رواية انا لك انت الفصل الخامس عشر 15 - بقلم حبيبة محمد

حضنها وضمها جامد في حضنه ولمس شعرها وهو بيقولها بهدوء: "أنا بحبك أوي يا ملك، ولا يوم فكرت حياتي من غيرك. عشان أنا دايما ضامن وجودك وعايزك جمبي وفي حضني." ملك قلبها كان بيرفرف من الفرحة وكان نفسها تحضنه وتقوله إنها بتحبه أوي، بس اللي عمله فيها مش شوية، كان لازم تنتقم منه شوية. قالتله بعدم اهتمام ولا مبالاة:

"أنا شيلتك من دماغي من ساعة ما قولتلي فكري في حياتك ومستقبلك، وأنا عملت زي ما أنت قولت. أنا بفكر في حياتي ومستقبلي ومبقتش بفكر فيك ولا في أي حد." قالتله وهي قاصدة تجرحه زي ما جرحها: "أنا مبقتش أحبك يا سليم، ياريت تفهم دا وتقدروا." دخلت الڤيلا وسابته واقف برا مع نفسه. سليم ضحك وهو مذهول وبيقول في نفسه: "ملك!!! تعمل كدا؟ جابت الجرأة دي منين؟ بس ليها حق، انت فاكر إيه يا سليم إنك هترفضها وتهينها وهي ترجعلك بسهولة؟

دخل وراها وهو بيقول: "هعافر عشان أخليكي تسامحيني يا ملك." *** مريم ضحكت جامد وقالت لأمير: "الله بجد! جبتولنا إحنا الحاجات دي؟ أمير خرج شوكولاتة ليها وقالها: "ودي مني ليكي." مريم فرحت أوي وخدت الحاجات الحلوة وقالت لأمير: "شكراً." أمير بصّلها وهو رافع حواجبه وبيقولها بمعاكسة: "احلوتي عن الأول كتير أوي يا مريم." مريم ابتسمت وقالتله: "وأنت في نظري حلو دايماً. احممممم أقصد يعني." أمير قرب منها جداً وقالها:

"تقصدي إنك معجبة بشكلي؟ مريم ضحكت بسخرية عشان متحرجش نفسها وقالتله: "تقدر تقول كدا." أمير خرج وسابها وهو بيمشي بطريقة غريبة جداً بالنسبالها. ماشية (bad boy) دخل أوضته وقلع التيشرت وولع سيجارة وهو بيبص من الشباك وبيفتكر الجملة اللي قالتها مريم. مريم خرجت البلكونة هي كمان. *مريم وأمير جنب بعض في البلكونة* أمير خرج الدخان من بوقه وقالها: "خارجة في السقعة دي ليه؟ مريم حمحت بكسوف وقالتله:

"مفيش بشم هوا. وبعدين أنت هتاخد دور برد." أمير رفع كتفه وقالها: "اشمعنى؟ مريم بصت عليه وقالتله: "أنت قالع التيشرت!!!! هتاخد دور برد كدا؟ أمير حرك رأسه بمعاكسة وقالها: "لا مش هاخد برد، أنا متعود على كدا." سليم كان طالع أوضته بس سمع صوت أمير بيتكلم في البلكونة. سليم استغرب وقال: "بيكلم مين دا من البلكونة وعمال يضحك؟ فتح باب الأوضة ودخل البلكونة لقاه قالع التيشرت وبيشرب سيجارة وعمال يهزر مع مريم. سليم قاله بغيرة وحدة:

"بجد والله!! بص لمريم بجدية وقالها بصوت رجولي: "ادخلي." مريم كانت لسه مكسوفة ومتحركتش من مكانها من كسوفها. سليم قالها بنبرة شديدة: "قولت ادخلي." مريم طلعت تجري على جوا وهي بتقول: "أنت عبيط يا سليم بجد؟ أمير عمل نفسه مش واخد باله وكمل شرب في السيجارة. سليم ضربه في كتفه وقاله: "وحياة أمك! عامل نفسك من بنها؟ قاله بتحذير وخوف على أخته:

