رواية حنين الليل الفصل الرابع عشر 14 - بقلم أميرة رمضان

انتي رايحة فين؟ أنا مش قولت مفيش طلوع. مليكة: وأنا قولت يا تعملهم أنت يا أعملهم أنا، خلينا نخلص. سليم بصوت عالي: أنا مش بحب الكلام الكتير، هاتي المنفضة. مليكة بضحك: أحلى منفضة لأحلى سولي. سليم: فرحانة عشان دبستيني، هاتي منك لله. مليكة: ههههههه، كل سنة وأنت طيب، عيش بقى مع السجاد. سليم بغمزة قال بصوت واطي: عقبال السنة الجاية أما أنفض سجادنا. مليكة بصدمة ممزوجة بفرحة: بـ بـ بتقول إيه؟

سليم بحب: إيه الرقة دي، اللهم أنت صايم. وطلع البلكونة، ومليكة واقفة مصدومة مكانها. *** دنيا: كارما كفاية عليكي كده، وأنا هكمل، اطلعي ريحي شوية. كارما: الشغل كتير عليكي لوحدك، أنا هساعدك ونخلصوا مع بعض. دنيا: لا لا، سيبي اللي في إيدك، قلت لك. سعدية دخلت المطبخ: انتوا بتتعازموا على إيه؟ وبعدين يا ست دنيا أنا اللي أقول مين يطلع ومين يقعد، مش أنتِ. كارما: والله هي عندها نظر وشايفة إني تعبانة عشان كده قالت لي أرتاح.

سعدية: تعبانة إيه؟ محسساني إنك أول واحدة تحملي، ما إحنا كنا حوامل يا أختي وكنا بنشتغل ويطلع عنينا، وكان عادي. كارما: دانتي بقى، لكن أنا محدش يقدر يطلع عيني. سعدية: إنتي بت قليلة الأدب وأنا هخلي ابني يربيكي، الله يجازي اللي وقعنا فيكي. كارما: أنا محترمة غصب عنك وعن أي حد. ميس: إنتي بتردي على خالتك كده ليه؟ احترمي نفسك. كارما: شوفي مين اللي بتتكلم عن الاحترام.

ميس بتقرب من كارما: إنتي واحدة قليلة الأدب وأنا اللي هربيكي. وقربت من كارما زقتها قوي وكانت هتقع بس دنيا سندتها. دنيا: إنتي اتجننتي؟ كنتي هتوقعيها! ميس: كان هيبقى أحسن. كارما بخوف على ابنها: أنا طالعة شقتي. وسابتهم وطلعت على طول. دنيا: الله يسامحكم، لازم تنكدوا علينا في أيام العيد. *** حيدر: إنتي يا بت واقفة كده ليه؟ مليكة واقفة سرحانة. حيدر: يا بااااات. مليكة بخضة: إيه؟ حيدر: إيه مالك واقفة زي الصنم كده ليه؟

هو الصيام ماثر عليكي لدرجادي؟ سليم طلع من البلكونة: خلصت أهو، منك لله. حيدر بضحك: إيه يا سوسن؟ إنتي اللي كنتي بتنفضي السجاد يا بيضة؟ سليم: إحنا مش هنخلص بقى من التحفيل ده. ندي طلعت من المطبخ: سوسن مين يا ولا؟ إياك تجيب اسم جدتك على لسانك. مليكة: أوووه، لقد وقعت في الفخ. حيدر: هي هتيجي على دماغي أنا في الآخر ولا إيه؟ سليم: أحسن من أعمالكم سلطت عليكم. حيدر: طب سلام أنا داخل أكمل نوم، يا ريتني ما طلعت.

