رواية الدكتورة والمغرور الفصل الرابع والعشرون 24 - بقلم الكاتبة الصغيرة

عند نيره وزين في المستشفى. زين وعمر دخلا الأوضة عند نيره وأسماء. عمر بصوت واطي لنيره: هو ممكن بعد إذنك تصحيها علشان تاكل، لأنها بقالها كتير نايمة وهي واخده علاج ولازم تاكل علشان العلاج ده. نيره مبصتلوش وقالت ببرود: تمام، متشكرين أوي على المعلومة. عمر بص عليها بزعل وراح قعد على الكرسي اللي قصادها. نيره بهدوء وهي بتصحي أسماء: اسماء فتحت عينيها بصعوبة كبيرة وقالت: نعم يا نيره. نيره بابتسامة: قومي يا حبيبتي علشان تاكلي.

اسماء بصت الناحية التانية وقالت بحزن: مش عاوزة أكل، سبيني أموت وأخلص من اللي أنا فيه ده. نيره بصتلها بدموع وقالت: وتسبيني لمين؟ هو أنا ليا غيرك في الدنيا يا أسماء؟ لدرجة دي أنا مش فارقة معاكي وعاوزة تسبيني؟ اسماء بصتلها والدموع بدأت تتجمع في عينيها وقالت: مقدرش أسيبك يا حبيبتي، ده انتي كل حاجة ليا، ده انتي عشرة عمري يا بت. نيره بضحك في وسط دموعها: طب قومي بقا علشان خاطري علشان تاكلي.

اسماء قامت بصعوبة ونيره سندتها علشان تقوم وقعدت جنبها. عمر راح عندهم وقال بتوتر وارتباك واضح: ممكن آكلها أنا لو سمحت. نيره كانت لسه رايحة تتكلم، قاطعها زين وهو بيقول: زين: أه طبعًا يا حبيبي، قومي يا نيره وسبيهم وتعالي برا علشان عاوزك. اسماء: زين أنا مش عاوزة حد ياكلني غير نيره، تمام. زين بضحك: لا أصل أنا عاوز مراتي معلش، وهجبهالك تاني. نيره بنرفزة: زييييين. زين وهو بيشدها: عيون زين والله. وسابوهم وطلعوا برا.

وعمر فضل واقف قدام أسماء وأسماء باصة الجهة التانية. عمر راح قعد قصادها وقال: ممكن تبصيلي. اسماء: ......... عمر بدموع: أسماء أنا والله ما أعرف اللي انتي قولتي ده كله، صدقيني لو سمحت، عاوزك تبصيلي، بصي في عينيّا. اسماء بصتله وعينيها كلها دموع. عمر: أنا آسف، سامحيني. اسماء بدموع: أسامحك على إيه؟ هو أنت عملت حاجة لا سمح الله. عمر: أنا عمري ما قسيت على حد والله، صدقيني، أنا طيب أوي. اسماء ضحكت بسخرية وقالت:

أه، ما هو باين عليك أوي. عمر باحراج: صدقيني مكنش قصدي، أنا عصبي وعصبيتي خلتني أعمى. اسماء: أنا عاوزة أطلق، أظن كده مفيش حاجة تجبرك عليا. عمر بضحك وهو بيشد الأكل علشان ياكلها. اسماء باستغراب: انت بتضحك على إيه؟ هو أنا قلت نكتة ولا حاجة. عمر أكلها علشان تسكت. اسماء وهي بتاكل: يا عمر أنت سامعني ولا إيه. عمر بضحك: لا مش سامع حاجة، واسكتي بقااا وأنتي بتاكلي.

اسماء سكتت بس مسكتش من جواها وفضلت تفكر وتسأل نفسها هتعمل إيه في اللي جاي، وبعد ما سرها اتكشف قدام الكل، وإن لو هما عرفوا هو مين هيتصدموا. وفاقت من شرودها على صوت عمر. عمر بهدوء: خلاص شبعتي ولا لسه. اسماء: أه الحمدلله. عمر شال صنية الأكل وراح قعد قصادها. عمر: ممكن أسألك سؤال وتجاوبي بكل صراحة. اسماء في نفسها: أكيد هيسألني على اللي عمل فيا كده مين، يا ربي هعمل إيه دلوقتي وهقولوا إيه. عمر: أسمااااء انتي معايا.

