رواية انا لست قبيحه الفصل العاشر 10 - بقلم اماني سيد

طلع رعد غرفته وفضل يفكر، هل هو كده يبقى ظلم جنان؟ بس هو ما عشمهاش بحاجة. هل هو كان بيحبها بالشكل الكافي اللي يحارب عشانها أو يحاول يقرب منها؟ طيب هو معجب بغزل عشان شخصها ولا عشان قرب الملامح؟ ولما افتكر غزل سرح بخياله وقال: "آه من غزل! وافتكر مشاكستها وردها الدبش أحيانًا وكسوفها، وافتكر لما جنان كانت بتبعد أو ما كانش بيشوفها الأيام، ما كانش بيحس بفراغ، إنما لما غزل غابت يوم واحد بس حس بفراغ كبير ووحدة.

برغم إنه كان حاسس إن شهاب ممكن يكون معجب بغزل، هو قرب منها عكس جنان بعد فورًا عنها. رعد لنفسه: "كده أنا عرفت أنا عايز إيه، أنا عمري ما حبيت جنان، يمكن كنت معجب بيها، إنما غزل لا، حالة خاصة بتعملها جوايا لما بشوفها فمش عايز أنزل عيني من عليها." في الجهة الأخرى عند غزل وصل جد غزل وعمها جمال ومحملين من خيرات ربنا فاكهة وفراخ وبط ورومي ولحوم وطلعوها عند غزل. نادية: "أهلًا أهلًا يا عمي نورت القاهرة! جمال:

"القاهرة منورة بأهلها يا أم غزل." نادية: "أهلًا يا جمال، إزيك عامل إيه؟ وأولادك عاملين إيه ومراتك؟ جمال: "كلهم بخير، الحمد لله." غانم: "وأنتِ عاملة إيه يا نادية؟ وغزل عاملة إيه؟ هي فينها مش شايفها ليه؟ نادية: "حالًا يا عمي هعرفها إنك جيت، هي بس كانت بتصلي العصر، اتفضلوا اتفضلوا."

دخل غانم وجمال وقعدوا في الصالون، وخرجت عليهم غزل، وغانم أول ما شافها فتح لها دراعاته وهي جرت عليه وحضنته جامد وعيطت، وجمال شدها من حضن جدها وحضنها جامد وسلم عليها. جمال: "وحشتيني قوي يا بنت أخويا! غزل مسحت دموعها: "وأنت كمان يا عمي، أنا ما كنتش عايزة فلوس، أنا كنت عايزة حبكم وخوفكم عليا." غانم: "على عيني بعدك عني يا غزل يا بنت الغاليين، بس بعدك ده كان خوف عليكي." غزل: "من مين يا جدي؟ خايفين عليا من نفسكم؟ الجد:

"من أقرب الناس ليكي يا غزل! غزل: "وحشتني قوي يا جدي، أنا ما وحشتكش؟ الجد: "وحشتيني قوي يا غزل، دنتِ أكتر واحدة تشبهيني في أحفادي، وعلى طول بكلم أمك وأعرف أخبارك." غزل: "وما كنتش بتكلمني أنا ليه على طول؟ الجد: "عشان لو كلمتك كنت هضعف وهرمي بكل حاجة عرض الحائط وهاجيلك أو أجيبك عندي، لكن بعدك عني حماية ليكي." نادية: "خليها تعرف يا عمي، من حقها." غزل: "أعرف إيه؟ نادية:

"تعرفي جدك عمل إيه عشانك وليه بيعمل كده. الشقة القديمة يا غزل زي ما هي مش متأجرة ولا حاجة، وجدك كل شهر هو اللي بيدفع لنا الفلوس اللي أنتِ فاكراها فلوس الإيجار، أنا معايا فيزا تانية جدك دايمًا يحط لي عليها فلوس عشان لو احتاجتِ أي حاجة أجيبها لك، غير الفيزا اللي معاكي اللي بتقبضي بيها، جدك كان بيحميكي من عمك جندي، جدك يا غزل باعت لي أول إمبارح 20 ألف جنيه عشان أي حاجة محتاجاها أجيبها لك وما أخليش نفسك في حاجة، وهو اللي اداني 10000 أول ما اشتغلتي عشان أجيب لك لبس، فاكرة الكورسات اللي كنت برفض إنك تنزلي تاخديها وكنت بدفعها لك أنا وبعملها لك مفاجأة إني دفعتها لك؟

جدك هو اللي كان بيدفعها لك يا غزل." غزل بصدمة: "طيب ليه خفيتوا عني كل ده؟ وليه إحنا قاعدين هنا؟ وليه ما قلتليش إنهم بيعملوا معايا كده وسبتيني فاهماهم غلط وشايلة منهم؟ غانم: "كده حماية ليكي من عمك، طول ما هو فاكر إني رميت طوبتكم وإنكم مش هتورثوا حاجة، أنتم كده في أمان وهو مش هيفكر يأذيكم أبدًا. وورثك يا غزل محفوظ اللي أنتِ اتهمتيني إني هاكله عليكي فاكرة؟ غزل: "طيب ليه ربطت أكاديمي لورثي بجوازي من ابن عمي الكبير؟ غانم:

