رواية الوعد الفصل الثالث 3 - بقلم سلمى ابراهيم

عمر بسخرية: هو بجد جاية تقدمي هنا في الشركة لوظيفة الـ HR؟ مليكا باحباط شديد وخوف لأنها محتاجة الشغل ده فعلاً: خلاص.. أنا كنت عارفة.. عن إذنك. عمر بزعيق: مهو العيب مش عليكي.. العيب على الحمارة اللي دخلتك ليا لحد هنا وهي عارفة إنك مرفوضة. مليكا: هو أنت بتتكلم كده ليه؟ عمر رمى ورقها على الأرض قدامها ومعاه كل أحلامها: اتفضلي برا.. حضرتك مرفوضة. بصت للورق كده بدموع وخوف من المستقبل وإنها هتعمل إيه بعد كده.

وطت جابت الورق.. وبصتله بدموع حاولت تخفيها. مليكا: متشكرة جدا. وأخدت ورقها وخرجت من الشركة خالص ومقدرتش تمسك دموعها. جس هو بتأنيب ضمير شوية.. بس عدى الموضوع. راحت مليكا عند خالتها مروة. فتحت لها شغف. شغف: مليكا حبيبتي.. طمنيني. مليكا: روحي يا شيخة منك لله.. انتي اللي دعيتي عليا. شغف بضحكة: إيه حصل بس؟ مليكا: فعلاً ربنا رزقني بأرخَم خلق الله. شغف: يووه.. يعني متقبلتيش؟ يلا مش مهم. مليكا: مش مهم إزاي بس؟

وأختي شروق اللي أدّي في تالتة ثانوي وكمان أمي وأنا كمان ومصاريف كليتي وعمي منو لله وأكل ورثنا. شغف طبطبت عليها بحب: معلش يا حبيبتي.. يلا تعالي باتي معانا انهارده. مليكا: منا هبات عندكوا انهارده.. فين المحشي اللي أمك عاملاه؟ روح عمر البيت ودخل على أوضته وكان بيفكر في مليكا بطريقة مش طبيعية والنظرة اللي بصتهاله. قعد شوية خلص شوية ورق وسرح شوية في ذكرياته.. في عليا البنت اللي كان بيحبها من صغره.

وأهلها كانوا أصلهم صعادِدة ولما عرفوا إنها بتكلمه قتلوها. من ساعتها وهو رافض فكرة الارتباط خالص وسنه وصل 30 سنة وهو كده مش عاوز يرتبط وقافل على قلبه خالص. جه زياد خبط عليه. عمر: ادخل. زياد: إيه يا عمر؟ من ساعة ما جيت كده ولا كلمتني ولا حاجة وأنت عارف إن بكرة عندي يوم مهم. عمر: تعالي يا عم ارغي. زياد: يا عم متوتر.. بكرة أنا هوصل لحلمي وألعب في الأهلي أو هفضل مكاني كده.

عمر: انشف يا ضِحي شوية.. إن شاء الله هتبقى زي الفل.. متقلقش. زياد: هتبقى معايا بكرة صح؟ عمر: أكيد يا حبيبي. واتنهد. زياد: مالك أنت كمان؟ عمر: مفيش. بص كان في بنت كده بتعمل عندي إنترفيو.. وأنا اتعاملت معاها بطريقة زفت بصراحة. بعدها كدا حسيت ضميري وجعني. زياد بص له بخبث: إيه يا عم؟ مانت طول عمرك بتهزقهم كلهم. عمر: محترم نفسك يا ضِحي.. يلا قوم نام اجري. زياد: خلاص. طب أنت عاوز إيه منها يعني؟

عمر: مش عارف.. نفسي أشوفها تاني. يلا يا ضِحي قوم بقى. زياد: كده كده هقوم عشان أنام بدري. تصبح على خير. عمر: وأنت من أهله يا حبيبي. وبعدها ناموا وعدى اليوم. صحي زياد الصبح جهز نفسه واتصل على شغف لأنها بالنسبة له أقرب حد ليه وبيتعاملو إنهم أصحاب جدا.. بس من ورا الكل.. عمر ومليكا بس اللي عارفين. زياد: صباح الخير. شغف بتوطي صوتها: صباح النور.. عامل إيه؟ زياد بينهج: اهو.. بجري شوية قبل ما أروح التمرين.. أنا مستنيكي.

شغف: مش عارفة بصراحة.. أخويا رخِم كده معايا. زياد: خلاص.. بلاش تعرضي نفسك للخطر خالص.. لو عرفتي تعالي. شغف: حاضر.. سلام. زياد بابتسامة حب: سلام. وقفل وكمل جري. بعدها بكام ساعة راح زياد التمرين بيستعد للماتش المهم في حياته. صحي أحمد الصبح ورايح يودي أخته الدرس. أحمد: يلا.. عارفة لو روحتي هنا ولا هنا بعد الدرس. شغف: لا متقلقش.. أنا هدخل بقى.. باي. ودخلت. استنت لحد ما هو مشي وخرجت وراه وراحت للاستاد عشان تشوف زياد.

راحت شغف وشافته. شغف: زياد. زياد: شغف.. ده أنا قولت إنك مش جاية. شغف: عيب عليك يبني.. أنا عمري أفوتلك ماتش. زياد: حبيبة قلبي أنتِ والله.. هفف.. أنا قلقان شوية بصراحة. شغف: من إيه بس.. اجمد كده خليك زي متبقاش زي الناس الخرعة. زياد بضحكة: خرعة؟ جبتيها منين الكلمة دي؟ شغف: من الشارع هيكون منين يعني. زياد: بس أنتِ جيتي إزاي؟ وأخوكي؟ شغف: بصراحة زُوغت من الدرس.

زياد: مينفعش يا شغف.. امتحاناتك قربت. عملتي كل ده وعرضتي نفسك للخطر عشان إيه؟ شغف بصتله في عينه: عشانك. فضلو باصين في عيون بعض شوية. شغف فاقت: احم.. ممكن أكلم بنت خالتي تيجي تتفرج أهي تفك شوية من اللي الزفت عملوا فيها. زياد: زفت؟ زفت مين؟ شغف: كانت رايحة امبارح تعمل إنترفيو في شركة واللي عملوا معاها طلع بارد وكلمها بطريقة بايخة خالص. زياد ربط ما بين أخوه وهي وضحك كده: اممم. شغف: بتضحك على إيه؟ ضحكني ونبي.

زياد: لا شوية وهتعرف.. كلميها تيجي. شغف: أنا كده كده قولتلها وزمانها جاية. إيه ده عمر أخوكي جه أهو. عمر: إيه عاملين إيه؟ زياد: الحمد لله.. إيه لسه جاي من الشغل؟ عمر: آه. زياد: أومال فين قريبتك دي يا شغف؟ شغف: أهي بترن.. الو يبنتي.. آه هو ادخلي بقى.. هتلاقيكي ف وشك.. باي. زياد: وصلت خلاص؟ شغف: آه هي اللي هناك دي. بص وراه زياد وعمر واستغرب عمر من الصدفة الغريبة دي و...