ندي: خليك افطر معانا يا سليم انهارده. سليم: والله يا ريت بس انتي عارفة أمي هـ*ـتـ*ـقـ*ـتـ*ـلـ*ـنـ*ـي لو فطرت برا انهارده بالذات، دي عاملة حظر لمالك ومراته وأولاده، بس أنا هربت منها. ندي: ربنا يخليهالكم ويبارك فيها. ودخلت تشوف الأكل. سليم: حلو كده السجاد ولا عايز يتنفض تاني؟ مليكة بكسوف: لأ حلو. سليم بمشاكسة: مالك وشك أحمر كده ليه؟ إنتي عيانة؟ مليكة بكسوف أكتر: آه عيانة. وسابته وجرت على أوضتها، وسليم ضحك عليها. ***

بعد ساعة في المطبخ. حنين: طنط حلو كده البشاميل ولا أخليه على النار شوية؟ سندس: خليه بس دقيقتين كمان عشان قوامه يكون كريمي، بس إيه الشطارة دي؟ نفسك في الأكل حلو زي مامتك. حنين بفرحة: بجد حلو. ميرا: مالك مبسوطة كده ليه؟ كل ده عشان عملتي البشاميل، اومال لو عملتي المكرونة كلها هتعملي فينا إيه؟ حنين: وانتي مالك يا حقودة؟ ميرا: أنا بقول رأيي، ولا يعني كله بيجي عند كلمتي ويزعل؟ حنين: طب إنتي عملتي إيه بقى من ساعة ما قعدتي؟

ميرا: فرمت الطماطم وتعبت، قعدت أريح شوية. ماريا: يالهووووي الكوسة اتخرمت برضه. خديجة: يختااااي! هو إنتوا هتتعلموا إمتى؟ مفيش واحدة عملتوها سليمة، كله مشوهاها كده. ماريا: هو العيب في الكوسة بتتخرم بسرعة. خديجة: تصدقي فعلا العيب في الكوسة، اطلعي يا بت من هنا بدل ما أخبطك بالسكينة دي. ماريا: طب والله إنتي عملتي الصح. جنه: خوديني معاكي. خديجة: اقعدي يا بت واتعلمي، مش كفاية عليا الفاشلة بنت الفاشلة دي.

ماريا بضحك وهي برا: شكرااا يا ديداااا. عز: بتكلمي نفسك؟ ماريا مردتش عليه. عز: أها، إنتي لسه زعلانة؟ على فكرة انهارده يوم عرفة ومينفعش حد يكون زعلان من حد. ماريا: والله خدت بالك إن انهارده يوم عرفة، وماخدتش بالك من كلامك اللي زعلني. عز: على فكرة أنا خايف عليكي منهم بجد. ماريا: وإنت مش هتعرف تحميني؟ عز بص لها وقال: أنا أفديكي بعمري وإنتي عارفة كده، بس مش هسيبك ترمي نفسك في النار وأقف أتفرج.

ماريا: أنا عملت كده عشانك، عايزة أساعدك وخلاص، مش هسيبهم يتحكموا فيك، لو على الفلوس أمرها سهل، لكن هما مش هيسكتوا وهيمسكوا عليكِ زلة، وكل شوية يطلبوا منك حاجات. عز: منا برضه قولت كده عشان كده مردتش أدفع لهم، بس ليه بلغتِ عنهم، بالذات في الوقت ده؟ ماريا: رغم إنه مش بيطمر فيك، بس أنا رحت للبنت اللي أنت خبطها بالعربية واتكلمت معاها. عز بصدمة: رحتي لميييين؟ إنتي اتجننتي؟ ماريا: إنت برضه هتتعصب عليا؟

عز: أنا مش حكيت لك وقولت لك متقوليش لحد، رايحة لها بنفسك؟ ماريا: أنا معملتش حاجة غلط، ده الصح وكان لازم يحصل، واتصرفت، ولما رحت أكلمها مكنش الوقت مناسب، كنا عايزين شوية وقت كمان، عشان كده بلغت عن أصحابك، أهو على الأقل ياخدوا فترة بعيد عن دماغنا، وأكون عرفت أكلم البنت وأقنعها إن مكنش قصدك، وباين عليها طيبة وهتسامحك والموضوع يعدي. عز: ومين قالك إنها هتمشي ببساطة زي ما إنتي مفكرة كده؟

