رواية في قبضة الفهد الفصل الخامس والستون 65 - بقلم جنات

في المستشفى، الكل واقفين قدام أوضة العمليات، ما عدا أسيل ومعاها مروة عشان الولاد. ريان: هما اتأخروا ليه كده؟ شروق: اهدى يا ريان، الولادة القيصرية بتاخد وقت. بعد شوية، سمعوا صوت بيبي بيعيط، والممرضة خرجت بيه. ريان أخدها منها: جميلة عاملة إيه؟ الممرضة: كويسة، متقلقش، شوية كده وهتتنقل أوضة عادية. ريان بص على ابنه: ما شاء الله. ريان قرب من فهد: أأذنله يا عمي. فهد أخدها وباس

راسه وبدأ يأذنله في ودنه: يتربى في عزكم يا ابني. ريان: تسلم يا عمي. شروق أخدتها: ما شاء الله، زي القمر. مريم قربت من شروق: ده نسخة من جميلة. ريان: عشان كده زي القمر. راكان: ربنا يبارك لكم فيه يا ابني. ريان: تسلم يا حاج. بعد شويا، الكل كانوا في أوضة اللي اتنقلت ليها جميلة، اللي كانت فرحانة بابنها واخداه في حضنها، والكل بدأ يبارك لها. مريم: هتسميه إيه يا ريان؟ ريان: لا، دي مهمة جميلة. تمارا: هاا يا ميلا هتسمي إيه؟

جميلة: أيان، عشان يبقى أيان ريان راكان. كنان: وعم كنان. اسر: هبل حتى في اختيار اسم ابنكم. جنه: بس والله اسم جديد وجميل. فهد: يلا كل واحد ياخد مراته ويرجع على القصر، ومريم وشروق هيفضلوا هنا معاهم، وبكرة الصبح هيرجعوا سوا. الكل عملوا زي ما فهد قال. *** تاني يوم، جميلة وريان رجعوا على البيت، واسيل كانت نازلة على السلم عشان ترجع على فيلا أدهم. اسيل حضنت جميلة: حمد الله على سلامتك يا ميلا.

جميلة: الله يسلمك يا قلبي، شوفتي أيان؟ اسيل أخدته: يروحي على الجمال، ربنا يبارك لكم فيه يا رب. ادهم: مبروك يا صاحبي. ريان: الله يبارك فيك يا أدهم. مروة: مبروك يا ميلا، كان نفسي أكون معاكي. جميلة: ولا يهمك يا مرمر. كنان: هتعملوا السبوع ده بقى ولا إيه؟ مروة: خلو كل سبوع لوحده. تمارا: لسه، عشان يبقى في سبوع في فيلا أدهم وسبوع عندنا هنا. مريم: أيوه كده أحسن. ادهم: خلاص زي ما أنتوا عايزين، نستأذن إحنا بقى.

مروة قربت من أسيل: خدي بالك على نفسك يا أسيل، ولو احتاجتيني في حاجة عرفيني. أسيل: حبيبتي يا ماما، ربنا يخليكي ليا يا رب. الكل ودعوا أسيل ومشيت مع أدهم. وجميلة طلعت على أوضتها القديمة عشان مريم تكون معاها دايماً عشان البيبي. *** في فيلا أدهم، سهام كانت في استقبالهم. سهام: حمد الله على سلامتكم يا حبايبي، نورتوا البيت. أسيل حضنتها: حبيبتي يا سوسو، البيت منور بيكي والله. ادهم: استلمي يا ست الكل.

سهام أخدت آدم من أدهم، وادهم أخد سيلا اللي كانت شايلاها أسيل. سهام: ياروح قلبي أنا، ربنا يبارك لكم فيهم يا حبايبي، ويتربوا في عزكم. ادهم: ويباركلنا فيكي يا ست الكل. سهام: يلا يا حبيبي خد مراتك عشان ترتاح من الطريق. أسيل: لا راحة إيه، ده إحنا لازم نجهز لسبوع، هيكون كمان يومين بإذن الله. سهام: طب ارتاحي شوية وبعد كده قوللي عايزة تعملي إيه، وأنا هساعدك في كل حاجة. أسيل: حبيبتي يا سوسو، أنا بحبك أوي.

