تواصل وانه جنت اشوف طبعه شنو بالبدايه يعني محجيتله سالفتي

لحد ما رحنه للمكان وطلعنه بالميه عمل

وكل يوميه ضلينه نروح وولد جدد هم اجوي ويانه وتقسمنه فرق كلمن بجهه بنفس المثلث

بعدين شفت كل حجيه ويانه صدك

عاد رحتله وحدي للمكتب وكعدت

كلتله ...

هيج وهيج صار عدنه وهيج اخوتي ماتو

وهيج نسمع وهيج نشوف كالي هذا سحر اسود وهذا مال موت خلاص مابي مفكه

كالي هذا يجي يااما من اكل وشرب فيصير الواحد منفوخه بطنه لو يسمن

يااما من بعيد فتلكاه كبل يوكع بفراشه

وماتنعرف علته وين

وحتى على ابويه وملوكه سألته لان ميمشون

كال هذا الي مسوي العمل متقصد يسكط هالمكان وهذا يخليهم هيج مربوطين جوه ايده

شوكت ميعجبه يموتهم بس يضربهم فوك الحزام يعني اذا ضرب فوك بصدرهم او راسهم كبل يموتون

- صخاماااات

يعني اختك وهذولاك كلهم هيج ماتو من ضربهم فوك بجسمهم

- كال اختك اي انضربت

بس اخوك ومرته لا هذا عملهم مال مره وحده

موت فالجن يبدي يشتغلهم شويه شويه

يقضي عليهم بالخبال لو يتلف اعصابهم والدماغ بس اختي جان عملهه مقسم يعني كل فتره ينضافله شي مو مره وحده ويختمه

- صخااامات النوب مقسم وختم وعزا بعيني

هاي شلون هيج ولك فهمني شلون حنعرفهن

- نعرفهن بعدين خلي اكملج

شكالي بعد

كال مدامهه اختك شافت بعينهه وكالتلك مره

وبنص بيتكم معناهه العمل بيتكم مو من بعيد

لان هيج شغلات متطلع الاااا من نص العمل

ونص البيئه مالته

وكال اختك مانضربت من شافتهه انضربت لان درو بيهه تخرب شغلهم

كال هالشغلات الي تنشاف متأذي بدون امر

تخووف ايي بس متأذي هيج الا بتسيير من احد

كلتله الحل شنو شلون اخلص من هالشي !

كالي شوف لااا تحصين يفيدك ولا رُقيه

ولا تنظيف وتطهير للبيت تفيد ولاا حتى تشيلون من البيت ولا تكعدون بامريكا هم متفيد كالي كلششي ميفيدكم تسووه

السحر الاسود ماااايتعالج الاا من ينلزم لزمه ايد وينفك ويتكطع يلاا تخلصون منه

كلشي غيره تضحكون على نفسكم بي

كلتله وين الكاه انه ادري وين مدفون !!

عاد كالي بيتكم تلكاه مادام ابو البيت مميت

لحد هسه فتلكاه بالبيت لان لو مدفون بمكبره

جان ابوك ماطول شهرين او اربعه ويموت

او اقلها يتخبل مثل مصار لاخوك ومرته هذولاك جان مدفون بكبر عملهم متتلاحكون عليهم

بس اليطول هالكد معناه بغراضكم وبينكم تلكوه وشوووكت ماا تشوف حالهم يبدي يوصل للموت اعرف اشتغلوه من جديد

وسفروه للمكبره

- يمممه عزاااا ولك الشغله مابيهه شقه !!!!

- چا شعبالج ريري ضيم هذااا ضيم

تنجرع الموت بالكطاره ومانكدر نكول كافي

- اوووف يضيمكم اوووف

بس همزززين مادافنيه هناك جان راحو بيهه

- هو وصاني كالي ضلو ساكتين وعايفين كلشي لتسوون لا تجيبون سيد ولا ترحون زيارات ولا تشتلغون بالبخورات كلشي ابتعدو لان هاي مضره مو نفع

كال العمل ميبطل بيهن بس بفكه يبطل

والجن المسخر لهيج شي ميخاف من هالسوالف بالعكس يأذي الي يجيه بهيج طرق

كال خلوووه عوفوه العمل عووفوه

اول شي راح الشخص المشتغله يأمن

هو مسيطر ويعوفكم

وثاني شي تكسبون وكت وادورون عليه وثااالث شي وهو الاهم

تفهمون منو الجاي يسويلكم هالعمل

كال هاي اهم شغله تعرفوهه

لان كل ماتبطلوه هو بينكم ويعرفكم

وراح يرجع يسوي الاقوى

يعني يا ريري هاي مهمتج تعاشريهم وتكشيفلي عن وجوهم

انه ماكدر لان رجال اطلع اليوم كله بالشغل وارجع ويامن اريد اكعد يعني وافتهم !!

هالشغله شغله نسوان وانتي اريدج تكعدين بينهن دكي وياهن ناعم لا تضلين رافعه خشمج عليهن وتتعاركين وياهن لا النوب يجيج السره استري عليه الله يخليج