"كنت عايز أحميكي وتبقي في عصمة راجل وابن عمك وعمك جمال كانوا هيحابوا عليكي بضلهم وعمك جندي كان هيخاف من عمك جمال ومن ولاده إنه يقرب لك عشان ما يقفش في وشهم، لكن طول ما أنتِ لوحدك هتبقي صيدة سهلة ليه." غزل: "طيب إيه اللي غير الوضع دلوقتي؟ غانم:

"حاجات كتير أولهم إن عمك جندي باع الشركة اللي هنا اللي أبوكي الله يرحمه كان ماسكها، وطبعًا الفلوس هتتوزع ونصيبك مش هيتوزع من ضمن الفلوس دي يا غزل، ومن غير ما تتسرعي كل حاجة هتفهميها في وقتها. وخدي الورق ده، ده ورق بيع مني ليكي بـ 10 فدادين والورق أهو باسمك وتقدري تتصرفي فيهم." جمال: "هو صحيح يا غزل إن اللي اشترى الشركة مش رعد برضه؟ غزل: "آه يا عمي هو اللي اشتراها عشان تبقى فرع تاني لشركته." غانم:

"تمام يا غزل، أنا مش عايزك تشيلي هم حاجة وسيبي كل حاجة زي ما هي، ولما جندي يعرف إنك هتتجوزي واحد زي رعد مش هيغامر أبدًا ويقف في وشك عشان هو مش هيقدر يقف قصاد واحد زي رعد وأخوه لوحده؛ لأني عارف إني مش هقف معاه لا أنا ولا أخوه." غزل: "طيب أنت عرفت منين إن عمي ناوي على الشر؟ غانم: "أمك سمعته وأنا ما صدقتهاش، وبعدين عمك جمال سمعه وأكد لي كلام أمك." عند شهاب ورعد شهاب: "إيه يا ريدو أنت فرحان؟ رعد:

"الحمد لله، بقولك نبدأ منين لحسن مش عارف حاجة، المرة اللي فاتت صباح وجنة هما اللي عملوا كل حاجة." شهاب: "ما تشغلش بالك أنت، سيب كل حاجة عليا، فكر بس في الهدية اللي أنت هتجيبها لها." خرج رعد وشهاب وراحوا لمحل زهور واتفقوا على شكل البوكيه وإنهم هيستلموه بكرة، وراحوا اشتروا علبة شوكولاتة من أفخم الأنواع، ورعد اشترى سلسلة ذهب هدية لغزل عبارة عن عين وفيها فص بنفس لون عيون غزل. عند غزل غانم:

"بصي يا غزل أنا كل اللي طالبه منك دلوقتي إنك تفضلي زي ما أنتِ ومش عايزك تشغلي بالك بحاجة وما تشيليش هم بكرة أو أي حاجة، سيبي كل حاجة عليا وعلى عمك جمال، خلينا بقى في الجد." غزل: "أتفضل يا جدي." غانم: "ممكن تسيبوني أنا وغزل لوحدينا؟ خرجت نادية ومعاها جمال وقعدوا في الصالة. الجد:

"كلميني بصراحة يا غزل ومش عايزك تخجلي مني، الحاجات دي ما فيهاش كسوف، الجدع ده أنتِ بتحبيه ورياداه ولا عايزاه عشان معاه فلوس وأنتِ ظروفك مش أحلى حاجة فشايفة إنه هيعوضك؟ غزل بكسوف: "لا يا جدي، أنا رياداه ومن زمان بس هو ما كانش شايفني، ولما اشتغلت معاه غصب عني لقيتني بتشد ليه وبعجب بيه أكتر بس دايمًا ما كانش ينفع أظهر ده وبداري جوايا وكنت بقول لنفسي إذا كان أهلي رموني هو هيبص لي على إيه؟ غانم:

"لا يا غزل أوعي تبصي لنفسك كده تاني، أنتِ كبيرة وغالية وكبيرة قوي كمان، المهم كملي وبعدين." غزل ما قالتش إن هو كان بيضايقها عشان جدها ما ياخدش موقف منه:

"المهم إني اشتغلت الأول سكرتيرة عند أخوه مستر شهاب وكان محترم جدًا معايا، ولما مستر شهاب سافر شغلي اتنقل مع رعد لإن هو اللي ماسك الشغل مكان أخوه وبقينا نتكلم في الشغل كتير وهو معجب بقدراتي في الشغل لحد ما مرة واحدة لقيته جه يتقدملي، ساعتها أنا ما كنتش مصدقة نفسي بس كنت خايفة جدًا ليكون مش واخدها جد." غانم: "طيب دلوقتي؟ غزل: "إصراره على إنه يجي يتقدم خلاني أحس إن هو واخدها جد بس أنا قلقانة ومتوترة، هل ده طبيعي؟ غانم:

