رواية قبل تنفيذ الاعدام بدقائق الفصل السادس 6 - بقلم عادل عبد الله

سافرت أوروبا لوحدي مع ماجد المدير المالي للشركة. ورغم إن ماجد كان إنسان منفصل، لكن كان بيتعامل معايا بمنتهى الاحترام. لكن أثناء سفرنا اللي استمر أسبوعين، اتكلمنا كتير مع بعض ولقيت نفسي بحكي له على مشكلتي مع بناتي. لقيت ماجد بينصحني إني أتطلق من جوزي وإننا نتجوز أنا وهو! خصوصًا إن البنات مامتي اللي بتربيهم! وقالي إنه معجب بيا من أول ما شافني، لكن كان مداري إعجابه لأنه عارف إني متجوزة وعندي أطفال!

لكن دلوقتي لما حكيت ظروفي مع أطفالي، وخصوصًا إنه عارف إعاقة جوزي، فالأفضل إني أنفصل عنه ونتجوز. فضل يوعدني إنه هيسعدني وهيلبي لي كل طلباتي وهيخليني أسعد واحدة في الدنيا. كان ردي عليه إني بحب جوزي حب شديد وعمري ما أفكر أسيبه أبدًا. عرضت التقارير الطبية لحالة علاء على الأطباء هناك، وكان الرد إن الحالة ممكن تتعالج لكن هتحتاج لملايين كتير مش معانا دلوقتي. خلصت شغلي ورجعت واشتريت هدايا كتير لعلاء وللبنات ولماما.

عرفت علاء بأن حالته ممكن تتعالج لكن لازم نستنى لغاية لما نكمل المبلغ المطلوب للعملية. رجعت شغلي وعدى كام يوم والأمور ماشية طبيعية جدًا، لغاية ما في يوم اتصلت على علاء لكن تليفونه كان مشغول. فضلت أتصل عليه كتير وتليفونه مشغول لدرجة إني معرفتش أكلمه! كنت في طريقي للبيت عديت على الشركة، وأنا زعلانة علشان تليفونه كان مشغول لوقت طويل. لما وصلت الشركة لقيته مش موجود، ولما سألت عنه موظف في الشركة رد وقالي: "إزاي يا هانم؟

ده أستاذ علاء بيفضل يكلم حضرتك طول النهار كل يوم! كلام الموظف كان صدمة ليا! وفضلت أفكر: علاء بيكلم مين كل يوم طول النهار؟ معقول علاء بيعرف واحدة غيري؟ مش ممكن أبدًا! بعد كل الحب اللي بينا ده؟ إزاي يجيله قلب يعمل كده؟ بعد كل اللي عملته علشانه؟ ده أنا وقفت جنبه وضيعت وقتي ومجهودي وفلوسي علشانه! ولما فكر بس إنه يعمل مشروع عملتله المشروع بفلوسي وكتبته باسمه! وكمان اشتريت له عربية باسمه بفلوسي!

ده أنا حياتي كلها ضيعتها علشان أرضيه وأعوضه عن اللي حصله ونسيت نفسي علشان أفتكره هو! يبقى في الآخر هو ده جزائي؟ فضلت أفكر كتير لحد ما وصلت البيت، لكن قولت لنفسي بلاش تظلميه لحد ما تتأكدي، يمكن تكوني فاهمة غلط! لازم أتأكد الأول.