- ايييي فهمت ماتعارك بعد

بس كولي بعد شسوي

- اي ضلي وياهن عاشريهن صيري بكلشي وياهن مو بس جناينه كرابتنه هم

انه كلهن اعرفج عليهن واخذج الهم بيت بيت

وانتي اخذي ارقامهن وضلي تواصلي وياهن وبعد باسلوبج وخبرتج انتي افهمي نفسيتهن

وشبيهن مابيهن

- اوووكييي

- بس بنفس الوكت اريد عينج على اهلي

وملوكه هم لتعوفيهه خطيه

تره هي عايشه وحدهه بس اخوهه مرات يكعد وياهه

و عمتهه شايله شغل البيت متلحك تكعد وياهه

وبيبيتهه بعد مره جبيره سالفه سالفتين تحجي وياهه وهي ضاله لا تتحرك لا تطلع

بس نايمه بفراشهه

شفتيهه شلون فرحت بيج من كعدتي وياهه

وحضنتيهه هي خطيه عايشه وحدهه

مرات تكعد تلون  لو تباوع تلفزيون بس هم تمل

كل عمرهه يمشي هيج

- لتخاف ملوكه يمي بعد اني اخليهه تنتعش

بس اخذني عليهه يوميه

-اي اخذج هنه خطوتين يوميه نروحلهم

بس حاولي ترتبين وكتج بين البيت وبينهه

ماشي

- اووكيي

هسه مكلتلي هذا شكالك عليه

-هاا مو كلتلج هو خلاج بالي

مو انه دايما اخابره واكله مادبرت وياي

كلشي مالكيت وهذا بيت كلشي بي من غرض مو مكبره وبسرعه الكطهه وتبين

وماكدرت اعرف منو اليسوي هالعمل

ماكدر افهم النسوان وانه كلش بعيد منهن

فكالي دبرلك مره تكعد بينهن وتجيبلك كل حجايه وخطوه الهن

كلتله منين ادبر كالي لازم تلكالك وحده

تتفهم هيج شغلات وتكدر تستفاد منهه

وحده ذكيه تعرف تقرا الوجوه مو ينضحك عليهه بكلمتين

فضليت من وكتهه ادورلي مره تناسب هالشي

والصراحه انتي اول وحده انه اتجرأ واحاجيهه

- هااااا

- اي والله ماحاجي لغيرج

صح مرات تجي بالي فلانه وفلانه بس

ماأمن بيهن اكول يجي يوم ويغدرني

لو ياخذنهه نقطه ضعف عليه فماحجيت لاحد غيرج من لكيتج اجيتج مستقتل

- ههههههه حدوره خوش تفكر

- انجبي احسن لتكولين حدوره لا اخنكج وعلي

- ههههههههههههههه شكددد اتونس عليك

خرررب لك انته اول واحد يونسني بعد كانيور

- خلف الله عليج

اكلج شو هم نعست مثلج

- ايي واحنه شنمنه !!

- خلي نام فد ساعتين وننزل

- حيدااااار

- صوتج ميطمن .. شكو ؟؟

- خلي انام يمك

-هاااا ؟؟؟

انداريت وباوعتلهه وهي عاضه شفايفهه

وضحكت كلتلي ..

- بس هيج يعني شويه

- ليش شعجب !

- هسه ردت روحك شبيك يااا

- هههههههه خباااال

تعالي نامي

-اندااار لتباوعلي

- هههههه شلوون بلوه

انطيتهه ظهري وهي دنت راسي دفعته لطرف المخده وخلت راسهه وضلت لازكه بظهري .. وترتني هيج مخلتني انام

كلتلهه ..

-شبيج خفتي ؟

- اي شويه

- هاي عود انتي ام كلب القوي

- معليك هسه عوفني اخاف بعدين وكت الصدك تلكاني اصيدهم صيد

-ههههه اذا هيج زين خليج خايفه ومرتاحه يمي بعدين طلعي طاقتج

- ايي اكولك وين نتغده اليوم ؟

-هههههههههههههه من ايدج مريتي

-درررووووح من ايدي هو اني شعرف اسوي

- تعلمي ريري ميصير تضلين متعرفين طبخ

-علمني انته

- شعلمج هواي صارن مالحك

- بعدين بعدين خلي انام اسكت يلا

ضليت اضحك وهي تحوص بعدين نامت

وانه تعبت اريد اندار واخاف تكعد

تالي حسيتهه نامت فد مره يلا انداريت عليهه

ضليت اباوعلهه شلون صايره نومتهه هيج بنص صدري ..

انتبهت على بشرتهه من نوع حمره

بيهه مثل نقط دمويه صغار صغار منتشرات على وجهه وبدايه صدرهه واذانهه هم حمره

بس بشرتهه مو ذاك البياض تنطي على صفار ..

حواجبهه خفيفه ومحفوفه مسفطات شعره شعره بس خفاف ... شعرهه سرح حيل

ومدرج لونه جوزي فاتح ..

عندهه شام باذانهه وبزندهه و وحده بارزه

بنص صدرهه ..

شفايفهه منفوخه وملمومه ورديه

من صفنتي عليهن حيييل اشتهيتهن وصار كل بالي عليهن ..

شميت شعرهه عجبني قربهه هيج مني وبهداوتهه هاي ..

تمنيتهه لو صدك نصيبي بغير هالظروف ولو صدك هي بنت بيت

وتصير قسمتي وياهه عدله وتطلع هالجذبه الجذبتهه على اهلي حقيقه وصدك نحب ونتزوج ونجازف ومنفترك

يمكن انه بهاللحظه تمنيت تصير عندي مره

كلبهه عليه اكثر ماتمنيت ريري لذاتهه وشكلهه ..

بس ردت صدك اعيش الزواج والمحبه والاهتمام ..

طار النوم من عيني بعد وضليت بس اباوعلهه وافكر .. هاي شلون عاشت وحدهه كل هالسنين ؟

اندكت الباب ورحت فتحت وشفت احمد

كالي ..

- هااا عمي خربت بعد صار عندك مره

بعد شيطلعك من الغرفه

- هاااا تغاار !! ازوجك ؟

- يلا الله وايدك زوجني شمنتظر الا اداعي يلا

-ههههههه يلا دورلك مره ونزوجك

- أسا عوف المره تعال كلي هاي صدك سيارتك

عندك سياره ومتكلي !!!

- ايي ماصارلهه هواي عندي

هاي مال المره هي اشترتهه وصارت بايدي

- بوووييييااااااي لك هم مره وهم حلوه وهم طاكه وتوزع سيارات لك عمي باليانصيب هاي متطلع متكلي وين لكيتهه

- ههههه مو اكلك عمك ذواق متصدك

- زيين العباس عليك خلي اخذلي فره بيهه

-لاااا اكعد لتروح تتخبل عليه ولك استر علينه

-العبااااس عليك عمي العباس عليك

أسا هيج عشر دقايق بس اطكطك بيهه شويه وارجعهه وبعده شارع فارغ أسا

- تروح تبليني وين تعرف تسوق انته !

- اعرف شبيه صغير

- لاااااا عوفهه

- العباس عليك عمي شبيييك حلفتك بالعباس تردني !

- لك شلزكت

- أسا هيه  مال ذله تنطيني السويج لو انزل ادعفسهه

- هههه شبتليت بيييكممممم يالله

امشي انزل أسا اجي وراك

- لك هله بعمممي الحنين هلله

عوف مرتك لتكعدهه زين

- اييي انزل عاد

سديت الباب و شفتهه كاعده كلتلهه..

