رواية فريده الفصل الثالث 3 - بقلم نجلاء عبد الظاهر

ريان دخل شاف فريدة بتعيط وندم على اللي قاله. ريان بحزن: أنا آسف يا فريدة، سامحيني. فريدة مسحت دموعها وقالت: متشغلش بالك. ريان راح عندها ومسك إيدها وقال بندم: أنا فعلاً ندمان إني قلت كده، بس بس صدقيني أنا مشاعري متلخبطة، كل حاجة جت فجأة. قاطعته فريدة وقالت: بس ده ميعطكش الحق إنك تجرحيني. ريان: ده غلطي فعلاً، انتي ملكيش ذنب في اللي انتي فيه، كل الحكاية وما فيها إن كله نصيب وقدر.

فريدة قالت بتنهيدة: عارف يا ريان، أنا ساعات بقول الحمد لله إن ربنا ابتلاني ابتلاء زي ده عشان يخفف عليا من حمل الذنوب، بس أحياناً بزعل على نفسي أوي إني دايماً حاسة بالعجز، واللي حواليا هيجيلهم وقت وهيزهقوا، إحساس إنك تقيل على اللي قدامك ده بيكون أصعب إحساس، خصوصاً لو انت بتحبه. ريان بعدم فهم: قصدك إيه؟

فريدة ابتسمت بحزن وقالت: متحطش في بالك خالص، حقك يا ريان تروح تتجوز تاني وتالت، وحقك تروح تتقدم للي بتحبها، أنا موافقة على أي حاجة. ريان: لأ يا فريدة، أنا هفضل معاكي لحد لما الشهرين يخلصوا، ولما ينتهوا هقدم ليها. إنما طول ما انتي معايا أنا مش هعمل معاكي كده أبداً، انتي متستاهليش مني كده. فريدة: بجد يا ريان؟ ريان بابتسامة: بجد يا فريدة. مش ناوية برضوا تاكلي معايا النهارده؟

على فكرة أنا في بيتنا أهلي مكانوش بيسبوني آكل لوحدي، إنما من وقت ما جيت هنا وانتي مجوعاني. فريدة بضحك خفيف: حاضر. ريان بفرحة: هقوم أحضر الأكل بقا أنا. فريدة بإحراج: أنا هعمله. وقاطعها ريان وقال عشان ميحسسهاش بالزعل: هنساعد بعض يلا. فريدة فرحت وقامت دخلت معاه المطبخ. روان: عرفت هتعمل إيه؟ الشخص: أنا عايز أفهم بس، انتي هتستفادي إيه من ده كله؟

روان: أنا عايزة ريان، هي أخدته مني. كل اللي عليك إنك تحاول تشككه فيها بأي طريقة، ترن عليها وهو هناك، تبعتلها ماسدجات وتحاول توضح له إن هي معاك، عايزاه يكرهها. كريم: وأنا هستفاد إيه؟ روان: لما آخد الفلوس من ريان، هيكون ليك نصيب فيها. كريم بص لها وقال: هو عنده فلوس؟ روان بخبث: كتير. وفريدة عايزة تاخد كل ده، يرضيك؟ كريم بخبث: لأ طبعاً ميرضنيش، خلاص معاك. روان بضحك: أيوه كده. تاني يوم. وفاء: عاملة إيه مع ريان؟

فريدة بتنهيدة: الحمد لله، اتفقنا نتطلق بعد شهرين. وفاء بصدمة: إيه يابنتي الكلام الفارغ ده؟ فريدة بدموع: عايزاني أعمل إيه يعني يا ماما؟ ريان بيحب واحدة تانية، وأقرب صديقة ليا، وعمره ما هيحبني. وفاء: بس بتحبيه. فريدة: وهو ميعرفش ومش عايزاه يعرف، مش عايزة أقلل من نفسي. مليش الحق في ده. وفاء: بس انتي مراته، ليكي كل الحقوق. فريدة بدموع وضيق: بس عامية يا ماما، عارفة يعني إيه عامية؟

يعني حتى أبسط حقوقي مينفعش أطلبها. هو مش مجبور يفضل معايا، وكمان لو اتجوز مقدرش اعترض لأن عنده الحجة، إنما أنا إيه؟ أنا ولا حاجة. وفاء بابتسامة وحنان: انتي هبلة. فريدة: أنا يا ماما؟ وفاء: أيوه ياختي، انتي الحمد لله عندك جمال، عندك التزام، كفاية احترامك. انتي ماشاء الله صفاتك الحلوة كتير، انتي بس اللي بتبصي على حاجة مش بإيدك. الأعمى بجد بيكون أعمى القلب مش العين. انتي جميلة يا فريدة. فريدة

حضنت أمها وقالت بدموع: بحبه أوي يا ماما. وفاء: خليه ليكي يا بنتي، بإيدك تقدري تخليه يكمل معاكي ويحبك كمان. فريدة: بس... قاطعتها وفاء وقالت: مفيش بس خلاص. الشهرين دول قربي جوزك منك، مش عيب ولا حرام. خليه ينسى اللي اسمها روان دي، اللي متستاهلش حتى كلمة صديقة. فريدة: بس يا ماما، روان... وفاء: متدافعيش عنها، انتي فاهمة؟

انتي عارفة هي عملت إيه كويس، باعتك في أكتر وقت محتاجاها فيه. دي متقدريش تقولي عليها كلمة صديقة حتى. فوقي لنفسك يا فريدة، محدش يستاهل كلمة صديقتي دي دلوقتي. كله بيقول نفسي نفسي. فريدة: يعني أعمل إيه يا ماما؟ وفاء: حافظي على جوزك يا فريدة، حافظي عليه. في المساء. ريان: اتعشيتي؟ فريدة: لأ لسه، كنت مستنياك. ريان بابتسامة: كويس، لأني جعان جداً. هدخل أغير هدومي وأخرج علطول.

فريدة بإحراج: ريان، كنت عايزة أروح بكرة الشركة معاك ممكن؟ ريان سكت شوية. فريدة بسرعة: خلاص لو مش هينفع خلاص. وقاطعها ريان بضحك: في إيه يابنتي؟ هو أنا لسه اتكلمت؟ ماشي، معنديش مشكلة. هتيجي تقعدي معايا في المكتب؟ فريدة: أي حاجة بس أخرج شوية من هنا، لأن زهقت من قعدة البيت. ريان بابتسامة: تحت أمرك، المهم تكوني مبسوطة. فريدة فرحت وابتسمت لما قالها كده. ريان بسرحان: تعرفي إن ضحكتك جميلة أوي.

فريدة اتكسفت ولسه هترد. الجرس رن. ريان بضيق: مين الرخم اللي جاي دلوقتي؟ فريدة ضحكت على طريقته. راح يفتح واتصدم لما شاف روان. فريدة: مين يا ريان؟ روان بغل: أنا روان يا خطافة الرجالة. ريان بعصبية: رواااان. فريدة بصدمة: روان!!!!