رواية ضي العامر الفصل السادس 6 - بقلم اسراء ابراهيم

فجأة لقت بنت بترقص مع عامر سلو ومتشعلقة في رقبته وبيضحكو، واتضايقت جدا لدرجة إنها فكرت تمشي، بس قالت: "وأنا مالي وماله، ما يعمل اللي هو عايزه." عامر لمحها، وخطفت قلبه بشكلها، وخلّيته مش مركز. اعتذر وراح لها. عامر: "إنتي بجد ولا خيال؟ ضي بصتله بغيظ ومردتش عليه. عامر: "إنتي جيتي إمتى؟ ضي: "من ساعة ما كنت بترقص مع السلعوة." عامر: "مع مين؟ ضي: "لأ، ما فيش. المهم الأوراق أهي، هستأذن أنا." عامر: "استني هنا، مالك؟ في إيه؟

ضي: "لأ، ما فيش، بس وجودي أعتقد ملوش لازمة." عامر: "مين اللي قال كده؟ بالعكس، بالنسبالي إنتي أهم حد هنا." ضي اتكسفت أوي ووشها احمر. ضي: "احم... هو... هو الحمام منين؟ عامر ضحك. عامر: "نعم؟ وده وقته؟ عموما هو من هنا." ضي: "تمام، ميرسي أوي." ومشيت وهي ما صدقت هربت من كلامه ونظراته اللي بتوترها. وهي ماشية سمعت بنتين بيتكلمو عليه وعلى وسامته، وإنهم بيتمنوا بس نظرة. بصتلهم بغضب ورجعتله تاني ونسيت الحمام. عامر: "إيه؟

رجعتي ليه؟ ضي: "ها؟ لأ، ما فيش." وعملت نفسها كانت هتتكعبل ومسكت فيه، وهو سندها وتقريبا كانت في حضنه، وعيون البنات متابعاها. ضي: "آسفة، كنت هقع." عامر: "ولا يهمك، المهم إنتي كويسة." ضي: "آه." ويلا بينا، وفضلت حاطة إيدها في إيده، وبصت للبنات وطلعت لسانها. ... في مكان تاني، عليا قاعدة في أوضتها بتفكر في مازن. فلاش باك

مازن كان كل يوم يقابل عليا، بس مكنتش بتعامله إلا في حدود الشغل، وده كان بيضايقه جدا، بس دايما كان يحاول ومش بييأس. وفعلا اتغير، وده هي لاحظته في تصرفاته. عليا: "إنتي متأكدة يا هدي؟ (هدي تبقى صاحبة عليا وزميلتها في الشغل، ومش بتعرف اللي بين عليا ومازن) هدي: "آه والله يا بنتي، هيا اللي قالتلي إنها حبت توقعه، بما إنه يعني كان بتاع بنات، وقالت تقلبه في قرشين، بس راح مزعقلها جامد وطردها كمان." عليا في نفسها فرحت.

عليا: "يعني اتغير بجد؟ أنا كنت قاصدة أعامله كده عشان أشوف هيزهق ويبعد، بس هو كان بيقرب أكتر." عودة من الفلاش باك عليا في نفسها: "أنا كنت خايفة يكون بيضحك عليا أو مفكرني زي البنات اللي يعرفهم. وعقلها بيقولها: محدش فينا مبغلطش، وهو خلاص ساب الطريق ده، هتحاسبيه يبقى على اللي جاي مش اللي فات." ... عامر: "عاصم بيه، أهلاً بيك." (صاحب الحفلة)

وخلصوا الصفقة واتفقوا، وكل ده وضي قاعدة ملانة أوي. واشتغلت أغنية سلو، وجات بنت عشان ترقص مع عامر، وضي قاعدة مفروسة، وقالت: "هيرقص تاني مع بنات؟ هو إيه راس كرومبة أنا؟ يعني ده إيه الهم ده." عامر: "سوري، مش هقدر." ضي هيييح، فرحت إنه موافقش. وجه واحد بس وسيم لضي. الشاب: "ممكن ترقصي معايا؟ ضي ابتسمت، ولسه هتعتذر. عامر بوش أحمر من الغضب: "لأ، مبترقصش هيا. واتفضل." وحرج الشاب. ضي: "ليه كده؟ حرجته." عامر: "إيه؟

كنتي عايزة ترقصي والناس تتفرج عليكي؟ ضي: "لأ طبعاً، كنت هرفض بشياكة، بس إنت مدتنيش فرصة." وفضلت مكشرة وباصة للي بيرقصو. عامر مد إيده ليها وقالها: "ترقصي معايا أنا ولا منفعش؟ ضي بتبص لأيده، وبصت في عينيه وسرحت، ولقت نفسها بتمد إيدها في إيده. ورقصو، وكأن العالم وقف في اللحظة دي، وكانت أول مرة يبقو قريبين من بعض كده. عامر: "بزمتك مش أنا أحلى من الصرصار اللي كان عايزك ترقصي معاه ده؟ ضي بتضحك على كده.

ضي: "بقي أنا أحلى من السلعوة اللي كنت بترقص معاها؟ عامر: "إنتي أجمل وأرق بنت قابلتها في حياتي." ضي اتكسفت وبصت في الأرض. عامر: "ضي." ضي رفعت وشها وبصت في عينيه. عامر: "أنا مش بعرف أتحكم في تصرفاتي وأنا معاكي، بحس إني شخص تاني. ضي، تيجي نمشي؟ ضي فرحت وقالتله: "يلا." وكان في عيون بتراقبهم. خرجوا الاتنين سوا من غير عربية ولا أي حاجة، بس فضلو ماشيين لحد ما راحوا مكان على النيل وقعدوا. عامر: "ضي، أنا عايز أقولك حاجة."

ضي: "قول." عامر: "أنا... أنا بحبك وحاسس إني اتعلقت بيكي." ضي اتفاجئت. ضي: "إنت متعرفش حاجة عني يا عامر، أنا حياتي كانت مدمرة." عامر: "ميهمنيش ومش عايز أعرف." ضي: "ومش جايز أما تعرف تغير رأيك؟ أنا هحكيلك عشان أنا محتاجة إني أحكيلك." وحكتله كل اللي مرت بيه من ساعة ما قبلت حازم لحد ما عرفت إنه كان بيحطلها موانع الحمل عشان متخلفوش. وكانت بتعيط وهي بتحكيله.

ضي: "لحد ما قابلتك، كنت حاسة إني أعرفك من زمان. معرفش إزاي قربت منك كده. أنا كنت واخدة عهد على قلبي إني مفتحوش تاني، كنت مفكرة إن كلهم حازم، وإني معيوبة أو مستاهلش إني أتحب. بس معاك إنت حاجة تانية، أنا في وقت قصير أوي حسيت إني معجبة بيك، ولما قولتلي كده النهاردة وحسيت بدقات قلبي، اتأكدت إني... أنا كمان... قاطعهم صوت جه من وراهم. صوت: "كده يا عامر تسيبني وتمشي؟ وقربت منه ومسكت إيده.

ضي اتصدمت وبصت لعامر باستفهام، كأني بترجاه إنه يقول إنه ميعرفش البنت دي. عامر: "أنا...