-هذا احمد يريد ياخذله فره بالسياره

تقبلين ؟

- اطلع وياه لتعوفه وحده

-اي اكيد اطلع وياه

تنزلين لو بعدج معوزه نوم

- لاا راح انزل

- زين البسي على راحتج

انه حجيب وياي ريوك بس خدري الجاي

- حيدر تره السياره بيهه سلاح لا تخليه يدعفس بيهه ويشوفه

باوعتلهه زين وكلتلهه ..

- ولج شجاب السلاح بايدج ! وشكو مخليته بالسياره !!!

- تره مرخص لا عبالك مال ختله

شايلته وياي للامان كلشي يصير بيمن ادافع عن نفسي !!

- ريري بعدج وينج وين الاسلحه

استغفر الله

راح اجيبه هنا ضمي بالسياره خطر يضل

- شكو عليه هناك صارله كومه

منو يدري بي

- شغلتج تخوف ولج

- اي ديربالك خاف تلعب بذيلك وياي افرغ الشاجور براسك

- سيد واشور ديربالج مني

-درررووووح سيد مال لنكه انته

- لتحجين عليه ولج تره اشور بيج

- هههخخخ بشرفك اسكت ماريد اجفص من الصبح خليني نازكه اليوم

- اييي بربج ضلي هيج كدام احمد

-تريد اتلوكلك شويه واخليه يفلفل ع الزواج

-ههههههههه كيفج بعد شيطلع وياج سوي

خلي اضحك عليه شويه

- دروح جيب ريوك بسرعه لياخذك الواهس بالفره

- ماتأخر

نزلت صبحت على اهلي واحمد لكيته واكف يغسل السياره ..

نشفتهه وياه وطلعنه

يريد يدعفس ماخليه اخاف يطلع السلاح

مادري وين ضامته هي ..

وضل بس يسأل على مواصفاتهه وسعرهه

و اخذته فولنه بانزين وكالي خلي اسوق

طلعتهه من كلبه وعفته يسوق بس انبهه

على طول الطريق واخذنه ريوك وصمون حار ورجعنه للبيت ..

نزل الضحكه شعلوهه ومنعنش وراح كعد يم امي خبصهه بسوالفه ..

لكيت ريري بالمطبخ محضره الجاي و واكفه تخابر من اجيت يمهه سدته ..

وضلت تسألني على احمد واحجيلهه وهي تخلي الصينيه

وكعدنا ناكل انه وياهه وامي واحمد وابويه صينيته يمه ..

جاي اشرب جاي وهي سوت لفه وخلتهه بايدي وتكلي ..

- هاك حبيبي د اُكل ياعيوني

كبل غصيت  وضليت اباوع بوجهه واكح

وهي حاصرتهه الضحكه وتكلي ..

-ياا عيني شجاك تنفس اخذ نفس قوي

شجاك اي غير تنتبه يااااحبيبييي

باوعت لاحمد اللفه بطرف حلكه كامشهه وصافن علينه وهي تنطيني المي وايدهه على ظهري ..

شربت المي وجريت نفس و شاورتهه ..

- علكيفج وياي لا هيج يمعوده نوبه ثانيه اروح بيهه انطيني مقدمات لتفاجئيني

ماحجت شي بس ضحكت وهي تباوعلي

ورجعت تاكل ..

بس كملنه ريوك نزلو الجهال وراحت هي تغسل المواعين وانه اجاني تلفون  من شريكي بالمحل على فد مشكله بالشبكه صايره لازم اروح بداله اجيكهه لان هو طالع

وكبل ماطلع اخذت ريري لغرفه ابويه

وكلتلهه ..

- باوعي راح اطلع أسا  ويمكن مااجي ع الغده

-واني شلون اتغده !!!

- هذا المطبخ ودبريلج اكله

- حيدر مااااعرررف اضلللل اعيدلك

- ريررري شلووون افتحلج مطعم هناا

دبري امورج

- اووووووف معليه مااكل انتظرك ترجع وتجيبلي وياك من بره

- استغفر الله

لشوكت تضلين هيج !!!

- لحد متعلمني اطبخ تره ولاااا طكه اني

كلشي ماعرف ومالي خلك اطبخ

بيتي بطل زيت ماعندي وانته قيس بعد

- يلااا يمعوده بس مشيهه اليوووم

اجيبلج والله ادزلج بايد احمد غدا الج ولاهلي

زيييين

- اي اوكي

- زين انطيني رقمج مرات احتاجه

خما اضل ع الفيس

اخذت تلفوني وكتبت رقمهه وبعدين طلعت

واخذت وياي احمد ..

ضلينه وحدنه بالمحل انه عيني بالحاسبه

وهو يدعفس بالغراض ماكعد وبس يسأل هاي شنو وهاي شتسوي وشكد سعرهه

دزيته الظهر اخذلهم الغده وضل هناك يتغده وياهم .. وانه اكلت لفه كباب وباقي اشتغل

وصارت ساعه ٢ ونص راسلتني ريري

ع الفيس ..

- عوف كلشي وتعال

جفلت من رسالتهه وكبل خابرتهه كلتلهه..

- شبيج شصاير بالبيت

- تعاركت ويه الشراميط الزفرات هذني تعال افزعلي يلا

واذا حجيت حرف واحد عليه انكلب طنطل عليكم تره فوررررت اعصابي و لخاطر امك سكتت لحد هسه

.

.

يتبع

..♣️🩸 ماء مغلي 🩸♣️..

*Adzzon*

جفلت من رسالتهه وكبل خابرتهه كلتلهه..

- شبيج شصاير بالبيت

- تعاركت ويه هالشراميط الزفرات تعال افزعلي واذا حجيت حرف عليه انكلب طنطل عليكم تره فوررررت اعصابي و لخاطر امك سكتت لحد هسه

كبل سديت الخط من خبصتي وقفلت المحل بس الباب وطلعت واخابر صاحبي يجي بدالي وكبل رجعت للبيت خايف لا تروح تجفصلهه جفصه ومالحكلهه ..

عفت السياره بالباب وطبيت ركض

البيت صنته ماكو حس لاحد هنا

رحت لغرفه ابويه وشفتهه كاعده ومتجتفه وكالبه خلقتهه وامي يمهه كاعده تحاجيهه

كبل سلمت وكعدت يمهه ..

