رواية حكاية زهره الفصل الثامن والعشرون 28 - بقلم شيماء منير

قالت هذه الكلمة وهي تكلم صديقتها وتبدل ملابسها في المطعم. هاله بدهشة: قولتلُه كده؟ إيه اللي حصل؟ زهره: لقيته هيتعصب وتقريبًا فعلاً هيقتلني. قليل لو عمل كده. وقفت تاكسي وركبت وجيت على هنا. هاله بضحك: آه يا جبانه. زهره: المهم وصلتي جنى؟ هاله: أيوه وصلتها ولاقيتك مرنتيش عليا. أخدت تاكسي وجيت خوفت أتأخر وقولت يمكن تتصالحوا والموضوع يطول. زهره: تفتكري بسهولة كده؟ هاله: ليه، انتي ناوية على إيه؟

زهره: ومين قال إني ناوية على صلح. هاله: ليه هتخلعيه بجد؟ زهره: لو عاند ممكن أوصلها لكده. *** آخر النهار. زهره وهاله كانوا مروحين. خرجوا كان مازن واقف قصاد المطعم. هاله من بين أسنانها: هو عرف منين مكان المطعم؟ زهره: تفتكري مشي ورا التاكسي؟ هاله: اممم ممكن. مازن كان واقف وساند على العربية. أول ما شافهم قرب منهم. مازن: مساء الخير. زهره بصتله بصمت. هاله: مساء النور. مازن: عايز أتكلم معاكي شوية.

زهره: أنا اللي عندي قولته الصبح. مازن بص لهاله ورجع بص لزهره. زهره: هاله صاحبتي ومش بخبي عنها حاجة. مازن بص لزهره بغضب. زهره اتوترت بس حاولت تبين عكس ده. هاله: طيب أنا هشتري حاجة من الصيدلية دي وراجعة. واتحركت من مكانها. مازن: أعتقد إن في بينا خصوصيات مينفعش تبقى على الملأ كده قدام أي حد. زهره: مفيش خصوصيات بتجمعنا. أعتقد الصبح قولتلَك على اللي فيه. مازن: آه الكلمتين اللي قولتيَهم وجريتي دول.

زهره بشجاعة مزيفة: أنا مجريتش. أنا كان عندي شُغل وخوفت أتأخر. مازن: اممم طيب. يا زهره، طلاق مش هطلق. وابقى وريني بقى هتخلعيني إزاي. زهره: سهل أوي وأنت عارف. مازن: ماشي. اعمليها كده وشوفي أنا هعمل إيه. زهره: وانت زعلان ليه؟ انت مش آخر مرة قدام باباك ومامتك طردتني وقولت إنك مش عايزني؟ مازن: انتي عارفة إن الحوار ده ليه ظروفه. بجد كنت هتجنن لما قريت كلمة مراتك بتخونك وشوفت الصور والفيديوهات.

زهره: كنت سألتني الأول وسمعتني. مازن: مش عارف. مش هنكر إني تسرعت في كل حاجة. بس بجد أنا بحبك ومش قادر أعيش من غيرك. زهره وهي بتتحرك من مكانها: وأنا بطلت. مازن وماسكها من ذراعها: بطلتي إيه؟ تحبيني؟ زهره: ابعد إيده لو سمحت. متلمسنيش. اتفقنا نتكلم من بعيد. لأني محددة موقفي. مازن ضغط على شفايفه بضيق وهو بيبصلها. زهره وحست إنه هينفجر فيها خلاص: بقا أنا همشي. مش هينفع أوقف هاله أكتر من كده وكمان عشان متأخرش على جنى.

مازن: هي فين صحيح؟ زهره: في البيت. مازن بضيق: سيبها لوحدها في البيت؟ زهره: لا طبعًا. مع طنط عايدة، مامة هاله. مازن: أهم حاجة تكون البنت متعودة عليها. زهره: آه متعودة. وبعدين إنت مالك؟ بنتي وأنا حرة فيها. مازن بص لها ورفع حاجبيه بدهشة من طريقتها. زهره ضغطت على شفايفها بحرج لأنها عارفة هو بيحب جنى قد إيه وبيخاف عليها. في اللحظة دي مازن أخد الموبايل من إيدها. زهره بضيق: هات الموبايل. مازن

وهو بيفتحه ويكتب رقم عليه: أكيد طبعًا هدهولك. أمال هطمن عليكي بعد ما تروحي إزاي. زهره بضيق: هعملك بلوك. مازن بعد ما رن على نفسه وظهر رقمها عنده: متقدريش. وابقى اعمليه كده يا زهره. *** في بيت نبيل. مريم: حقها يا عمر. زي كل البنات تعمل سيشن. وبعدين هي قبلت إن مفيش خطوبة وهي وافقت. عمر: أنا مش حابب حوار السيشن والتلامس واحنا لسه مش متجوزين.

