رواية قدري الفصل السابع 7 - بقلم رحاب محمد

فهد دخل جوه الفيلا لقاها طلعت فوق. بص لـ جدته اللي بصتله بعتاب ومتكلمتش. فهد طلع على فوق ودخل أوضتها من غير ما يخبط. لقاها منهارة من البكاء. فهد بتردد طبطب عليها. زقت قدر إيده بضعف: شكراً إنك بينتلي حقيقتي وإني زي أي بنت بالنسبالك. وكمان إنك مش بتطيقني. يا خسارة يا فهد. فهد عيونه اتملت بالدموع ودموعه على وشك النزول. لسه هينطق اسمها. قامت من على السرير وخرجت بره وبتسرع خطواتها. وراها فهد. فهد: قدر قدر رايحة فين؟

قدر نزلت تحت. كان مراد وخديجة قاعدين. قدر وجهت كلامها لـ خديجة وادتها نظرة بمعنى كل شيء انتهى. قدر: شكراً يا تيتة على وقفتك جنبي وحبك ليا وكأني حفيدة بجد أو من عيلتك. وعاملتيني معاملة كويسة وكنتي بتحبيني حب محدش ادّاهوني قبل كده. بصت لـ فهد وكملت كلامها: أنتي الوحيدة اللي وثقتي فيا وفهمتيني بجد. بصت لـ مراد:

وأنت يا مراد أكتر حد سندني ووقف جنبي وعرفني يعني إيه يبقى ليا ضهر في الدنيا. أنت اللي عرفتني يعني إيه ضحك ومرح وإني أرمي كل همومي ورايا وربنا هيحلها. بصت لـ فهد: أما أنت فـ مش لاقية حاجة أشكرك عليها غير حاجة واحدة بس. إنك جبتني هنا وعرفتني على أهم وأحسن شخصين في حياتي. بس للأسف علاقتنا مش هتدوم. جبتني هنا وجمعتني بيهم بسببك وبرضه همشي من هنا وهتفرق عنهم بسببك. لفت ضهرها ولسه هتمشي. بصتله تاني وقالت:

واه صح. أنا ومراد مكنتش هنتخطب ولا هنتجوز. مراد أخويا وأكتر من أخ. ده اللي عندي واللي هقولهولك. بصت لـ مراد وخديجة: ارجوكم لو بتحبوني بجد هطلب طلب واحد قبل ما أمشي. محدش يقوله سبب اللي خلاني أكدب الكدبة دي. أنا ومراد. ارجوكم. لفت ضهرها ومشيت. مقدروش يحوشوها ولا فهد لأنه كان تحت تأثير صدمة نزلت عليه زي الصاعقة. إزاي مكنوش هيتجوزوا وإيه معنى كلامها ده وليه ميقلولوش. فاق من صدمته وطلع يجري وراها بأقصى سرعته.

هي جريت جامد لحد ما وصلت على الطريق وعربيات رايحة وجاية. بتجري ووراها فهد. فهد: قدر استني أرجوكي هفهمك. قدرررررر. صرخ باسمها لما شاحنة كبيرة جت وخبطتها بقوة. وقعت قدر غرقانة في دمها وبتنزف من كل أنحاء جسدها. ساكنة بلا حركة. حواليها دائرة من الأشخاص ينظرون إليها بشفقة. واحد يقول: لا حول ولا قوة إلا بالله. خبطها وجري منه لله. غيره بيقول: اطلبوا الإسعاف.

مراد كان طلع يجري وراهم لحد ما وصل وشاف ناس ملفوفة حوالين بعض وفي حد في النص وفهد واقف مبرق وباصص ناحية الناس دي. قرب مراد بإيد مرتجفة وبيزق الناس. أول ما شاف قدر شهق جامد. راح ناحية فهد وفضل يزق فيه يمين وشمال عشان يفوق. وعرف إن جاتله الحالة. فهد من صغره بسبب حادثة حصلتله أي حد بيحبه أو متعلق بيه حصله حاجة بيفضل متسمر مكانه وإيده بترتعش ووشه بيصفر. مفُاقش غير لما لقى قلم نازل على وشه من مراد. خلاه يفوق.

أول ما فاق جري على قدر. شالها ودموعه نازلة. جري على عربيته. حطها ورا وقعد جنبها ومراد بيسوق. فهد حاضن راسها وبيـبكي بشدة: ق قدر ارجوكي قومي عشان خاطري قومي. قومي ومش هأذيكي وهسيبك براحتك بس اطمن إنك بخير. قومي يا قدر يلا بسرعة. هههه يا مراد. سرّع مراد أكتر لحد ما وصلوا المستشفى. دخل فهد وهو شايلها وبيصرخ: عايز دكتورة يا بهايمممم. جت ممرضة ودكتور ومعاهم الترولي. فهد: عاااايز دكتورة مش دكتور هااا. الدكتور:

حضرتك حالتها خطر مينفعش نستنى. فهد: اللي قلتلك عليه يتعمل. جت دكتورة وهي بتجري خوفاً منه وخدوا قدر ودخلوا أوضة العمليات. فهد قعد على الأرض وضم رجله على جسمه ودموعه نازلة. ومراد واقف جنب أوضة العمليات بيدعي إنها تبقى بخير. فهد وقف مكانه والغضب متملك منه. اتصل بشخص في التلفون وقال بصوت يرعب: العربية بالسواق ييجوا على مخزن المعادي بكرة الصبح وإلا اعتبر نفسك ميت. راجع كاميرات الشارع وهاته. قفل في وشه.

عدى ساعة واتنين وتلاتة. بعد تلت ساعات ونص خرجت الدكتورة وعلى ملامحها الإرهاق. وقف فهد ومراد بسرعة. اتكلم فهد بالهفة: خير يا دكتورة؟ الدكتورة:

حالياً إحنا تخطينا مرحلة الخطر. كانت حياتها في خطر لو اتأخرتوا دقيقة كمان. أربع ساعات وهتـفوق من البنج. واضح جداً إن جسمها ضعيف وده زود الخدوش والكسور اللي في جسمها. عندها ضلع مكسور وشوية كدمات في جسمها وفي وشها. ولو عدى الأربع ساعات دول وفـاقت فاكركم أو حتى عارفة حد منكم يبقى خير. لكن... فهد بقلق: لكن إيه؟ الدكتورة:

لكن لو مفتكرتش يبقى جالها فقدان ذاكرة مؤقت من أثر الخبطة. هتفوق منه بعد يوم أسبوع شهر سنة. دي بقا من عند ربنا. عن إذنكم. فهد اتصدم من كلامها. جدّاً. مراد: متسبقش الأحداث يا فهد. بإذن الله هتفوق فاكرانا وكله هيعدي. بعد خمس ساعات جت الممرضة وقالت: المريضة فاقت. دخل مراد وفهد بسرعة على أوضة قدر اللي كانت باصة في نقطة بشرود. فهد: ق قدر أنتي كويسة؟ بصتله قدر واترسم على وشها علامات استفهام: انتو مين؟