- شبيج ريري

ضلت عافسه الوجه وتباوعلي .. جريت نفس

وكلتلهم ..

- شو سنطه وين الجماعه ؟

امي انطتني بطل الماي شربت وهي تكلي..

- كلمن اخذت ويلادهه وصعدت

- علويه شصار من البدايه احجيلي

- سوالف جناين يمه لا يضل بالك

وانه كلتلهه لمريتك لا تخابرك وهي مارضت

مو كتلج يايمه لا تهبطين الرجال هاي جايج يركض ويابس ريكه

اباوعلهه وهي راح تنفجر وجهه احمر

وبس مبوزه وساكته .. وكفت وكلتلهه

-امشي وياي يلا

كبل كامت وطلعت كدامي وصعدنا لغرفتنه

مالحكت اسد الباب وهي بدت تحجي ...

- امهات الوصخ الجايفات هذني يجن يعلن صوتهن عليه !!

من امدااااني اذا اسكتلهن

لك اني هذني ادوسهن بنعالي اعدمهه لجهرتهن الزفره

لك اووووووف لو بس امك طالعه منها وعايفتني اكفشهن واكسرهن عظمه عظمه

- ريري شجااااج

هاي عود انه كايلج دكي ناعم وياهن

بعدهه ماعدت ليله على حجايتي ورحتي تعاركتي وكلبتي البيت عليهن

- لك يا ناااعم ياااحجي انتته شبيك شفتهمت وتحجي عليه !!!

لو ماتصدك تلكالك زله وتكعد تلعلع

- لسااانج للمره الالف ضبي لسانج وياي

واحجي عدل

- اهووووووو دروووووح انته رادلك خلك

واني مشتعل ابو ابويه

كعدت تدخن وتهز برجلهه .. ضليت واكف يم الميز واحاجيهه ..

- شصار فهميني منو البدا شنو الصار احجي

- لك هاااي الطحشه تكولي

خيه مو عروس انتي وبعدهه سبعتج مطالعه

ونكعد نخدمج

ام الوصخ حاطه عينهه على كعدتي وراحتي

تريدني اكعد اكنس وامسح الهه ولجايفتهه

- علكيفج لتنزلين ع الترابي ضلي فهميني

شحجيتن

- مو داكولك تريدني اشتغل

وكلتلهه شعليج بيه اني رجلي كايلي لتسوين شي عليج بس بامي وابويه

- شوكت كايل !

- لتجلطني ولك مو كلت بس اهلي صخميهم

-هاااا شبيييج

- ايي قصدي داريهم وهيج

هسه لتضل توكفلي ع الكلمه افتهم واسكت

- استغفر الله

وتالي ؟

- اييي كلتلهه هيج لو كمزت لربهه

ضلت تلعلع وشنو احنه نخدم بيج

نوكل ونشرب بجنابج والبيت شكبره شكده

رجلج ميفكر بس باهله هاي الكادر عليهه

واحنه نمسح جوه رجليه ونوكل

عاد اني استلمتهه بعد هي الجفصت

و كلتلهه رجلي تاج راسج ولج اذا جبتيه اسمه على لسانج اكصه وبكيفنه نعيش مو على مرامج والبيت مجان عايز لايدي يلا يتنظف

ويتعدل مثل ماجنتو عايشين كملو

اني عليه بالحجي والحجيه وانتن اركعن راسجن بالحايط شتسون سون

- ريرررري ريري لااا هيج دخيل محمد

لااا هيج تخربين كلشي أسا انه موصيج

تقوين علاقتج بيهن لو تكاطعين وتكرهين

-اييي شتريدني اخليهه ادمغ على راسي واسكت !!!

فوك ماافزعلك واكول رجلي واكص لسان اليحجي عليه هيج تجازي ومايعجبك !!

- لااا بويه عجبني عجبني بس انتي تفهمين غايتي شنو وهيج جاي تصعبيهه

- حيدر من الاخير شغل ماشتغل بالبيت

والي تلاسني احطهه واكتلهه مره الثانيه

هالمره لان امك ادخلت وجرتني يمهه اني سكتت لخاطرهه وعفتهن يلعلعن بس دخلي النوب وحده تحجي اووووويلللييي الااا ابيتهه بالكسور واطفي الدنيا بعينهه بس خلي يندكن بيه بعد

هاا وهاي الجايفه الجبيره الطنطل وجه الشووم الكاتلهه الوصخ والدود تكولي

المطبخ معليج بي غير ايدي ماتلزمه

بس البيت بعد من فوك لجوه عليج

انتي كلشي معندج اكعدي نظفي احنه عدنه كومه جهال رادلهم حيل

عود شنو دتتشمت لو تبسمر لان ماعندي جهال !

هاي همزين مو صدك جان انزرف كلبي واطك بحسرتي واكوم اشلخهه شلخ

واكوم مطبخهه فوك راسهه الا اركع مواعينهه بنص كفشتهه المدبكه المكمله

ام الخياس تجي تتامر براسي متدري لو بغير هالبيت طالعه بوجهي جان شسويت بيهه

- لا اله الا الله

ولج كافي اسكتي عوفيهن ولج شلون حعوفج هنا واطلع لتسودنيني ريري كبري عقلج لخاطر الحسين

هنه مسحه وكنسه امسحي وفضيهه شكو داعي لهالحجي والهوسه

- شنووووو يممممه !!

ااااني اكعد اكنس وامسحلهن !!!

شبيك انته شبيييك

جايبني انظف واخدم باهلك ولك ؟؟؟

لتطبك وياهن حيدر تره ابيس بيك انته الثاني

- ريررري جاي تفهمين انه شريد لو لااا

-لاااا لااا كلشي مافهم

هذني خلن عقل براسي

- چا رجعي عقلج ونحجي لتضلين تعبيني هيج

-حيدر ماشتغل شي غير الحجينه بي

لاتكلب هسه عليه

انته كلت عليج بااااهلللييي

مكلت تعالي امسحي وصخمي بعينج

ضليت افرك بوجهي واهدي بنفسي

ورحت كعدت يمهه ..

