رواية اعادة تاهيل معقدة الفصل الخامس والعشرون 25 - بقلم زهرة عصام

نوح بتبرير: مش قصدي بس. مكملش كلامه و لقي تمارة بتترنخ و بتقع على الأرض فصرخ: تمارة! ذكية بصت عليها و عنيها وسعت و صرخت بإسم كمال: كمال! كمال دخل جري لقي تمارة واقعة على الأرض و نوح بيحاول يقوم بس دراعه معجزه. بص لنوح و قال: أنا آسف. وجري شال تمارة نيمها على السرير تاني. جوري دخلت و هي مسندة لينا و صرخت بإسم تمارة. قعدت لينا اللي عيطت تاني وجريت على تمارة مسكت ايديها وبتحاول تفوقها. نوح كتم غيظه من

كمال جواه و قال في نفسه: مش مهم دلوقتي يا نوح، المهم نلحق تمارة. بص ليه و قال بجدية: دكتورة بسرعة يا كمال. و حط تحت كلمة دكتورة دي ١٠٠ خط. كمال هز رأسه بتفهم و خرج بسرعة يشوف دكتورة. ذكية زقت عجل الكرسي بتاعها لحد ما وصلت لسرير تمارة و بصت عليها بتمعن. بصت لـ جوري اللي قلقانة عليها و لينا اللي قاعدة لا حول لها ولا قوة ورجعت نظرها تاني على تمارة و قالت جواها:

إنتي اللي إمتلكتي قلب حفيدي بقي. حلوة وصغيرة وإخواتك كمان حلوين. بصت على نوح وخوفه البادي على وشه و قالت: هيخرجوا من هنا على الفيلا يا نوح، هيكونوا معانا بس لازم عشان يقعدوا نعمل حاجة والحاجة دي هتفرح قلبك يا حبيبي اللي بقاله كتير مفرحش. مسكت إيد تمارة وبقت تدعك فيها جامد وبتحاول تفوقها. جوري بدموع: عشان خاطري قومي، إحنا تايهين من غيرك يا تمارة. ميلت على رأسها وبوستها و قالت:

كل مرة بتتعبي فيها بنحس إننا ولا حاجة من غيرك. لينا فوقت وجريت عليهم وقفت جنب جوري وهي بتقول: هي مالها يا جوري، أنا مش عارفه هنخلص من الهم دا امتي بس. كل ما أقول خلاص هنفرح تيجي مصيبة تانية تحل فوق دماغنا، هو إحنا مش مكتوب لينا الفرح وإلا اية؟ جوري أخدتها في حضنها وهي بتقول بانهيار: إحنا كل حاجة بتروح من إيدينا بس لا، هنفضل مع بعض للآخر محدش هيقدر يفرقنا.

ذكية بصتلهم وسامعة كلامهم وصوت عياطهم بقي هو اللي مسمع في المكان. لدرجة أنه وتر نوح اللي ما زال بيحاول يقوم فزعق وقال: في اية بطلوا نواح، إنتوا شايفنها ما.تت قدامكم؟ هي أغمي عليها مش أكتر، اسكتوا مش عاوز أسمع واحدة فيكم بتعيط، إنتوا فاهمين؟ جوري عقدت حواجبها وبصت ليه بغضب ولينا مسكت ايديها وبقت تبص ليهم بعيون مدمعة. ذكية بصت لـ لينا وقالت لها: تعالي يا صغيرة انتي. لينا بصت ليها وشاورت على نفسها وقالت: أنا يا طنط.

ذكية هزت رأسها بايجاب وقالت: أيوة تعالي، هو في حد صغير هنا غيرك؟ لينا تقدمت تجاها ونزلت لمستوي الكرسي وقالت باحترام: نعم. ذكية رتبت على كتفها وقالت بهمس: متخافيش منه، هو متعصب بس لو عوزاني اشدهولك من ودنه عشان زعق ليكم هخليه يكون زي الكتكوت المبلول دلوقتي. نوح سمعهم وعقد حواجبه وقال: إحنا في اية وإلا في اية دلوقتي يا نانا؟ لينا بصتله بغضب وبصت لـ ذكية وقالت بهمس:

