رواية عشق للأبد الفصل التاسع 9 - بقلم سولييه نصار

في البيت، كان هاشم قاعد على الأنتريه وهو بيفكر إزاي يقول لكريم عن الموضوع. هو عارف قد إيه كريم طيب وهيتصدم في مرام، حب عمره. عمره ما حب يعمل معاها كده بس هي اختارت تسمع لأمها، وهو مش هينسى اللي أمها حاولت تعمله معاه. وأكيد مش هيغامر بحياة كريم مع واحدة زي مرام. اتمنى أن كريم يحب زهرة ويكمل معاها وميفتحوش موضوع مرام، بس زهرة عندها حق لازم كريم يعرف. حك رأسه بتعب، فجأة شاف مرام بتقرب منه وهي متوترة،

بصلها بهدوء فقالت بتوتر: "جدي، أنا فيه واحد عايز يتقدملي... زميلي في الشغل." "إيه؟ خطة جديدة عشان تبوظي جوازة كريم؟ قالها هاشم ببرود فبهتت وهي بتقول: "إيه اللي بتقوله ده يا جدي؟ لا طبعًا... أنا مالي بكريم، أنا خلاص طلعته من دماغي." "أومال ليه قابلتيه؟ فاكر إني نايم على وداني؟ مرام، اللي في بالك مش هيحصل." بصتله بضيق وقالت: "إيه اللي في بالي يا جدي؟! أنت ليه بتعاملني بالشكل ده؟ أنا حاسة إنك بتكرهني...

كل ده عشان كريم بيحبني ومبيحبش زهرة؟ أنا مش مصدقة إنك بتحبها أكتر مننا كلنا وهي مش من دمك." "مش من دمي صح، بس أحسن منك بكتير." دموعها نزلت بغضب وحقد وقالت: "تربية الملاجئ تبقى أحسن مني؟ "أيوه أحسن منك وبكتير كمان... لإنها عمرها ما فكرت تسرقني! بهتت أكتر وهي بتبصله فقال: "مصدومة ليه؟ دي حقيقتك وحقيقة أمك اللي هعرفها لكريم دلوقتي! كانت مرام مصدومة وهي بتبصله، قلبها بيدق بسرعة... خايفة بالفعل يكون كشف ألاعيبها...

حست بالضغط العصبي. فجأة جات مدبرة البيت عشان تقوله إن كريم وزهرة جم. ابتسم هاشم وقال: "كويس، خليهم يدخلوا أوضة المكتب." وبعدين بص على مرام وقال: "تجيبي أمك وتيجي على المكتب أحسنلك." *** كنت قاعد في المكتب مع زهرة اللي بتفرك إيديها وكانت متوترة لسبب أنا مش عارفه... جدي طلبنا وأنا لحد دلوقتي مش فاهم.

دخل هاشم فجأة وقعد على الكرسي وهو بيبص لكريم بنوع من الشفقة. بعد شوية دخلت مرام ووالدتها والتوتر مالي وشوشهم زي ما يكونوا عاملين عاملة. بصلهم الجد بصرامة وقال: "ها، تحبوا تتكلموا انتوا وتعترفوا بالحقيقة لكريم ولا أعترف أنا؟ اتوترت مرام وبصتلهم من غير فهم. قالت والدة مرام وصوتها بيترعش: "نعترف عن إيه يا هاشم باشا؟! ابتسم هاشم وقال: "خلاص أتكلم أنا وأقول اللي عملتوه... استنوني لحظة عشان أجيب ضيف كمان معانا." طلع

وبعد شوية جه وهو بيقول: "تعالى... فجأة شهقت أم مرام بصدمة وهي بتشوف كابوسها بيتحقق!