- ذبي جكارتج خلي نحجي

- متحجي هسه هي بحلكك لو بحلكي

-لج تخنك طفيهه عاد

- اذا تريد تقنعني بحجيهن لتعب نفسك

كلشي ماسوي

اني بيتي بالكوه انظف اجي هنا اصير مصرع شغل الكم !!؟

- بس اسمعيني

هسه انتي يهمج منو هنا كليلي ؟

- ميهمني احد تهمني فلوسي وشغلي وياك وبس ولانعل ابو الراح لابو الاجه

- زين زين

هسه فلوسج وعندي وشغلج وياهم

غير تشتغلين عدل حتى تاخذين فلوسج وترجعين لبيتج وترتاحين

اذا انتي كاضيتهه بس مشاكل شوكت حتركزين وتشتغلين !!

افهميني ريري انه من اكلج سايريهن

مو قصدي اتعبج ولا جايبج خدامه هنا الهن

بس حتى تضبطين امورج

هذني المصخمات التكولين عليهن هنه اهم شي عدنه منهن تكدرين توصلين لكومه نسوان بعد

غير تضبطين وياهن ويصيرن يعرفنج على فلانه وفلانه وهيج شويه شويه تمشين بشغلج

- اتلوك بس مانظف

- عيني تلوكي براحتج بس تره التنظيف كلش يفيدج

كولي شلون ؟

- شلون

- اول شي راح نتطمن البيت نظيف بايدج

مامرشوش شي منا منا

وثاني شي تصيرلج فرصه ادورين بالغراض

وتعرفين مكان كل شغله وشكو بيهه وراهه

والبيت كله يصير بايدج تتحكمين بي وهاي كلش تفيدنا هالسالفه

وهنه عليهن المطبخ وانتي خلصتي منهه مو متعرفين تطبخين هاي اجتج عدله بعد

- بس هنه كالن كلمن تطبخ لنفسهه يعني كلمن جدرهه وحد بعد

شوفلي حل

- اي يلا بعد احسن حتى نأمن بأكلنه

تعرفيني انه كلش اتخوف من سالفه الاكل

- واااانيييي ماعرف اطبخ صار مليون مره اكولك ماعرف اصخم بالطبخ مافههههممم

- عمممي ااانه اعلمج بس انتي اوكفي وسوي انه كلشي اعلمج زييين

- تعلمني اسوي غده !! واذا طلع محروك ميبس معجن شسوي ؟ اذبهه براسك تره

- ههههه ذبيهه براسي هي ضلت على هاي

- يضحك ابو كفشه شجاريلك انته كاعد متختخ بمحلك وعايف الكراب عليه

-هههههه هااااا حجالج احمد

- لك شايف لو جايني بهذاك شكلك كبل اشحتك من الباب

عزاااا لك هاي شنووو جنت

-هههههه مصيبه جانت وخلصت منهه

-ههخخخخخ هاي بس انته هيج طلعت لو اخوتك هم

- لااا كلنه هيج الولد شعرنه مكنكر ونص افريقي كل واحد كفشته هالكبرهه بس تخلصنه منهه الحمدلله

-هاا كلكم سويتو كرياتين وسرحتوه

- لاا اخوتي ضلو يزينوه خفيف كلش وكبرو شعرهم نصه وكع ضل خفيف راحت الكفشه

ههه بس انه لااا كلت اسرحه واخلص

- هخخخخخخ لك داتخيلك هيج كفشتك هالكبرهه وراسك صغير وانته ضعيف مملوص وطويل هههههههههه ياااايممممه

عزااااا عزاااااا جااان متتتتتت بس اشوفك بعد اخرب ضحك واوكع هههههههييييييي

لك اييييييع تلعب النففففس جنت

بس حلو شعرك صاير شلون هذا عبد الحي

بمسلسل مراد تعرفه مو

- ههههههههه اييي ايي شلون ماعرفه

- بس انته مكصره وحلو مرتبه هالشغله الوحيده عدله بيك صارت

دعضل مثله ياحظي ضال مملوص مسلوع

اكوم حتى اني اركض وراك بس تعضل

ويصيرلك جسم براسه خير

- اييي هسه من تكومين اطبخيلي زين واخلص من لفات الفلافل والكباب واضرب ثريد من ايدج اكرش وكتهه مو بس اعضل

- ههخخخخ من ط....ي اذا كرشت

- لسانج رادله غسل وتشحيم

-هسه شكلت هي ط..ي شبيك ع اساس مسامعهه لو متعرفهه !!؟

بس حقك هو انته منينلك ط.. حتى تتعود عليهه وتعرفهه

رايح مكووي كوووي يابس

هاي بس اهل الط...ة يعرفوهه ويجلبون بيهه انته معذور

- خررررب

يااااالكعبه لسانج اسكتي ريري

اسكتتي ابتلي على عمري احجيلي وياج سالفه

- ههههاااااايييييي الااا اكرهك بروحك واخليك تنشنش تضل عليك تصير محنط وتمشي تخرع بالعالم خلي اشتغلك مو بس اشتغل اهلك هم ينرادلك تعب

اووف اووف شصير اني

لشغلي .. للبيت .. لاهلك ..

لحلكك الي اضل اعلف بي

وراسك الي لازم اضل ازن بي واشبع ضحك عليك

- يبوووووووو بعد شيسكتهه

عمي امشي خلي اخذج هناك واخلص

-وين توديني ولك يامسلوع

- اوديج للكبور تنبشيلي

هناااك يم بيت السيد امشي بدلي

-اووي ماريد اروح خلي اكعد اتمزمز شويه

واتلفن بعد عندي واهس للعرك خلي اشوف شمصخمين هناك

- لج ريري لج ارحميني

لج امشي اكعدي ويه المكروده هذيج مو كتلج ضلي وياهه

- اييييي هسه هي طايره دنطي صبر خلي اخابر

امشي انزل يم امك عيب تسمع حجيي ميليق بجناب الساده

- اكلج صدك انتي ويامن تحجين بالضبط

شو بس اخابر واخابر ! المن تخابرين ؟

- اخابر الولد اليشتغلون عندي يعني المن اخابر

- وهذوله منو شجم واحد وشنو شغلهم

-اكولك انته شكو جاي تحقق وياي !

