رواية انت نوري الفصل السابع 7 - بقلم شيماء حمادة

اسر بيشدها من وسطها ويلزقها في الثلاجة. اسر بضيق: اثبتي لي. جورى: ازاى؟ اسر بيقرب منها ويبوسها من شفايفها. جورى بتزهق بضيق وتضربه بقلم على وشه. جورى: انا فعلاً بكرهك يا اسر. يظهر اني كنت غلطانة لما مرتضتش اقول لبابا. وبتسيبه وتمشي. اسر بيمسح ايده على وشه بضيق. هو مكانش هيعمل كده، ميعرفش ايه اللي حصل له. اول ما قرب منها محسش بنفسه غير وهي بتزقه.

جورى بتكون ماشية وهي بتعيط. بيشوفها ادم اللي بيكون جاي ياخد لبس ويرجع تاني. ادم: جورى مالك؟ جورى بعياط: اسر يا عمو. ادم: ماله؟ جورى: بيضيقني. ادم: بيضيقك اوي؟ جورى بتسكت ومش بتعرف هتقول ايه. ادم بشك: طيب يا حبيبتي. اطلع انتي وانا هشوف الموضوع ده. جورى بتطلع. وبعدها اسر بيطلع من المطبخ. ادم بجدية: انت عملت ايه للبنت؟ اسر: مين؟ ادم: اسر رد عدل. اسر: معملتش حاجة. ادم بضيق: امال كانت بتعيط ليها؟ اسر: معرفش.

ادم بضيق: تمام. روح لم هدومك بسرعة. اسر باستغراب: ليه؟ ادم: علشان مش هتقعد في البيت ده تاني طول ما انت مش عارف تحترم اللي فيها. اسر: ياسلام. وفاتون هتقعد مع معتز لوحدها عادي؟ ادم بضيق: معتز انضف منك وعمره ما يفكر يستغل فتون. اسر: وانا مش هسيبها معاه لوحدها. ادم: وانا ما أمنش أسيبها معاك. اسر: يعني ايه؟ ادم: يعني هتلم هدومك وتشوفلك اي خرابة تعيش فيها.

(ادم كان هيشتري له شقة بس لما ضيقه بالكلام حس انه مدلعه وانه لازم يشيل المسؤولية شوية) اسر بعصبية: شقة ايه اللي اشوفها الساعة 1 دي. ادم وهو طالع على السلم: معرفش انزل ألاقي مخلص علشان أوصلك. اسر: معايا عربية. ادم بسخرية: هو انا مقولتش ليك؟ اسر: ايه تاني؟ ادم: العربية دي بفلوسي وانت مش هتاخد اي حاجة انا جبتها لك. واحمد ربنا اني هسيبك تاخد لبسك. اسر بغيظ: وعلى ايه. خليه هو كمان. وبيطبق ويسبب البيت وهو بيستحلف لجوري.

*** أما ادم بيطلع على اوضة فتون. بيخبط مش بترد. بيفتح الباب براحة. بلاقيها نايمة. بيدخل ويقعد جنبها على السرير ويصحاها. ادم براحة: توتة. فتون بنوم: اممم. ادم: اصحي يلا. فتون بتقوم بفجعة: اتاخرت. ادم بضحك: اتاخرتي على ايه يا هبلة؟ الساعة لسه 1. فتون بترجع تنام تاني: امال مصحيني ليه؟ ادم بيشدها: اصحي يلا. حضري هدومك علشان هنمشي. فتون باستغراب: هنروح فين؟ ادم: الشقة التانية. فتون بحزن: ليه؟

ادم: قومي بس ونتكلم في الطريق. انا هروح احضر لبسي على ما تكوني خلصتي. فتون: ماشي. ادم بيبوسها من راسها ويمشي. *** عند ليلى بتكون صاحية بتكلم وليد. ليلى بخجل: بس بقى عيب. وليد: طيب ايه؟ ليلى: ايه؟ وليد: مفيش أي كلمة حلوة كده. ليلى: لا. لما نتجوز. وليد: هانت كلها تلات أيام. ليلى: ان شاء الله. وليد: هنجيب الفستان بكرة. ليلى: طيب اقفل بقى علشان اعرف اصحى. وليد: ماشي يا قلبي. سلام. ليلى: سلام. ***

