رواية الحب الروحاني الفصل السادس عشر 16 - بقلم يارا عبد السلام

بعد المحاضره.. الكل خرج وهى وقفت قدامه. نور بعصبية: أنا مش هسمحلك تكلمنى بالطريقه دي وتتحكم فيا. يحيي ببرود: براحتى. نور: _بصفتك اي. يحيي: _بصفتى هبقى جوزك أن شاء الله. نور بصتله بصدمه وقلبها بدأ يدق بقوة لدرجة أنها خافت أنه يسمع دقات قلبها بس قررت انها تجننه الاول ومش هتوافق بسهولة. نور: _جوزي ازاي يعنى ومين قالك اصلا اني موافقه. يحيي: _هتوافقى يا نور. نور: _لا طبعا مش بمزاجك مش كل حاجه بمزاجك. يحيي:

_ومين قالك أنه هيكون بمزاجى هوا هيكون بمزاجك انتى وانتى اللي بنفسك هتوافقي. نور: _هه دانت بتحلم عن اذنك علشان مش فاضيه للكلام دا. وسابته ومشيت. وهوا فضل باصص في اثرها بابتسامه: أنا عارف انك هتجننيني يا نور بس معلش كله يهون علشان قلبك دا يكون ملكى. أنا استاهل علشان محستش بيكي زمان وكنت قاسى على نفسي اووي وبسبب كدا قسيت على جوهرة زيك.

نور خرجت ووشها احمر من الكسوف عوزا الأرض تنشق وتبلعها اخيرا نطقها اخيرا قال إنه هبتجوزها وهتبقى مراته. راحت لمريم اللي شافتها بتكلم نفسه. مريم بضحك: انتى مالك كدا يا بنتى انتى بتكلمى نفسك. نور بهيام: اصله قالها. مريم: _هوا مين وقال اي. نور: قال انى هبقى مراته يا مريم تخيلي!! يحيي نطق خلاص بقالى تلات شهور عالحال دا واخيرا نطق. مريم:

_يبنتى هوا انتى لاقيه كرامتك في كيس شيبسي هوا مش انتى قولتى انك هتبعدي عنه ومش هتكلميه ولا ليكي دعوة بيه ولسه متخانقه معاه وكنتي واقفه دلوقتي علشان تتخانقى معاه. نور: _مهو مهو فاجئني بس انا اي وقفت قدامه كدا بقوة وقولتله مش موافقه. مريم هوا ممكن ياخد كلامى جد وميتجوزنيش فعلا. مريم: _يارب صبرني عالبت دي علشان هقتلها عديمة الكرامه دي يا سهله. نور: _انا سهله يا مريم. مريم:

_اه يا قلب مريم سهله وغوري من وشي علشان ملعبش فيه البخت. نور: _طيب أهدى وقوليلي اعمل اي أنا كدا كدا مش هوافق بسهوله. مريم: _ودا المطلوب لازم تلففيه حوالين نفسه علشان يعرف قيمتك ويحس أنه مش هياخدك بسهوله وانك غاليه. نور: _اه. مريم: _حسسيه أنه ميفرقش معاكي والكلام اللي قاله دا عادى بالنسبه ليكي. نور: _اه. مريم:

_حسسيه أن رفضه ليكي زمان قطع رابط كبير اووي من ناحيتك وانك مش بسهوله ترجعى تربطي الرابط دا وانك قلبك انكسر بسببه. نور: _اه. مريم: _عامليه بجمود وبطريقة جافه علشان يحس فعلا أنه خسرك وخسر الجوهرة اللى جواكى. نور: _اهمريم ضربتها على رأسها: هوا اي اللي اه انتى هتنفذى الكلام دا ولا لا. مريم: _يبنتى بأكدلك انى فاهمه وهعمل كدا متقلقيش أنا مستحيل أضعف قدامه. مريم: _اتمنى متضعفيش مع انى شاكة. نور: _عيب عليكي. مريم:

_ربنا يستر. أنا هقوم اروح علشان عندنا فرح في البيت. نور: _فرح مين يا نادله. مريم: _فرح بنت عمى يا اختى بنت المحظوظه النهارده خطوبتها على دكتور كدا مش عارفه بتاع مسالك ولا اي هه بس سبحان الله الاتنين غتتين زي بعض. نور: _وجيتي لي النهارده. مريم: _مانتى عارفه اني بستلطفهاش وانتى عارفه أن ماما لما بتصدق تشوفنى في البيت. نور: _اها روحى يا مريم تعالى يا مريم اعملى يا مريم. مريم:

_ومريم زهقت والله امتى يجي قرة عيني بقى وينتشلنى من اللى أنا فيه دا. نور: _هوا مش مسافر يا بنتى ولسه قدامه سنه عقبال ما ييجي. مريم بدموع: _مهو دا اللى مخليهم كلهم يتحكموا فيا ويعملوا اللي هم عوزينوا وانا مضطره اسكت علشانه. نور: _هوا مش طلب ايدك قبل ما يمشي وبعدين هوا مش غريب دا ابن خالتك. مريم:

_ولو يا نور هم عندهم أن مفيش لسه حاجه رسميه ولولا انى واقفالهم كانو نفذوا اللي في دماغهم وجوزوني اى حد. بس اللي مفرحنى أن خالتو واقفه معايا وبتحبنى وهوا كمان بيحبني. نور: _ربنا يرجعه بالسلامه وافرح بيكي بقى. مريم: _يارب يا نور غيبته طولت اووي وحشني. نور حضنتها وطبطبت عليها لأنها عارفه قد اي هى بتحب طارق ابن خالتها اللي مسافر بقاله خمس سنين علشان يشتغل ويقدر أنه يأسس ليهم بيت. مريم قامت: _أنا همشي بقى يلا سلام.