"بص يا أمير، أنا مقعدك معايا هنا في الڤيلا عشان أنت صاحب طفولتي وقريبي. غير كدا لأ، وعايزك تعمل حسابك إننا قاعدين مع اتنين بنات في البيت، يعني كفاية استهبال ومتخرجش من غير تيشرت تاني عشان قولنا في بنات." أمير خرج سيجارة وقال لسليم: "خد ولعلك شمعة وريني سكاتة." سليم ضحك وخد منه السيجارة وولع هو كمان وشدهم كرسيين وقعدوا يتكلموا في البلكونة. مريم طلعت تجري على ملك عشان تحكيلها. فتحت باب الأوضة وهي مسكوفة وبتقول لملك:

"ركزي معايا. كنت بتكلم مع أمير في البلكونة وسليم دخل على أمير وعرف." ضحكت بكسوف وقالت: "وسليم عمل نفسه من بنها." ملك كانت قاعدة بتحط روج وبعدين سابته من إيدها وقالت لمريم: "إيه حوارك مع أمير؟ مريم قالتلها بمكابرة: "مفيش!! وبعدين أنتِ عارفة إني بحب كريم." ملك بصتلها بقرف وقالتلها: "هتفضلي لحد إمتى مع كريم دا، مع إنه بيكرهك وبيكرهنا وبيأذينا كتير أوي." مريم بصت في الأرض بحزن وقالت: "معرفش! أنا مش قادرة أحب غيره."

ملك قامت وجابت الكتاب عشان تذاكر وقالتلها: "اومال لو عرفتي سليم قالي إيه هتعملي إيه؟ مريم جالها فضول وقالت: "احكي." ملك حطت الكتاب ع المكتب وقعدت وهي بتقولها: "اعترفلي بحبه." مريم قامت اتنططت وسقفت بفرحة وقالت: "اكيد أنتِ كمان اعترفتيلوا؟ ملك سكتت بحزن وبعدين قالت: "أنا من زمان معترفاله ودست على كرامتي بسبب حبي ليه، بس هو كان بيعمل إيه؟ كان بيكسر قلبي في كل مرة بعترفله فيها بحبي ليه." مريم قالتلها بعدم فهم: "إيه!

وبعدين إيه حصل؟ ملك بصت للكتاب بعدم اهتمام وقالت: "مفيش. قولتله إني مبقتش أحبه." مريم اتذهلت وقالت بصدمة: "نعم! أنتِ عبيطة؟ ملك قالتلها بعصبية: "لا مش عبيطة، أنا عايزاه يحس نفس إحساس، عايزة كرامتي اللي اتهانت ترجعلي تاني مش أكتر." مريم بصتلها بتفاهم وقالت: "بس أنتِ من جواكي؟ ملك كملت كلامها وقالت: "لسه بحبه، من جوايا لسه بحبه." *** في صباح يوم جديد.

مريم وملك كالعادة كانوا لابسين لبس المدرسة وخرجوا هما الاتنين ونزلوا عشان يفطروا مع أمير وسليم. مريم قعدت قدام أمير وهي بتبسم له وسليم لاحظ فبرقلها وبصلها بحدة. حمحت بكسوف وركزت في أكلها. ملك تنهدت وهي بتقول: "خير، كلكوا ساكتين على الصبح كدا ليه؟ أمير ضحك وهو بياكل بسرعة وبيقولها: "مفيش، بحاول مأخرش نفسي على الشغل." ملك ضحكت بسخرية وقالتله بهزار: "يعني أنت لو قولت صباح الخير هتتأخر عن الشغل؟ مريم قالتلهم وهي بتهزر:

