رواية هكذا يكون الحب الفصل الرابع 4 - بقلم ايمان جمال

وصلت الڤيلا، وصافي نزلت من العربية بس مهاب لا. "ايه دا انت مش هتدخل معايا؟ "لا ياحبيبتي انا رايح لباسم المعرض." "ماشي يا أبيه." صافي دخلت الڤيلا ومهاب مشي. عبدالحميد كان قاعد هو والبنات واولاده وزوجاتهم في مدخل الڤيلا. "امال مهاب فين ياصافي؟ "وصلني وراح لباسم المعرض ياجدو." "ماشي ياحبيبتي." ثم بص لفيروز: "تعالي اعرفك على فيروز." صافي بإبتسامة حلوة زينت وشها: "اسمك حلو اوي." فيروز بإبتسامة: "انتي احلى."

صافي قعدت معاهم وفيروز كانت فرحانة في وسطهم. سراج لفيروز: "انتي عايشة لوحدك يابنتي؟ فيروز بحزن: "ايوا ياعمي، بابا وماما اتوفوا من تلات سنين وانا من ساعتها لوحدي." "مش مخطوبة؟ فيروز بخجل: "لا ياعمي لسة." وفاء: "عارفة يافيروز حبيت فيكي ايه اول ماشفتك؟ فيروز: "ايه ياطنط؟ وفاء: "حجابك." البنات بصوا لبعض. وخلود اتكلمت: "يعني احنا وحشين كدا يافوفا؟

وفاء: "لا ياحبيبتي مش وحشين انتوا ماشاء الله عليكم ملتزمين بالصلاة والدين وكل حاجة الا الحجاب. وحجاب البنت فرض وواجب في الدين الاسلامي. احنا محبناش نضغط عليكم عشان عارفين ان لازم تقتنعوا بيه الاول." شروق: "نوعدك ياماما اننا هنلبسه بس نكون مستعدين للخطوة دي." ليلى: "ربنا يهديكم يابنات." صافي: "عارفين انا كنت عاوزة البس الحجاب من زمان بس كنت مستنية اما انزل مصر الاول."

فيروز: "بصي ياصافي قبل ماتاخدي القرار تكوني عارفة كويس ان القرار دا له احكام وشروط. يعني مثلا تلتزمي بلبس الحجاب يعني شعرك مش يبان ادام اي حد ولد. يعني مثلا ادام ابن خالك لا، ابن عمك لا. عمك وخالك اه، لكن ولد غريب عنك لا. غير لو كان جوزك ومحلل ليكي." عبدالحميد سامع كلامها ومعجب بيها اوووووي وكبرت في نظره. سراج بإعجاب: "ربنا يحميكي يابنتي." وفاء: "انتي بعد كدا تيجي هنا على طول." فيروز: "حاضر ياطنط."

ليلى: "بصي يافيروز البنات وكل اللي هنا مش بيقولوا كلمة طنط دي. ممكن تقولي لينا لولا وفوفا؟ فيروز بإحراج: "لا ازاي ماينفعش طبعاً." عبدالحميد: "لا ينفع. هما اصلا مش بيحبوا كلمة طنط ولا ماما عشان مايحسوش نفسهم كبروا." وفاء: "اه. احنا لسة شباب." ايمن ضحك: "واضح." ليلى: "ماشي يا ايمن." الكل ضحك وكانوا فرحانين. *** في معرض العربيات. مهاب دخل المكتب وباسم قاعد فاتح اللاب وبيتفرج على حاجة. واول ماشاف مهاب قفل شاشة اللاب.

"انت قفلت اللاب ليه؟ باسم بتوتر: "ها..عادي لاقيتك جيت قفلت." مهاب رفع حاجبه🤨: "امممممم ياراجل." باسم: "عاوز ايه يامهاب؟ مهاب قعد: "انت بتحبها؟ باسم بتوتر: "هي مين؟ مهاب: "باسم بلاش لف ودوران وتعالى معايا دوغري." باسم اتنهد: "مش عارف يامهاب." "يعني ايه مش عارف؟ "يعني مش عارف حبي ليها دا حب اخوات ولا حب حبيب لحبيبته. صدقني مش عارف يامهاب." مهاب مسك اللاب: "طب وريني كنت بتتفرج على ايه." مهاب فتح شاشة اللاب وشاف ملف بإسم