عند اياد بيكون قاعد مع اسر اللي بيحكيله اللي حصل له للمرة المليون. اياد بزهق: اسر انت صدعتني. انا ادخل انام والشقة عندك اهي. شوف هتعمل ايه. اسر: انت هتسبني وتنام؟ انت صاحب مش جدع. اياد: يالهوي عليا. اعمل ايه تاني. اسر: شوف لي حلا. اياد: مقولتك. اسر: وانا مستحيل اعتذر لها. اياد: يبقى متصدعنيش. انا عايز انام. ورايا شغل بكرة. اسر: روح اتخمد يا خوي. اياد: فكر يا اسر. اسر بعند: مش هعتذر. اياد بصوت عالي علشان

بيكون وصل اوضة النوم: انت حر. *** عند ريم بتكون عايزة تدخل الحمام بس مش قادرة تتحرك. وكمان مكسوفة تقول لادم. بتفضل تعيط وهي بتحاول تكتم صوتها علشان ادم ما يسمعش ويسألها في ايه. (متعرفش أن ادم مش هنا) ادم بيدخل هو وفتون اللي بيبان عليها الضيق وبتفكر ان ريم خلاص هتاخد مكان امها. ادم: هتنامي معايا ولا مع ريم؟ فتون: معاك طبعاً. ادم: طيب ادخلي حتى الهدوم وتعالي نشوفها علشان لو صحية تسلمي عليها. فتون: لا. ادم بجدية: فتون.

فتون: حاضر. بس تعالى نسلم عليها الأول. ادم: ماشي. ادم بيروح هو وفتون بتروح غصب عنها. ولما بيقرب من الأوضة بيسمع صوت عياط مكتوم. ادم بيخبط باستغراب. ريم بصوت مخنوق: ادخل. ادم بيدخل واول ما بيشوفها يسألها بقلق. ادم بقلق: مالك؟ فتون بتكون مضايقة ومستغربة في نفس الوقت. ريم بتتكسف تقوله: مفيش. وبتبص على فتون. ادم: دي فتون بنتي. ريم: بتبتسم لها: قمر ماشاء الله. فتون بتمد أيدها وهي بتبتسم غصب عنها.

ادم بيشد فتون بسرعة علشان ميجرحش ريم. بس ريم بتكون حاسة بعجز وإهانة فبتعيط. ادم بحنية بيمسح دموعها بمنديل. ادم: معلش والله متعرف. انا اسف. نسيت اقولها. ريم بتفضل تعيط بسخرية. فتون بتغير وبتطلع. ريم وهي بتعيط: روح صالحها. شكلها غيرانة. ادم بيبتسم: اه. هي بتغير عليا شوية. ريم: ربنا يخليهالك. ادم: يارب. هطلع اشوفها وهاجي تاني. ريم بتهز راسها. ادم بيطلع عند فتون. ادم: طلعتي ليه؟ فتون بغيره: قولت اسيبكم براحتكم.

ادم بيضحك: طيب تعالي علشان تصلحيها. فتون: اصلحها ليه؟ هو انا كنت زعلتها؟ ادم: بصي. ريم اتعرضت لحادثة وحصل لها عجز مؤقت. وانتي من غير ما تقصدي جرحتيها. فتون: ازاي؟ ادم: لما مديتي ايدك تسلمي عليها وهي مش بتعرف تحرك ايدها ولا رجليها. فتون بتعيط: والله انا اسفة. مكنتش اقصد. ادم بيحضنها ويمسح لها دموعها: انا عارف. بس يلا علشان تشوفيها مالها. يمكن تكون مكسوفة تقولى. فتون بتهز راسها. ادم: هعمل لكم عصير واجي واركن.