سهام: حبيبتي، ربنا اللي يعلم، إنتي بنتي اللي كان نفسي فيها. أسيل حضنتها: حبيبتي يا سوسو. ادهم: وأنا إيه، ماليش من الحب جانب؟ سهام: ربنا يخليكم ليا، يلا اطلعوا ارتاحوا. أسيل أخدت آدم وطلعت مع أدهم اللي شايل سيلا. *** في جناح أدهم، دخلوا. أسيل: تصدقي أوضتي وحشتني جداً. ادهم: الأوضة بس؟ أسيل: وحبيبي اللي بيشاركني الأوضة كمان. ادهم: ياواد ياواد. أسيل لسه هتنيم آدم على السرير. ادهم: استنى يا حبيبتي. أسيل: في إيه؟

ادهم: تعالي معايا. ادهم مسك إيد أسيل، فتحت باب أوضة جداً، والجناح، وأسيل اتفاجئت إنها أوضة أطفال مقسومة للونين، لون بينك ولون بيبي بلو، وكل سرير فوقه اسم الطفل، وفيه لعب وكل حاجة ممكن يحتاجوها البيبيهات. أسيل: وااااو، دي حلوة أوي يا أدهم. ادهم: من يوم ما ولدتي وأنا بجهز فيها عشان لما ترجعي تتفاجئي. أسيل وأدهم نيموا آدم وسيلا، كل واحد في سرير، وأسيل حضنته بقوة: أنا بحبك أوي يا دومي، أوي.

ادهم باسها من خدها: وأنا بعشقك يا قلب دومي. أسيل بعدت عنه: بس دي كانت أوضة المكتب بتاعتك. ادهم: أنا نقلت كل حاجاتي في أوضة في نفس الدور وعملتها مكتب ليا. أسيل: أنا هروح آخد شاور وأنام شوية، لأني بجد تعبانة أوي. ادهم: مالك يا أسيل؟ أسيل: امبارح طول الليل بيعيطوا، ماما قالتلي هما بيكونوا كده الشهور الأولى، ومنمناش أبداً. ادهم: طب تعالي يا قلبي نامي شوية، وأنا هاخد بالي منهم لو صحيوا. أسيل: ربنا يخليك ليا يا أدهم.

ادهم: يلا روحي بسرعة. أسيل: حاضر. *** في قصر الفهد، زينة وجنه قاعدين مع جميلة في أوضتها، وأيان اللي مش بيبطل عياط. جنه: إيه ده، من أول يوم وعامل دوشة كده؟ زينة: لا، ده آدم كان ملاك، بقي. جميلة: أنا راسي هتنفجر، هو مش راضي يسكت ليه؟ جنه: اهدى يا جميلة، ماما راحت تحضرله الرضعة أهو. زينة: هو ليه رافض يرضع؟ جميلة: الدكتورة قالت عشان لسه في الأول، شوية شوية هيتعود. جنه: طب تعالي حاولي يمكن يرضع على ما ماما تطلع.

جميلة: طب هاتيه. زينة وجنه ساعدوا جميلة لحد ما أيان رضع ونام. جنه: ياروح خالتو، إنت كنت جعان يا قمر. جميلة: هو حد قاله ما يرضعش من الأول؟ إيه الواد ده. زينة: إنتي لسه في أول يوم يا جميلة، اهدى شوية. جميلة: مانا هادية أهو يا أختي. جنه: إنتي حالتك حالة. الباب اتفتح ودخلت مريم: هو نام؟ جنه: رضع ونام يا ماما. مريم: الحمد لله إنه رضع، نامي شوية يا جميلة قبل ما يصحى. جميلة: أنا تعبانة جداً يا ماما.