(خلود) وفيه كل صوره. مهاب بصله: "وتقولي مش عارف حبي ليها ايه." باسم ساكت ومش بيرد. مهاب قفل اللاب وبص لباسم: "بص ياباسم اللي انا شايفه انك بتحبها حب عشاق مش حب اخوات خالص. وانت اللي بتكابر." باسم: "مش بكابر يامهاب والله. بس انا مش عاوز اقول حاجة وانا مش متأكد منها. لازم احس ان حبي ليها دا حب عشاق مش اخواتي." مهاب قام: "ماشي ياباسم." "انت رايح فين؟ "رايح الڤيلا عند بابي." "انت كنت جاي ليه؟

مهاب قرب منه: "دا معرضي على فكرة ذيك." باسم ضحك: "ياعم عارف. بس انت مش بتجي هنا غير لما اقولك تعالى ومش دايما بتيجي من نفسك." مهاب ابتسم: "كنت جاي عشان اعرف انت مخبي عني ايه." باسم ابتسم: "مقدرش اصلا اخبي حاجة عنك وانت عارف كدا كويس." مهاب: "ماشي ياسيدي وفكر وابقى قولي نويت تعمل ايه." باسم: "ماشي." مهاب خرج وركب عربيته ورجع الڤيلا عند جده. مهاب، وصل ونزل من العربية والحرس اخد منه مفتاح العربية يركنها. مهاب (الجد)

وفايز ابنه وناني وريماس قاعدين بيتكلموا. مهاب دخل: "مساء الخير." الكل: "مساء النور." ريماس قربت منه: "مهاب ممكن نخرج سوا النهاردة؟ مهاب بصلها: "مش فاضي ياريما." "مش فاضي ليه؟ "هخرج مع اصحابي." مهاب (الجد) بصله بغضب وحاول يتمالك اعصابه: "بس دي خطيبتكم." مهاب (الصغير) بصله بغضب وحاول يتمالك اعصابه: "ريماس اختي وبس." ريماس اضايقت من كلمة 'اختي' والدموع اتجمعت في عنيها: "انا طالعة اوضتي."

وبصت لمهاب: "انا اسفة يامهاب بس حتى لو كنت بتعتبرني كأخت ليك كنت على الاقل تخرج معايا." ريماس سابتهم وطلعت ومهاب حاسس انه قاسي اوي معاها وحاسس ان قلبها طيب عكس مامتها وقرر يطلع وراها يتكلم معاها. مهاب طلع عند اوضتها وخبط وهي فتحت. ريماس بإستغراب: "مهاب! "ممكن اتكلم معاكي شوية؟ "طبعا تعالى ادخل." مهاب دخل بس ساب باب الاوضة مفتوح وقعد على كرسي جمب السرير وهي على السرير. "ممكن ماتزعليش مني؟ "انا مش زعلانة منك يامهاب."

"امال ليه دموعك دي؟ "عشان بحبكم." مهاب بهدوء: "مش يمكن الحب اللي جواكي ليا دا حب اخوات وبس؟ ريماس بتهز دماغها بلأ. "بصي ياريماس، ممكن الحب دا حب اخوات ذي ما انا بحبك كأخت وانتي مش حاسة بدار؟ ريماس بحزن واضح: "بس انا عاوزة اكون معاكم." "ومين قالك اني مش معاكي. انا جمبك ومعاكي في اي وقت تحتاجيني فيه بس كأخ." ريماس زعلت وبصت في الارض: "ماشي." مهاب مضايق انها زعلانة وحب يفرحها: "مش كنتي عاوزة تخرجي؟ ريماس بصتله: "ايوه."

"طب يالا اجهزي ونخرج سوا." ريماس فرحت جدا ومهاب فرحان انها فرحت وقرر انه يقربها منهم. مهاب دخل اوضته واخد دش وغير هدومه ونزل اخد ريماس وخرج وكلم باسم قبل ماينزل من اوضته وقاله يجيب البنات النادي ويأكد على صافي انها ماتقولش ادام ريماس انها اخته. وبعد شوية مهاب وريماس وصلوا النادي، ومهاب ركن عربيته ودخلوا سوا. "خلينا قاعدين جمب ال Pool (حمام السباحة) "ماشي."