مريم: طيب براحة وفهمها وجهة نظرك وبراحه شوية. بصراحة سامعك وأنت متعصب وأنت بتتكلم معاها. عمر: ماشي. هحاول وأشوف. مريم: هقوم أشوف ماما بتعمل إيه في المطبخ. عمر بهزار: يا بنتي اقعدي في جمب ببطختك دي. مريم: ده قمر. ده كفاية إنه ابن المنشاوي. عمر: يا سلام على الغرور. انتي اتعديتي منهم. مريم: لا مسمحلكش. دي مش غرور دي ثقة. عمر: آه عارفها الثقة دي. مريم: آه صحيح. ما أنت خاطب من المنشاوي. خود بالك بقى من كلامك.

عمر: آه طبعًا. أنا أقدر أعمل غير كده. مريم سابت عمر وراحت لسوزي في المطبخ. مريم: أساعدك في إيه يا ماما؟ سوزي: تساعديني إيه؟ لا ارتاحي انتي خالص. مريم: والله يا ماما أنا مرتاحة على طول. سوزي: يا رب يا حبيبتي. يكملك على خير. مريم: يا رب يا ماما. أنا بتجيلي مغصة كده بتتعبني أوي. سوزي: طيب نروح للدكتور. مريم: حسام قالي كده. بس كدا كدا عندي كشف بعد يومين. *** عدى أسبوع. هاله: مالك في إيه؟

زهره: مش عارفه. حاسة إني دايخة شوية. هاله: من إيه طيب؟ نروح نكشف. زهره: أنا حاسة إنه حوار الأنيميا ده. أنا معملتش تحليل من زمان. هاله: لا يبقى نحلل يا زهره. زهره: إن شاء الله هحلل. *** عند عمر. كان بيتكلم هو ومريم. مريم: يعني خلاص اتفقتوا على كتب الكتاب؟ عمر: أيوه. وكده أعملها السيشن اللي هي عايزاه. مريم: تمام الحمد لله. ربنا يتمم بخير يا قلبي. عمر: يا رب.

وبعد كده كتبوا الكتاب وعملوا خطوبة في بيت فتون على الضيق زي ما كان اتفق معاها. *** في وقت متأخر من الليل. مريم: آآآه الحقني يا حسام. أنا تعبانة. حسام قام وشغل النور بفزع: إيه فيه؟ مريم: بتوجع. مش قادرة. وجع في بطني. حسام بقلق: وجع إيه بس دا انتي لسه هتبدأي السابع بكرة. مريم بصراخ: مش عارفه. مش قادرة. حسام: طيب يلا نروح المستشفى. مريم بوجع وخوف: كلم لي ماما. حسام: حاضر. بس قومي أساعدك تلبسي.

حسام جهزها وراح خبط على جيهان. جيهان وفتحتله: إيه يا حبيبي. انتوا كويسين؟ حسام: مريم تعبانة أوي يا ماما. جيهان بخضة: مالها؟ حسام: مش عارف. تعبانة وبتعيط. أنا جهزتها وهاخدها على المستشفى. جيهان: على ما تنزلها هكون جهزت. حسام أخد مريم ونزل. كان مازن لسه راجع من بره. مازن: مالكم في إيه؟ حسام: مريم تعبانة شوية وهاخدها المستشفى. مازن وقرب منهم بقلق: ليه مالها؟ حسام بزعل: تعبانة والله يا مازن. مازن: طيب مستنين إيه؟

يلا. هجيب عربيتي ونروح المستشفى. حسام: ماما نازلة بس عشان تكون معاها. سمعوا صوت جيهان. جيهان وهي نازلة على السلم: أنا جاهزة أهو. وركبوا كلهم عربية مازن. وصلوا المستشفى. الدكتور كشف على مريم وقال لازم تدخل عمليات. ودخلت عمليات. بعد نص ساعة الدكتور خرج. حسام قرب منه وجيهان ومازن. حسام: طمني يا دكتور.