فتون: فراولة بلبن. ادم: انتي هتتشطري كمان. *** فتون بهزار: انتي لسه بتعيطي؟ ده انتي قلبك اسود. ريم: لا. فتون: يا شيخة. امال ايه ده. وبتمسح لها دموعها. ريم: بعيط بس مش منك. فتون بحنية: امال من مين؟ بتكمل بهزار: اوعي يكون دومي. ريم بتضحك: لا مش من باباكي. ده كتر خيره والله. تعبته معايا. فتون: تعبك راحة. فتون: ممكن تعتبريني صاحبتك او اختك الصغيرة. مش هقول بنتك علشان شكلك صغيرة. ريم بسخرية: لا مش صغيرة ولا حاجة.

فتون: ليه عندك كام سنة؟ ريم: 35. فتون: برضو متنفعيش ماما. اكيد مش هتخليني وأنتي عندك 8 سنين. ريم بتضحك: يخسارة. هتحرم من كلمة ماما من بنت عسل زيك. فتون: انتي اللي عسل. بس قوليلي برضو كنتي بتعيطي ليه. ريم مش بتلاقي حل غير أنها تقول. ريم بخجل: بصراحة انا. انا عايزة ادخل الحمام ومش عارفة اتحرك. وكمان مكسوفة من باباكي. فتون بحزن عليها: ليه؟ هو مش جوزك. ريم: بس برضو مينفعش. فتون: لا ينفع. استني. ريم: لا يا فتون.

فتون بتطلع وتروح عند ادم اللي بيكون بيفضي العصير في الكوبيات. فتون بخجل: بابا. كنت. ادم: قولى. فتون: ريم يعني كانت. ادم: متنطقي يا فتون. فتون: عايزة تدخل الحمام بس مكسوفة تقول. ادم بيخبط راسه: نسيت. طب هنعمل ايه؟ فتون: هو ايه اللي هنعمل ايه يا بابا؟ مش انت جوزها؟ ادم: بس مينفعش. فتون: هو في ايه؟ انت وهي بتقولوا مينفعش. هو انتوا مش متجوزين وبتضحكوا علينا ولا ايه؟

ادم: لا متجوزين يا لمضة. بس شوفيها كده لو تقدر تستحمل على ما اروح المستشفى واجي. فتون: حاضر. فتون بتدخل وتطلع تاني لادم. فتون: قالت اه. ادم: حلو اوى. وبيخد مفاتيح العربية وبيطلع بسرعة على مستشفى الدمنهور. فتون بترجع تقعد مع ريم وبيتكلموا ياما. بعد شوية ادم بيدخل الشقة وهو معاه ممرضة وكرسي متحرك. ادم: معلش يا منار هتفضلي بس لحد الصبح. منار: عادي يا دكتور. ولا يهمك. ادم: فتون. فتون بتطلع: نعم يا بابا.

ادم: خدي منار وشوفي ريم عايزة ايه. وانا تحت لحد ما تخلصوا. فتون: تمام. وبتاخد منار ويدخلوا لريم ويقعدوها على الكرسي. وبعدين بيدخلولها الحمام وريم بتكون مكسوفة جداً. وفتون بتحاول تقنعها أنه عادي. *** الصبح فتون بتحس على صوت التليفون بترد بنوم. فتون بنوم: الو. اياد بيسرح في صوتها شوية وبعدين بيفوق. اياد: هو انتي فين يا حضرة الظابط؟ فتون: معلش يا فندم مش هقدر اجي انهاردة. اياد: تمام. ماشي. وبيقل.

اياد بيكبم نفسه: هو ايه ده؟ انا كنت برن علشان ازعق لها. بيكمل بابتسامة مش عارف سببها: مش مهم. بينادي على العسكري. اياد: ألغي التدريب انهاردة. العسكري: تمام يا فندم. *** جورى بضيق: والله يا لين زي ما بقولك كده. لين: انتي بتحبي فيه ايه؟ جورى: معرفش. يارتني ما حبيته. لين: قولتلك خليكي في شادي. بصي الواد عنيه هتطلع عليكي ازاي. جورى: ياختي اسكتي. الدكتور: يا انسة انتي وهي اتفضلوا بره.