مريم: معلش يا حبيبتي، هما في الأول بيبقوا كده، بكرة يتعود، وإنتي كمان تتعودي، يلا نامي شوية. جميلة: حاضر. مريم: نيميه في سريره يا جنه، وروحوا ارتاحوا انتوا كمان شوية. زينة وجنه: حاضر. *** مرت الأيام وسهام وأدهم بيساعدوا أسيل في تحضيرات السبوع. صباح يوم السبوع. في قصر الفهد، الكل بيجهزوا عشان يروحوا فيلا أدهم. حسن بصوت عالي: يلا عشان منتأخرش. مروة: خلاص، كلنا جهزنا اهو. فهد: فين البنات؟ تمارا: نازلين مع الشباب اهو.

كنان: العربيات جاهزة بره. فهد: طب يلا، كل واحد ياخد مراته على العربية، على ما البنات والشباب ينزلوا. شوية والكل نزلوا وركبوا العربيات واتحركوا وراحوا على فيلا أدهم. *** في فيلا أدهم، اللي كانت الجنينة متزينة كلها بالبلالين بلون البينك والبيبي بلو والأبيض، وأسامي البيبيهات، وكان شكلها روعة. العيلة وصلوا ودخلوا ونزلوا من العربيات. جنه: وااااو. زينة: الجنينة شكلها قمر أوي. جميلة: زي ما خططنا بالظبط.

تمارا: تعالوا ندخل يلا. ادهم جه عليهم: أهلاً أهلاً، الفيلا نورت والله. حسن: منورة بأهلها يا أدهم. مروة: فين أسيل والولاد يا أدهم؟ ادهم: فوق بتجهز يا مرمر. جنه: ممكن نطلعلها؟ ادهم: ممكن ونص كمان، اتفضلوا. البنات طلعوا والكل دخلوا قعدوا جوه الفيلا، وكانت سهام في استقبالهم. *** في جناح أدهم، الباب خبط. أسيل: تعالي يا سوسو. البنات دخلوا: إحنا جينا. أسيل: حبايب قلبي، تعالوا. أسيل سلمت

عليهم وأخدت أيان من جميلة: إيه القمر ده... جنه:قوليلها كلنا بنقول شبه ريان وهي مصممة إنه شبهها. أسيل ضحكت:لا ده ريان الصغير. جميلة:محدش يقول لريان كده، أنا أقنعته خلاص إنه شبهها، أنا وهو صدق. البنات ضحكوا عليها. زينة:فين الولاد يا أسيل؟ أسيل:في أوضتهم، تعالوا. أسيل دخلت أوضة البيبيهات ووراها البنات اللي انبهروا بجمال الأوضة. زينة أخدت آدم:قلبي اللي وحشني. جنه:سيلا يا قمر انتي. جميلة:حلو أوي إنكم لابسين أبيض زي بعض.

أسيل:آه حبيت الفكرة إني ألبس أنا وهما، وأدهم اللي طلع عيني لحد ما وافق يلبس أبيض. جنه:فكرة حلوة بس مش هعرف أعملها. زينة:ليه؟ جنه:لأن أخوكي مش بيحب الفواتح. جميلة:احتمال يقولك نلبس أسود. البنات ضحكوا. أسيل:هتعملي سبوعك امتى يا ميلة؟ جميلة:الأسبوع الجاي بإذن الله، وطبعًا هتساعدوني في اختيار كل حاجة. البنات:طبعًا. أسيل:أنا خلصت، يلا ننزل. البنات:يلا.

البنات نزلوا وأسيل سلمت على العيلة والناس كانت بدأت تيجي. والكل خرجوا الجنينة وبدأت حفلة السبوع اللي كانت حفلة عائلية كلها لعب وهزار وضحك، والكل كانوا مبسوطين. والكل اتصوروا سوا مع أسيل وأدهم والبيبيهات. وبعد وقت طويل خلصت الحفلة والكل رجع على بيته. بتمر الأيام على أبطالنا وحياتهم هادية وطبيعية، والكل متحمسين وبيجهزوا لسبوع أيان. وأسيل جت هي والبيبيهات القصر عشان يفضلوا لحد وقت السبوع.