الدكتور بأسف: للأسف الولد مات. هو كان النبض ضعيف وكان عندنا أمل ننقذه. بس للأسف مقدرناش. أهم حاجة دلوقتي الأم. لأن لو كان مات في بطنها كان هيسبب لها تسمم وتتأذي. مازن غمض عينه بوجع على أخوه. جيهان مسكت ذراع حسام وضغطت على كتفه بحنو. حسام بوجع: أهم حاجة طمني على أمه. الدكتور: الحمد لله كويسة. وإن شاء الله هتبقى أحسن. بس ياريت أما تفوق تكونوا جنبها عشان نفسيتها. جيهان: أكيد طبعًا. مش هنسيبها. الدكتور: عن إذنكم. واتحرك.

في الوقت ده وصل عمر وسوزي ونبيل. سوزي وقربت منهم: إيه؟ مريم مالها؟ جيهان: اطمني يا سوزي. كويسة. سوزي: إيه اللي حصل يا حسام؟ في إيه؟ أنا مكلماه بالليل كويسة. حسام: الحمد لله. أهم حاجة هي كويسة. سوزي: ليه؟ إيه اللي جرى؟ جيهان بحزن: الولد مات. سوزي بخضة ووجع على بنتها: يا حبيبتي يا بنتي. ومريم عاملة إيه؟ اتأذت؟ جيهان: متقلقيش. الحمد لله هي كويسة. الدكتور لسه مطمنا. سوزي ببكاء: يا قلبي يا بنتي. دي لما تعرف هتتقهر.

جيهان: بعد الشر عليها من القهر. ليه يعني؟ الحمد لله إنها جت على قد كده وهي كويسة وربنا يعوضهم تاني. إن شاء الله. دول لسه في بداية عمرهم. سوزي ببكاء: يا رب. جيهان: إحنا عايزين أما تفوق نوصلها الموضوع براحة عشان متتعبش مننا. *** الصبح. هاله: يعني هتروحي تعملي تحاليل؟ زهره: آه. مش لازم أجي الشغل النهارده. هاله: تمام. ابقي طمنيني. زهره: حاضر. *** سوزي: يا حبيبتي بطلي عياط. انتي من وقت ما جوزك قالك وانتي مش مبطلة عياط.

مريم ببكاء: ابني خلاص يا ماما. دا أنا كنت بحلم إني أشوفه. سوزي: يا نور عيني. دا قضاء ربنا. إن شاء الله هيعوضك. جيهان: أيوه يا حبيبتي هيعوضك. واللهم. مريم من بين دموعها: يا رب. *** في إحدى مراكز التحليل. زهره بصدمة: حامل!!!! انت بتقول إيه؟ دي أكيد مش نتيجة تحليلي. الدكتور: لا يا فندم. نتيجة حضرتك. وشكل حضرتك في حمل متقدم. وبعدين لازم تكشفي عند تخصص لأن حضرتك الأنيميا مش حلوة ولازم تتعالج.

زهره بتوتر: أنا عايزة أعيد التحاليل تاني. الدكتور: تحت أمرك. زي ما تحبي. *** مساء في بيت هاله. هاله: يانهار أبيض. ٤ شهور يا زهره؟ وانتي مش حاسة؟ زهره: أنا بجد اتفاجأت لما الدكتور قالي وهو بيكشف إنه ٤ شهور. هاله: بجد؟ كنتي فين؟ انتي بقالك شهرين سايبة الفيلا. الشهرين اللي قبلهم دول كنتي فين بجد؟ زهره: يابنتي والله حوار الصعيد ده وانشغلت بجد. معرفش إزاي ما حسيت. هاله: ههههههههه. والغريبة إن بطنك مش ظاهرة خالص.

زهره: أيوه فعلاً. فاكرة في جنى. هاله: دا انتي كنتي منفوخة في جنى أوي. زهره: فعلاً. هاله: المهم. البت جوجو اللي هتفرح. زهره: متجيبيش سيرة قدامها أو قدام أي حد. هاله: ليه؟ أوعي تكوني ناوية متعرفيش جوزك؟ زهره: أيوه. هاله بضيق: أيوه إزاي ولحد إمتى؟ مينفعش. زهره: أما أشوف نفسي. هاله: هو انتي لسه حاطة في دماغك موضوع الطلاق ده؟ زهره بصتلها وسكتت.

هاله: لازم موضوع الحمل ده يخليكي تغيري رأيك. لأن حرام بجد البيبي اللي جاي يتربى بعيد عن باباه. يتبع...