رواية دعوى حضانة الفصل الثاني عشر 12 - بقلم يارا عبد السلام

وانا قاعد كالعاده لقيت صوت في البلكونه اللي جنبي. "آه، أبتدينا." واحدة بتغني بصوت عالي. بصيت لقيت بنت حاطه الهاند فري في ودنها وبتغني معاه. وطبعا مش هتسمعني. وحسن حظها إنها كانت واقفه قريبه مني. لقيت نفسي بشد السماعة من ودنها. قامت بصتلي. _انتي! _انت تاني يا ابني. انت مبتحرمش. _انتي هبلة يا بنت. انتي مش شايفة إني في بيتي ولا إيه؟ _آه تمام. وانت عاوز إيه بقى؟ الصبح كنت هتموتني ودلوقتي بتستظرف. متبقاش حكّاك كده.

_انتي هبلة يا بت ولا بتستعبطي؟ أنا أبصلك انتي ليه؟ كنتي ملكة جمال؟ وبعدين انتي مش شايفة نفسك ولا إيه؟ ولا بتبصي لنفسك في المراية؟ اللي خلاني أكلمك إن صوتك عالي وأنا عاوز أشتغل. _متشتغل بعيد عني. إحنا تقريبا في الشارع، وده ملك للجميع. إن شاء الله أرقص حتى. انت مالك؟ _بت، متخلينيش أتعصب عليكي. أنا ماسك نفسي بالعافية. أنا مش عارف إيه البلاوي دي. _زيك بالظبط. دانت تلم ورخم. وطلعتيني من المود اللي كنت فيه. إنسان رخم.

_إيه إيه، حيلك حيلك. أنا لحد دلوقتي مش عاوز أقل أدبي. واحمدي ربنا إن في حيطة مانعاني عنك. _وكنت هتعمل إيه يعني؟ أخاف وأكش يعني؟ ولا أعمل إيه؟ _لا متخافيش. بس اعرفي انتي بتكلمي مين. ومتخلينيش أعملك محضر إزعاج هنا. تمام. في الوقت ده دخلت أمه بالشاي. (على طول بتيجي في أوقات كنا عاوزينهم يشدوا شعر بعض.) $في إيه يا عمر؟ _وكمان اسمك عمر. اسمك مش لايق على شكلك خالص. _ماله شكلي يا أختي؟ _مش عارفة. اسألي طنط. $في إيه يا عمر؟

انت بتتخانق؟ مين القمر دي يا عمر؟ _آه، شهد شاهد من أهلها. شفت إني قمر. ادخل بقى جوه ومشوفش وشك تاني. $يا بنتي انتي قمر وكل حاجة. بس ابني طبعا قمرين. عمر بغرور: احم. روحي العبي بعيد يا شاطرة. _نينييييي. امشي يلا من هنا. _يلا. _أيوا يلا. إيه هتضربني؟ _مش بعيدة. منك لله يا شيخة. ضيعت وقتي مع واحدة متر ونص زيك. روحي أجري. وانتي مش باينة من سور البلكونة كده. _حوش يلا يا زعافة انت.

_اسألك سؤال. في بنت كيوت تقول يلا، وفي بنت كيوت تسمع مهرجانات. _آه، اهو كيفي كده. عندك مانع؟ _يارب صبرني. ماما، الواد يحيي ميشوفش البت دي. مش عاوز الواد يطلع تاجر مخدرات. _على أساس إن أبوه تاجر مصاصات. _بت، غوري من وشي. بصي، أنا هسيبلك البلكونة كلها وأمشي. الاهي تنشكي في كعب رجليكي يا بعيدة. _اهو انت. أمه قربت منها ناحية السور كده. وهي فرحانة بتقولها زي أي أم مصرية. _انتي متجوزة يا قمر انتي؟ _لا يا طنط. _اسمك إيه؟

_شهد. _الله على الجمال. عسل. وانتي عسل. حاسه إن الفرج جاي قريب. عن إذنك يا قمر. شهد بصتلها باستغراب. "شكل العيلة دي مجانين ولا إيه؟ أنا إيه اللي بلاني بالشقة دي يارب؟ كلو بسببك يا عمي. منك لله. أنا مالي ومال أخويا."

