رواية اللغز الفصل السادس عشر 16 - بقلم سالي محمد

أنا وامجد والولاد بنتفرج ع الفيلم وفرحانين. وف وسط ما احنا مندمجين سمعنا صوت حادث عربيه وناس بتصرخ. أمجد قال: محدش يتحرك دلوقتي. الباب هيخبط، مش عايز صوت. وبأشارة بليده البيت كله بقي ظلمه والتلفزيون طفاه. قولت بصوت واطي ف ودن أمجد: ف اي؟ قالي: هقولك بعدين. انا خوفت والولاد خافوا. أمجد حضنا واستخبينا ف حضنه. وهمس بصوت واطي جدا: متخافوش، انا هنا. اطمنت شويه لما أمجد حضني انا والولاد. حسيت بأمان فعلا.

مافيش دقيقه والباب خبط. قولتله بهمس: أمجد مش هتفتح؟ قال: لا، احنا مش هنا. قولتله: ليه؟ ف اي؟ قال: أمنيه اسكتي دلوقتي. واللي ع الباب فضل يخبط بابديه الاتنين والصوت مزعج. وسكت مره وحده. أمجد قام من مكانه جري ومد ايده قريب من باب الشقه وفضل يهمس بكلمات مش فاهمها. والولاد قاموا عملوا زيه ع الشبابيك. فجأه سمعت صوت هبد جامد ف الباب. جريت ع أمجد حضنته من ورا وانا بترعش. والولاد جم حضنوني انا وامجد برضو من ورا.

أمجد حس بخوفي. التفت ليا وخدني ف حضنه جامد. قالي: متخافيش، انا هحميكم لاخر نفس فيا. قولتله وانا بعيط: مين دول وعايزين اي؟ قال: ناس من عشيرتي تبع ماهينار. قولت: هي لسا بنت عمك دي بتحبك؟ هي ورانا ورانا. قالي: متقدرش تحب غيري. هي بتحاول ترجعني تاني بس انا قلبي خلاص ملكك انتي ياعمري. وحط ايده ع خدي، مسح دموعي وباسني ع جبيني. وقالي: ماتقلقيش، انا مش هسمح ليهم بالدخول. وعملنا تعويذه تمنع دخول اي جن. قولتله: طب وعين؟

قالي: عين وصلت ليها الخبر وهي اصلا مش جايه. تعالي نكمل الفيلم. قولتله: فيلم اي بقي؟ انا دمي نشف. قالي: نجري؟ وغمز بعينه. تيجي؟ قولتله: أمجد انت رايق بجد؟ هو دا وقته؟ قالي: دا وقته ونص. قولتله: لا طبعاً، لما تسترد صحتك. قالي: انا ياقلبي بضحكك، اضحكي. عايز اشوف وشك بيضحك. ابتسمت عشان اخفف عنه. عارفه اللي شافه مش شويه. قالي: ايوة كدا، بحبك موت. وحضني تاني.

وقعدنا نكمل الفيلم بس دماغي ماكنتش مع الفيلم. دماغي مع ماهينار واللي عايزة تعمله. ولما الفيلم خلص أمجد لاحظ سرحاني. قال للولاد: حبايبي، يلا كملوا لعب جوه. يلا ع الاوضه. ودخلوا. وهو قرب مني وحط دماغي ع صدره. وقلتله: أمجد امتي هتفهمني اللغز؟ انا بقيت تايها.

قالي: ياستي، اللي كانوا بيمثلوا دلوقتي ان العربيه عطلت دول خدم ماهينار. بصي، هي كانت كل حياتها، انا من صغرنا وهي بتحبني ومش شايفه غيري زوج ليها. وف ليله كانت ف مهمه للبيت دا، هو كان مهجور اصلا. قولتله: أمجد هي المهمه كانت انا؟ اتوتر وقالي: اه.