شغلي لتدخل بي عيوووني

تطلع لو احجي يلاا فضني

- احجي كدامي ماطلع اريد افتهم شتحجين

- شحجي يعني غير اسال شكو ماكو هناك

لو عبالك اكود وياهم هيج وخفت

- خابري هسه يلا عوفي الحجي وياي

كعدت وتربعت وضلت تخابر اول ماحجت ..

- هااا لك شو ماكو اليوم شبيك مطفي

دكوم صحصح وحاجيني يامطي يلا تحرك عاد

ضلت تباوعلي وانه بس رافع حواجبي واسمعلهه ..رجعت تحجي ..

- هااااا صحيت ولك كم مره اكولك لتشرب بالنهار مخليتك حارس ز..ـه انته

لك هذني هسه يلعبن صول جعاب وانته دثو مطفي

اييييي تنجب وتولي يمهن حتى لو هناك اثنين

اني شغلي وياك انته لعد دافعتلك فلوس على صخام وجهك

شكد الوارد احجيلي

زين حولهن العصر انتظرك

وامشي اخذلك كشه عليهن ودزلي الاخبار

يلا لتضل منطمر هنا تلحلح وروحلهن

سدته ورجعت خابرت ..

- هااا لك اسميع وين الصور ولك شو انتظر وكلشي ماكو

اي متدزهن عاد منتظر النجده

اكولك طلعت تحاليل لو بعد

دروح شوفهم شتعرفهم فارغين الك ويخابرون امشي اسحبهن اليييوووووم يلاااا

كافي وكفنه شغل هواي اليووم اريدهن التحاليل بايدك منا لليل اذا خابرتك وماكو

تعرف شيصير يلا دز الصور وروح

سدته وكالتلي..

- جان حطيت اذنك وياي بعد

- هذوله هيج مكفخه صايرليج وعادي

- عايز يطلعلهم حس

لاصمتهم بفلوسي عيونييي حتى القنادر يبوسون لو كلتلهم

- واالله مادري شحجي

انه يمج كل حجيي يخلص

- احسن خليك هيج

- اكلج شنو ياصور تنتظرين

- صور الملهى داشوفهم شلون ينظفون زين لو يكضوهه عليه كلاوات

- وياتحليل ؟

- هذني المصخمات احللهن كل فتره خاف شايلات التهابات .. ايدز بيهن

لا زم اضل اسويلهن فحص لان سمعة المكان عاليه ماريدهه تخرب بجيافتهن

- ايباااه سمعه هه

- هذا الميعجبك يدر ذهب تفهم شنو ذهب

- ذهبج هذا بالاخره ينكوي جسمج بي ويطبع على لحمج خاف متدرين

- ديلا هسه ضلت على هاي

هي النار كلشي بيهه عادي زياده خير

- لاااا والله انتي الحجي وياج ضايع

- اييييي حدوره انتتته تفهمني ع الطاير

فدوووه لحلكك اروح رجلي المسلوع مممممموووووووااااح

كفختهه على راسهه وهاي اول مره اسويهه

وهي عادي تكهكهه .. كلتلهه..

- متكومين اخذج لملوكه

- لااا هسه اكوم بس اوكف خلي ادز هالبصمه

فتحت التسجيل وكالت ..

- وووولج خووووووثه ولج اشتغلي عدل لااا اعلكج من نصج واسمطج سمط

لتضلين فاااهييييه كملي شغلج وولي لكوادتج

عشر دقايق واخابر اذا ماشفت كلشي يلمع

اليوم ابيتج بنص الخيس سمعتتتيييييي

سدته وكامت وشمرت تلفونه ع الفراش

وكالت ..

- حلبس العبايه كبل فوك الدشداشه مو احسن

لو ابدل ؟

انه صافن عليهه هاي شتحجي يالله شهالقابليه الي عدهه للغلط !!!!

- ولللك هااااا وين رحت بصفنتك

مو احاجيك

- شتلبسين لبسي كيفج

- زين

اكولك ناخذ احمد ويانه شو حبيته لهالوليد

- لا يجوز يرجع هو

- متاخذني اشوف بنات هادي شلونهن

- اخذج بس يصيرلي مجال

استعجلي يلا ورايه رجعه للمحل

وهاا صدك تذكرت

بعد هاذ هو اتفقنه ع التنظيف والتعامل وياهن لو لا

- ايييي ديلا فهمت

- ريري مو بس حجي واجي الكاج عالكتهه

لخااطر كل عزيز عندج لتسويلي مشاكل

انتي ذكيه وتعرفين شلون تكسبين الواحد

واكسبيهن ضلي اضحكي عليهن بسوالفج

لحد مناخذ الي نريده زين عيني

-اوووكييي

بس اكولك شغله

هسه اني وياك نتعشى بره البيت

زين اهلك منو يعشيهم ؟

شو هذني جنهن شايلات ايدهن فد مره منهم

- ايي معليهن بيهم هاي لو امي توكف تسويلهه جدريه صغيره على كدهم فاهي تطبخ الهه ولابويه لو بالعشى ياكلون ركيه

وخبزه لو روبه بطيخ وعنب هيج مكضيهه

- بس ليش هيج امك فد نوب متيهه البيت

شو مالهه كلمه هنا على احد

- امي كايلج عليهه متدخل أسا لو تهجمين البيت متكلج ليش

بس تهدي النفوس

هي من راحو اخوتي بعد عافت كلشي صارت ماتدير بال لاحد

- هااا خطيه هم حقهه

تره اني احبهه لامك شو كعدت بكلبي هالمره

مدري ليش

- هم نعمه تحبيهه كود تداريهه على هالمحبه

- بس اتعلم اطبخ واصير اداريهه

هسه خليني اطكطك ويه هذني

- من باجر اعلمج بعد مابيهه مجال

- يلا خلي اجرب شكو بيهه

نزلنه وسلمت على امي وكلتلهه رايحين

وضلت هي تشاور بريري وبعدين حجيت ويه احمد وكال هم راح اطلع وسلم على الاهل و طلعنه . .

بعدني اول ما حركت السياره وهي كالت ..