هتعرفي تعملي كدا وإلا هيزعق ليكي انتي كمان، دا عاوز زي ه.لاكوا أول ما يزعل وهو بيلعب مصارعه. ذكية ضحكت جامد على كلام لينا وقالت: إنتي مش عارفه ق.دراتي لسة، أنا نانا يا بنت. بصت لـ نوح وقالت بصرامة: أنا مش عوزاك تتكلم معاهم نهائي، إنت فاهم ولا حتى تزعق ليهم، هما يعملوا الي ه.ما عاوزينه وخصوصا القردة الصغيرة دي، إنت فاهم؟ نوح بسخرية وقلق على تمارة:

مكملتيش معاهم عشر دقائق و قلبتي ضدي، أومال لما تقعدي معاهم علطول اية اللى هيحصل؟ ذكية بسخرية: هنعمل ح.لف عليك يا نونو. نوح برق من الكلمة وشه احمر وقال: نانا اية نونو دي؟ اسمي نوح، أنا الكينج، يتقال لي نونو! جوري بسخرية في نفسها: معاك حق، دا حتي الدلع خسارة فيك، دا إنت عيل رخم. لينا حطت اديها على بوقها وكتمت الضحكة وذكية بصت ليه وقالت بسخرية: على الناس كلها إلا أنا، يلا. نوح حط ايده على دماغه وقال في نفسه:

كل ما بحاول أصلح وأبين برستيجي تيجي ذكية وتنزلوا لسابع أرض. الله المستعان والله. نوح دخل عليهم وهو بينهج والدكتور وراه وقال بصوت م.تقطع: قلبت المستشفى ك.لها على دكتورة بس ملقاتشي، جبتلك دكتور يمشي الليله. نوح بص ليه وحاول يكتم غيظة بس مقدرش فصرخ في وشه وقال: دكتور يمشي الليله اية؟ هو فرح أمـ.ـك؟ كمال خد نفسه وقال: مالك دلوقتي بأمي، ما تسبها نايمة في تربتها مرتاحة، تقلق منامها لية إنت؟ نوح ضغط على شفايفه وقال:

إنت م.ستفز و بارد على فكرة. كامل هز رأسه بايجاب وقال وهو بيهز حواجبه عشان ينرفزة أكتر: من بعض ما عندكم يا كينج. نوح جز على سنانه وقال: تعال قومني عشان نشوف الح.ما.ر اللي وراك دا هيتنيل يعمل اية. الدكتور عدل من نظارته وقال: هو مين دا اللي ح.ما.ر، حضرتك تقصدني أنا؟ قالها وهو بيشاور على نفسه فنوح بصله بسخرية وقال: و هو في حد واقف وراه غيرك؟ أدخل فوقها من غير ما تلمسها. الدكتور ربع ايده وعقد حواجبه وقال:

إنت بتتكلم كدا ليه؟ على فكرة أنا دكتور هنا وانت اللي محتاجني مش العكس. لا و جبت الج.راة أصلا إنك تشتمني وتغلط فيا؟ كمال بص ليه وحط ايده على كتفه وقال: عدي يوم يا دكتور وأخلص ومتعلقش على اللي بيحصل ولا أي كلمة تتقال ليك. يعني لو عاوز تروح سليم. وإلا إنت شكلك بتحب الملاهي وأنا همرجحك قريب. الدكتور بصله وعقد حواجبه بجهل وقال: بعيدا عن إني مش فاهم حاجة من ملاهي و مراجيح بتاعتك دي خلينا نخلص عشان عندي مرور.

نوح بصله بغيظ وقال: إستني لما اجي أقف معاك مش هتلمسها غير تحت عنيا. جوري هبت فيه وقالت: في اية عمال تتحكم في البت و تهزق الدكتور من الصبح ليه؟ هو مفيش حد قادر ليك وإلا اية؟ سيب البت تتفلق عشان واحد مغرور زيك قال اية: دكتور و حط ١٠٠ خط تحت دكتور. إنت عاوز تمشي الكون على مزاجك وإلا اية؟ لينا حطت اديها على بوقها وقالت: يلهوي يا جوري دا هياكلك يا حبيبتي. قولت هولاكو و بيلعب مصارعه و محدش صدقني. نوح يصلها

و رفع حاجبة وقال برود: إقفي بعيد يا شاطرة ومش عاوز أسمع صوتك تاني لحد ما الزفت دا يخلص. بص لـ كمال اللي كاتم ضحكته وقال: خرجها يخويا لحسن تجبلك سكته قلبيه، تعال قومني ياض. كمال ساعد نوح أنه يقوم وسنده لحد ما قعد على السرير جنب تمارة. نوح كان بيتألم من الجرح اللي أول ما اتحرك شد عليه بس كالعادة بيكابر. بص للدكتور و قال له: خمس دقائق، لا خمس دقائق كتير، دقيقة و نص و تكون مخلص شغلك، إنت فاهم؟ الدكتور