صباح يوم جديد، يوم سبوع أيان. الكل جاهز ومتحمس. جميلة اللي لبست لون الأزرق وطرحة بيضة، وريان شميز أزرق وبنطلون أبيض، والصغنن سالوبت أبيض في أزرق. نزلوا وخرجوا الجنينة وكان شكلهم قمر. والجنينة كانت كلها متزينة بالبلالين بلون الأزرق والأبيض. اللي حضر السبوع الناس القريبة منهم بس، وكانت حفلة خفيفة جداً وعدى وقتها بسرعة جداً على الكل اللي كانوا مبسوطين جداً. وبعد ما خلصت الحفلة الكل رجع على بيته.

بتمر الشهور يوم بعد يوم وأبطالنا عايشين مبسوطين. وفيهم اللي سعيد بحياته مع حبيبه وبانتظار فرد جديد هينور عيلتهم. وفيهم اللي بيعيش تجارب ومغامرات مختلفة مع البيبيهات الصغيرة. زينة اللي بقت في الشهر التاسع وبتستنى ميعاد الولادة بفارغ الصبر، وأسر اللي متحمس أكتر منها. وصمم إنه يحضر كل حاجة خاصة بالبيبي بنفسه.

جنه اللي عرفت إنها هتجيب ولد وكانت فرحانة جداً وبتعدي الأيام عشان يجي وينور حياتها هي زين الفهد اللي بيهتم بيها ودايماً معاها. في يوم الكل متجمعين على سطح القصر وقرروا يسهروا كلهم سوا. كل واحد قاعد وجمبه مراته وشروق اللي شايلة أيان في حضنها. ريان:ما تيجوا نلعب لعبة الإزازة. جميلة:دي لعبة قديمة أوي. زينة:بس حلوة. تعالوا نلعبها بجد. ريان:ثواني هجيب إزازة. أسير:يلا الكل يجمع. حسن:العبوا انتوا واحنا هنتفرج عليهم.

جميلة:تعالوا نلعب سوا. فهد:العبوا انت. جنه:طب يلا. الشباب والبنات اتجمعوا حوالين الترابيزة وزين لف الإزازة جت على ريان وجنه. ريان:أنا اللي هسأل. جنه:اسأل. ريان:هتسمي النونو إيه؟ جنه:لأ دي مفاجأة. أسير:لازم تردي على السؤال. زين:لأ مش هترد. ريان:أوف هتبوظوا اللعبة من أولها. جنه:لأن دي هتكون مفاجأة لو سمحت يا ريان. جميلة:خلاص لف الإزازة يلا. زينة كانت حاسة بتعب بس مش عايزة تبين عشان السهرة ما تبوظ.

ريان لف الإزازة وجت على جميلة وأسر. جميلة:تعاليلي أنا اللي هسأل. أسير:ياساتر على الشر. اسألي يا أختي. جميلة:إيه إحساسك لما ربنا استجاب لدعوتك وزينة بقت من نصيبك؟ أسير مسك إيد زينة وباسها:دي أحلى حاجة حصلت في حياتي كلها. ريان:وياترى زينة ندمانة على اختيارها ليك؟ زين:هو سؤال واحد. ريان:طب خليها ترد. ندمانة ولا... زينة بوجع:آه. أسير بص لها باستغراب:إنتي قولتي إن يازينة إنتي بجد ندمانة؟ ريان:يا كسفتك يا أسورة.

زينة مسكت بطنها:آآآآآه. تمارا قامت بسرعة:زينة مالك يا حبيبتي؟ زينة:وجع صعب أوي يا ماما. آآآآه. أسير شالها:خلونا نروح المستشفى بسرعة. أسير نزل وركب العربية ومعاه تمارا وراح على المستشفى. البنات والماميز لبسوا ونزلوا وكل واحد معاه مراته واتحركوا في طريقهم للمستشفى.