- لك انته شبيك متعرف اصول اللواكه

دمشي اخذلهم فد شي منا منا مو نطب ايدنه فارغه هم جماعه يبزعون منه كل يوميه فوك روسهم وماكلين عشاهم بلوشي

- ههههههههه مو انه متعود عليهم

فانسى هالشي بس يلا هالمره نغير

نصير اصحاب ذوق

- جيبلي وياك علاكه ام الخمسه دناكلهه اني ومليكه

- تدلل ملوكه

- هااااا

- هههههه شكوو شبيج جوعرتي

- مخلصه دهن

متديرلي شويه ولك شو انته فد مره ناشف

لا تتحارش لا تجفصلك جفصه لا تطالب بحقوقك مني

- هههههه مو كلتي لا تتدنالي

- وانته هالكد تسمع الكلام يمه !

هسه دغلط فد مره وكول اريد شيصير يعني

- اييي وتكعدين تفيكين براسي وانه كلت وانه وصيت وانته وعدت وشيخلصني بعد

-ههخخخخخ

ولك لو مااخاف عليك بعدك جويهل بهالسوالف جان اني حطيتك و نج..ك

- اكعدي راااااحه وشويه ثكل بنتي ثكككل

- دوكف صدك هسه خطر هالسؤال بالي

اذا نمت وياك انزلك تصعدلي شلون نرهمهه

-ههههههههههههه

لج كااااااافيييييييي رحمه لاهلج

- ايييي غير دافكر اشوف شلون تضبط ويانه

ولو صدك اني شكو متعبه نفسي وياك

مو خوش انته خفيف متريح مو خبره متفيد

- ريريييي من صدك كااافيي اسكتي

جاي تجفصين زايد وانه جار خلك وياج

اسكتي احسن مانتعارك وتصير ليلتنه كشره

- ديلاااااا سكتت

يالسيد المستحرم

اصدك ماعندك مكسرات ومتشتهي وتضل تخيط وتخربط براسك

- موووووو كلتتتت اسكتتتتتييييييي

الاااا تطلعيني من طوري يلا ترتاحين

-لااااا

الااا تن..ج...ي يلا ارتاااااااح

- استغفر الله استغفررر الله

- ديلااااا عيني سبيت الكعبه وتستغفر !!!

هي كلمه وحده داعبرلك عن راحتي شلون تصير شبيك متتحمل تسمعهه تفول كبل مو

-لج لخاطر الاسلااااام اسكتي

لتحجين هيج وياي ماريد

زيييين اااانه بهالشغلات انسيني عوفيني

كولي عاجز حجاره بارد فاهي اي شي

بس فكي عني

- صدددددتك ولك

تعال سولفلي شبيك خاف تحبلك وحده وصاير وفي براسي

-ولج هو انه لو احب اجيبج بدالهه !!!

-لعد هااا

ع....ك نظيف وكلبك هم نظيف !!!

- لسااااانج يالكعببببه لج اسكتتتتي شبيييج

كاافي

شبتليت ياربي صبرررك

-دررررووووح واحد مفول وكامز لربه وكاعد يستشرف براسي

لك ذااااك وينك مبين مخنوك خنك

بس انته مشتهي ومستحي ومحسوبتك بايعه المستحى وجايه اريد اريحك واخلصك من العيون الحمر الفاضحتك بس انته متقدر

- ماااريدددد هسه عاتب عليج كايلج ريحيني

عوفيني شجلبتي لخاطر الحمزه

- ديلاااا راح اعوفك انته هم ضوجتني وخربت واهسي

عبالي اكولك ارجع من وكت ونسوي ليله حمره بس مابيك خير ومتستاهل هم

عفتهه بعد مارديتلهه .. وطبكت يم الاسواق

ونزلت اريد اشتري وراسي مسطور

دايخ نسيت حتى شاخذلهم ؟

سطرتني خرب بيهه ماتسكت

ضليت افتر بالاسواق واباوع والكط

اخذتلهم علاكه حلويات وعصاير وجباسه

وللبيت اخذت علبه مال ككو وبسكت

رجعت للسياره ولكيتهه تخابر ..

من سدته كلتلهه ..

- ويامن تحجين ؟

- شعليك

- وسم من اسالج جاوبي

- سم بكلبك ولك لتتامر اني احجي بكيفي

- يطبج مرض عساج لا حجيتي

حركت بسرعه واخذتهه لبيت السيد

عفتهه يم ملوكه وطلعت لشغلي ومفوره اعصابي .. شكد مااتهدا وياهه لااازم تضل تحرك باعصابي وتجفص ...

رجعتلهه بالعشره بالليل جنت تعبان كبل

اخذتهه ورحت لبيتنه ..

كعدنه ويه اهلي ساعه وصعدنه ..

ضليت متمدد على بطني واحاجيهه ..

- شلونهه وياج ملوكه

-مثل الورد

بدلتلهه ومشطت شعرهه وقرضت اظافرهه

ونسولف وهي بس تضحك

فتحت كارتون بتلفوني وضلينه نباوع ونجرش حلويات

من جابو العشه جنت شبعانه بس هم اكلت

ودحيت بحلكهه هم مسلوعه مثلك شضال بيهه

وتريدوهه تمشي من حيلهه وعافيتهه تمشي

- اي خوش خوش

يلا وين الله وتمشي على ايدج

- اذا مشيتهه انته وابن عمك تشترولي لكزسس

- خييييرررررررر

- بكيييفييي بعد اتشرررط وغصبا على روسكم تنفذون

- ريري بعدين بعدين خلي الله يمكني

واتشرطي هسه مفلس تره غير هالفلسين بالمحفظه ماعندي

- انطيك ؟

- مشكوره

- لااا صدك اذا تريد انطيك ولو تغثني انته بس يلا هم شويه اعينك بلكت يغزر بيك

- ضمي فلوسج الج عيني لا تسويهه عليه مانيه

- حنزل اسبح اذا غيرت رايك كولي

- بيمن ؟

- بالفلوووس لتخاف رجعنه لاغين الامور اللااخلاقية المتحب تسمعهه

- هههههه همزززين هسه ريحتيني

- الكطك الكطك وين تروح مني

- حنااااام من تجين لتطلعين صوت تره تعبان

- اووكييي

نمت وماكعدت الا على صوتهه تكلي ..

- كوووم ولك شكد نومك ثكيل صار الصبح

متكعد عاد

باوعت ساعه سته ونص كلتلهه..

-شعجب كاعده هالوكت.