لين وهي طالعة وهي وجوري: الله يخرب بيتك انتي واسر في ساعة واحدة. *** عند اسر بيدخل عند اياد. اسر: يويو حبيبي. اياد: خيراً. اسر: عربيتك. اياد: متتريقش. اسر: بجد والله عايزها. اياد: لا. اسر بياخد المفاتيح من على المكتب: حبيبي تسلم. وبيطلع يجري. اياد بيقوم وراه بسرعة: اسر لابس. اسر بيكون طلع من المكتب. وطبعاً مش هيجروا وراه في الشغل. اياد: ماشي يا اسر الكلب. ***

عند معتز بيكون واقف بيتفرج على معزته الصغيرة. واه من حلاوتها اللي مجنناه برغم صغر سنها. معتز بتأنيب لنفسه أو بمعنى اصح لقلبه: ايه اللي بعمله ده. لازم اشيلها من دماغي. معتز بتنهيدة: وقلبي. فيروز بتخبط وتدخل. فيروز: حبيبي بيعمل ايه؟ معتز: ولا حاجة يا ست الكل. فيروز: طيب رايح العيادة انهاردة؟ معتز: اه ان شاء الله.

فيروز: طيب انا كنت عايزة عايزك تروح تجيب حاجات من السوبر ماركت علشان تيتا وجدو هيروحوا الحج. واحنا عاملين عزومة لكل حبايبنا. معتز بتذمر: بتهزري يا ماما؟ عايزاني اروح اتسوق لكم؟ فيروز: معلش. خد جورى معاك اصل الضيوف كتير وجورى مش هتقدر تشيل كل ده لوحدها. معتز: هو مين اللي جاي؟ فيروز: وليد وليلى وعمك مصطفى ورغد وحمزة وايسل وكريم وعمتك ندى وعمر ومحمد ونور وبنتهم وبسمة. معتز بفرحة: هروح امتى؟ فيروز: ما من شوية مكنتش راضي.

معتز: اصل لقيت المعازيم كتير وجورى مش هتقدر لوحدها. فيروز: ماشي. هروح اجيب الورقة اللي فيها الحاجات اللي هتجبها. معتز: تمام. *** في الأتيليه. وليد: لا. شوفي واحد غيره. ليلى: ماله؟ ماهو حلو اهو. وليد بغيره: ضيق. ليلى: ماهو مفيش حد غريب. وليد بجدية: قالت لا يا ليلى. ليلى بتزعل وتروح تخلعه. بعد شوية. ليلى: طيب وده؟ وليد: كان في ده من بدري. ليلى بتفرح: يعني عجبك؟ وليد: اي حاجة عليكي عجبني. ليلى بسخرية: ماهو بين.

وليد بيضحك: طيب يلا روحي اقعدي علشان نمشي. ليلى: حاضر. وبتروح. وليد بيحاسب على الفستانين. ليلى: ليه كده؟ كتير عليك. وليد: مفيش حاجة في الدنيا تسوى ضحكتك. ليلى بيبتسم وبتقول بحب: هو انا قولتلك بحبك قبل كده؟ وليد بفرحة: قولى تاني كده. ليلى بدلع: لا. هي مرة واحدة بس. وليد بخبث: طيب مفيش حاجة بمناسبة الخبر الحلو ده؟ ليلى: تقصد؟ وليد بخبث: يومين وهاخد كل حاجة. *** جورى بتكون ماشية بره الجامعة هي ولين. بيجي شادي وراها.

شادي: انسة جورى. ممكن نتكلم شوية على جنب؟ جورى: ليه؟ شادي: دقيقة مش هاخد من وقتك كتير. لين: هستناكي بره. جورى بتهز راسها بمعنى تمام. شادي بيتكلم بتوتر: انا كنت. عايز اقابل والدك. جورى: ليه؟ شادي بحب: بصراحة انا معجب بيكي وعايز اتقدم لك. فا لو ينفع تشوفي معاد مع والدك اكون مشكور لك جدا. جورى لسه هترد. لين: يلا يا جورى اتاخرنا. شادي: طيب فكري. هستنى ردك المحاضرة الجاية. جورى: ماشي. وبيمشي شادي بابتسامة. لين: هقالك ايه؟

جورى بتلاقي اللي بيشدها ويدخلها العربية. جورى: انت اتجننت؟ اسر بضيق: مسمعش صوتك. جورى بتحاول تفتح الباب بس بيكون مقفول: اسر والله لو منزلتني لصوت ولم عليك الناس. اسر: صوتي. جورى: عاااا…. اسر بيخرسها ببوسة. جورى بتفضل تضرب فيه بس هو بيتحكم في أيدها الاتنين وبيبعد لما بيسمع خبط على قزاز العربية. من الجامعة: انت بتعمل ايه يا متخلف انت. اسر ببرود بيطلع البطاقة بتاعته.