"عموماً، الاهتمام مبيطلبش." سليم بص لأمير وهو بيضحك عليه وبيقول لمريم وملك: "معلش أصله دحيح أوي." ملك مردتش عليه وكملت أكل ومريم ضحكت على كلام سليم وقالتله: "خلاص هنأخره على الشغل." أمير بصّلها بإعجاب لضحكتها وكان متنح بشكل واضح. سليم خبطه في رجله وقاله بهمس: "لو متعدلتش هزعلك مني يا أمير." أمير حمحم بخجل وقام من على السفرة وهو بيقول: "الحمد لله خلصت وأقدر أروح الشغل دلوقتي." ***

مريم وملك نزلوا من العربية وهما مبسوطين وبيهروا على موضوع ما. سليم نده على ملك وقالها: "بقالي يومين مبتاخديش مصروفك؟ هتفضلي من غير مصروف؟ ملك سكتت وبصت في الأرض وهي بتحاول تاخد موقف وبتقوله: "متقلقش، أنا أصلاً مبحتاجش حاجة عشان يكون معايا فلوس." سليم خرج من جيبه فلوس ومد إيده من الشباك وقالها: "خدي، خليهم معاكي. مينفعش تمشي من غير فلوس." ملك حاولت تهرب منه وقالت: "الحصة الأولى شكلها هتبدأ." أمير طبطب

على كتف سليم بتريقة وقاله: "دخل فلوسك في جيبك تاني يا حنين، البت مش طايقاك." سليم زقه وهو بيقوله: "يا أخي أوعى كدا، دا أنت غتت." *** وكالعادة كريم وسيف وديما وبنت جديدة معاهم واقفين بيتريقوا على ملك ومريم. ملك شدت مريم في إيدها وقالتلها: "يلا، مش عايزة أعمل مشاكل النهارده." ديما وقفت وراهم وقالت بصوت عالي: "بس وقفتك مع أمير امبارح كانت مسلية، مش كدا؟ مريم وقفت وقلبها دق بتوتر ولفت وهي بتقولها: "أنتِ بتراقبي؟

ديما قربت منها وهي بتجز على سنانها بغيظ وبتقول: "تؤ تؤ! ملك ضربتها في كتفها وقالتلها بعصبية: "ما تنطقي." البنت الجديدة معاهم دي كان لبسها غريب جداً ومتكبرة زيادة عن اللزوم. كانت لابسة بنطلون أسود وجاكيت أسود ولابسة حلقان كتير ومسيبة شعرها الأصفر وهي بتقول لملك بحقد:

"لا لا متتعصبيش أوي كدا، الموضوع مش مستاهل. أنا ساكنة جديد في الڤيلا اللي قدامك على طول. كنت واقفة في البلكونة شوية عادي لقيت اتنين عشاق واقفين بيهزروا ويضحكوا، قمت أنا صورتكوا في سبيل التسلية مش أكتر. وانهاردة أول يوم ليا هنا في المدرسة وأنا هكون صاحبة ديما وكريم وسيف أصلاً من زمان. ولما شافوا صورتك وصورة أمير بالصدفة على فوني قالوا لا دا إحنا لازم نستفاد بالموضوع." كريم قرب وهو بيضحك بسخرية وبيقول:

"آه صحيح، متستغربيش، إحنا عرفنا الاسم منين عشان أنا أعرفه أصلاً وقابلته قبل كدا في شركة مش فاكر اسمها، مش صح ولا إيه يا نيمو؟ مي بصتله بانتصار وقالتله: "صح." ديما بصت لسيف وهي بتقوله: "ابعت الصورة للمدرسة كلها كدا يا سيف، خلينا نننبسط شوية." ملك طلعت تجري على سيف وهي بتعيط وبتقوله: "عشان خاطري متبعتش حاجة."

