رواية خادمة قلبي الفصل التاسع والأربعون 49 - بقلم زهرة عصام

رهف بسرعة صدمته و قالت: تجي نتجوز بالسر؟ حازم إتصدم من كلامها و قال: إنتي بتقولي إيه؟ رهف بصت في التليفون و حطت ايديها على بوقها و قالت في نفسها: أقسم بالله ما شفت أغبي مني. حطت التليفون على ودنها تاني و قالت: دا كان توكتوك معدي يا سعادة البيه المدير متاخدش في بالك إنت عارف إني هبلة. زفر حازم براحة و قال: اممممم هبلة؟ طب يا هبلة هانم متصلة دلوقتي ليه؟ رهف بسرعة: برازي فيك. لحظة إستوعبت اللي قالته و كملت بضحكة متوترة:

قصدي بطمن على الوضع عندك تقولك إقفل دلوقتي و هبقي أكلمك تاني أصل الماية جت و هدخل أخد شاور. قفلت الخط و هي بتقول: الله يرحم أمك يا رهف قال شاور قال ماله الكلام بتاعنا دا ماله هدخل استحمي لحسن دا أنا ريحتي بقت تقرف من كتر التنضيف و التراب اللي مغطي أمي. حازم بص لـ ملوك و قال: البت دي حاجة من الاتنين يا إما عبيطة يا إما عبيطة. ملوك ضحكت و هزت رأسها بإيجاب فـ حازم قال: أيوة صح أنا كنت عارف هي عبيطة. تعالي نشوف ملك يلا.

*** منال وصلت أوضة ملك و لقت مالك و وليد بره لسه هتتكلم سمعت صراخ ملك و هي بتقول: ولاااااااادي. منال جريت على الأوضة و دخلت لقت ملك قاعدة و ظهرها على الحيطة و رأسها لورا و حاطة ايديها على بطنها و بتصرخ. منال جريت عليها و أخدتها في حضنها و هي بتقول: بس يا حبيبتي متعمليش في نفسك كدا عشان خاطري و خاطر ملوك. ملك بصت ليها و قالت بانهيار: ابني يا أمي إبني راح. يا ريتني كنت أنا و هو لا يا ربي. منال باست على رأسها و قالت:

ربنا يعوض عليكي يا حبيبتي أهدي عشان خاطر صحتك اهدي يا ملك. مالك كان واقف على الباب و باصص عليها و دموعه بتنزل بصمت. عاوز يدخل يخدها في حضنه بس رجليه متخشبة مش قادر يتحرك. وليد حط ايده على كتفه و همس قائلا: هتبقي كويسة يا مالك. صدمة خسارة ابنها مش سهلة برضوا. دا غير كلامك اللي زي السم اللي سمعته منك و أنا عارفك لما بتتغابي و تلغي عقلك و تفكيرك.

مالك كان باصص عليها هو مش متخيل إن الأمور وصلت لكدا بينهم. و أنه حتي مش قادر يدخل ياخدها في حضنه. بص عليها و هي بتبكي في حضن أمها و عيونه بتنزل دموع لوحدها من غير حتى ما يبكي. سمع جملتها اللي قطعت قلبه: ملك: لي يا أمي كدا؟ لي ربنا بيختبرني في ولادي؟ كان ممكن ياخدني بس ولادي يفضلوا بسلام. منال بصت ليها بحدة و قالت: إنتي من إمتي ضعيفة كدا؟

لا يا بنت منال انتي أقوي من كدا و هتعدي كل دا. هما يومين اللي هسمحلك فيه تبكي غير كدا وربنا لكون ضرباكي بالشبشب يا ملك عشان تفوقي لنفسك. هتكفري و انتي قاعدة يا بنت الصرمة. مالك مستحملش يشوفها كدا خرج جري و وليد وراه. حازم قابلهم في الطريق بس سابهم و دخل لـ ملك اللي أول ما شافت ملوك فتحت اديها و ملوك راحت ليها. ملك بقت حاضنة ملوك و بتعيط و حازم بص عليها بأسف و انسحب بهدوء علشان يسيب لـ ملك المساحة الكافية ليهم.