"طبيعي يا عروسة، المهم يا بنتي أنتِ مش لوحدك، أنتِ وراكِ عيلة كاملة بتحبك وبتخاف عليكي." غزل: "أنا بحبك قوي يا جدي، ما تزعلش مني على أي حاجة قلتها لك قبل كده، حقك عليا." وقامت باست رأسه. الجد: "ما أقدرش أزعل منك يا غزل، ده أنتِ الغالية بنت الغاليين." عند جمال ونادية جمال: "إزيك يا أم غزل عاملة إيه؟ نادية: "أنا بخير يا جمال، وأنت ومراتك عاملين إيه كويسين؟ وعيالك وابنك الكبير اتجوز وخلف ولا لسه؟ جمال:

"كلنا بخير، ابني الكبير اتجوز وخلف ولد، اتجوز بنت خالته اللي كان متكلم عليها، والصغير اتجوز واحدة كانت زميلته في الجامعة وهي حامل دلوقتي." نادية: "ومراتك عاملة إيه؟ جمال: "زي ما هي لسه حاشرة نفسها في كل حاجة." نادية: "هههههههههههه عيب كده يا جمال، أنتوا كبرتوا." جمال: "لا أنا لسه شباب وبدور على عروسة كمان، هي اللي كبرت." نادية: "طول عمرك دمك خفيف يا جمال." جمال:

"وأنتِ يا نادية لما غزل إن شاء الله تتجوز وتشوف حياتها، أنتِ ناوية تعملي إيه؟ هتعيشي لوحدك؟ نادية: "مش هعمل حاجة، هفضل زي ما أنا كده وهي برضه مش هتسيبني وهتجيلي من وقت للتاني." جمال: "طب بدل الوحدة دي، ما أكتب عليكي و تيجي تعيشي وسطينا؟ نادية: "إيه يا جمال اللي بتقوله ده؟

لا طبعًا مستحيل، أنت راجل كبير ومتجوز وأولادك كمان مخلفين يعني جد وأنا بنتي هتتجوز وإن شاء الله تخلف وأنا كمان أبقى جدة وأنت جاي لي بعد السن ده وبعد كل اللي أنا قلته ده وتقول لي نتجوز؟ لا طبعًا مستحيل." جمال: "إيه اللي بتقوليه ده يا نادية؟ ما تنسيش إن إحنا كلنا متجوزين صغيرين ده أول حاجة، ثاني حاجة هو الجواز دلوقتي بقى ليه سن معين؟ الـ 50 والـ 60 دلوقتي حرام يتجوزوا ولا إيه؟

أنا مش بقولك تعالي نعمل حاجة حرام أو عيب، أنا بقولك إحنا هنتجوز على سنة الله ورسوله." نادية: "فرضًا أنا وافقت، مراتك وعيالك هيوافقوا؟ ده مراتك ممكن تطخني عيارين تجيب أجلي." أثناء حديثهم خرج الجد وغزل، ووقف جمال ونادية عن الكلام. جمال لنادية: "كلامنا ما انتهىش يا نادية، هنكمل كلامنا بعدين." نادية: "بقولك يا عمي، هقوم أنا وغزل نغرفلكم بقى دلوقتي عشان إيه نتغدى."

نادية وغزل غرفوا الأكل وكلهم أكلوا في جو هادي ودافئ، وعدى اليوم في ضحك وهزار سواء عند غزل وأهلها أو عند رعد وشهاب. آخر اليوم عند غزل غانم: "نستأذن إحنا بقى يا نادية وهنيجي لكم بكرة إن شاء الله." نادية: "طب ما تباتوا يا عمي بدل المشوار." غانم: "ما يصحش يا نادية عشان جمال كمان ياخد راحته، وبعد إذنك هنبات في شقتكم التانية." نادية: "أنت تؤمرني يا عمي." ودخلت جابت له المفتاح.

وعدى بقية اليوم بدون أحداث جديدة، وثاني يوم نادية جابت اتنين يساعدوها في الأكل وتوضيب الشقة وخلصوا كل حاجة بدري، وغزل لبست فستان بيبي بلو وعليه طرحة بيضا وشوز أبيض بكعب عالي وحطت كحل أزرق ظهر أكتر جمال عينيها. دخل رعد وشهاب وقعدوا مع الجد وعمها وبدأوا يتكلموا وطلبوا إيد غزل للزواج. غانم: "بص يا رعد يا ابني، أنت شخص كويس وأنا موافق عليك مبدئيًا، بس أنا عرفت إنك أنت اشتريت الشركة من جندي عم غزل صح؟ رعد:

"صح يا حاج، عشان تبقى فرع تاني لينا وأنا اللي هديره." الجد: "أنا عايز غزل تدخل شريكة معاك في الشركة الجديدة دي بنسبة 30%." غزل وكل اللي قاعدين اتصدموا من طلب الجد.