رواية الم البداية الفصل الحادي عشر 11 - بقلم فريده احمد

ريم خرجت من الشقة بسرعة ونزلت وقفت تاكسي وركبت فيه. سواق التاكسي: هتروحي فين يا آنسة؟ ريم: المقطم. وقالت له على العنوان بالضبط، والسواق وصلها مكان ما قالت له. بعد وقت، ريم نزلت من التاكسي بعد ما حاسبته، ووقفت أمام مركز التجميل اللي هي شريكة فيه مع صاحبتها داليا. ريم اتنهدت ودخلت وهي بتبص على المكان بابتسامة حزن. في الداخل نهى، بنت من اللي بيشتغلوا في المكان، أول ما شافتها قربت عليها وقالت لها بابتسامة: آنسة ريم ازيك؟

ريم: ازيك يا نهى، عاملة إيه؟ نهى: كويسة الحمد لله، حضرتك أخبارك إيه، وليه مش بتيجي المركز بقالك فترة؟ ريم: كنت تعبانة شوية. نهى: ألف سلامة عليكي. ريم بابتسامة: الله يسلمك. ريم سلمت على كل الموجودين اللي أول ما شافوها كانوا مبسوطين جدًا. ريم للبنات: أمال فين داليا؟ البنات قالوا لها إن داليا في الدور الثاني. ريم هزت رأسها وطلعت. داليا أول ما شافتها سابت اللي في إيديها وجريت عليها وحضنتها بحب. داليا: كنتي فين يا ريم؟

ليه كل شوية بتختفي؟ قولتيلي إنك هتجيلي إمبارح ومجيتيش ولما حاولت أكلمك لقيت تليفونك اتقفل. ريم بتعب: تعالي ندخل جوه. داليا بعد ما دخلوا وقفلت الباب قعدت قدامها. وقالت لها: مالك يا ريم في إيه؟ ريم مرة واحدة اتفتحت في العياط. داليا بقلق: مالك بس يا حبيبتي؟ وقربت منها وحضنتها. داليا: في إيه ما تقلقينيش عليكي يا ريم. ريم بعدت وقالت لها: أنا تعبانة أوي. داليا مسكت إيديها وقالت لها: حبيبتي ممكن بس تفهميني مالك فيكي إيه؟

ريم هزت رأسها وقالت لها: هقولك عشان حاسة إني تايهة. ريم مسحت دموعها وبدأت تحكي لها على كل حاجة وكل اللي عمله معاها حازم من وقت ما شافها في القسم لحد ما اتجوزها، وتهديده ليها أنه هيأذيها لو ما سمعتش كلامه. داليا وهي حاطة إيديها على بوقها ومصدومة من اللي بتسمعه: معقول في إنسان بالحقارة دي؟

ريم بدموع: أنا اتدمرت يا داليا، ضحك عليا وفهمني إني مش بنت وإن تقرير الطب الشرعي أثبت إن حصل بيني وبين الحيوان التاني ده علاقة وأنا صدقته، منا كنت متخدرة ومكنتش حاسة بحاجة، أنا مش عارفة أعمل إيه، حاسة إني في كابوس حياتي كلها اتقلبت مرة واحدة. ريم: والحيوان مش مكفيه كل اللي عمله فيا وبيقولي إن أميرة هي اللي لبستني القضية دي. ريم بحيرة: أنا مش مصدقة، هي أميرة ممكن تعمل فيا كده بجد؟ داليا

اتنهدت وقالت لها بهدوء: صدقي يا ريم. ريم بصت لها بصدمة قبل ما داليا تكمل وتقول لها: أميرة فعلًا هي اللي عملت فيكي كده، هو مش بيكذب عليكي. ريم بعدم تصديق: أنتي بتقولي إيه؟ أميرة أختي وصاحبتي هي اللي عملت فيا كل ده، طب إزاي وليه؟ ريم: أنا مش فاهمة حاجة. داليا: بصي يا ريم، أميرة بتغير منك ومن زمان، بس أنا برضه مكنتش متصورة إنها هتوصل بيها السافلة وتعمل فيكي العملة السودة اللي عملتها دي.