بمجرد ما حازم قفل الباب منال بصت لـ ملك و قالت بسخرية: هقدملك في برنامج الدوم لاكتشاف المواهب الشابة. ملك مسحت دموعها و قالت بتذمر: جري إيه يا منال ما تسيبي الواحد يعيش الدور. مش إنتي اللي قولتيلي أعمل كدا؟ منال بصت ليها بغيظ و قالت: تعيشي الدور إيه يا فنانة دا خمسة و كنت هصدقك. دا الواد عيط يا جاحدة بقولك مثلي مش طلعي مواهب أمك المدفونة. لو حد كان ركز معاكي يا بنت الصرمة كنتي إتكشفتي. ملك بتذمر و طفولة:

إيه يا منال مش إنتي اللي قولتي للدكتور يقولي أقول إن البيبي مات و أنهار و نفسيتي تتعب عملت اللي قولتي عليه أهو. منال بسخرية: و الصراحة إنتي ما صدقتي الفرصة تجيلك و تبدئي موهبتك اللي انتي بتموتي فيها صح؟ ملك بغيظ: أيوة يختي أنا كان طموحي أبقي ممثلة بس إنتوا إللي دفنتوا موهبتي و دلوقتي جه الوقت إنها تطلع للنور. و بصت لـ ملوك و قالت بحنان: إنتي كويسة يا قلب ماما؟ ملوك هزت رأسها بإيجاب و حضنتها. ملك بصت لـ منال و قالت:

ودتيها لدكتور يا ماما قالك إيه؟ منال بلعت ريقها عشان عارفه إني ملك تستحمل أي حاجة إلا إن ملوك تزعل فقالت بهدوء: شوية و هترجع تتكلم تاني محتاجة شوية اهتمام بس. ملك هزت رأسها بإيجاب و باست على راس ملوك و شدها من حضنها و قالت: قوليلي يا منال إنتي عملتي دا كله إزاي؟ منال ابتسمت بخبث و قالت: أول ما خدوكي العمليات دخلت للدكتور في الخباثة و طبعًا كله كان مشغول فمحدش ركز معايا. فلاش باك. منال بصت للدكتور و قالت:

بنتي يا دكتور عاملة إيه؟ الدكتور بصلها و قال: هي كويسة جدا على فكرة عندها نزيف بسيط بسبب الضغط النفسي غير كدا هي كويسة و دا علاجه حاجة بسيطة و سهل جدا. منال بتفهم: حلو أوي دلوقتي المنيل على عينه جوزها هو السبب في الضغط النفسي دا و أنا الصراحة عاوزة اربيعه شوية فهطلب منك خدمة قد كدا. الدكتور بصلها و عقد حواجبه و قال: خدمة إيه دي؟ على حسب اللي هتطلبيه. منال ابتسمت بخبث و قالت:

إنت هتخرج من العمليات تقول قدام الكل إن ملك فقدت الجنين. الدكتور بغباء: أيوة بس دا محصلش و هي كويسة و البيبي كويس. منال بحدة: دكتور فتح مخك الزنخ دا معايا مش ناقصة غباء على المسا. الدكتور بصلها بصدمة و قال: إنتي بتكلميني أنا؟ منال بسخرية: لا بكلم أمك بص يا دكتور إنتي هتقول ليهم إن الجنين نزل كدا و كدا يعني. الدكتور بصلها و قال بحدة: إنتي عاوزاني أخون ضميري المهني يا مدام؟ منال بصت ليه و رفعت حاجبتها و قالت:

ضمير إيه يا دكتور الحمير إنت. إسمي اللي بقولك عليه وتنفذه وإلا هفضحك في المستشفى كلها و اقول بيتحمرش بيا. الدكتور بصلها و بلع ريقه بصعوبة هو مش عاوز مشاكل و قال: حاضر اتفضلي انتي و أنا هنفذ كل اللي انتي عايزاه. منال خرجت و هي بتقول: لازم يخرجوني عن شعوري و أنا من جوايا ست مؤدبة. باك. ملك بسخرية: إبليس بيسقفلك يا منال. منال بكيد و بحاجب مرفوع: طبعًا دا إبليس دا تربيتي يا بت. ***