وقعدوا جمب حمام السباحة وشوية وباسم والبنات وصلوا بعد ماوصلوا فيروز بيته. باسم شاف مهاب وريماس قاعدين جمب حمام السباحة: "يالا يابنات هما قاعدين هناك اهم." راحوا عندهم ومهاب اخد باسم بعيد عنهم. "كويس انك جيت." "في ايه؟ "انا خارج غصب عني مع ريماس عشان مش عاوز ازعلها." "طب يالا نروح نقعد معاهم." مهاب وباسم قعدوا وصافي عاوزة تنزل حمام السباحة بس مش بتعرف تعوم. صافي قاعدة جمب مهاب وبتهمسله: "عاوزة انزل الـpool

(حمام السباحة) يا أبيه." "انزلي ياحبيبتي." "بس مش بعرف اعوم." مهاب ضحك: "هنزل معاكي." صافي فرحت اوي وقامت هي والبنات يلبسوا مايو اسلامي. وريماس مستغربة من قرب صافي من مهاب. "هي عندها كام سنة يامهاب؟ "١٨ سنة." "يعني في ثانوية عامة؟ "ايوه." "يعني كانت مسافرة؟ "اه وورقها اتنقل في مدرسة هنا." "اه ماشي." شوية والبنات لبسوا ومهاب وباسم غيروا هدومهم في اوضة اللبس الخاصة بالنادي ولبسوا كل واحد فيهم شورت بس.

وريماس رفضت تنزل الماية بس مضايقة من قرب صافي من مهاب؛ لأن مهاب شايل صافي في الماية عشان مش بتعرف تعوم. ريماس مسكت فونها واخدت كام صورة ليه. "انا فرحانة اوي يا أبيه." مهاب باسها: "يارب دايما ياقلب أبيه." باسم قرب منهم: "خف شوية عشان ريماس شكلها مش مطمنه." مهاب بص على ريماس وبص لباسم: "مايمهنيش." خلود وشروق جمب بعض بيتكلموا. "مش كانت فيروز جات معانا تغير جو؟ "ما انتي شفتي بنفسك رفضت ازاي."

"ماتعرفيش اخبار عن نتيجة الترم الاول؟ "المفروض انها بانت في الكنترول وهروح بكرة اشوفها." "خلاص هروح معاكي انا كمان وبالمرة اشوف نتيجتي." "خلاص ماشي ونقول لفيروز وتروح معانا." *** نيجي لڤيلا مهاب العمري. قاعد في الجنينة وبيتكلم في التليفون. "يعني هي كانت عنده النهاردة؟ "ايوا ياباشا." "تمام. انا عاوزك تتابعها واوعى تاخد بالها ان في حد ماشي وراها." "حاضر ماتقلقش."

"عاوزك كمان تعرفلي مين اللي مع مهاب الفترة دي. هو بيقول انها بنت خالته بس حاسس بحاجة غريبة." "حاضر ياباشا كل حاجة هتكون عندك خلال يومين." مهاب (الجد) خلص المكالمة وبيكلم نفسه: "ياترى مين دي يامهاب. بس مش دا المهم الوقتي. المهم هي البت اللي شغالة عند عبدالحميد." *** فيروز قاعدة في بيتها وبترن على ضياء وبيكنسل عليها. ضياء قاعد فوق ومعاه سلمى زميلته في الشغل. سلمى بدلع: "فرحت اوي لما وافقت اني اجيلك."

ضياء بيقرب منها: "قولت عشان نكون على راحتنا." سلمى بدلع اكتر: "وعشان كدا انا جيت." ضياء قرب منها وللاسف خان فيروز معاها. فيروز باردوا بترن عليه وهو مش بيرد. فيروز لنفسها: "رد بقى ياضياء. ياترى انت فوق ولا بارة." وفضلت تفكر انها تطلعله بس في الآخر قالت لا ماينفعش. شوية وتليفونها رن وكانت فاكراه ضياء بس كانت شروق. "الو ياشوشو." "جهزي نفسك بكرة عشان نروح نشوف النتيجة." "انا هكون في الشغل ابقي شوفيهالي انتي."

"لا هتيجي معايا وبعدين هستأذنلك من جدو." "لا ياشروق انا مش عاوزة كدا. وبعدين انا خايفة اروح اجيبها." "يابنتي خايفة ايه. انتي ماشاء الله عليكي كل سنة بتجيبي تقدير امتياز وبتكوني الأولى." "يارب السنادي كمان اكون كدا." "ان شاء الله." "شوفي هالي انتي ياشوشو عشان خاطري." "ماشي ياحبيبتي خلاص هشوفها انا وهقولك." "ماشي ياقلبي. انتوا لسة بارة ولا ايه؟ "ايوا. مش كنتي جيتي معانا."

