رواية اعادة تاهيل معقدة الفصل السادس والثلاثون 36 - بقلم زهرة عصام

مش متفائلة يا علاء. اللي عملته بنت الشوارع في بنت الوزير دا مش هيعدي على خير. دي إهانة محدش يسكت عليها أبدًا. بصلها وهو كاتم غيظه وبيقول: أنتي السبب يا وهيبة. نظرت إليه بصدمة قائلة: أنا السبب؟ عملت إيه يعني أنا؟ علاء بصلها بعدم تصديق وقال: والله يعني مش عارفة عملتي إيه؟ يعني مش رحتي خطبتي ليه من غير ما تقولي له؟ روحتي كلمتيهم من غير ما تعرفي حتى إن كان فيه في حياته حد ولا إيه؟

إنتي اللي غلطانة وبتتصرفي من دماغك. فـ أنتي سبب المشكلة من الأول وإنتي اللي تحليها دلوقتي. فـ اقعدي مع نفسك كدا وشوفي هتحليها إزاي. وهيبه فتحت عيونها أوي وقالت: يعني أنا غلطانة عشان عايزة ليك أنت وابنك الأحسن؟ عايزاه يتجوز بنت وزير يرفع من شأنه ويعليه كمان وكمان بدل بنت الشوارع اللي جايبها دي؟ لا وكمان بيتجوز من غير ما يقول لحد. علاء بتريث:

لمي لسانك واعرفي إن اللي بتشتميها دي خلاص بقت مرات ابنك، يعني مفيش في إيدك غير إنك تحترميها. وبلاش كل شوية بنت شوارع بنت شوارع، وخصوصًا قدام ماما لأن نتيجة كلامك أنا مش هكون مسؤول عنها، وخصوصًا إنك عارفة كدا كويس. وهيبة بعصبية: يعني إيه؟ أفهم من كلامك إنك هتسيب مامتك تهزق فيا وتقل مني وأنت هتقف تتفرج؟

أنا مقولتش كدا، بس عمايلك هي اللي بتوصل الأمور لكدا. أنا مش هقف في وش أمي مهما تعمل، وإنتي عارفة كدا لأنها في الأول والآخر أمي. زي ما هي أمك وبتديها احترمها وقيمتها قدام الكل، أنا كمان مراتك ولازم تحفظلي كرامتي قدام العالم كله. وبرضوا دي مرات ابنك وكرامتها من كرامتك إنتي دلوقتي، يعني كل ما تقللي منها تبقي بتقللي من نفسك يا وهيبة. خليني أفكرك بحاجة إنتي ناسيها، وبلاش تعتبريها معايرة والكلام الفاضي دا.

إنتي قبل ما اتجوزك مكنتيش تملي حاجة وأنا وإنتي والناس كلها عارفة دا. لكن دلوقتي بتلبسي من أشهر الماركات، فساتين بتتعمل باسمك، بتاكلي في أشهر وأغلى المطاعم، عندك حساب في البنك يعيشك ملكة بقية حياتك. فـ ليه تيجي على حد إنتي عيشتي نفس ظروفه؟ مش بيقولك محدش بيحس بحد غير لو كان زيه تقريبًا؟ إنتي كنتي زي البنات دي وأقل كمان. فـ متحاوليش تتغيري معاهم ليه؟ متقربيش منهم وتحبيهم ويحبوكي ليه؟ ردت بقسوة وقالت:

لا مش هحس بحد ولا عمري هحط نفسي مكانهم، عارف ليه؟

عشان أنا دُقت المرار على ما وصلت لكدا. عشان اتذليت كتير واتداس عليا أكتر. مكنتش بلاقي الأكل وبقعد بالأسبوع أشرب ميه وأملي بطني عشان مجوعش. كنت بشوف الناس بتدخل مطاعم وتاكل وأنا بره بربط بطني عشان جعانة ومش لاقية حتى تمن الأكل. اشتغلت مساحة عربيات واتعرضت لكثير أوي، إنت متعرفش حاجة ولا شوفت حاجة. عنيت أوي لحد ما قابلتك. وقتها اتغيرت حياتي، حلفت يومها إني ما هرجع للفقر والقرف دا تاني، وإني لو قابلت حد من العينة دي هدوس عليه بأوسخ جزمه عندي ومش هرحم حد.

بصت ليه وكملت كلام وقالت: ابنك دا لازم يتجوز بنت الوزير. برضاه أو غصب عنه هيتجوزها، أنا مش مستعدة أخسر صفقة مهمة زي دي عشان خاطر كلام فارغ. ويا أنا يا هما في البيت دا. هز راسه بخيبة أمل على كلامها وخرج من الأوضة. *** بقي أنا تمارة يتقالي كدا؟ أنا واحدة فتوشوب تتكلم عليا وتهين فيها كدا؟

لا أنا مش لازم أسكت عن الكلام دا. حاسة إني لسة ماخدتش حقي تالت ومتلت. يا رب تيجي تاني يا رب أشوفها عشان أقطعها بجد وحقيقي المرة دي. يا رب عايزة أكلها بسناني كدهون. أووف بقي هعمل إيه دلوقتي أنا وأطلع غيظي في إيه؟ وإنتي لسة مطلعتهوش؟ بصت للي بيتكلم والتاني كمل كلامه وقال: أومال لو مكنتيش طلعتي عين البنت كنتي عملتي إيه؟ دا أنا حايشك عنها بالعافية. تمارة رفعت حاجب وبصت ليه وقالت: وأنت مالك متأثر كدا باللي حصل؟

إيه صعبانة عليك الفوتوشوب يا خويا؟ بصلها بمحن وقال: صعبانة عليا أوي. وبعدين إيه أخويا دي؟ بقي أنا عامل الهيلمان اللي تحت دا وصارف ومكلف عشان تقوليلي أخويا؟ تمارة برقت أوي وقالت: نعم؟ صعبانة عليك؟ طب قرب روح لها يا كينج واختفي من قدامي دلوقتي عشان أنا على آخري منك ومن الحرباية دي. نوح قرب منها ولسه هيتكلم صرخ وقال: يخربيت أبوكي! إيه دا؟