ماريا بعصبية: على الأقل أنا فكرت واتصرفت، تقدر تقولي إنت بقا عملت إيه؟ من وقت اللي حصل وإنت واقف مكانك سر، مستني في أي وقت لما تلاقي البوليس جاي يقبض عليك أو أصحابك يتحكموا فيك، شاطر بس تقعد تغلطني. عز: قصدك إيه؟ ماريا: مقصدش حاجة، عن إذنك. عز تنهد بغضب، وسليم جه وقف قدامه. سليم: عندها حق في كل كلمة قالتها. عز: سليم إنت متعرفش حاجة. سليم: وإيه بقا اللي أنا معرفوش؟ منا عرفت منها بدل ما كنت أنت اللي قولتلي.

عز: أنا دماغي مش فيا اليومين دول، وربنا، وهي ضغطتني أكتر باللي عملته، أنا مقولتش تصرفاتها غلط، بس هي مكنش ينفع تعرض نفسها للخطر كده، والله أنا خايف عليها. سليم: طب تعالا نقعد كده ونشوف الحوار ده عايز مننا إيه. *** عمر: تعالي ننزل نفطر. كارما: لأ مش هنزل، هفطر هنا. عمر: ليه؟ في حاجة؟ كارما: لأ عادي، مش قادرة أنزل. عمر: إنتي تعبانة؟ كارما: شوية. عمر: طب تعالي ننزل. العيلة كلها متجمعة، مينفعش نقول لأ مش هننزل.

كارما بعصبية: يوووه، قلت مش هنزل. عمر: مالك يا كارما؟ إنتي مصرة إنك تصغريني قدامهم وخلاص. كارما: انزل إنت، لكن أنا لأ. عمر: في حد زعلك صح؟ كارما: أنا اتخانقت مع مامتك كالعادة، بس المرادي ميس اتدخلت. وقالت ببكاء: وكانت هتقعني، بس ربنا ستر، ودنيا سندتني. عمر بغضب: اااي! هي اتجننت دي؟ يومها مش معدي. وقام عشان ينزلها بس كارما مسكت إيده. كارما: إنت رايح فين؟ عمر: نازل أعلّمها الأدب.

كارما: عمر، اهدي يا حبيبي، أنا حكيت لك عشان إنت عايز تعرف اللي حصل، لكن بالله عليك خلي العيد يعدي على خير، مش عايزة مشاكل، وبذات مع ميس. عمر: إنتي خوفتي منها؟ كارما ببكاء: أيوا خوفت، خوفت على ابني، أنا مكنتش بخاف وبجيب حقي منها في وقتها، بس حالياً بقيت خايفة ومرعوبة منها. عمر حضنها وقال: متقلقيش، طول ما أنا موجود محدش يقدر يعمل لك حاجة. كارما: ابعد، هو الحضن عجبك ولا إيه؟ عمر: اه عجبني أوووي ومش هبعد عشان واحشني.

كارما: عمررر! انزل افطر، أنا لسه عندي شغل في الشقة. عمر: قلب عمر، طب تعالي أنا وإنتي ننزل ناكل لقمة خفيفة ونطلع نخلص الشقة مع بعض. كارما بفرحة: بجد هتعمل الشقة؟ عمر: مالك يا بت فرحتي أوي كده ليه؟ وبعدين أنا قلت نعملها مش أعملها، طيرتي حرف النون في ثانية، منك لله. كارما: هههههههه، لازم يطير حد، يلاقي الدلع وما يتدلعش، يخليك ليا يا عمرررري. عمر: بت رايحة فين؟ أنا قلت أنا وإنتي. بت خدي هنااااا.