رواية المجنونة الفصل الخامس 5 - بقلم اليا

الأربعة قاعدين، كل واحدة بتبص للتانية متوترين، مستنيين يدخل عليهم من الباب بعدما واحدة منهم شافت عربيته بتركن. بص في وجوههم، مريحوش وضعهم، نفس البصة لما يكونوا عاملين مصيبة. معاذ افتكر بنته المفروض تكون وسطهم، بيدور ملقهاش، اتخض عليها. "هي فين؟ مريم نطت واقفة مكانها بترجف، وحاسة بشدة بسمة لفستانها بتحاول تمنعها متفضحهمش. "هي مين ديه؟ لو تقصد البنت اللي لابسة جاكيتك مشفناهاش." بسمة بغيظ. "الاهي تبلعي لسانك."

معاذ اتعصب. "وديتو البنت فين؟ ما تنطقوا." سمية لطمت. "هننطق ياخويا هننطق، بس كله من تحت راس فريدة وبسمة، معملناش حاجة، بريئين من ذنبهم، متطلقناش يا معاذ." معاذ زعق. "فريدة." فريدة بدلع. "نعم يا حبيب فريدة." معاذ. "يا رب صبرني، قولولي البنت فين؟ "أنا هنا يا حبيبي." فريدة برقت، همست في ودن بسمة لما شافتها نازلة من على الدرج. "إزاي ديه طلعت من أوضة مقفولة، بالمفتاح، هيطلقنا خلاص." بسمة بغل. "وبتنادله حبيبي قدامنا."

لين جريت حضنته، بدلال. "انت رجعت، اتأخرت عليا." معاذ بحنية. "آسف، انت كويسة؟ بسمة مرارتها هتفقع، من قلقه وحنيته عليها. "كده كتير يا معاذ، اتجوزت علينا على سنة الله ورسوله، قلنا ماشي شرع ربنا، إنما تجيب واحدة لا انت حلالها ولا هي حلالك تحضنها في نص بيتنا وقدامنا، منقبلهاش على نفسنا." معاذ مستغرب. "انت بتقولي إيه؟ لين معرفتيهمش انت مين بالنسبالي؟ لين ضحكت.

"الصراحة لا، هما في البداية سابولي مجال، وبعدما استوعبت سوء الفهم، ردات فعلهم ضحكتني، حبيت أتسلى معاهم، أنا غلطانة؟ معاذ ضحك. "شقية يا لين، ديه لين بنتي." الأربعة بصوت واحد. "بنتك؟ معاذ برفع حاجب. "أيوه بنتي، لين اعرفك مراتي الأولى مريم، مراتي التانية فريدة، مراتي بسمة، والرابعة مراتي سمية، اعتبريهم في مقام مامتك." لين ابتسمت. "أربع أمهات مرة واحدة."

بعتها مع مريم تدلها على أوضتها تديها من هدومها بيجامة تلبسها لين ما تشتري اللي يلزمها. معاذ ريح على الكنبة وطلب قهوته من فريدة. معاذ بيشرب القهوة وبعد رجعة مريم، الأربعة قاعدين حواليه مستنيينه ينطق. "بتبصولي كده ليه؟ حد عنده اعتراض في اللي قلته قبل شوية." بسمة ابتسمت. "مفيش اعتراض يا حبيبي، بس عايزين نفهم إزاي فجأة بقيت مخلف بنت طولك." سمية ببلاهة. "لأ ديه أقصر منه." فريدة بغيظ. "تعرفي تسكتي يا سمية." معاذ كشر.

"شايفك بتسكتيها، ليها الحق تقول اللي هي عايزاه زيك زيها." فريدة بدلع. "مش قصدي يا حبيبي، بس مستعجلين، عايزين نفهم، بعد العمر ده كله، طلع عندك بنت وإزاي مفيش واحدة منا تعرف عنها حاجة." معاذ بهداوة. "بنتي وبنت رقيه الله يرحمها، مراتي قبل ما اتجوز مريم، إزاي، وهي كانت فين؟ ليه محدش عنده خبر؟ مش مهم، المهم تاخدوا بالكم منها." الأربعة ساكتين. معاذ. "مش سامع منكم كلمة حاضر يا معاذ." مريم بلعت ريقها.

"حاضر يا حبيبي، متخافش." بسمة بمجرد ما معاذ مشي. "سامعة بيقول بنته، بنته إزاي وهو على أساس مبيخلفش، خلفها إزاي، وديه كانت فين في السنين اللي فاتو." فريدة بغيظ. "مش شايفاه مهتم بيها زيادة، البنت لازم تطلع من البيت ده." سمية بلعت ريقها. "بس معاذ قال." بسمة قاطعتها. "لو البنت ديه فضلت هنا هتنسي معاذ خالص، حلنا الوحيد نمشيها، وإلا مش هيحصل خير، مش بنته متأكدة وهثبتلكوا."