مالك ركب عربيته و جري بيها و وليد ملحقوش لسه هيوقف تاكسي لقي موبايله بيرن وقف رد عليه. منه قاعدة في بيتها القديم و شايلة مالك الصغير و هي بتقول بتذمر: هو إيه القرف دا بقي كان لازم مالك يعمل دا كله وليد وحشني أوي. حسبي الله ونعم الوكيل فيك يا مالك يا إبن أم مالك. مسكت تليفونها و كلمت وليد اللي رد عليها و قال: أيوة يا حبيبتي إنتي كويسة؟ منه بحب: إيه يا حبيبي أنا كويسة الحمد لله إنت عامل إيه و ملك و ملوك عاملين إيه؟

وليد بتنهيدة: هما كويسين يا حبيبتي المهم خدي بالك من نفسك و من مالك الصغير لحد ما أجيلك. أنا شوية و هرجع الفيلا أطمن عليكم. منه بلعت ريقها بصعوبة و قالت بتوتر: لا يا وليد يا حبيبي إحنا مش في الفيلا. وليد عقد حواجبه و سالها بتوجس: أومال إنتوا فين يا منه؟ و إزاي تخرجي من البيت و إنتي لسه والده و من غير إذني؟ منه بلعت ريقها و قالت بتوتر: أنا في بيتنا يا وليد. وليد زعق و قال: نعم يختي؟ في بيت مين؟ إوعي تقولي عند منال.

منه بتأكيد: أيوة يا وليد ماما خليتني لميت هدومي و أنا و مالك الصغير و هدوم ملك و ملوك و رجعنا بيتنا. وليد بصدمة و زعيق: و متنيلتيش قولتيلي ليه وإلا أنا مليش كلمة عليكي؟ و بعدين هو يغلط وأنا اتعاقب ليه؟ منه عقدت حواجبها و قالت: إنت بتزعقلي وأنا لسه مسبعتش أنا غلطانة إني حنيت ليك و كلمتك يقطع الحب و سنينه. و قفلت الخط. وليد بص للتليفون و قال:

بتقفل الخط في وشي بنت منال. مش مكفيها خدت الواد و طفشت لا كمان مش عاجبها إني اتعصب عليها ماشي يا منه انتي و أمك. دخل المستشفى و وصل لاوضة ملك لقي منال واقفة على الباب. بصلها و قال بغيظ: طب مالك غلط أنا مال أمي بتعاقبني معاه ليه؟ دا انا ملحقتش أفرح بالواد يا منال. منال بصت ليه من فوق لتحت و قالت: معلش يا وليد أنا عندي الحسنة بتخص و السيئة بتعم. وليد نفخ و قال:

يا منال استهدي بالله و خليها ترجع البيت هروح اخدها. أنا مليش ذنب. منال ضحكت بسخرية و قالت: نجوم السما أقرب ليك يا وليد. بص يا إبني من الآخر أنا ممشية بناتي على قاعدة. يا نعيش عيشة فل يا نموت إحنا الكل. وليد بصلها بغيظ و سابها و مشي و منال بصت لـ حازم اللي ضحك عليهم و قالت: وأنت يا كابتن رهف أسمع إنك زعلتها بس شوف إيه اللي هيجري ليك. حازم رفع حاجبة و قال: وأنا مالي بيها يا منال؟ منال بحزم:

مالك و نص و تلت تربع مش هتبقي مراتك. حازم بصلها بدهشة و قال: إيه مراتي؟ مين اللي قال كدا؟ منال بحدة: أنا اللي قولت إيه هتكسر كلامي كمان؟ حازم بغيظ: لا يا حبيبتي مش هكسره بس بصي يا منال إنتي لسه قايلها من شوية لوليد نجوم السما أقربلك من إني اتجوز العيلة دي و شابها و مشي. منال في سرها: ماشي يا شوية أوباش أما ربيتكم من أول و جديد ميبقاش إسمي منال. مسكت خصله من شعرها و قالت:

