رواية غرام العيسى الفصل التاسع عشر 19 - بقلم اسماء السيد

عيسي من وراهم: أنا اللي اتبرعت له. فجأة، بصّت العيلة كلها عليه بصدمة وعدم تصديق. يوسف بصدمة: عيسي! عيسي بضحك: آه عيسي، مالكوا؟ قامت رحمة جريت عليه بعدم تصديق وحضنته جامد، وهو حضنها، وجرى عليه كامل ومريم ونور وحضنوه كلهم وهما مش مصدقين. رحمة بدموع: أنا قلبي كان بيتقطع عليك يا ضنايا، اتوحشتك يا قلب أمك. عيسي: وإنتِ كمان يا ماما. قرب يوسف وحضنه، وسامي اللي عيط، والعيلة كلها عيطت.

فجأة دخلت غرام من الباب: وأنا موحشتش حد هنا؟ حسن بدهشة: غرام بنتي! جرى عليها وحضنها، وهي حضنته جامد لدرجة إنه شالها من على الأرض. عامر بحب: عيسي، اتوحشتك يا ولدي. وقرب وحضنه. كل ده وسارة وبسمة مصدومين وخايفين؛ لأن عيسي بص لهم نظرة غريبة أرعبتهم. بعد ما الكل سلّم عليه، سارة جرت حضنت عيسي فجأة. سارة: وحشتني أوي، أنا قلت جرى لك حاجة، كنت خايفة عليك موت.

كان لسه هيزقها بعيد، بس غرام فجأة مسكتها جامد وبعدتها عن عيسي اللي فرح إنها غيرانة، بس اتصدم لما غرام ضربت سارة قلم قوي. سارة: إنتِ إزاي تمدي إيدك عليا يا حيوانة؟ غرام بغيرة: وإنتِ إزاي تتجرئي وتحضني جوزي وتقولي له وحشتني؟ سارة بتوتر: أنا ما كانش قصدي حاجة. غرام بغضب: إنتِ واحدة مش محترمة وإنسانة حقيرة. سارة بغل وحقد: إنتِ ظالماني على فكرة، ده ابن خالتي.

غرام: ولو مين، أجنبي عنك ومحرم عليكي، أنا بس اللي ليا الحق في كده فاهمة؟ وبصت لها بقرف، وعيسي كان فرحان عشان غرام بقت قوية وبتدافع عن نفسها، وسارة بصت لها بكره وراحت جنب أمها. كامل: بس ما قلت ليش إنت عايش إزاي يا ولدي؟ عيسي بضحك: لأ، دي حكاية طويلة هحكيها لك بعدين. كامل: أنا مش مصدق نفسي إنك عايش يا عيسي. عيسي: لأ ما تخافوش، أنا عايش والله مش بتحلموا. رحمة حضنته ثاني: اللهم لك الحمد، ألف حمد وشكر ليك يا رب.

عيسي بص على غرام بحب وغمز لها، وهي اتكسفت. حسن حضن غرام ثاني: أنا كنت مرعوب عليكي. عيسي بغيظ: كفاية يا عمي، مش حضنتها مرة؟ حسن ضحك من بين دموعه: لسه بتغير مني برضه، بس ما قلت ليش وصلت لها إزاي وإيه اللي حصل؟ عيسي: ما تقلقوش، أنا ما أعرفش أنام وأسيب مراتي بعيد عن حضني، دي روحي وأنا ما أقدرش أعيش من غيرها. غرام اتكسفت ودفنت وشها في صدره، وعيسي ضحك. عيسي بخبث: مالك يا خالتي مش فرحانة برجوعي ولا إيه؟

بسمة بتوتر ورعب: حمد الله على سلامتك يا ولدي. عيسي بنظرة مرعبة: الله يسلمك، ما تخافيش عليا، أنا ما بموتش بساهل كده. بسمة سكتت، والعيلة فرحت جدًا برجوعه. عامر بسعادة: تتعمل أكبر ليلة في البلد بمناسبة رجوع الغالي ومراته. روحية بسعادة: تعالَ اقعد يا قلب ستك، إنت ومراتك. غرام بمرح: لأ، أنا شايفة إن كل الحب لسي عيسي وأنا لأ، ما فيش حد بيحبني في القصر ده. رحمة كانت لسه هتتكلم، قاطعها عيسي بسرعة.