اسماء بتوتر: هااا أه معاك معاك، اتفضل قول سؤالك. عمر: ممكن أعرف ابن الـ... اللي عمل كده مين، علشان والله ما هرحمه. اسماء بتمثيل إنها تعبانة: معلش يا عمر نكلم في الموضوع ده وقت تاني، أنا تعبانة أوي وعاوزة أنام. عمر فهم إنها مش عاوزة تتكلم وقال: حاضر. وقام من قصادها وراح نام جنبها وأخدها في حضنه. اسماء بصدمة: انت ياا أخ إيه اللي عملتو ده، سبني لو سمحت. عمر بضحك وتملك أكتر: هشش مش عاوز أسمع صوت ونامي وارتاحي ياله.

اسماء وهي بتحاول تقاوم وتقوم بس مقدرتش لأنها تعبانة، فاستسلمت وبعد شوية نامت. عمر بص عليها بهدوء وابتسم بلطف. وبعد شوية لقاها بتترعش وبتقول كلام مش مفهوم وهي نايمة. عمر فهم إنها بتحلم بكابوس، شدها لحضنه أكتر وفضل يمسح على شعرها وقال: ششش أهدي يا حبيبتي، أهدي، أنا جنبك. وبعد دقايق هدت أسماء ورجعت لوضعها الطبيعي. عند زين ونيره وهما قاعدين في كافيه المستشفى.

نيره بعصبية: أنا عاوزة أقوم أطمن على أسماء، أصل أستاذ عمر ده مش مضمون، ممكن يعمل فيها حاجة تاني. زين ضحك بسخرية وقال: هو هيفترسها ولا إيه. نيره بنرفزة: هتقعد تهزر كده كتير، أنا هقوم أروح لهم. وقامت نيره ووراها زين وهو بيضحك عليها. وراحوا. ونيره فتحت الباب بهدوء واتفاجأوا لما لقوا أسماء في حضن عمر وحضنها بتملك وإيده على شعرها ونايمين بعمق وهدوء. نيره بصتلهم بحب وقالت: شكلهم لطيف أوي يا زين. زين فرح من جواه جدًا

وقال بصوت واطي لنيره: تعالي وسيبيهم نايمين، ياله يا حبيبتي. نيره طلعت وقفلت الباب بهدوء وقالت: معقولة بجد مش مصدقة اللي شفته ده. زين بصالها بمشاكسة وقال: متيجي ننام شوية إحنا كمان، ولا هما أحسن منا يعني. نيره: زييييين. زين بضحك: عيون زين. نيره: احم، تعال نقعد هنا لغاية ما يصحوا. زين: بجد تعالي ننام شوية على ما يصحوا، أنا منمتش خالص وعاوز أرتاح شوية، حرام عليك.

نيره بضحك عليه: خلاص خلاص، اسكت بس بشرط، أنت اللي هتنام بس، أنا هرجع تاني هنا. زين بخبث: أكيد يا حبيبتي، مش معقولة تسيبي صحبتك حبيبتك لوحدها يعني. نيره: ماشي، تعال ياله، هوديك الأوضة اللي كنت برتاح فيها لما كنت بتعب من الشغل، محدش بيدخلها غيري وكده يعني. زين: ماشي يا حبيبتي، ياله. نيره خدته وراحت على الأوضة ودخلت هي الأول علشان تجهز السرير لزين. زين قفل الباب وحضنها من ضهرها وقال بضحك: بخخخ يا عسل.

نيره بضحك: المفروض إني أتخض كده يعني. زين بضحك: مثلي يا ستي، متعرفيش تمثلي. نيره بخضة مزيفة: ياااا لهوي، اتخضيت، خلاص حلو كده. زين بضحك: يالهوي عليكي إنتي يا قمر حياتي. نيره وهي بتبعده: اتفضل ياله نام بقاا، وأنا همشي أروح عند أسماء. زين بضحك: أهاااا طبعًا أماااال. وهوب راح شايلها وحطها على السرير. نيره: زييييين، سبني علشان خاطري، أنا مش عاوزة أنام. زين دفن وشه في رقبتها ونفسه الدافي بيخبط في رقبتها بكل لطف.

نيره بتوتر: زيين، أنا مش عاوزة أنام. زين بهدوء: ياله يا نونا نامي علشان مش هتقومي. نيره ضحكت وقالت: شريررر وضحكت عليا، المفروض مكنتش أسمع كلامك وأجي معاك. زين بضحك: ماشي يا ستي، أنا شرير، نامي بقاا. نيره ضحكت وفضلت تلعب في شعره بهدوء لغاية ما ناموا الاتنين. وبعد ساعات صحت أسماء لقت نفسها في حضن عمر. ضحكت بكسوف وتعب وصحت عمر بهدوء. اسماء: عمرر يا عمررر. عمر بنوم: اممممم، سبيني أنام شوية يا سمر.

اسماء والدموع بدأت تتجمع في عيونها.