حضنت نور ومشيت ونور بصت في اثرها بدموع. نور: _ربنا يريح قلبك يا مريم. “فات من عمري سنين وسنين شفت كتير كتير وقليل عاشقين اللي بيشكى حاله لحاله. واللى بيبكي على مواله. اهل الحب صحيح مساكين صحيح مساكين اهل الحب صحيح مساكين صحيح مساكين” كانت قاعده بتسمع الاغنيه واتبعتلها رساله على التليفون. “ياما عيون شاغلونى لكن ولا شغلونى الا عيونك انت دول بس اللي خدونى خدونى وبحبك امرونى ♥️”

كانت رساله من يحيي ابتسمت بسعادة ولسه هترد افتكرت كلام مريم انها لازم تتقل ومتديلوش اي اهتمام. نور: _ماشي يا يحيي أنا هوريك. كانت قاعد في البلكونه وبيسمع ام كلثوم. يوسف دخل ومعاه اتنين قهوة: يا سيدي يا سيدي شكل الحب دق بابنا من جديد وخلاص العقده هتنفك. يحيي: _شكلها هتجننى يا يوسف مش هتستسلم بسهوله أنا عارف. يوسف:

_وانت كمان متستسلمش بسهوله نور شخصيتها جميلة جدا عندها كبرياء ومستحيل تتنازل بسهوله ف لازم انت اللى تحاول ومهما حصل متستسلمش عاوزك تستمتع وانت بتخوض التجربه دي وكأنك اول مره تحب ولازم تشوف نور من منظور تاني غير انها بتحبك وعاوزاك شوفها من ناحية قلبك وشوف هوا عاوز اي. يحيي ابتسم وبصله: انت كبرت اووي يا يوسف حاسس انك مش ظابط حاسس انك دكتور نفساني. يوسف:

_يعم مش للدرجادي بس اهو ملقناش حظنا في الحب بنساعد غيرنا على الله يطمر وتسمى اول عيل على أسمى. يحيي: _مش لما اتجوزها الاول. يوسف: _هتتجوزها متقلقش لو عاوزني اخطفهالك أنا معنديش مانع. يحيي: _هههه لا يعم مش للدرجادي نور عاقله وهتوافق بالذوق. يوسف: _اههههه منا عارف. أنا هقوم انام علشان عندى مهمه الصبح. يحيي: _ماشي ربنا معاك. عند مريم. كانت قاعدة بعيد عنهم كلهم حاسه ان في حاجه ناقصه في وجودهم.

اتنهدت بحزن وبصت في الارض بتداري دموعها. صوت: _تسمحيلي اقعد هنا. ملامحها اتغيرت واتعصبت ورفعت راسها ولسه هتزعق شافته وهوا واقف وعلى وشه ابتسامه هادية زي عادته قلبها قام من مكانه قبل رجليها. مريم: _طارق! طارق: _قلبه وحشتيني يا مريم. مريم اتكسفت وبصت في الارض. طارق: _لسه بتتكسفى يا مريم. مريم: _انت مش قولت هتقعد ست سنين. طارق: _مقدرتش اقعد اكتر من كدا مقدرتش استحمل ابعد اكتر كفاية بعد بقى. مريم دموعها نزلت:

_انت انت حقيقي واقف قدامى ولا بيتهيألى. طارق: _لا يستى واقف قدامك وارجوكى متعيطيش علشان مكتبش الكتاب دلوقتي واخدك في حضنى قدام الناس دي كلها. مريم وهى بتمسح دموعها زي الاطفال: _خلاص اهو. طارق: _انتى زعلتى انى هكتب الكتاب. للدرجادي مش بتحبينى. مريم بسرعه: _لا لا والله مش قصدي أنا أنا. طارق ضحك وقرب منها: _وانا كمان بحبك. مريم ابتسمت وبصت في الارض.

طارق راح عند ابو مريم وبعدها قرب من مريم. وركع قدامها وطلع علبه قطيفه وفتحها كان فيها خاتم جميل اووي. مريم اتفاجئت وبصت لخالتها اللي بصتلها بفرحه وسعاده باينه على ملامحها وهزت راسها ليها انها توافق. طارق: _تتجوزيني يا مريم. مريم: _موافقه طبعا موافقه. لبسها الخاتم والكل سقف ليهم والخطوبه بتاعت بنت عمها اتحولت لخطوبتها هي كمان. عند نور. كانت خارجه تشرب ميه ولقت ابوها قاعد وشكله تعبان. نور: _احم في حاجه. ممدوح يصلها:

_لا مفيش يا بنتى. نور: _ماشي. دخلت تشرب وخرجت لقته ماسك قلبه. نور قربت منه بسرعه: _مالك انت خدت الدوا. ممدوح: _خلصان. ولبست بسرعه ونزلت. يحيي كان واقف في البلكونه وشاف نور خارجه من العماره وماشيه ناحية اول الشارع. يحيي: _رايحه فين المجنونه دي في الوقت دا. كانت ماشيه بسرعه وفجأة طلع قدامها شابين. الشاب الأول: _الحلوة رايحه فين. نور: _وسعوا من طريقي لو سمحت. الشاب الثاني بوقاحه: _تؤ يا حلوة. طلعت الموبايل:

_خدو دا اللى معايا ولو سمحتوا ابعدوا. الشاب الأول بوقاحه: _لا احنا مش عاوزين الموبايل احنا عاوزين اللي شايله الموبايل. نور بعصبية وهى بترفع ايديها تضربه: _يا وقح يا قليل الادب. الشاب الأول بعصبية: _انتى قد القلم دا. ولسه هيمد أيده عليها لقى اللي بيزقة على الأرض وبدأ يضرب فيه.