رواية الملك النمر الفصل السادس عشر 16 - بقلم بيتر نيدفيد

"فى قصر نيبرو" وقف هيرون قدام الملك الحارق وقال: -الحملة العسكرية جاهزة وفى انتظار اوامر جلالتك بالتحرك. = هنتحرك عند الفجر وهقود الجيش واستراحتنا الاولى هتكون عند جبل الحياة. -جلالتك لسة مصمم تقود الجيش؟ = ضربة واحدة من سيفى هتنهي الحرب وهتخضع مملكة صوفيا ليا. -الأمير هواش هيستلم امانة العرش؟ = لاء، الملكة ماجدوليا هتدير شؤون المملكة نيابة عن الأمير دراجو.

-أختيار موفق يامولاي، الملكة ماجدوليا قوية وتستحق أمانة العرش لحين عودة جلالتك بخير وسلام. = لو على الاستحقاق فالأمير هواش هو الاحق بده، لكن عشان امانهم هبعدهم عن العرش. -ومين ممكن يأذي ابن الملك او زوجته، أستحالة حد هيجرؤ على المساس بيهم. = اوقات بنكون شايفين وفاهمين ولكن بنتظاهر بالعكس. -تقصد ايه جلالتك؟

= مش مهم، خلينا دلوقت في خط سير الحرب، هتتحرك انت اولا بمجموعة من جنود الماشا هتاخد معاك 50 جندي ومن بعدها أنا بالجيش كامل وهنتقابل عند جبل الحياة. -جنود الماشا؟ = مالك ياهيرون مستغرب ليه؟ -جنود الماشا مهمتهم تأمين الملك فقط. = وده من ضمن التأمين هتاخد 50 منهم وتمهدوا الطريق قدامي. -وليه مانتحركش مع بعض ونمهد الطريق قدام جلالتك؟ = عشان انا شايف إن ده المناسب، مفهوم؟

-مفهوم جلالتك، اوامرك، عند الفجر هتحرك بجنود الماشا وهنتظرك عند جبل الحياة. = بالنسبالك انت، هتتحرك عند منتصف الليل. -امرك يامولايا. أشار الملك لهيرون بالانصراف، فانحنى وخرج من جناح العرش وهو مرتبك وفي حيرة من ترتيبات الملك. وبعث مرسال للملكة ماجدوليا عن طريق إحدى جواريها يطلب منها مقابلتها فوراً عند حصانها الخاص في اسطبل الخيول الملكية. وبعد مرور أقل من ساعة، وصلت ماجدوليا لعنده وقالت بقلق: -في ايه ياهيرون؟

ايه سبب طلبك ليا بسرعة كده؟ = الملك قرر تتولي مسؤولية العرش نيابة عن ابنك دراجو. -ماهو ده معروف، ايه الجديد؟ = نبرته ونظراته النهارده كانوا مختلفين وقال انه اوقات بيكون فاهم وشايف ولكن بيظهر العكس، ثم انه عدل في خط سير الحملة والاغرب انه هيخليني أتحرك قبله بـ 50 فرد من جنود الماشا. -الماشا! الجنود دي مهمتها تتحرك مع الملك بس. = وده اللي انا مستغربه، ليه هيتحركوا معايا انا، وليه مانتحركش مع بعض كلنا؟

-وده معناه ايه بالنسبالك؟ = ممكن يكون الملك شاكك فيا؟ -مستحيل، لان أنا التهمة الوحيدة اللي بسببها يشك فيك علاقتك بيا وهي دي المشكلة الوحيدة اللي هتقابلك لو اكتشفها الملك، ولو كان اكتشفها فعلاً ماكنش هيقرر يخليني مسؤولة عن العرش في غيابه، كان هيأمر باعدامنا فوراً.

