رواية ازيز الماضي الفصل الثامن 8 - بقلم اسماعيل موسى

هتديني الفلاشة؟ بالطبع هديكي الفلاشة، أنا مش شاب مراهق هتفرج على فيديوهاتك القذرة. ليه معجبتكش؟ شهند متحاوليش تباني قذرة لأنك قذرة. هتديني الفلاشة؟ قالت هند مرة أخرى وهي تقرب وجهها من وجهي. أيوه. مرور بحب قديم، وعماد كل شوية بيفتش في دفاتره القديمة لحد ما يقع على صيد واقع في شبكة يستغله. معنى كلامك إن مروة مكلمتوش؟ ابتسمت هند. يا راجل؟ يعني أنت نسخت مفتاح واقتحمت شقة وزرعت كاميرا وأنت متأكد إن مراتك بريئة؟

وضحي كلامك يا هند، وقتي قليل ودماغي مش هتفضل مظبوطة كتير كده. لازم تعرف إني معرفش كل حاجة ومفيش حد يعرف كل حاجة، لكن اللي أعرفه إنه حاول يكلمها من تليفونه برقمه القديم ومراتك أكيد رفضت. بعدها استغل رقم تليفوني وممكن تكون ردت عليه. يعني أنت مش متأكد؟ هو ليه مسألتش مراتك وخلصت نفسك من كل ده؟ أنتي فاكرة إني محاولتش يا هند؟

أنا عندي وجهة نظر أستاذ سامح، طالما عماد استخدماني للاتصال بمراتك يبقى أكيد مراتك متجاوبتش معاه، وإلا أكيد يعني مكنش هيكلمها وأنت في البيت، فاهمني؟ لو فيه تواصل كانو هيتفقوا على ميعاد ومكان أنت ملكش وجود فيهم. ممكن أعرف حب قديم يعني إيه؟ أيام الجامعة يا أستاذ سامح، هو فيه حاجة بتجيب المصايب غير الجامعة! اللي أعرفه إن عماد تقدم لمراتك من زمان واترفض. مدت هند يدها نحوي وابتسمت ابتسامة ساذجة.

أخرجت من جيب بنطالي الفلاشة ووضعتها في يدها. نهضت هند وبشك همست: بسهولة كده؟ أنت أكيد معاك نسخة تانية؟ أنا اديتك كلمتي يا آنسة هند وأخدت اللي أنا عايزه ومش معايا نسخة تانية. يعني أقدر أمشي؟ طبعاً اتفضلي، باب الشقة مفتوح. أنت، أنت، أنت ليه بتعمل كده؟ أنت متأكد من اللي بتقوله؟ هتسيبني أمشي كده؟ نهضت أنا الآخر، سلمت على هند وعلى وجهي ابتسامة. تقدري تمشي يا آنسة هند، وأوعدك مش هعترض طريقك تاني.

بارتباك وشك غادرت هند الشقة وصكت الباب خلفها، واستدارت أكتر من مرة على السلم تتأكد إني لا أتعقبها.