رواية قبل تنفيذ الاعدام بدقائق الفصل الخامس 5 - بقلم عادل عبد الله

علاء قالي إنه بيفكر يعمل شغل خاص لنا بدل ما يشتغل عند حد. عجبتني أوي الفكرة خصوصًا إنها هتكون فرصة لعلاء إنه يرجع للحياة تاني، وكنت عايزاه يبقى في وضع كويس أوي يعوضه عن اللي فات. جمعت الفلوس اللي معايا وعملتله شركة كويسة، وكتبنا كل أوراق الشركة باسمه، واشتريت له عربية باسمه أحسن من اللي معايا علشان يكون مالي مركزه في شركتنا.

لما علاء خرج واشتغل وبدأ يتعامل مع الناس تاني، كنت بغير عليه أوي، لكن لأنه بطل يغير عليا زي الأول، كنت بداري غيرتي عليه. كنت مستغربة جدًا إنه بطل يغير عليا رغم إن لبسي اتغير كتير، وأصبحت بتعامل مع ناس كتير عكس الأول. ومش هخبي إني كنت بتعاكس كتير لدرجة إني فكرت كذا مرة إني أسيب الشغل وأقعد في البيت، لكن مرتبي الضخم كان دايمًا بيحفزني إني أكمل.

بناتي بدأت تكبر، وكنت بدي لماما فلوس كتير تشتريهم كل اللي نفسهم فيه، وكنت سعيدة أوي بحبهم الزائد لماما، وكنت ببقى سعيدة أوي لما أسمعهم بيقولولها يا ماما. كنت حاسة إن ماما تعبت معايا أوي في تربية البنات، فكنت بديها مبلغ كبير كل شهر يكفيها ويكفي البنتين في كل مصاريفهم وزيادة. عمري ما عملت حساب للفلوس، وكنت عايزة كل اللي حواليا يكونوا سعدا. لكن لاحظت إن البنات لما كانوا بيرجعوا البيت بيكونوا عايزين يرجعوا تاني عند ماما.

حاولت أقرب منهم علشان أعرف السبب، لكن للأسف اكتشفت إن حصلت فجوة كبيرة بيني وبين بناتي! بناتي بقوا يحبوا ماما أكتر مني، وبيعتبروها إنها هي أمهم مش أنا! مش بس كده، ده كمان أنا تقريبًا بقيت مش موجودة في حياتهم! كنت مصدومة من الفجوة اللي حصلت بيني وبين بناتي، وكنت مش عارفة أعمل إيه وأقربلهم إزاي؟

استنيت علاء لما رجع من شغله، وكان البنات نايمين، وكلمته وقولتله إني أنا حاسة إن بناتي ضاعوا مني، وإني بقيت مش موجودة في حياتهم نهائي! علاء ضحك وحاول يطمني وقالي إني أنا مكبرة الموضوع زيادة عن اللزوم، وإن حب البنات لماما مش هيقلل من حبهم ليا أبدًا، لكن علشان هما لسه صغيرين بيتعلقوا أكتر باللي بيقعد معاهم ويلعب معاهم كتير، إنما حبهم ليا عمره ما هيقل.

بعد كده جالي سفر لأوروبا علشان أخلص شغل للشركة، طلبت من علاء إنه يسافر معايا منها للفسحة، وفي نفس الوقت يعرض حالته على الأطباء بره، يمكن يكون له عملية تعالج الإعاقة اللي في رجله وترجعه سليم، لكن علاء قالي إنه مش هيقدر يسيب الشركة.