"لا ياستي كدا حلو. وبعدين لو كنتي انتي وخلود وريماس كنت وافقت. لكن انتوا خارجين مع اخوكي وابن عمتك فخلاص." "خلاص احنا فيها بكرة بعد الشغل وبعد مانطمن على النتيجة نروح النادي." "ماشي موافقة." شروق خلصت مع فيروز وخلود كانت لسة في الماية هي وباسم بس بعيد عنها. وماب قاعد على كرسي حمام السباحة ومركز مع باسم. وماب بيصفرله وباسم بصله بغضب ومهاب ضحك عليه. باسم قرب منه وهو لسة في الماية: "ماتبطل رخامة ياعم انت."

"ماتروح ياعم جمبه." "لا يامهاب المرة اللي فاتت قالتلي امشي. المرادي بقى هتقولي ايه؟ "مش بقولك بتحبه." باسم بصله بغضب وكمل سباحة وقرب من خلود: "امشي ولا عاوزة تفضلي لوحدك." خلود بصتله: "لو انت عاوز تفضل افضلي." باسم قرب منها: "ليه بقيتي بعيدة من اخر مرة اتكلمتي معايا فيها؟ خلود: "بحاول احافظ على كرامتي." باسم مضايق انها زعلانة منه: "بس انا ما هنتش كرامتك ياخلود."

خلود بصتله بحزن: "لا ياباسم اهانتها من غير قصد وكمان وجعت قلبي." وسكتت شوية: "بس عادي ياباسم خلاص حصل خير." خلود خلصت كلامها وبعدت عنه وخرجت من حمام السباحة وهو واقف مكانه مضايق، وبعد شوية طلع وقعد معاهم. بعد شوية مهاب رجع ريماس الڤيلا وراح عند جده عبدالحميد في الڤيلا وقعد معاهم وكانوا فرحانين. *** في المساء. مهاب طلع اوضته واتوضى وصلى العشا وقعد يقرأ قرآن وصوته حلو جدا في تلاوة القرآن.

فيروز في بيتها خلصت صلاتها وقعدت تقرأ الورد القرآني. وشوية وجرس الباب رن، وظبطت حجابها وقامت تفتح وكان ضياء. فيروز بحزن: "لسة فاكرني." ضياء: "حقك عليا، بس كنت مشغول." فيروز: "ماشي ياضياء." ضياء: "انا كنت عاوز اقولك ان خلاص بجهز ورق السفر والاسبوع اللي جاي هسافر." فيروز دموعها نزلت غصب عنها: "يعني هتسيبني؟ ضياء: "ماقولتلك يافيروزتي انا بعمل كدا عشان." فيروز بدموع: "ليه مش عاوز تفضل هنا ونكمل بعض؟

ضياء: "قولتلك ماينفعش." فيروز بحزن كبير: "ماشي ياضياء." "هتستنيني؟ فيروز بصتله: "هو انا ليا غيرك عشان اكون لغيرك؟ ضياء بخبث: "ولا عمرك هتكوني لغيري." فيروز استغربت من كلامه بس قالت عادي وبصتله وسكتت. ضياء: "مش هتخليني اشرب معاكي شاي قبل ما اسافر؟ فيروز بصتله: "مش قولنا ماينفعش." ضياء: "مرة بس ياقلبي وبعدها هقعد سنة من غير ماتشوفيني." فيروز وافقت وبحسن نية: "ماشي."

ضياء بخبث: "لما اعرف اليوم اللي هسافر فيه، نبقى نقعد." فيروز: "ماشي ياضياء." ضياء نزل وهي دخلت وقفلت الباب وفضلت تعيط جامد عشان هتكون لوحدها. وصلت ركعتين وفضلت تدعي ربه. تاني يوم الصبح، شروق وخلود راحوا الجامعة والنتيجة ظهرت وكل واحدة فيهم نجحت بتقدير. خلود وشروق بتقدير جيد وفيروز بإمتياز (ذي كل سنة) وشروق قررت انها تروح ليها الشركة وتفرحها. بعد شوية شروق وخلود وصلوا الشركة وطلعوا.

