رواية خادمة قلبي الفصل الثامن عشر 18 - بقلم زهرة عصام

مالك قاعد على كنبة وعلى يمينه ملك وعلى شماله ريا وقدامه وليد وحازم اللي بيكتموا الضحكة بالعافية. مالك بصرامة مصطنعة ومن جواه هيموت ويضحك على منظر ملك: إحنا هنعمل معاهدة سلام بينا عشان نعرف نعيش الكام يوم الجايين دول في سلام. ملك قاعدة ضاربة بوز وبتربطم: يعني كان لازم يشيلني من عليها، كان فيه كام شعراية صفر كنت خلاص على وشك أشيلهم ليها، بس الله في سماه لشيلهم برضوا، صبرك عليا يا بت الدزمة. مالك بص لريا وكمل:

يعني لا جميلة خدامة هنا ولا انتي ضيفة هنا، كلنا هنا أخوات في بعضينا. وبص لملك وقال: يعني نحترم بعض ومنقفش لبعض على الواحدة. ملك قامت مرة واحدة وقالت: اسكوز مي بقي يا سعادة البيه الحليوة، أنا اللي يدوسلي على طرف أجيبه من قفاه، آه معلش إحنا بنتكلم، مهو مش هتحرق دمي وأسبهالكم وأموت أنا مفروسة. مالك شد إيدها وقعدها وقال: مهو معاهدة السلام دي مش هتخليكي تمو'تي مفروسة، اقعدي واسمعي الكلام للآخر بقي. ملك وقفت تاني وقالت:

اسكوز مي معلش كمان مرة، أنت يا سعادة البيه الحليوة مقعدنا في حصة تاريخ جمبك وسايبة مطبخي والسجاجيد اللي هتتغسل، إيه معاهدة سلام، معاهدة سلام اسمها قعدة صلح. مالك نفخ بغيظ وقال: طب نكمل القعدة بقي يا جميلة، ممكن؟ ملك مدت إيدها ليه وقالت: بوس. مالك فنجل عينه بحركة مضحكة وقال: أفندم؟ ملك ببلاهة وتراجع: خلاص متبوسش، هقعد بس لو الكلام معجبنيش، وحياة أبوك يا شيخ، فيه كام شعرة كدا صفر عاوزين نخلص منهم.

حازم مقدرش يقاوم أكتر من كده ووقع على الأرض من كتر الضحك. مالك شد ملك قعدها تاني وقال: اهدي بقي خلينا نخلص، ورانا مصالح. ملك بتريقة: أهو حطيت حزمة قديمة في بوقي وسكت أهو، ربنا على الظالم المفتري، وبصت في السقف وقالت: أهم يا رب أهم، وشاورت على اللي قاعد كله وكملت: أهم اللي جايين عليا، أكمني وحدانية، أسخفهم قرود وأنا هرضى بالأمر الواقع وأقول قضاء وقدر.

مالك بص لها بصة خلتها تقول تحط إيد على بوقها والإيد التانية تشاور بيها بمعني خلاص. مالك: نرجع تاني، معاهدة السلام دي مش بين جميلة وريا بس، لا دي بينا الكل. حازم: إني أعترض. مالك بسخرية وغيظ: بتعترض على إيه إن شاء الله، إحنا لسه قولنا حاجة يا زفت. حازم: معرفش، بس طالما اجتماع بيبقى لازم أعترض فيه، إيه يقولوا عليا مش فاهم. مالك حط إيده على وشه لما شاف ملك بتشجعه وتقول:

برافو عليك يا سعادة البيه كريم شانتيه، أصلاً محدش بيفهم هنا غيرك. ورفعت إيدها وقالت: أنا بايد اعتراض سعادة البيه كريم شانتيه، مهو مش هيبقى لوحده اللي بيعترض، لازم كلنا نعترض، إيه هنسيبه يعترض لوحده. مالك اتعصب مرة واحدة وقال وقف، مسك شبشب وهو بيقول: طب يلا يا ولاد الـ'ـكلب من هنا بقي، أنا عمال أدادى وأحايل عشان منكترش مشاكل وانتوا مش راضين تسكتوا. كلهم أول ما شافوه كدا طلعوا يجروا. حازم شد ريا وقال:

تعالي، انتي مش حمل شبشب تاني، كفاية عليكي جميلة. ملك: اخص، بتتحالف مع الأعداء، بس ابقي خليك فاكر. حازم ساب إيد ريا وطلع يجري على أوضته وهو بيقول: سوري، بس العمر مش بعذقة، ودي شرانية. وليد كان وصل لأوضته وبيضحك على منظرهم. مالك ماسك الشبشب وبيجري وراهم، بص لقي اللي بتستخبي ورا الكنبة بخوف. مالك بيتسحب علشان متحسش بيه لحد ما قعد على الكنبة. ملك طلعت رأسها تبص تشوفه فين، لقيته في وشها، ضحكت ببلاهة وقالت:

أحلى مسا عليك يا ريس. مالك خلع الحزام ولفه لفتين على إيده. ملك شافته كدا جريت وهو جري وراها. ضرب ضربة بالحزام يدوب جت حاجة بسيطة عليها. ملك: عاااا، اهدي يا سعادة البيه الحليوة، اهدي يخويا، هتعمل عقلك بعقل عيلة طلاق تلاتة عيلة. مالك بغيظ: بقي أنا مقعدكم في حصة تاريخ، مش كدا، تعاليلي بقي يا حلوة، لحسن دا إنتي غلاوتك عندي فوق ما تتخيلي. ملك بتجري لمحته هيضرب، نطت وهي بتقول: أركب الهوا.

