رواية البريئة و القاسي الفصل السابع عشر 17 - بقلم اسماعيل موسي

انتي هتسيبيني هنا كتير؟ قولتلك بلاش أخلف كلمتي مع فهد، انتي السبب في اللي أنا فيه. شاهنده وهي بتحضن رعد: أنا بعمل كل حاجة عشانك يا حبيبي، ما كنتش فاكرة إنه ندل وقذر للدرجة دي، دا واحد خاين. وعدك إنك هتخرج من الحجز بكرة الصبح. رعد: رايحة فين يا ماما؟ متسبينيش هنا مع المجرمين والقتلة. لازم أمشي دلوقتي يا رعد عشان أعرف أخرجك من هنا. الصفقة التانية تمت بحمد الله يا سادين.

الحمد لله يا أميرة، الشركة بدأت تتحرك وعملاء كتير بدأوا يتصلوا بينا. أنا لازم أسيبكم دلوقتي يا أميرة، أنتم عارفين هتعملوا إيه. أميرة: لكن الوقت لسه بدري، انتي مش متعودة تروحي بدري كده؟ عندي مشوار كده، هازور دار أيتام، لازم نتبرع بجزء من المال عشان ربنا يبارك لنا فيها. استقلت سادين تاكسي أجرة بعد ما اشترت هدايا ووصلت دار أيتام منزويه محدش بيفتكرها ولا بيبص عليها. أطفال أبرياء فقدوا ذويهم ومحدش قدر يرعاهم.

شافت الأطفال بيلعبوا في الساحة، هدوم مقطعة وسخة. صراخ، وافتكرت طفولتها. محدش يقدر يشعر بألمك إلا اللي شرب منه، مهما تسمع من مواساة وشفقة مستحيل شخص يقدر يشعر بيك ويعرف انت بتحس بإيه. وزعت الهدايا وقعدت شوية مع الأطفال قبل ما تروح على الفيلا. سندس: الأكل جاهز يا سادين هانم. سادين: ياه سبحان الله، سندس دي لسه من أيام كانت بتخاف تكلمها مرعوبة من شاهنده. سادين: تعالي يا سندس وهاتي باقي الخدم، إحنا هناكل مع بعض.

سندس: باعتراض، لكن دا هيخليهم ياخدوا عليكِ يا هانم. سادين: بضحك، يلا يا سندس. وهما بياكلوا دخلت شاهنده، شافتهم متجمعين حوال السفرة، عينيها برقت، كانت عايزة تولع فيهم كلهم. لكن غصب عنها اضطرت تبتسم وقعدت تاكل معاهم، وكانت بتاكل سادين بإيدها. خلصوا أكل، سادين طلبت قهوتها وطلعت على غرفتها. شاهنده دخلت المطبخ: أنا اللي هعمل قهوة سادين بنفسي، دي حبيبتي. شاهنده عملت القهوة وحطت فيها مخدر وطلعت بيها على غرفة سادين.

شربت معاها القهوة وفضلت تشكرها على موضوع الفيلا وإنها مهما كان واحدة من العيلة والفيلا ما راحتش بعيد. سادين شكرتها لكن كانت حاسة بصداع جامد. شاهنده: ممكن أشوف عقد الفيلا يا سادين عشان أتأكد. سادين مشيت على الدولاب ووقعت قبل ما توصل. جرتها شاهنده وحطتها على السرير، فتشت الدولاب لحد ما لقت عقد البيع. كانت مرتبة كل حاجة، عقد بيع جديد بصمت سادين عليه. فضلت سادين مخدرة لحد الليل، شاهنده أدّت كل الخدم إجازة مدفوعة الأجر.

الفيلا بقت فاضية، أول ما سادين فتحت عينيها لقت شاهنده جنبها على السرير. سادين: آسفة، نمت غصب عني وسبتك لوحدك. سادين: بصراحة أنا مصدعة ونفسي في فنجان قهوة. خدت سادين فنجان القهوة وشربته وفقدت الوعي. بعد ربع ساعة شاهنده كلمت جعفر، وصل هو واتنين معاه. أمرتهم ينقلوا سادين لعربيتها وانطلقت بسيارتها خلفها جعفر واللي معاه. كلمت معاذ الشمري، طلب منها تنقل سادين على فيلته اللي في التجمع الخامس، هيكون في انتظارها هناك.

قبل ما توصل شاهنده وقفت العربية وطلبت جعفر: انت عارف هتعمل إيه كويس؟ جعفر: أيوه يا هانم، أنا جايب معايا خبير تصوير فيديوهات. شاهنده: أقسم بالله يا جعفر لو حصل أي خطأ هقتلك. أنا عايزة صورة واضحة، معاذ الشمري لازم يبقى تحت أمري. جعفر: متقلقيش يا هانم، كله مترتب.