عيسي بحب: كفاية أنا أحبك يا قلبي، ولا أنا مش كفاية؟ غرام اتكسفت جامد ودفنت وشها في صدره أكتر. دياب من وراهم: طب وأنا ما ليش حد يسأل عليا؟ عامر: دياب، إنت كنت عارف؟ دياب حك راسه بتوتر: أنا... أنا أعرف إيه، هو فيه إيه؟ يوسف بغيظ: وحياة أمك! وطلع يجري وراه، ودياب جرى بسرعة واستخبى ورا رحمة. رحمة مسكت ودانه: يعني إنت عارف إن عيسي عايش، مش تقولي لأ، إزاي نخبي، طب ما فيش بشاميل لمدة شهر.

دياب بص لعيسي بغيظ: عجبك كده يا عيسي، ماشي. بسمة بتوتر: عن إذنكم. عيسي بخبث: على فين يا خالتي؟ بسمة برعب: لأ معلش، بس تعبانة شوية وعاوزة أرتاح. وطلعت وسارة وراها وهي هتطّق. راح عيسي والعيلة وقعدوا في الصالون، وعيسي أخذ غرام في حضنه. عامر: احكي لنا بقى حصل إيه. عيسي: اللي حصل... وبس. رحمة بدموع: يا مري، كل ده حصل؟ حسن بدهشة: شهاب يطلع منه كل ده؟ عيسي: أيوه يا عمي، ده كان أكبر تاجر مخدرات في روسيا.

رحمة: معلش يا حبيبتي، ربنا يعوضك خير. غرام بدموع: الحمد لله، قدر الله وما شاء فعل. نور: طب وما تعرفوش مين اللي حط السم؟ دياب بتوتر: مونيكا. غرام اتنفضت من حضن عيسي، وهو سكت بس حضنها أكتر عشان تهدى. حسن بغضب: والله أنا لازم أقتلها بنت المركوب. عيسي ببرود: مش هتعرف يا عمي. مصطفى: ليه مش هيعرف؟ عيسي: عشان هي ميتة أصلًا. غرام بصدمة: إيه ماتت؟ حسن: ماتت إزاي يا عيسي؟

عيسي: شهاب بعت سعد المساعد بتاعه وراها، وبعدين قتلها في شقتها، وبعد كده حرق الشقة ومشي. غرام بدموع: وإنت عارف ومخبي عليا كل ده؟ عيسي بحنية: اهدى يا حبيبتي، كل حاجة هتكون كويسة. غرام سكتت ونامت في حضنه، وهو طبطب عليها بهدوء. دياب بتوتر: عيسي. عيسي: أمم. دياب: بالمناسبة الحلوة دي أنا عاوز هدية على تعب الشهور اللي فاتت. الكل بص له بدهشة. عيسي ببرود: اشمعنى؟ دياب بتوتر: ما هو أنا مش هشتغل ببلاش يا صاحبي، آه.

عيسي برفعة حاجب: أومال عاوز إيه؟ دياب بسرعة: أنا مش عاوز فلوس. عيسي برفعة حاجب: أومال عاوز إيه؟ دياب بتوتر: بصراحة عاوز أتجوز. عامر: أخيرًا يا واد قررت، عينك على واحدة؟ دياب بص لمريم بطرف عينه: أنا عاوز أتجوز مريم أختك. عيسي: نعم تتجوز مين؟ دياب بضيق: إيه يا عيسي؟ أنا عاوز مكافأتي، مريم. عيسي بص لها وهي حطت وشها في الأرض. دياب: ها يا عم كامل، إيه رأيك إنت وعيسي؟

كامل: والله عندك أخوها أهو، إن كان عليا موافق، شوف أخوها. عيسي بخبث: بس مريم في حد متقدّم لها. دياب بعصبية: مين ده اللي متقدم لها؟ وأنا هآكله بسناني. عيسي ببرود: مش نسألها عاوزاك ولا عاوزاه؟ دياب بسرعة: نسألها. عيسي بص لها: ها يا مريم، عاوزة دياب ولا العريس الثاني؟ مريم بعفوية: لأ أنا عاوزة دياب. استوعبت واتكسفت. دياب بص لها بحب وبص لهم بانتصار. عيسي فجأة انفجر في الضحك، والعيلة كلها ضحكت على دياب.