وقفت على ناحية من السفرة وهو وقف الناحية التانية. بصتله ببلاهة وقالت: و مالها حصة التاريخ، جميلة حصة التاريخ، ظل أنا أصلاً بدأت أفهمه منك، كنت بجيب فيه كحك في المدرسة. مالك بغيظ: أنا بقي ظالم وهتتربي النهارده يا جميلة. ملك: الله يخربيت جميلة وعلى اللي جابوها، في ساعة واحدة

حطت إيديها في وسطها وقالت: هو أنت يا سعادة البيه الحليوة جاي تتشطر عليا أنا، طب ما تشوف اللي جريوا واستخبوا في أوضهم دول، وإلا عشان أنا الضعيفة اللي فيهم ملحقتش أجري. مالك: ضعيفة أنا يا ستي ظالم. مالك كان قريب من أوضة ريا اللي واقفة تتفرج عليهم ومبسوطة أوي وقالت: أيوة كدا يا مالك، ربيها وخدلي حقي من حتة الخدامة اللي محدش عارف يشكي منها دي. ملك: اسكتي بدل ما أجي أشيل الشعرتين اللي فاضلين.

كانت بتكلمها وهي مركزة مع مالك اللي ضرب ريا حزام على رجلها وقال بزعيق: ادخلي جوه. ريا صوتت من الوجع وقفلت في وشهم الباب وهي بتبرطم. مالك رجع بص لملك اللي بتضحك ومش واخدة بالها، وفي حركة سريعة كان قدامها وضربها بالحزام ضربة على رجلها. ملك: عاااا، بتوجع يا سعادة البيه الحليوة، بتوجع، واللهمالك: هتسمعي الكلام وتقصري الشر وإلا لا. ملك بعند وهي حاطة إيدها على رجلها مكان الضربة:

الله وأنا مالي يا لمبي، دا نسمة هوا تعدي في وقت حر، دا أنا محدش بيسمع صوتي ولا بيحس بحركتي، دا أنا الدنيا جاية عليا أوي. مالك: جري وراها وهي طلعت على السفرة وجرت لآخرها، عملت إيديها على شكل مايك وقالت: واحد اتنين تلاتة هبا. بصت على مالك وقالت: سلام كبير أوي لـ أبو رحاب اللي مشرفنا في المنطقة. وليد وحازم جم من وراها وقالوا: هااااااام. ملك لعبت حواجبها لمالك وقالت: وسمعني سلام لو مكنتش إنتي تدلعني مين هيدلعني.

مالك حط إيده على وشه بقلة حيلة وضحك عليها وعلى خفة دمها اللي كفيلة تخرجه من أي مود. مالك: ربنا يهديكي يا بنتي. ملك بغمزة: يا رب يا بابي. ملك جت في دماغها فكرة وحلفت لتعملها. بصت لـ حازم ووليد وعينها لمعت بخبث. مالك عدل لبسه وقال: أنا رايح الشركة وانتوا خلوا بالكم من ريا، لحسن ريا وسكينة دي تاكلها. ملك: متخافش عليها يا سعادة البيه الحليوة، هحطها في عنيا، وغنت: وحياة عنيك وفداها عنيا، أنا بحبك قد عنيا، وبقت تهز كتفها.

مالك هز راسه بقلة حيلة وخرج. ملك نزلت جري من على السفرة وقالت: بعد ما أخلص ترويق وعمايل أكل، عاوزاكم في مهمة قومية، وبلاش جبن وتسبوني قدام سعادة البيه الحليوة لوحدي ها. وليد: فيه في دماغك إيه؟ أعرف بس، شكلك ناوية على خراب الديار يا عبلة. ملك: لو مجبتش الـ 100 ناقة الحمر مفيش جواز يا عنتر. حازم: لاااا، بد من أن تاني بيها يا عنترة. عبلة ملكت ديار بني عبس. ملك: بس يا شيبوب انت، وتعالوا ساعدوني. ريا قاعدة

في الأوضة بغيظ وقالت: اللي إسمها جميلة دي مبوظة عليا كل مخططاتي، كدا مش نافع، لازم أخلص مهمتي في أقرب وقت. ملك قاعدة بتغسل السجاد وحازم بيحول ليها مية من الحمام. وليد كان بينفض ويروق، على الرغم من اعتراضه في الأول بس اندمج معاهم. ملك بصت بضحكة شغلت السماعات على أغنية: يا مدلع يا مدلع، يا سايبني في نار قلبي مولع.

وليد بص على منظرهم اللي خالي من أي دلع ونزل ضحك، وملك اللي كل شوية ترفع إيديها على رأسها وتضحك وتغني وتهز كتفها بترقص بشكل مضحك. مسكت جردل المية وزقته على حازم اللي شهق وقال بنبرة أنوثية: ينفع كدا تبلي هدومي كدا، استهوي، آه يا جميلة يا قاسية. وقضوا اليوم كله في الترويق لحد ما قعدوا بتعب. وليد: كنتي بتفكري في إيه بقي يا جميلة؟ اتحفينا. ملك بخبث:

سعادة البيه الحليوة لو عرف اعتبرنا في المقابر، يا سعادة البيه كنافة بالمنجة. حازم بفضول: ليه؟ هنعمل إيه؟ ملك بخبث: هنتفتح مدرسة رقص.