نفخ بضيق وقال في سرة: ميتين أم دي شغلانة يا جدع. اية اللى كان دخلني طب بس. كمال همس ليه وهو ماشي وقال: نصيبك الاسود. أكيد عملت حاجة في حياتك عشان ربنا يبتليك بالمهنة دي. الدكتور بص ليه وكمال هز رأسه بايجاب بإستفزاز. الدكتور مسك إيد تمارة ونوح حط ايده على كتفه فالدكتور بصله وقال: لا كدا مش هعرف أشوف شغلي بقي. أخرج و ابعتلكم دكتور تاني أنا زهقت. ذكية بصت ليهم وضحكت جواها وقالت بحدة:

نوح ابعد ايدك عن الدكتور خليه يشوف شغله. ي.ستحسن إنك ترجع على سريك دلوقتي. نوح ساب الدكتور وهو بيبرطم وقال في نفسه: ميتين أم دي شغلانة يا جدع. الدكتور كشف على تمارة وقاس ليها الضغط وقال: ضغطها واطي جدا. جوري رد عليه بلهفة وقالت: ايوة يا دكتور، إتبرعت بالدم إمبارح ومأكلتش وإتعلق ليها محلول. الدكتور هز رأسه بتفهم وقام: أنا هعلق ليها محلول دلوقتي وباذن الله لما يخلص هتكون كويسة. كمال إستشعر اللهفة من نبرة جوري وجز

على سنانه وقال في نفسه: أقسم بالله كلمة كمان وهي تمرجح على ايدي. نوح حط ايده على كتفه وقال بشماتة: تعيش وتأخد غيرها يا برنس. كمال بصله وعينه بدأت تحمر فنوح كمل: بتوجع مش كدا؟ عشان تبقي تقف تضحك أوي.

صلاح كان واقف في صوان العذاء صامد مفيش دمعة واحدة راضية تنزل منه. بس من جواه نار كفيلة إنها تنهي حرب وهتكون الخساير فيها هي جنود الطرفين. بقي بيص على اللي حواليه والرجالة اللي قاعدة بتعزي ومنهم اللي بيسمع القارئ بانتباه ومنهم اللي بيتكلموا من تحت لتحت بهمس ومنهم اللي بيشرب القهوة. افتكر منظر أمه والد.م مغرقها والنار والحقد اللي جواه بيزيدوا. إنتي اللي عملتي كدا يا فدية وكل دا عشان الكلب بتاعك؟

ورحمت أمي ما هرتاح غير لما ابعتك ليها. صبرك عليا إنتي وابن الكـ.ـلب التاني دا. والله لخليكم تتمنوا الموت ومش هطلوه وبعد ما أشفي غليلي منكم هبعتكم للرفيق الاعلي يحاسبكم، يعني هتتحاسبوا مرتين مرة مني ومرة لما تتشوا في نار جهنم الحمرة. القارئ خلص القرآن والناس بدأت تقوم يسلموا على صلاح ويمشوا. صلاح بقي يسلم عليهم بجمود ومش بادي أي رد فعل أو تعبير على وشه سوي الجمود واللا مبالاة.

بعض الناس بعد ما خرجوا من الصوان بدأوا الهمز واللمز فمنهم اللي قال: هو واقف كدا لية؟ كأنه مش متأثر بمو.ت أمه. وإلا يكونش كان مستني فعلا موتها ويكون متفق مع أخته؟ –متسئش الظن يا أخي. الراجل مصدوم لسه وهياخد فترة على ما يفوق من صدمته ويرجع لحياته الطبيعية من تاني.