دياب بغيظ: بتضحكوا على إيه؟ هي وافقت وأنا موافق وعاوز كتب كتاب على طول. يوسف بعفوية: وأنا كمان يا عيسي عاوز أتجوز. عيسي: هو في إيه كده كلكم عاوزين تتجوزوا؟ يوسف: على فكرة أنا مكلمك على نور من زمان. عيسي بخبث: خلاص يوسف يتجوز الأول. دياب: لأ أنا اللي هتجوز الأول. يوسف: لأ أنا الأول، أنا اللي طالب الأول. عيسي بزهق: بس إيه شغل ابتدائي ده إنت وهو؟ إنتوا الاتنين في يوم واحد، ومعاكوا أنا وغرام كمان عشان ما تعملش فرح لغرام.

غرام بصت لعيسي بعدم تصديق: بجد هنعمل فرح؟ عيسي بابتسامة: عاوزة فرح؟ نعمل فرح، ما نعملش ليه يا ست البنات؟ تفيدة بهزار: أيوه يا سيدي الحب ولع في الدرة يا عم عيسي، آه بقى عيسي اللي كان كشري وما بيبتسمش حتى بقى يعرف يضحك. غرام بضحك: ادعوا لي بقى عرفت أثر فيه. الكل ضحك وكانت أجواء جميلة جدًا. *** في غرفة بسمة. كانوا قاعدين مش طايقين نفسهم من الغل والسواد. سارة: يعني عيسي رجع وكمان راجع بيحب الزفتة اللي اسمها غرام.

بسمة بغضب: اخرسي، هي مش ناقصة، أنا كان لسه خطوة واحدة وخطتي هتمشي زي ما كنت راسماها. سارة بغباء: ما تكمليها عادي وما حدش واخد باله. بسمة: إنتِ غبية، ده عيسي لو عرف مش هيرحمني. سارة بغل: أنا لازم أخلص من غرام بأي تمن وأي طريقة. بسمة بخبث: لسه عاوزة تتجوزي عيسي؟ سارة بسرعة: أكيد، ده أنا هموت عليه. بسمة كانت بتفكر: اطلعي برا دلوقتي. سارة بزهق: زي ما تريدي. وخرجت من الغرفة وبسمة قعدت تفكر. *** تحت في الصالون.

عيسي: خلاص يا جماعة، الفرح الجمعة الجاية، يعني بعد أربع أيام. دياب بفرحة: تسلم لي يا أحلى عيسي في الدنيا. عيسي بضحك: والله إنت عبيط. يوسف بمرح: يا حبيب قلبي أنا مش عارف لو كنت مت كنت هتجوز إزاي، الحمد لله إنك ما متش دلوقتي. عيسي بدهشة: يعني أموت بعد ما تتجوزوا؟ دياب ويوسف في نفس واحد: آه. عيسي بغيظ: كده يا كلاب منك ليه؟ ماشي طب ما عنديش بنات للجواز.

يوسف بخوف: لأ يا عيسي ده إنت حبيبي، ده أنا ما كنتش عارف أعيش من غيرك أبدًا، إنما لو عاوز تلغي جوازة دياب أنا ما عنديش مشاكل. دياب بصدمة تشرشحه: نعم يا روح أمك؟ مين ده اللي يأجّل؟ أنا هتجوز البنت دي يعني هتجوزها فاهمين؟ رحمة: بس يا كلب إنت وهو، اهدوا واترزعوا في جنب، البنات ميتين من الضحك بدل الكسوف يا منيل إنت وهو. يوسف ودياب بصوا على مريم ونور لقوهم ميتين من الضحك. دياب بغيظ: إنتِ بتضحكي على إيه؟

مريم بتوتر: أنا لأ ما فيش حاجة، بضحك على نور. يوسف: وإنتِ يا أختي بتضحكي على إيه؟ نور بضحك: هههه بضحك على خيبتي، هتجوز واحد مجنون هههه. الجميع ضحك حتى دياب ما عدا يوسف اللي بص لها بغيظ. تفيدة: يا حبيبتي يا بنتي. عيسي برفعة حاجب: في إيه؟ روحية بخبث: غرام نامت. عيسي: بجد نامت؟ وبص عليها لقاها نعسانة في حضنه وابتسم بخفة. مصطفى: أكيد ما حستش بالأمان وعرفت تنام غير وسطنا.