وسرحت في نفسها وعلى حالها اللي وصلتله. بعد ما كانت عايشة مع عمها وأخوها كان بيبعتلها فلوس دايماً. وفجأة عمها طردها من غير أسباب. بس حمدت ربنا إن أخوها كان مديها فيزا فيها فلوس باسمها. وده اللي ساعدها تلاقي شقة. عمر دخل وهو متعصب. *أنا يا هيجيلي في مرة أغفل البت دي وأقتلها، يا أما هضربها. وأمي داخلة تقولها يا قمر. قال دي قمر دي. دي جعفر. بس الصراحة قمر! يخربيتك يا عمر. قمر إيه؟

دانت لسه متخزوق من مصر كلها. احترم نفسك يابا وروح اشتغل أو نام. عندك حق. أنا هروح أنام. الصبح. صحي عمر كالعاده. روتين كل يوم. ونزل الشغل اللي هو مخلصش الشغل بتاعه امبارح. دخل المكتب وسند رأسه لورا. مش عارف لي جت في دماغه يروح لشادي! حاول إنه يبعد الفكرة عنه. بس برضه لسه موجودة. حازم دخله. _احم. يا عمر، أنا نزلت الإعلان. والناس بدأت تقدم. هتقابلهم امتى؟ _بكرة هيدا أقابل. _تمام. ماشي. _حازم، متعرفش السجن اللي شادي فيه؟

_ليه؟ _بأسأل. _آه، في ****** _تمام. أنا هروح مشوار كده وجاي. _هتروحله؟ _لأ. _لأ، بلاش يا عمر علشان المشاكل. _أنا مش بتاع مشاكل. أنا عاوز بس أطمن عليه. أشوف لو عاوز حاجة. وأعرف منه شوية حاجات كده. _طيب، أجي معاك. _لأ. أنا هروح لوحدي. _تمام. عن إذنك. عمر راح المكان وطلب إنه يقابل شادي. اللي هو صعب يقابله. بس بكام اتصال كده حل الدنيا. (بلد مصلحة) استنى شادي لما جه. عمر بصله. _عاوز إيه يا عمر؟ جاي تشمت فيا صح؟

_انت تعرف عن عمر كده؟ برضو؟ أنا عمري شمّت فيك. _امال جاي لي؟ _جاي أطمن عليك. يا اللي كنت صاحبي. للأسف. يا اللي دمرت حياتي. يا اللي خطفت ابني وحرمتني منه. يا اللي عملت اللي محدش في الدنيا قدر يعمله. كسرتني. بعد لما كنت حاسس إنك أخويا وسندي. حسستني إني مليش ضهر. انحنيت. بقيت مهزوز. حتى ثقتي في الناس قلت. يا صاحبي. أو يا اللي كنت صاحبي. _خلصت كلامك؟ عاوز إيه بقى؟ _ليه عملت كده يا شادي؟

انت عمرك كنت محتاج فلوس ولا شهرة. لي عملت كده؟ كنت بتستفاد إيه؟ وانت بتدخل في جيبك قرش حرام جاي من التجارة في أعراض البنات. وتشغل بنات سنهم 18 سنة وأقل في الأعمال المشبوهة. ليه؟ دانت محامي. ومثل أعلى. المفروض انت اللي تدافع. مش انت اللي تعمل الغلط. فين القسم اللي قسمته؟ فين أخلاقك؟ فين دينك؟ فين كل دا؟ فين يا صاحبي؟ العمرة اللي عملناها سوا. فين؟

ضيعت نفسك ودينك وأخلاقك وشرف عيلتك علشان شوية فلوس. أخواتك البنات ذنبهم إيه؟ وأختك اللي انت سايبها في بيت عمك. يا ترى عمك بيقولها إيه دلوقتي؟ ولا عامل فيها إيه؟ وانت عارف إن عمك مادي. _خلصت كلامك ومواعظك؟ برافو. ممكن تتفضل بقى من غير مطرود. _أنا مش هقولك غير حاجة واحدة. ربنا يخفف عنك ويهديك يا صاحبي. _تمام. شكرا.

مينكرش إن كلام عمر هزّه. هو فعلا مش محتاج الفلوس. هو أصلا كان غني. بس الطمع آخره وحش. وهوا حاسس إنه ندمان. ودلوقتي جت في باله أخته اللي عمر لسه فاكر بيها. اللي أكيد الأخبار وصلت لعمّه. ويا ترى عمل فيها إيه. *يا ترى عاملة إيه يا شهد؟