و حيات مقاصيصي دي لخليكم تلفوا حولين نفسكم و برضوا مش هرحمكم عشان تتعلموا الأدب إن كان انتوا وإلا شوية العرر اللي أنا مخلفاهم. *** مالك كان واقف في مكان خالي من الناس مكان لما يبقي مخنوق بيروح يقعد فيه. كان ماسك شوية طوب و برمي في الفراغ و هو بيفكر. هل هيقدر يجمع العيلة تاني بعد اللي عمله وإلا كدا خلاص عيلته إتشتت و مش هيتجمعوا سوا تاني؟ دمعة نزلت منه لما إفتكر ابنه اللي مشفش الدنيا و قال:

سامحني يا حبيبي سامحني والله مكنتش أعرف إنك هتكون ضحية شيطاني. أنا الغلطان مفيش غيري بس كنت هعمل إيه إفتكرت إني لما هقسي الوضع هيتعدل اتارية كان بيبوظ وأنا مش واخد بالي. يا رب احفظهم ليا يا رب عارف إني غلط اديني القدرة إني ارجعهم ليا تاني. بص في الساعة لقاها تسعة بليل أخد العربية و جري بيها لحد ما وصل حضانة ملوك ركن و نام في العربية و هو بيقول:

حقك هاخده من كل اللي سخني عليكي يا ملك أهي بنت الكلب دي هي السبب في اللي حصل كله ما كانت انضربت و هي ساكته. مالك نام من شدة إرهاق اليوم و ملك و ملوك نايمين في المستشفى و منال نايمة على سرير جنبهم. وليد اللي قاعد في الكافيه مركز في الأغنية و الكوبليه اللي اشتغل. مبقتش عارفه اعمل ايه حالي مش صعبان عليه. فردد بسخرية قائلا: والله العظيم حالي ما صعبان علي حد. مالي و مال مشاكل مالك و مراته. و كمل بتذمر طفولي:

أنا عاوز مراتي مليش فيه. و حازم اللي قاعد قدام أوضة ملك و ساند راسه على الحيطة غمض عينه و سمع صوتها و هو بيقول: سعادة البيه المدير كريم شانتيه بشا فرقع لوز بيه تجي نتجوز بالسر تيجي ناخد بيت بعيد. كان شايفها و هي بتعمل حركات بإيديها و بتغني و بتضحك بشقاوة. راح ليها و قال: إنتي عملتي فيا إيه يا رهف عاوز اخدك في حضني ينفع. ضربت بإيديها على صدرها بحركة شعبية و قالت:

تأخد مين في حضنك يا سعادة البيه المدير إنت مفكرني إيه يا خويا والله ما ينفع معاك غير منال هروح أقولها. كانت لسه هتمشي مسك ايديها و قال: استني هنا هتقوليلها إيه يخربيتك. شدها عليه و هو بيقول: قوليلي بقي كنتي هنقولي لمنال إيه؟ رهف بصت في عيونه ببراءة و قالت: مش هقول ليها حاجة بس سيب ايدي. حازم قربها ليه أكتر لدرجة إن أنفاسهم إختلطت و قال:

بصي بقى أنا مليش في حركات الملحن دي ولا حول بحبك و الكلام دا بس أنا من ساعة ما شفتك و انتي بتتكلمي بشفايفك اللي شبه عسل النحل دي و أنا الصراحة بحب عسل النحل أوي فهدقها. رهف لسه هتتكلم إتفاجئت بيه بيبوسها بحب فتحت عينيها أوي و حاولت تبعده عنها لحد ما بعد و قال: رهف بصتله بصدمة و قالت: إنت عملت إيه إنت قد اللي عملته دا؟ طب خد. ضربته بالرجل في رجله لحد ما وقع على الأرض. حازم فتح عينه لقي نفسه واقع على الأرض

قدام أوضة ملك فقال بدهشة: شكلك هتنفذي كلامك وإلا إيه يا منال؟ احيه بجد إيه اللي أنا حلمت بيه دا؟ ربنا يعدي الأيام الجاية على خير. وليد اللي خرج بره المستشفى و أخد تاكسي و راح لـ منه و مالك الصغير بيت منال و هو بيقول: ورحمت أمي لروح أشوفها هو أنا هقعد أحط إيدي على خدي و أغني يحزنون و أنا أصلا مش مدي خوانه.