رواية في بيتنا غريب الفصل الثاني 2 - بقلم رقيه وائل

صالح: أنا اتجوزت خواجاية ... و طلقتها من كام شهر، بس قبل ما أسافر، قالتلي أنها حامل و أنا مش عارف اتصرف ازاى! ريحانة: إيه! صالح: إيه إيه؟ خد نفس و بص قدامه و هو بيتكلم بعقلانية: عارف مكنش ينفع اخد القرار ده لوحدى، بس أنا ضعفت.. ضعفت يا ريحانة قدام جمالها، قدام أنى اتونس فى الغربة، قدام إنى اكون عيله بدل إلى اتحرمت منها من و أنا عيل..

كان بيتكلم بندم و حسرة، و صوته بيتألم.. لكن ريحانة كانت فى عالم تانى، هى لسه مش مستوعبه انه اتجوز، أنه لمس غيرها، أن قلبه مدقش على بابها هي، بعد كل سنين الحب دي.. صالح: ريحانة انتي معايا؟ .. ريحانة! فاقت من سرحانها: ها؟ .. قوم نخش عند ابويا، بينه بينادي. قامت بسرعة، لكن وقفها مسكته لايدها إلى وجعتها كأنها بتحرق.. حاولت تملص ايدها لكنه كان متبت فيها بغرابة. صالح: ريحانة انتِ هتمشي بالسهولة دي .. مش هتقوليلى أي حاجة؟

قام وقف و قرب منها.. عيونها دمعت، لكنها استجمعت شجاعتها و اتكلمت بجدية: لا ازاى .. ألف مبروك يا ابن عمي. اتصدم صالح من ردها و فلت أيدها، أول ما حست بأنها حره، مشيت بسرعة ناحية البيت و الدموع مغرقة وشها.. (بالليل) منصور: يلا يا صالح يابني العشا جاهز.. جه صالح من جوه وهو لابس جلباب، اكمامة فضفاضة، و قعد على السفرة وهو بيلف بعينه فى المكان، و بعدين سأل: أومال هي ريحانة مش هتتعشى معانا؟

فاتن بلامبالاة: نديت عليها و قالت إنها شبعانة.. شرد صالح و الضيق غالب على ملامحه. منصور: الله ما تاكل يا صالح و لا الأكل مش على هواك؟ فاق و ابتسم و هو بياخد رغيف عيش و بيقول: ازاى بس .. دا أنا كنت بتشفشف على حاجة منه فى بلاد بره يا عمي. بعد العشا عمل صالح كام سندوتش و حطهم فى طبق، و طلع بيهم عند ريحانة. صالح وهو بيخبط: ريحانة .. أنا صالح، عاملك سندوتشات زى إلى كنت بعملهالك زمان للمدرسة، مكلتيش حاجة فى يومك افتحي.

محدش رد.. صالح بضيق: ريحانة؟ .. معقوله نمتي؟ اكسر الباب علشان اشوفك يعني..؟ سند على الاوكرة وهو بيتلكم، و الباب اتفتح. علشان يلاقى ريحانة واقعة على الأرض و فاقدة الوعي. قلبه وقع فى رجله و جرى ناحيتها و..