شروق وهي عاملة زعلانة: "فيروز النتيجة ظهرت." فيروز بقلق: "انتي زعلانة ليه هي وحشة؟ شروق بفرحة: "يابنتي إمتياز طبعا ذي كل ترم." فيروز بفرحة حضنت شروق: "خضتيني حرام عليكي." "سلامتك من الخضة ياقلبي." "مبروك ياصاحبة الامتياز." فيروز ضحكت: "ايه الاسم دا." "اكتر اسم لايق عليكي." فيروز فرحانة اوي وعبدالحميد كان خارج من مكتبه واتفاجئ بالبنات. "خير يابنات؟ "نجحنا ياجدو وبتقدير كمان."

عبدالحميد بفرحة: "مبروك ياحبايبي. انتي عملتي ايه يافيروز؟ فيروز كانت لسة هترد بس خلود ردت: "دي ياجدو اسمها صاحبة الامتياز واحنا جيد." عبدالحميد بفرحة بيهم: "مبروك يابنات ويالا بينا نحتفل." الشركة كلها بتباركلهم وفرحانين بيهم. فؤاد قرب من فيروز: "مبروك يافيروز." فيروز بإبتسامة: "الله يبارك فيك يافؤاد." فيروز بعدت عن الكل ورنت على ضياء ورد عليها. "الوو." "فيروز." "ضياء انا نجحت." "مبروك ياقلبي نجحتي بتقدير؟

"اه إمتياز." "مبروك يافيروزتي." "الله يبارك فيك." فيروز خلصت المكالمة وعبدالحميد قرر انه ياخد البنات ويتغدوا سوا وكلم ريماس في الڤيلا وطلب من السواق يروح يجيبها. "عاوزين تروحوا فين؟ شروق وفيروز في صوت واحد: "مطعم 7Sky." "اشمعنا المطعم دا؟ "مكانا المفضل ياجدو." "موافق يالا." عبدالحميد اخد البنات ومشي ووصلوا المطعم وبعت السواق يجيب صافي. وبعد شوية جات. "الله ياجدو بقالنا كتير ماخرجناش كدا."

"ان شااء الله هنخرج كدا على طول." "ايه رأيك في المطعم يامستر عبدالحميد؟ "بصي بقى اسمي جدو وبس." فيروز بإحراج: "ازاي بس ماينفعش." "ها. انا مش بعيد كلامي." "حاضر ياجدو." "ايوا كدا." "انتي جميلة اوي يافيروز." فيروز بصتلها وابتسمت: "انتي اجمل ياحبيبتي." خلود ماسكة تليفونها وعاوزة تكلم باسم تقولوا انها نجحت وتفرحوا ذي كل سنة بس مترددة. وفيروز لاحظت دا. "كلميه ياخلود." "قلقانة."

"كلميه يابنتي وبعدين انتي كدا كدا بتكلميه كل سنة بعد النتيجة." خلود اقتنعت بكلام فيروز وقامت تكلم باسم في التليفون وباسم رد بسرعة. "مبروك." خلود بإستغراب: "عرفت منين؟ "كنت عندك في الكلية وعرفت." خلود بفرحة: "يعني انت كنت رايح تشوف نتيجتي؟ "ايوا. ونجحتي ذي كل سنة مبروك." خلود بفرحة: "الله يبارك فيك." باسم سامع صوت الهوا حواليها وكأنها في مكان جمب البحر: "انتي عالبحر؟ "احنا في مطعم جمب البحر والقلعة." "مع مين؟

"مع جدو والبنات." "طب اجي؟ خلود بفرحة: "تعالى." "خلاص ابعتيلي العنوان في رسالة." "حاضر." خلود قفلت مع باسم وكانت فرحانة وراحت قعدت مع جدها والبنات. "قالك ايه مفرحك كدا؟ "باسم جاي." "بجد." "اه والله." وبعد شوية باسم وصل وقعد معاهم. "ماجبتش مهاب معاك ليه؟ "رنيت عليه كتير ماردش فأكيد عامل تليفونه صامت." "اكيد في اجتماع." صافي لجدها: "جدو ممكن اتكلم معاك شوية؟ "طبعاً ياقلبي." عبدالحميد اخد ريماس ونزلوا عند البحر.