من الجامعة: مش معنى انك نقيب انك تعمل كده في الشارع عادي. اسر بياخد البطاقة من ايده من غير ما يتكلم وبيمشي. اسر لجورى اللي بتعيط: اسكتي بقى. جورى بعياط: هو انت ليه مصمم تكرهني فيك؟ ده انا كنت بحبك اكتر من نفسي. ليه كده يا اسر؟ ليه تخلينا مثقش فيك؟ ده انا كنت بثق في رايك في كل حاجة اكتر من بابا ومعتز. بتكمل بشحتفة: لو. لو مش عايزني كان ممكن تقولي بطريقة. انضف من دي. انا بجد بكرهك.

اسر قلبه بيوجعه من كلامها ومش بيقدر يتكلم. جورى: نزلني. اسر بصوت واطي وهو مكسوف من نفسه ومن اللي عمله: هوصلك. جورى: لا. اسر: مبيردش وبيوصلها لحد البيت. اول ما بتوصل بتنزل من العربية جري. *** عند ادم بيكون بيحضر الفطار وبيكلم حد في التليفون. ادم: ايوا. عرفت مين اللي رن عليه. الشخص: ايوا يا فندم. الاتصال كان باسم كوثر المحمدي. ادم: مين دي؟ الشخص: والدة المدام بتاعتك يا فندم. ادم باستغراب اكبر: طيب هي فين دلوقتي؟

الشخص: بين عندنا. انها موجودة في بيت العميد نصر علاوي يا فندم. ادم باستغراب اكتر: انا معتش فاهم حاجة. الشخص: نعم يا فندم. ادم: لا خلاص. شكراً. الشخص: العفو. ادم بيدخل عند ريم بيلاقي عندها فتون. ادم: انتي صاحية يا قرده؟ فتون: امم. وريني عملت فطار ايه. ادم: ده مش ليكي. فتون بتبص لريم وتقول: هبدا اغير منك. ريم بتبتسم. ادم: طيب خدي وكليها بقى لحد ما اجيب العلاج. بس اوعي تاكليه منها. فتون: تعرف عني كده؟

ادم: ابو كده يا حبيبتي. يلا سلام. *** عند معتز الباب بيخبط. فيروز: قوم افتح يا زيزو. معتز: انتي هتستغليني بقى. فيروز: معلش انهارده بس. معتز بيروح يفتح بيلقى مليكة. مليكة بخجل: جورى موجودة يا عمو؟ معتز: عمو؟ مليكة: دكتور. معتز: ادخلي يا مليكة. الله يهديكي. فيروز: تعالي يا لوكة. مليكة: ماما قالت اني اروح اساعدك انتي وجورى. وهي شوية وهتيجي. فيروز: كتر خيرك يا حبيبتي. اطلعي لجورى فوق. ولو كده روحي معاها تتسوق.

مليكة: ماشي. معتز بسخرية: اطلعي لعمتو جورى. مليكة بتبصله باستغراب وبتكمل طريقها. *** عند ادم بيدخل ويدي العلاج لريم ويدخل الجلسة. فتون بتغازله: ولعة معاك. ادم: امشي يا جزمة. فتون بتطلع. ادم: ريم كنت عايز اسألك عن حد. ريم: مين؟ ادم: ايه علاقتك بنصر علاوي؟ ريم مش بترد وبتعيط. ادم: اهدى. انا بس بسألك. لو مش عايزة تردي انتي حرة. ريم بحزن: المفروض جوز امي. ادم: ومالك زعلانة كده ليه؟ ريم: ممكن متكلميش في الموضوع ده دلوقتي.

ادم: تمام. وبيكمل الجلسة.