عيسي بابتسامة: عن إذنكم، أنا هطلع أنيمها وهنبقى ننزل على العشا. وشالها وطلع. عامر بضحك: عرفت توقعها بنت اللذينة هههه. الجميع ضحك وعيسي طلع فوق. *** عند سليمان، كان في مكتبه هو ومنصور وبيتكلموا في حاجة عن السوق وبيعدوا فلوسهم. منصور بسعادة: كدا احنا طالع لنا مكاسب الشهر ده 12 مليون. سليمان بضحك: مش قولت لك بكرة تروق وتحلي، الحمد لله إن الزفت عيسي بعد عن طريقي وودع.

منصور: فعلًا ده كان واكل السوق كله في كرشه لوحده ومكانش سايب لنا غير الفتافيت، بس عيسي كان بيكسب دول في يومين يا باشا. سليمان بغيظ: اهدى عليا واحدة واحدة، هجيب أكتر وأكتر وهبقى أكبر من عيسي وعيلة الهواري كلها. منصور: ما هو كامل الهواري فلت منها المرة اللي فاتت، عامل زي القط بسبع أرواح. سليمان بضحكة خبيثة: وسامي راح فين؟ لازم نخلص النهاردة أو بكرة. منصور بخبث: عيب عليك يا باشا، كله تمام.

وخبط كاسه في كاس سليمان وضحكوا بشر. قاطعه رنة تليفون منصور وكان أحد الرجال اللي بيراقبوا قصر الهواري. منصور: أممم، في جديد؟ أحد الرجال: الحق يا منصور بيه. منصور بقلق: إيه في إيه؟ الراجل برعب: عيسي الهواري رجع. منصور بصدمة: إيه مين اللي رجع؟ الراجل بتوتر: والله زي ما بقولك كدا، عيسي الهواري عايش ما ماتش. منصور بتوتر: رجع إزاي وإمتى؟ الراجل برعب: معرفش، بس هو لسه راجع من حوالي تلت ساعات، أنا خايف أنا والرجالة وهمشي.

منصور: إياك تمشي فاهم؟ الراجل: بقولك عيسي الهواري رجع تقولي اقعد؟ ده ممكن يقتلني في لحظة، ده مبيرحمش، ولو عرف إننا ناوين على... هيقتلني. منصور بخوف: طب اقفل ومتمشيش، خليك بس بعيد وهكلمك تاني دلوقتي. وقفل الخط. *** سليمان بقلق: في إيه؟ مين اللي رجع يا منصور؟ منصور برعب: عيسي الهواري. سليمان بصدمة: مين عيسي؟ الكاس وقع من إيده واتكسر. منصور بخوف: آه عيسي طلع عايش. سليمان بخوف: إزاي عايش إزاي؟

منصور بتوتر: عيسي لو عرف اللي حصل في أبوه بسببنا واللي حصل في السوق والمخازن، مش هيسمي علينا. سليمان برعب: عندك حق، ده عيسي هي... هي... هيقتلني، لا لا أنا لازم أتصرف. منصور بعصبية: نتصرف في إيه بقى يا باشا، كل شوية كنت بحذرك وأنت متسمعش ليا. وسابه وخرج. سليمان اترعب لدرجة إنه عيط من الخوف لأنه عمل حاجات كتير محدش يعرفها. ***

في جناح عيسي وغرام، دخل عيسي وحط غرام على السرير ودخل جاب بيجامة وغير لها هدومها وهي نايمة في العسل، ابتسم عليها وباس رأسها ودخل الحمام. بعد مدة طلع عيسي من الحمام لابس بنطلون بس، واتجه للسرير ونام جنب غرام وأخدها في حضنه وحس إنه مرتاح البال ونام باطمئنان. *** في مكان مجهول، كانت سارة وبسمة قاعدين قصاد دجال كبير. الدجال: جاية في إيه؟ بسمة بحقد: عاوزة أكره واحد في مراته وأحببه في بنتي. الدجال: أممم وبعدين؟

بس ده هيكلفك كتير، ده مش ليا ده لأسياد. بسمة بغل: هعطيك اللي أنت عاوزه بس عاوزة أشوف النتيجة في أسرع وقت. الدجال: أسرع حاجة بعد أسبوع. بسمة: مش كتير؟ الدجال: دي أسرع حاجة معاكي حاجة من أثرهم؟ بسمة بتوتر: آه معايا اتفضل. وطلعت ملابس داخلية من ملابس غرام ومن ملابس عيسي. الدجال: تمام، أنتِ عاوزاه يحب بنتك دي؟ بسمة: أيوه دي، عاوزاه يعشقها ويكره مراته. الدجال: اسمه مراته إيه؟ بسمة بغل: غرام حسن عامر الهواري.