"خير ياحبيبتي؟ "عاوزة بابا يعرف بوجودي." عبدالحميد بهدوء: "مش مهاب قال نستنى شوية؟ "ايوا ياجدو بس كان نفسي يعرف اني بنته لما رحت الشركة مع مهاب نظراته ليا كلها حب وشوق وحنية." عبدالحميد: "انا عارف انه هيحبك وانه طيب وحنين ومتأكد كمان انه مستغرب الشبه اللي بينك وبين امك الله يرحمها." "ايوا ياجدو انا لاحظت كدا باردوا. حتى جدو مهاب باردوا لاقيته مستغرب وسأل مهاب عني."

عبدالحميد: "بصي ياريماس احنا نستنى شوية لحد مايجي الوقت المناسب." "ماشي ياجدو." "يالا نروح للبنات." رجعوا واتغدوا كلهم سوا وباسم بيسرق نظرات لخلود وفيروز ملاحظة دا وحست ان باسم بيحبها بس قالت انها مش هتقولها غير لما تتأكد عشان مش تديها امل عالفاضي. عدا اسبوعين والعام الدراسي التاني بدأ والبنات رجعوا الكلية. وماب لسة ماتقابلش مع فيروز ومهاب (الجد) لسة بيتابع فيروز. وضياء سفره اتأجل وهيسافر بعد اسبوع.

وفيروز خلاص معاها المرتب واخيرا صاحب البيت وافق انها تدفع الفلوس على مرتين. *** في الجامعة. شروق وفيروز قاعدين في كافيه الكلية وعندهم محاضرة بعد ساعة. "ضياء ناوي يعمل ايه؟ فيروز اتنهدت: "ولا اي حاجة. هيسافر سنة وهيجي نتجوز." "تفتكري هيوفي بوعده؟ "تصدقيني لو قولتلك اني مابقتش فارقة. انا موجودة معاه ذي مش موجودة. ساعات بيكون حلو معايا وساعات لا." "انتي بتحبيه اوي يافيروز ودا غلط."

فيروز اتنهدت واتكلمت بحزن: "اعمل ايه ياشروق غصب عني ماليش غيره وانا حبيته اوي." "عارفة بدعيلك بإيه بإن ربنا يرزقك بواحد احسن منه وارجل منه." فيروز بغضب: "بتدعي عليا يارخمة." شروق ضحكت: "دا انا بدعيلك." "ماشي يارخمة يالا ناكل عشان المحاضرة هتبتدي." نيجي لخلود قاعدة في الكلية بتاعتها في الكافيه وولد زميلها قرب منها. "صباح الخير." خلود بإبتسامة: "صباح الخير ياوائل." "قاعدة لوحدك ليه؟ "ابدا البنات قاموا يطلبوا الاكل."

"ممكن اقعد معاكوا." "اه ياابني عادي ما احنا زمايل." "لا حلو اوي اللي بيحصل داخل." خلود بصت على صاحب الصوت وكان باسم. خلود بفرحة: "باسم." باسم بغضب وبيبص لوائل: "دا مين؟ خلود: "دا وائل زميلي." "انا وائل الشهاوي زميل خلود." باسم بيضغط على سنانه: "اهلا." وائل استأذن ومشي وباسم واقف بغضب ومضايق. "انت ازاى تسمحيله يقعد معاكي؟ خلود بإستغراب: "وفيها ايه يعني دا زميلي." "يعني انتي شايفاها عادي؟ "اها عادي."

"ماشي عالعموم انا كنت جايلك عشان جبتلك الجدول بتاعك." خرج ورقة من جيبه: "اهو." خلود اخدت الجدول منه وسابها ومشي. خلود مستغربة من تصرفاته بس قالت عادي دا حب اخوات وقعدت وبعد شوية دخلت المحاضرة. نرجع لفيروز وشروق خلصوا المحاضرة والمعيد الجديد نده على فيروز. "ايوا يادكتور." "انت فيروز الاولى على الدفعة مش كدا؟ "اها." "ماشاء الله عليكي. وان شااء الله ليكي مستقبل كويس." "شكرا اوي لحضرتك." "ربنا يوفقك." "يارب." (دكتور

احمد: معيد جديد عنده ٢٥ سنة كان متفوق في دراسته وعشان كدا بقى معيد اول ماتخرج على طول، شاب محترم جدا وعيونه خضرا وشعره بني غامق وبشرته بيضا، وطويل.) احمد مشي وشروق بتغمز لفيروز. "شكله وقع." "بس يارخمة هو يعني قالي ايه." "اممممم مش يمكن هو عمل حجة الامتياز دي وانك الاولى عالدفعة في التلات السنين اللي فاتوا عشان يفتح كلام معاكي." "بس ياماما ويالا عشان هروح الشركة." فيروز راحت الشركة وفؤاد شافها. "فيروز."