= معاكي حق، أظن في خطة في دماغ الملك وهتظهر ملامحها في الساعات اللي جاية. المهم ياماجدوليا، وقفي أي خطط ضد الملكة لوفي والأمير هواش، حافظي على حياتهم لحين مانتخلص من الملك. -حاضر ياهيرون، بس أنا كنت محتاجه أقضي وقت في حضنك قبل ما تسافر. = بعدين ياحبيبتي، هييجي وقت ومش هتبعدي عن حضني أبداً، ارجعي دلوقتي جناحك قبل ما حد ياخد باله مننا. "مملكة صوفيا"

"مولاتي الملكة، جاتلنا رسالة زاجلة من أحد رجالنا في مملكة نيبرو إن الملك الحارق هيتحرك باتجاهنا بأعداد كبيرة من الجيش." قالها لامك للملكة صوفيا اللي استقبلت الخبر بارتباك وقلق وقالت: -مش هنعرف هرماس بتوقيت الحرب، لازم مايعرفش. = بس يامولاتى ازاي الملك مايعرفش بتوقيت الحرب؟ دي خيانة لجلالته. -هرماس هيبقى فاهم إن دي مش خيانة لكنها حماية، أنا عايزة أحميه من فكرته بمواجهة الحارق ملك ضد ملك.

= مش من حقنا نفرض عليه شكل الحرب، هو الوحيد اللي يأمر وعلينا السمع والطاعة. -لامك، ده من ضمن وعودك بحماية ابني من الموت، عايزني أسلمه للحارق يقتله؟ = ... حاضر يامولاتي، هنخلي الملك يتفاجئ بالحرب وهنقدم ملحمة قتالية ضد جيش الحارق وهننتصر، أوعدك. -لاء مافيش قتال بين الجيوش كمان. = يعني ايه جلالتك؟ مش فاهم!

-هرماس حالياً في فترة عزلة، كعادته كل فترة بيقعد كام يوم بعيد عن الناس مع ليبو، أعتقد قدامه 3 أيام لإنهاء عزلته، ودي فرصة ممتازة. هيكون الحارق وصل بجيشه وهنفذ كلام هرماس ملك ضد ملك، لكن هيكون أنا ضد الحارق. = مستحيل، عايزة تقاتلي الحارق نيابة عن الملك والمملكة؟ أنا أمنعك حتى لو اضطريت أمنعك بالقوة. -لامك، انت بتكلم الملكة صوفيا، الزم حدك وتمالك أعصابك قدامي.

= مستحيل يامولاتي أسيبك تنتحري، مستحيل أوافق بتسليمك للموت، خليني أنا أواجه الحارق وهنتصر عليه لأجلك. -لو كلفتك انت بالمواجهة وقتها الحارق هيكلف أي حد من جيشه يواجهك نيابة عنه. أما أنا، هتحداه كملكة ضد ملك. ثق فيا يا لامك، أنا ههزمه وهقطع رقبته وهكون كملت مهمتي في استرداد عرش نيبرو لابني هرماس. = لا يمكن هسمح بده، جلالتك خليها حرب تقليدية جيش ضد جيش وأوعدك يامولاتي هسلمك رقبة الحارق بإيدي.

-هرماس أراد الحرب تنتهي بدون سفك دم من الجيشين والحقيقة كان عنده حق، هنحمي أرواح الآلاف بالطريقة دي. وأنا اتمنيت كتير أقتل الحارق بإيدي انتقاماً لدم حام واللي عمله فينا من بعدها، وأظن مافيش فرصة أفضل من كده. = لكن يامولاتي.. -ده أمر يا لامك وعليك تنفذ وبس، وممنوع النقاش فيه.

وقف لامك في حالة من الحزن والانكسار، ولمعت عينه بالدموع وانحنى قدام صوفيا وخرج من قدامها بسرعة وقلبه مليان بالألم والكآبة. ودخل في دوامة من الحيرة بين عقله وقلبه، بين تنفيذ أمر الملكة وبين عشقه ليها. كان بين نارين، أنه يفسد خطة صوفيا ويعرف هرماس ويتحول لخاين في نظرها، أو بين أنه يكون خاين في نظر هرماس وفي نظر نفسه إذا التزم الصمت وتمت المواجهة بينها وبين الحارق. لكنه قرر يعرف هرماس بتوقيت الحرب وشاف إن فرصة انتصار

هرماس على الحارق أقوى من فرصة صوفيا. بعد ساعتين من التفكير، ركب حصانه واتحرك لمكان عزلة هرماس. ولكن بعد أمتار قليلة من طريقه اتفاجأ بمجموعة من الحرس الملكي بتقبض عليه وبتقوده للسجن بأمر من الملكة صوفيا اللي كانت مكلفة قائد الحرس بمراقبته.