ريم وهي في حالة ذهول: طيب وأنتي عرفتي إزاي إن هي السبب؟ داليا: سمعتها بوداني وهي بتكلم المحامي واتأكدت إنها هي ورا كل اللي حصلك. داليا: أنتي متعرفيش كانت عاملة إزاي لما عرفت إن أنتي خرجتي، دي كانت هتتجنن إن خطتها فشلت. ريم وهي بتهز دماغها من اللي بتسمعه: أنا مش مصدقة، أميرة! وضحكت بسخرية على غبائها وهي بتقول: يعني كل اللي حصلي ده من صاحبة عمري، وأنتي إزاي كنتي عارفة ومقولتيليش؟

داليا: أنا لسه عارفة من يومين، وهو ده الموضوع اللي كنت عايزة أحكيهولك لما كلمتك إمبارح بس أنتي اللي اختفيتي. ريم: أنا مش عارفة ألاقيها منين ولا منين، من حازم الزفت ولا من أميرة اللي لحد دلوقتي مش قادرة استوعب إن هي اللي عملت كل ده، ولا من فارس اللي طلع معندوش أي ثقة فيا. ريم: أنتي عارفة أنا حاسة بإيه دلوقتي؟ أنا اتخدعت في أكتر اتنين قريبين ليا، أنتي متخيلة، حبيبي وصحبتي.

داليا: عارفة إنها حاجة صعبة، بس صدقيني الاتنين ما يستاهلوش إنك تزعلي نفسك بسببهم. داليا: وبعدين أنتي متخيلة الزبالة أميرة دي عملت كل ده ليه؟ ريم بضياع: مش عارفة، مش عارفة إيه السبب اللي ممكن يخليها تأذيني بالطريقة دي. داليا: عشان بتحب فارس يا ريم، وطبعًا هي اللي شككته فيكي، تعرفي إنها بقت بتقابله كل يوم. ريم: كفاية، كفاية أنا مش عايزة أسمع اسمهم تاني. ريم قامت: أنا لازم أمشي. داليا: طيب أنتي ناوية تعملي إيه؟

ريم: في إيه؟ داليا: هتعملي إيه مع جوزك ده؟ ريم بتعب: مش عارفة، بس مش هرجعله. داليا: أمال هتروحي فين؟ ريم: أنا هسافر شرم الشيخ لماما. داليا: وتفتكري هيسيبك؟ ريم: عارفة إنه مش هيسيبني بس أنا حاليًا مش عايزة أشوف وشه. داليا: بصي يا ريم أنا معاكي إن حازم ده حيوان وواطي، بس أنا شايفة إنه هو الوحيد اللي يقدر يحميكي. ريم: يحميني من مين؟ أنا محتاجة اللي يحميني منه.

داليا: أنا حاسة إنه مش هيأذيكي، اللي عمله معاكي ده وإصراره عليكي بيقول إنه بيحبك. ريم بسخرية: بيحبني؟ وليه ما تقوليش إن إصراره ده عشان هو إنسان مريض وأناني أهم حاجة إنه يحقق رغبته وبس؟ داليا: لا يا ريم أنا متأكدة إنه حبك والدليل على كده إنه اتجوزك. ريم: اسكتي يا داليا أنتي مش فاهمة حاجة، اللي زي حازم ده ميعرفش يحب، ده اتخلق عشان يأذي بس.

داليا: على فكرة بقى لو هو فعلًا كان عايز يأذيكي كان خد منك اللي عايزه من غير جواز، وزي ما بتقولي بني آدم بجبروته ده مكانش هيفرق معاه غير رغبته وبس. ريم: أنا ليه حاسة إنك بتدافعي عنه؟ داليا: أنا مش بدافع عنه أنا بس بقولك فكري كويس أنا مش عايزاكي تخسري كل حاجة. ريم بيأس: أنا خلاص خسرت كل حاجة، يلا أنا همشي أنا بقى. وقامت. داليا: هتسافري؟ ريم: أيوه. داليا: أنا من رأيي ما تسافريش من وراه، أنا خايفة عليكي. ريم وهي بتاخد

شنطتها من على الكرسي: ما تخافيش، هيعمل إيه أكتر من اللي عمله؟ داليا: طيب خلي بالك من نفسك وابقي طمنيني عليكي. ريم: حاضر. وفتحت الباب ولسه هتخرج لقت أميرة في وشها. أميرة: ريم وحشتيني أوي. ولسه هتحضنها، ريم رفعت إيديها قدامها. وقالت لها بحدة: خليكي مكانك. أميرة باستغراب: في إيه يا ريم؟ إيه المعاملة دي؟ ريم بسخرية: بجد؟ عايزة تعرفي في إيه؟ أميرة بتوتر: أيوه طبعًا. ريم: في إنك واحدة واطية وزبالة.

ورفعت إيديها ومرة واحدة راحت نازلة على وشها بالقلم.