الدجال: أممم طب روحي أنتِ وتعالي لي بعد ست أيام. بسمة: من عيوني، هتحتاج كام أجيبه معايا وأنا جاية؟ الدجال بطمع: 100 ألف بس. بسمة بدهشة: بس؟ آه تمام، لو جابت مفعول هعطيلك أكتر. وخرجت هي وسارة. سارة بخبث: تفتكري هيجيب مفعول؟ بسمة: أكيد ده أحسن دجال في بر الصعيد كله. سارة: يا رب ينجح. بسمة بضحكة خبيثة: كل حاجة هتمشي بكيفي أنا ههه. وضحكوا بشر ومشوا متجهين للقصر. ***

في المساء، في جناح عيسي، صحيت غرام ولقت عيسي حاضنها جامد لدرجة إنها مكنتش عارفة تتحرك. غرام: عيسي يا عيسي. عيسي بنوم: أممم. غرام: عاوزة أقوم. عيسي فك إيده وهي اتحررت وقامت، ولسه هتمشي عيسي مسكها من إيدها وشدها لعنده وقعت في حضنه. غرام بخجل: عيسي. عيسي بحب: عيون عيسي وقلب وروح عيسي. غرام: ممكن تسيبني أقوم؟ عيسي: تؤتؤ، عاوز مقابل عشان تقومي. غرام بعدم فهم: مقابل؟ مقابل إيه؟ عيسي بضحك: بوسيني مثلًا!

غرام بدهشة: لاء عيب مستحيل. عيسي: يا بنتي هو إيه اللي عيب أنا جوزك. غرام بكسوف: برضه عيب. عيسي بعند: خلاص مش هتقومي غير لما تبوسيني. غرام باستُه من خده بسرعة ولسه هتقوم مسكها أكتر. غرام: إيه تاني؟ عيسي برفعة حاجب: وأنتِ كدا بوستيني؟ غرام: آه في إيه؟ عيسي بتوهان: البوسة مش كدا كدا. وباسها بحنية. بعد شوية بعد عنها وهي خدودها احمرت وهو ابتسم.

غرام بكسوف: يا قليل الأدب. وضربته في صدره بخفة وجريت على الحمام وهو انفجر في الضحك على كسوفها. *** تحت على العشاء، كان الجميع متجمع على العشاء. نزل غرام وعيسي. عيسي: مساء الخير. رحمة: مساء العسل عليك يا قلب أمك. عيسي قرب منها وباس رأسها واتجه للكرسي. تفيدة: عملتلك أحلى بشاميل يا حبيبي. عيسي بابتسامة: تسلمي يا مرت عمي. بسمة: معرفتش أنت لسه عايش إزاي يا عيسي يا ولدي.

عيسي بخبث: لاء عادي يا خالتي، مكنتيش عاوزاني أرجع ولا إيه؟ بسمة بسرعة وخوف: لاء يا ولدي، أنا كنت هموت على فراقك يا حبيبي. عيسي: آه معلش. سكتت بتوتر. بعد مدة خلصوا العشا وعيسي قام اتجه لمكتبه وغرام بقت تلم السفرة معاهم. في المكتب كان قاعد عيسي بيشرب سيجارة وبيفكر في حاجة، قطع تفكيره خبط الباب. عيسي: ادخل. اتفتح الباب ودخل كامل وعيسي طفى السيجارة احترامًا لأبوه. عيسي بقلق: في حاجة يا أبوي؟

كامل بتوتر: لاء عادي، كنت عاوز أتكلم معاك شوية. عيسي: اتفضل اقعد. قرب كامل وقعد على الكنبة المقابلة لعيسي. عيسي: في حاجة ولا إيه، أنت كويس؟ كامل: آه كويس يا ولدي الحمد لله، بس كنت عاوزك في حاجة. عيسي: اتفضل يا أبوي. كامل بتوتر: كنت عاوزك تسامحني عن اللي حصل زمان. عيسي بضيق: والله هو أنا؟

كامل بسرعة: أنا مش عاوز ردك دلوقتي، أنا عاوزك تفكر وترد عليا، العمر مفيش فيه كتير يا ولدي والموضوع مش مستاهل، أنا عارف إني غلطت بس عارف كمان إن قلبك هيكون حنين على أبوك. عن إذنك يا ولدي. وقام خرج بهدوء. عيسي رجع برأسه لورا ولع سيجارة وقعد يفكر يعمل إيه.