= الله يكون في عونه، اللي حصل مش صعب وخصوصا إن والدته مامتتش موتة طبيه. دي ماتت مقتو.لة وبأبشع طريقة ممكن تشوفها. لا ولا إلا قتلها كمان بنتها وأخته، يعني بطارة دلوقتي عند أخته. فرد الراجل الأول وقال: أمه أصلا كانت بتاعت مشاكل، كل الحارة دلوقتي افتكرت فتحية وبناتها. إنت مش متخيل البوستات على الفيس من الصبح نازلة ترف إن حق جوري وتمارة رجع أوي. –مش يمكن في حلقة مفقودة ويكون حرامي قتـ.ـلها وخطف فدية؟

= يمكن، ويمكن برضوا زي ما بيقولوا، قتـ.ـلت أمها وهربت مع عشيقها. آخر فترة أصلا كانت سريتها على ك.ل لسان وإنها بنت شمال. ولما تمارة كشفتها أمها واخوها عملوا فضيـ.ـحة ليها هي واخواتها. –عشان كدا بوستات الفيس مكتوب فيها "يمكرون ويمكر الله والله خير الماكرين". = لا خ.د الجديدة بقي يا عم "وعند الله تجتمع الخصوم". ضحك الراجل الأول وقال:

الشعب المصري دا محتاج جنازة ويمشي فيها إلا من رحم ربي طبعاً. شفتوا بيقولوا اية "اية اللى بينكم وبين ربنا يا فتحية انتي وبناتك حتي يتذكركم أهل الحارة". = اي دا هي مش كانت ١٠٠ مليون بقت أهل الحارة. –اللي شهدوا على الواقعة يا عم. ضحك الثلاث رجال وكل واحد مشي في طريق.

هي دي حال الدنيا، كل مبتلي والمبتلي فقد هو اللي بيشيل الهم. محدش بيحس بحد ولا بيقدر ح.زنه. كله مستني جنازة ويمشي فيها واعرف دايما إن الناس هتتكلم سواء كان خير أو شر. عندك مصيبة أو عندك فرح كله هيتكلم لأن ببساطة محدش بيسيب حد في حاله ولازم يتكلموا وينظروا على ك.ل حاجة. لأن الناس دي بتحس بسلام نفسي رهيب لما تعمل كدا. يعني لو عدي موقف ومتكلموش عنه وفصصوه مش هيعرفوا يناموا.

عدي ساعتين والمحلول خلص وتمارة بدأت تفتح عينيها. حطت اديها على رأسها وقالت بصوت ضغيف: اممممم. رهف ولينا جريوا عليها وذكية مكنتش اتحركت من قدمها. كلهم انتبهوا لـ جوري وهي بتقول: إنتي كويسة يا تيمو؟ تمارة في مرحلة اللاوعي فقالت: اممم، اية اللى حصل وأنا فين؟ لينا بصت ليها وقالت: أنا كدا إطمنت إنك كويسة يا تمارة. انتي علطول لما يغمي عليكي بتفقد الذاكرة. تمارة مش قادرة تماطل معاها فقالت بهمس:

أنا دايخة أوي يا جوري مش قادرة أقوم. جوري: أكيد عشان ضغطك واطي، ثواني هنزل أجيب ليكي أكل. ميلت عليها وقالت: تمارة أنا مش معايا فلوس، انتي معاكي؟ تمارة هزت راسها بايجاب وقالت: في جيب البنطلون. جوري رفعت الغطا من عليها شوية ودخلت اديها في جيب أختها وخرجت منه فلوس وقالت: هروح أجيب ليكي أكل. نوح شافهم ومحبش يكسفهم فقال بصرامة: و مين بقي اللي هيمنعني إنت؟ لا إنت ملكش كلام عليا. نوح ضحك بإستفزاز وقال:

متنسيش إني الواصي عليكم، إدخلي إقعدي مكانك يا جوري. لينا: بس يا أبيه تمارة دلوقتي لازم تأكل عشان تقدر تقف. ذكية لجوري: تعالي يا بنتي اقعدي بدل ما انتي واقفة كدا بدل ما يجيلك شلل م.بكر. نوح ضحك وقال: يا قلب أبيه إنتي يا صغننه، الأكل زمانه جاي في الطريق. شكلك جعانة يا سوسة انتي صح؟ لينا هزت رأسها بايجاب وقالت: ايوة جعانة أوي ولازم نمشي عشان نذاكر الامتحانات خلاص مفيش. ذكية بفضول: إنتي في سنه كام يا لينا؟

أنا في تانية إعدادي وجوري اولي ثانوى وتيمو في تانية ثانوى. فجأة قطع كلامهم الباب اللي خبط واتفتح ودخل منه اللي عصب نوح وخلى ودانه تحمر. على الجهة التانية صلاح جاله تليفون فيبعد شوية عن الصوان وفتح الخط وقال: ورحمت أمي لندمك على اللي عملته دا. هبعتك ليها بس الصبر يا بنت الصر.مة.