رواية فقط وفقط للرجال الفصل الرابع 4 - بقلم مريم سمير

شهقت من الخضة ومش عارفة ليه استخبيت وراه. مش عارفة ليه شفته حمايتي في اللحظة دي. "انتي أي اللي جابك هنا؟ جايه معسكر للرجالة؟ أنا ربيتك على كده! أنا غلطان إني وثقت فيكي، انتي قليلة الأدب." بابا رفع إيده وجاي يضربني. غمضت عيني بقوة وبعدين فتحتها لقيت أحمد ماسك إيده. "اهدي يا عمي، محدش عرف حاجة." "كده يا مريم تعملي فينا كده! "طب أنا هسيبكم لوحدكم. أرجوك متضربهاش، اتكلموا بالراحة، هي أكيد عندها سبب."

بابا خد نفس بتنهيدة وهز راسه بالموافقة. مشي وأنا بصتله ورجعت بصيتلهم تاني. "عملتي كده ليه؟ "كنت عايزة أجرب، كان نفسي أحس إحساس تعب الرجالة ولي عملوا معسكرين واحد لينا وواحد ليهم. ليه يكونوا هما اللي واخدين الحمل كله؟ والله يا بابا مكان قصدي أزعلك، كان نفسي بس أجرب." "انتي عارفة نتيجة اللي عملتيه ده إيه؟ كنتي فاكرة إنك هترجعي البيت ومحدش هيعرف؟

لولا إن قائد المعسكر دفعتي، كان زمانك في السجن عشان ده انتحال شخصية. ولا انتي مش بتفكري في عواقب اللي بتعمليه يا هانم؟! "بابا أنا...

"لأول مرة أحس إني خايف عليكي، طول عمرك بميت راجل واعتمدت عليكي ومرضتش أكسر بخاطرك لما قولتي هتدخلي شرطة. إحنا روحنا معسكرك وملقناكيش هناك، طلعنا ومامتك فضلت تعيط وأنا هتجنن عليكي، لغاية ما صاحبتك اللي انتي معرفاها مكانك قالتلنا. أنا مصدقتش إلا لما جيت وشوفتك. اللي عملتيه ده غلط، غلط كبير يا مريم." "غلط كبير بس اتعلمت، اتحملت كتير وبقيت أقوى من الأول. سامحني والله آخر حاجة أقصدها إني أزعلك."

حضنته وهو كان مودّي وشه الناحية التانية. طلعت من حضنه وأنا عياطي على وشي. "أول مرة أحضنك وانت متحضنيش يا بابا." "خمس دقايق تلمي حاجتك وتيجي، مش ناقصين فضايح. إحنا في العربية برا مستنينك." خد ماما ومشيوا. أنا عمري قلبي موجعني كده. أنا والله مش قصدي أذي حد، والله مش قصدي. كنت ماشية وأنا بعيط. العياط ده طلع بيوجع أوي. أنا مكنتش كده! طلعت لقيته قاعد على السرير وأول ما شافني قام من مكانه. "خليك، أنا هاخد حاجتي وأمشي."

قعد مكانه وبص الناحية التانية. "حتى انت زعلان مني؟ أنا أذيت كل اللي حواليا، كل اللي بحبهم. أنا وحشة أوي يا أحمد، وحشة أوي." "... "متزعلش مني، وهفضل فاكرة وقتنا سوا. عايزة أقولك إنك أجدع وأحسن صاحب في الدنيا، وإنك دايماً كنت جنبي وبتساعدني." "... مكنش بيرد عليا ولسه باصص في الناحية التانية. بدأ عياطي يزيد ولميت حاجتي بسرعة. لقيته حط إيده على كتفي فبصتله. "بطلي عياط، عمرك معيطتي قدامي قبل كده."

"عمري معيطتش خالص. أنا آسفة." "خلي بالك من نفسك." هزيت راسي. "سلام يا أحمد، وأتمنى فعلاً إنك تسامحني عشان أنا حاولت أقولك كتير والله بس مكنتش بعرف. مكنش قصدي أكسر ثقتك فيا أو تتخيل إننا مش صحاب." مشيت ونزلت وركبت العربية ومشينا. رجعت البيت وبابا دخل الأوضة بتاعته على طول. حطيت شنطتي في الصالة ودخلت وراه. "بابا... "... "هتفضل زعلان من بنتك الوحيدة؟ انت متجوز غير أمي ومخلف عيال غيري فمقويين قلبك؟ ضحك وبصلي وسكت.

"والله آخر مرة. والله متزعل مني، حقك علي دماغي وقلبي والله." حضنته. "احضن عشان معيطش تاني والله." حضني. "متخوفنيش عليكي تاني." "والله حاضر، و... عايزة آكل." "إيه؟! "ما أنا عيطت جامد أوي ودا خد من صحتي، فقوم معايا أعوض." ضحك. "امشي من قدامي." "حبيبي يا حاج والله." كلنا سوا ورضيت ماما في أقل من ثانية. حقيقي أنا بحبكم أوي والله. خلصت ودخلت أوضتي. أول ما دخلت افتكرته. قعدت على السرير وابتسمت. "هو أنا مش هصحى على ضحكته؟

ونكتة البايخة ومش هدور وشي بكسوف لما يطلع من غير قميص الترينج؟ لا أعترض معلش. طب والله هيوحشني أوي، ويعز عليا إنه زعلان مني. أقسم بالله." مر أسبوع وكل حاجة اتظبطت وبابا معتش زعلان مني خلاص، عشان هو راجل جدع والحارة كلها عارفة إنه راجل جدع. آه، كنت بفتكره كل ليلة وأفتكر لحظاتنا سوا واضحك وأنام. أيوه، هشوفه إمتى يعني؟ صحيت الصبح على صوت صاحبتي شهد. "انتي يبت سهلة ليه؟

أنا مش طايقاكي. كده تقولي لأبويا إني في معسكر الرجالة؟! "لا أسيبهم ميتين من الخوف عليكي." "الله وكيل مقتنعت." "قولي فوقي، عملتلك قهوة عشان تفوقي وتحكيلي كل حاجة حصلت." "انتي السبب إني مش معاه دلوقتي." "ثواني، ثواني مع مين؟ قمت وقفت وبدأت أتكلم وأنا بتحرك.