مريم اتكسرت أوي ومكانش في إيدها حاجة غير إنها تضرب ديما وتشتمها، بس ديما عكس عصبية مريم كانت باردة جداً وعمالة تضحك. سيف بص لملك وقالها بغرور: "الصور دي مش هتتبعت بشرط." ديما ومي وكريم بصوا باستغراب. ملك قالتله وهي بتمسح دموعها: "إيه الشرط؟ سيف حط الفون في جيبه وهو بيقول: "تيجوا ننضفولنا شقتنا." ملك حطت راسها في الأرض وقالت: "موافقة." مريم بصت لملك وقالتلها: "لا يا ملك لااا." ملك شدت مريم في إيدها

وطلعوا الفصل وهي بتقولها: "لو معملناش كدا هينشر صورتك وسمعتك هتبوظ في المدرسة كلها يا مريم." ديما وكريم وسيف ومي دخلوا وهما بيضحكوا بسخرية. *الحصة بدأت* "الميس فتحت الكتاب وقعدت وهي بتقول: كنا بنتكلم عن التنمر وقد إيه هو بيخلق مشاكل نفسية كبيرة." ملك ومريم بصوا لديما وصحابها وهما بيحاولوا يوجهوا ليهم الكلام. ديما ضحكت وضربت إيد مي كف وقالتلها: "آهو هناخد درس في الإنسانية مبيخلصش." *بعد نهاية المدرسة*

مريم وملك خدوا عنوان المكان اللي هيروقوه وراحوا عليه بتاكسي من فلوس مريم. أول ما وصلوا بصوا على الڤيلا الكبيرة وبصوا لبعض بذهول وقالوا: "استحالة!! إحنا هنروق الڤيلا دي كلها؟ ديما خرجت من الڤيلا وقالت: "نورتوا؟ مش كنتوا تجيبوا في إيديكوا أي حاجة من أي توال نحلي بيها طيب." ملك ومريم دخلوا وهما مش طايقين نفسهم.

أول ما دخلوا لقوا كريم ومي وسيف قاعدين حاطين رجل على رجل وماسكين موبايلات وحاطين شيبسي وعصاير ومشروبات كتير والدنيا متبهدلة على الآخر. سيف قام وهو بيقول بتريقة: "أهلاً بأجمد خدامتين." مي ضحكت على كلام سيف وبعدين بصت عليهم من فوق لتحت وقالت بقرف: "ياااي مقرفين." ديما وقفت مي وقالت لملك ومريم: "كفاية يجماعة، خليهم يشوفوا شغلهم." ملك دخلت مع مريم وبدأوا بالمطبخ وغسلوا المواعين.

وسيف خلاهم مش واخدين بالهم وصورهم وهما بينضفوا وبيمسحوا. مريم بعد ما خلصت حطت إيدها على ضهرها وقالت: "تعبت." ملك مسحت إيدها بمناديل وقالت: "وأنا كمان." مريم حركت رأسها وهي بتقول: "لأ، مقصدش تعبت جسدياً، أقصد تعبت نفسياً." ملك قلعت المريلة وقالتلها: "أنا نفسيتي مدمرة بسببهم أصلاً." مريم مسحت إيدها بالمناديل وقالتلها: "يعتبر خلصنا إحنا كدا؟ مريم أمأت براسها وقالتلها: "آه." كريم دخل وهو بيسقف وبيقول:

"يلا يا كتاكيت اغسلوا دول كمان." رموا أطباق كتير أوي تاني وأكياس شيبسي وبوظوا تعبهم على الأرض. ديما دخلت وهي بتقول: "وتعالوا روقوا أوضتي عشان اتبهدلت تاني." مي دخلت تجيب بيبسي من التلاجة وهي بتقول: "آه سوري، نسيت أقولك إن التلاجة من جوا مش نضيفة ونسيتي تنضفيها." سيف رمى الجاكيت بتاعه في وشهم وهو بيقول: "واغسلي دا كمان عشان متوسخش أوي." مريم خرجت تجري من الڤيلا وهي بتعيط وقلبها مكسور من اللي بيحصل معاها ومع ملك.

بس ملك مجريتش ورا مريم عشان لو جريت ورا مريم هينشروا الصور، فا اضطرت تعمل هي كل دا لوحدها عشان مريم صورها متتنشرش.