"في حاجة يافؤاد؟ "كنت عاوز اسألك عن يومك النهاردة في الجامعة كان عامل ازاي؟ "كان حلو اوي الحمدلله." "يارب دايما يارب. لو احتاجتي اي حاجة انا موجود." "شكرا يافؤاد ربنا يخليك." فيروز دخلت لعبدالحميد: "مساء الخير." "مساء الورد." فيروز ابتسمت: "جاهز عشان الاجتماع كمان نص ساعة." "اه جاهز بس قلقان." "طول ماحضرتك معاك الحق ماتقلقش. وبعدين اللي اسمه مهاب العمري دي تلاقيه كان بيهدد بس بالكلام وخلاص."

عبدالحميد بتنهيدة: "مهاب طلاما صمم انه ياخد المناقصة يبقى هياخدها." "بس هو محاولش يعمل حاجة تانية من ساعة اخر مرة لما طلب مني الملف." "دا اللي قالقني لان انا اكتر واحد عارفه." "سلم امرك لله ياجدو." عبدالحميد ابتسم: "بحب كلامك اوي ليا وانك بتطمنيني." فيروز ابتسمت: "انا اللي بحبك اوي بجد وبحمد ربنا على حضرتك وانك اعتبرتني ذي احفادك." "انتي بنت طيبة ومحترمة وعشان كدا اعتبرتك حفيدتي." مهاب خبط ودخل وهما قاعدين يتكلموا.

"حبيبي تعالى." مهاب دخل وهو مضايق وما اخدش باله من فيروز: "بص عشان انا اتخنقت اللي اسمه مهاب دا انا زهقت منه." عبدالحميد بص لفيروز: "اطلبي واحد ليمون يافيروز وسبينا شوية." "حاضر." فيروز خرجت وسابتهم ومهاب قاعد مضايق. "ممكن تهدى وتقولي ايه حصل؟ مهاب بغضب: "كل اما يشوفني يقولي عاوزك تتجوز." "عنده حق." "جدو والنبي بلاش كدا." "ليه بس يامهاب، انا فعلا عاوز افرح بيكم." مهاب وقف: "انا همشي احسن."

"اقعد يامهاب انا بتكلم معاك مش بتخانق." "اقعد ليه ياجدو عشان اسمع نفس الكلام اللي هو بيقولوا؟ "لا يامهاب انا مش هقولك ذيه بس عاوزك تشوف نفسك وحياتك. انت مقضي كل وقتك شغل وبس." "يعني ياجدو انا لاقيت البنت اللي تخطف قلبي وقولت لاعبدالحميد." "والله هتلاقيها ان شاء الله." "يبقى خلاص لما الاقيها هتجوز." "ماشي ياحبيبي." شوية والساعي دخل بالليمون. "اشرب الليمون وروق دمك." "هو اللي يعيش مع مهاب يشوف روقان."

"باردوا مش ناوي تقوله ياجدو." "لا يعني لا." "ماشي يامهاب." الاسبوع عدا خلاص وضياء هيسافر بكرة، لبس ونزل لفيروز رن جرس الباب وهي فتحت. "مسائو." فيروز بإبتسامة هادية: "مساء الخير." "ها هتسبيني واقف عالباب كدا؟ فيروز سمحتله يدخل: "ادخل." ضياء دخل وقعد في البلكونة وفيروز عملت الشاي. "فيروزتي هاتيلي كوباية ماية." "حاضر." فيروز دخلت تجيب الماية وبعد شوية خرجت وقعدت مع ضياء وبيشربوا الشاي وفضلوا سهرانين سوا.

نيجي لمهاب سهران في الجنينة لوحده وصافي جات قعدت جمبه. "مالك يا أبيه؟ "مافيش ياقلبي. قوليلى عاملة ايه في مذاكرتك؟ "الحمدلله والمدرسين هنا كويسين اوي." "ذاكري كويس عشان تجيبي مجموع كويس." "حاضر ويالا عشان تطلع تنام." مهاب ابتسم: "ماشي." تاني يوم الصبح، عند فيروز صحيت من النوم وكانت الصدمة.