"أحمد. التدريب كان صعب أوي يا شهد، بس معاه حاجة تانية. ولا لما ننط من فوق بالحبل بحس إني طايرة من الفرحة. أنا حفظت كل كلامه، حتى الكلام اللي مش بياخد باله منه. مختلف أوي عن أي حد. عليه ضحكة أقسم بالله تنسيكي كنتي هتقولي إيه. هو آه وقتنا سوا مكنش كبير، بس ده أحسن وقت عيشته في حياتي. هو حقيقي ألطف صاحب في الدنيا. قد إيه هو وحشني." "مريم!!! "انتي سخنة؟ "هو عمل اللي متعملش صح؟ "ده مين الجامد اللي خلاكي تقعي؟

ده انتي مبيعجبكيش العجب!! ابتسمت. "بس ده أحمد." "طب يلا قومي." "على فين؟! "معسكرنا!! وقعت فنجان القهوة من إيدي. "هنروح بجد؟! "انتي يبتي هبلة؟ الجاكيتت الجاكيتت." "ثواني أعرف الحاج وأوضب شنطتي." طلعت وأنا الضحكة من الودن دي للودن دي. كان فيه حاجة اسمها تقل، مش كده؟ الحاجة دي نلغيها خالص بقى عشان عايزة أشوفه معلش. "راحة المعسكر يا والدي." "بتاعك ولا بتاع الرجالة يا قدري؟ ضحكت. "لا متخافش، المرادي بتاعي."

"خلي بالك من نفسك. خدي دول." "انت فاكر إني مش هعرف أعتمد على نفسي وإني لسه صغيرة عشان آخد منك فلوس؟! "ربنا يصلح حالك يا بنتي و... "كام دول يا حاج؟ مش عارفة ليه كنت مبسوطة أوي كده. مهو المعسكر بتاعنا لازق في بتاعهم يعني هشوفه غصب يعني هشوفه غصب. أنا قولت أهو بدل ما أعمل جريمة وقتي. خلصت حاجتي ونزلت مع شهد، وبابا وصلنا بالعربية ودخلنا. طلعنا على الأوضة وحطيت الشنطة على السرير وقعدت جمبها وخدت نفس طويل.

"محلاها عيشة الحرية." "يلا عشان هنبدأ تدريب." "ودوني على بيت أهلي حالا!! أصلاً عادي على فكرة وأنا استرونج، بس هو ينفع أعيط؟ نزلت أنا وشهد وحقيقي اكتشفت قد إيه التدريب مع الرجالة أرحم من البنات الملزقة دي. "يلا هنبدأ، يلا أربع لفات حوالين المعسكر." "أي أربع أي؟ يا جدعان ودوني معسكر الرجالة مش بهزر بجد. أنا عايزة الـ 15 لفة. أنا ذمتي 15 يا جماعة في إيه!! كله لف وأنا أول واحدة خلصت ووقفت مكاني. "إيدا هموت ميا مش قادرة."

كنت باصة للبنت ورافع حاجبي. "الميا هناك، روحي اشربي أصل شكلك هتموتي دلوقتي!! "دلوقتي تمارين المسدس، كله على الموقع." فرحت ونطيت وسقفت إيد بإيد. "تمريني المفضل يحليله والله." روحنا الموقع وكل واحدة مسكت مسدسها. قبل ما أبدأ افتكرته. كان هو اللي علمني وكنت مرعوبة من المسدس لغاية ما بقي التدريب الأقرب لقلبي. متيلا تنجزوا وتقولوا اضربوا!! ضربنا وكانت البنات كلها بتصوت. مالكم!!

جبت الست أهداف قريبين من الهدف الأحمر وجت القائد وقفت قدامي. "عفارم عليكي، مجتيش من أول مبدأنا ليه؟ "اصل، اصل كنت تعبانة شوية." "استمري، شكلك بتحبي اللي بتعمليه. يلا دورتين تانيين حوالين المعسكر قبل ما تطلعوا." لفينا. والله والله والله والله مشوفت بنات خرعة كده. والله مشوفت. أو يمكن أنا اللي جامدة ولا إيه. على الله حكايتي. الجامد مبيحكيش عن جمدانه. أنا فعلاً اللي جامدة. طلعنا وشهد وكانت بتفرفر على السرير.

"متنشفي يخرعة في إيه؟ "اشهد أن لا إله إلا الله وأن محمد رسول الله." "يجدع!! "انتي عارفة كنت بتدرب إزاي؟ أنا كنت بلف المعسكر 15 مرة والمعسكر بتاعهم أوسع من بتاعنا يجي مرتين كده، وكانت تدريبات كتيرة. هو أنا مش هنط الحبل؟ "نامي يا مريم." "مش هنط الحبل! "يمريم نامي." "الحبل مش هنط! "منك لله." "... "انتي رايحة فين! "أنا عايزة أنزل دلوقتي." "دلوقتي فين انتي اتجننتي!!