- ضجت من النوم امشي خلي ننزل نشوف شكو ماكو

صليت الفجر ونزلت وياهه .. اخذت ابويه للحمام ورتبت كعدته يم الحديقه وهي جابتلنه الريوك .. شاورتهه

- لج شو اليوم حاميه فد نوب كلشي تسوي بدون ما اكلج

- اني هيج ساعه تلكاني لهلوبه وساعه اكلب خلقتي واطنكر واصير حجاره

فلتتعجب تره سبعين مزاج عندي

-هههههه لج انتي كارثه وعلي

كعدنا ناكل وكلت لامي ...

-علويه منا وجاي ريري بعد راح تنظف البيت وكلشي يخصكم انتي والحجي عليهه

اريدج تعلميهه على اطباعنه وبكلشي تلكيهه طايعتج

امي ضلت تباوعلهه وريري كلتلهه ..

- اي عمه انتي احجيلي شتريدين واسوي

علميني كلشي على ايدج تره اني مو هالكد

بامور البيت كاضيتهه بالشغل وهيج بس بالعطله اسويلي كم شغله بالبيت وخفيفات

يعني فانتي علميني على ايدج

- ان شاء الله يمه سهل شغل البيت وانتي سباعيه ماشاء الله

- فدوووه لكلبج عمتي عيوني الج بس كولي

ضلن يضحكن وانه اباوع لابويه صافن على ريري ...

راحت للمطبخ تغسل صينيه وانه يمهه

كلتله..

-ريري الحجي بعده شايل بكلبه علينه

- اي اعرف هالشي

- شلون شسوي؟

- اني ادبرهه معليك

- مو هم كلتيلي ادبرهه وكلشي ماكو

- يجيك الصافي هسه انته بس عوفني اكعد وياهم وافرهم الك فر

- يلا شوفيني سباعيتج

-اكولك تروح للسوك؟

- ها محتاجه شي؟

-اي

- شنو

خلت الصينيه مكانهه واجتي يمي دنكتلهه

وشاورتني ..

- مو هذني المعزايات لازم اضبط وياهن واتلوكلهن فشويه خلي اكسر عينهن

بهديه عود مال صلح وهيج

-اي شتريدين اجيب ؟

- مادري شتكول انطيهن قطع قماش

لو اخذلهن معطرات يفيدين لريحتهن الخايسه يبوو شكد اكرهههن

-ههههههه حتى يركعنهه براسج

- اشكهن بالنص غير

ديلا كول شناخذلهن؟

- حجيبلهن قطعتين قماش وانطيهن

- اي اووكي ومدامك رايح رايح

اريد تجيبلي

- اي اي كولي ادري هي تفلسيه الوحده كولي

- ههههه

جيبلي كيلوين برتقال وخيار عطروزي

مو تجيبه مُر تره اخليك تاكله كوله استنكي الزين الزين

-واااانه اشتمه اذا مر لو حلو ! هو شيطلع بعد حظج ونصيبج

- حظي مصخم جيب على حظك

- ع اساس انه حظي يضوي ضووي

-هسه دجيييب ونتفاهم بالحظوظ وكتهه

وجيبلي عنب احمر واسود ضوكهن حلوات مو تجيبه فاهي

- اييي

- بس كثر يعني كثر هيج اريد مال شبع

وجيب ركي وبطيخ لاهلك هم ماعدهم تره

واااهم شي تجيب وياك ليمووون اريد هذا العراقي الاخضر مو الاصفر وفلفل هم

- هذني كلهن شتسوين بيهن

-اتمزمز عيونيييي شويه للصحه هم فيتامينات

شيفهمك انته بهالسوالف ميعرفوهه المسلوعين

- بلشت بعد

رايح اتسوك احسن

شغلت السياره وطلعت للسوك .. تسوكت

من كل شي واخذت مسواك يكفي للكل مو بس الهه .. وعزلت الهه بجهه وللبيت بجهه

واول مارجعت ونزلت العلاليك باب المطبخ

تلكتني هي وجرت ايدي وكالت..

-عوف كلشي لك تعال شوف شلكيت

- انطي صبر ولج منا الاهل لتجرين هيج

-ديلاا فضني امشي

رحت وياهه لغرفه ابويه وجانت فارغه

ومبين هسه منظفه كبل هي سدت الباب

وراحت للجربايه رفعت الجرجف وكلتلي ..

- تعال شوف شملزوك هنا

دنكت يمهه وشغلت الفلاش وضليت اباوع

واشوف خمس عظمات ملفلفه بخيوط

ومتلزكه بشكل نجمه .. ملزوكات بنص الجربايه من جوه ..

كلتلهه..

- شلون لكيتيهن هذني مشايفهن من جنت ادور

- جان فوكاهه كارتونه طويله ملزوكه ومثبته ويه الحدايد هاي بحيث ممبينات بس اني جريت كلشي نفضته وجريت هاي هم وشفتهن بس مكلت لاحد انتظرتك تجي يلا

وشوف هنا فوك شكو بعد شوف الصخااام المصخمينه لابوك

شالت الفرشه وفتحت سحاب الدوشك وضلت تسحب خيوط بيض طوال .. تسحبهن وبعد بيهن طول .. لحد ما كومتهن كدامي

وركضت قفلت الباب واجتي يمي ..

- شوف هاي مو فصخت الشلته مال دوشك

جان شفت سحاب الدوشك كلت خلي اشوف خاف مدحوس شي بي كلشي يصير

واجتي عدله كبل بس مديت ايدي لكيتهن

وهاا تره جانن ملفوفات على الاسفنج هذا

بس اني جريت نصهن بالبدايه وبعدين من رجعتهن هيج تكومن جانن مضبوبات ضب على الدوشك

- ريري هذني شوصلهن لفراش ابويه !!!

- شوصلهن بعد اكو غير هالاثنين المصخمات منو يكدر غيرهن يوصل هنا

اخذت الخيوط اباوعلهن كلهن عكد والعكده

مشخطه بالاحمر ...

قربت الخيط كلش يم عيني وكبل ذبيته من ايدي .. كلتلهه..

- هذا بي دم

- ايي هم شكيت بي

- نكس هذا

استغفررر الله حسبي الله ونعم الوكيل

- هسه شنو ؟ شنسوي بيهن !

.

.

.

يتبع

اعتذر على تاخير الموعد اليوم

اشتراكي خلص وهسه جددت