رواية خدعتني بحبها الفصل العاشر 10 - بقلم سلمي تامر

بصّله كرم بصدمة شديدة من اللي قاله واتكلم بغضب وعصبية. _مراتك مين اللي جاي تدور عليها؟ انت ناسي إنك طلقتها وخدت تمن ده ولا إيه؟ _طلقتها إزاي يعني؟ انت هتستعبط؟ أنا معملتش حاجة زي كده. سيف ابتسم بسخرية واتكلم بقرف. _لا يا حبيبي، طلقتها بعد ما أنقذتها منك لما كنت عايز تغتصبها وقولتلي أديك مليون جنيه عشان تعمل كده. كرم اتنرفز أكتر ومسكه من هدومه واتكلم بصراخ.

_بقولك إيه يالا، متعصبنيش. أنا مستحيل أعمل حاجة زي كده في حبيبة ولا أطلب مليم واحد منك. بعده عنه واتكلم ببرود. _والله ده اللي حصل. ولا إن عزا عمي شغال، أنا كنت قمت بالواجب معاك. كرم أخد تاني صدمة لما عرف إن حسان مات. أول حاجة جت في باله حبيبة وحالتها دلوقتي هتكون عاملة إزاي، عشان كده اتكلم بقلق وتوتر. _فين مراتي؟ أنا عايز أشوفها. _أصلاً الطلاق ده باطل لأني مكنتش في وعيي ومش فاكر أي حاجة من اللي حصل.

سيف بصّله بتفكير واتكلم بحدة. _يعني معترف إنك بتشرب. _أكيد لأ، أنا مبشربش سيجارة حتى. وبعدين انت مالك أصلاً؟ أوعى كده وسع من وشي. زقه بعنف واتجه ناحية البيت وطلع السلالم وفضل يدور على حبيبة لحد ما لقاها. اتصنم مكانه أول ما شافها وحس بوجع كبير في قلبه من حالتها. كانت قاعدة على سريرها ماسكة صورة أبوها وتحت عينيها سواد ووشها شاحب. حس إنها اتبدلت وبقت واحدة تانية فاقدة الحياة. صعبت عليه جداً وقرب منها واتكلم بحزن وحنان.

_حبيبة. بصتله بسرعة بخوف ورعب ورجعت لورا وهي بتعيط. _انت.. انت جاي هنا ليه وعايز مني إيه؟ مش كفاية اللي عملته. كرم بحزن. _مالك يا حبيبة؟ خايفة مني ليه؟ والله العظيم ما كنت في وعيي ومش عارف إزاي عملت كده وفقدت وعيي إزاي. يا حبيبة أنا عمري ما كنت هأذيكي بالطريقة دي، أنا عمري ما مديت إيدي على أي بنت أصلاً، إيش حال مراتي. اهدأت شوية لما لمست الصدق في كلامه ورجعت تاني لحزنها واتكلمت بابتسامة وجع.

_انت خلاص مبقتش محتاج تنتقم مني على اللي عملته فيك يا كرم. أنا خلاص اتكسرت واتدمرت من بعده. وحقك جالك تالت ومتلتّم. ده اللي كنت عايزه. كرم بنفي ونبرة حزينة. _أكيد لأ طبعاً يا حبيبة. أنا عمري ما أقدر أشوفك كده وأبقى مبسوط وفرحان. انتِ مع كل دمعة نازلة في عيونك بتقطع في قلبي دلوقتي بسكين باردة. ده أنا قلبي مبيعملش حاجة غير إنه بيحبك. بصتله نظرة فاقد الحياة واتكلمت بهدوء.

_انساني يا كرم وابدأ من تاني. انساني وعيش حياتك، انت تستاهل حد أحسن مني بمراحل. أنا منفعش ولا ليك ولا لغيرك. عارف لو قابلتك في حياة تانية وظروف غير كده كنت أول حاجة أعملها إني أعشقك يا كرم. انت اللي زيك اتولد عشان يتحب. مفيش في حنيتك ولا خوفك عليا والوحيد اللي كان بيعاملني كده بابا. لكن أنا مش هقدر أبادلك ده. أنا مبقاش عندي أي حاجة لأي حد. رغم إن كلامها وجعه جداً لكن محبش يضغط عليها واتكلم بتفهم.

_وأنا مش عايز منك حاجة يا حبيبة. كفاية اللي انتِ فيها. ولما تفوقي هطلقك وهحررك مني وابدأي من جديد وحاولي تتعلمي من اللي فات. واعرفي إني هبقى دايماً في ضهرك وأي حاجة تعوزيها تعالي لي. بصتله بامتنان ودموعها نزلت بندم على اللي عملته معاه.

مشى كرم بخطوات بطيئة وكان حزين جداً إن علاقتهم انتهت. كان نفسه تبادله مشاعره وأحاسيسه ناحيتها وكان هيعيشها أسعد إنسانة في الدنيا. لكن للأسف الحب مش بإيدينا ومش بنقدر نتحكم في قلبنا يحب مين ويكره مين. سيف كان طالع تاني للناس اللي بره لقى منار بتنده عليه. _سيف.. سيف استنى. بصّله بإستفسار ومنار اتكلمت بهدوء رغم حزنها اللي باين على ملامحها. _تعالى المطبخ، كل حاجة ياسيف. انت من امبارح مأكلتش أي حاجة.

بصّلها بإستغراب من اهتمامها وهي لاحظت ده واتكلمت بإحراج. _انت.. انت زي أخويا ياسيف ولازم أهتم بيك عشان متقعش من وسطنا. _شكراً يامنار. بس أنا مش قادر آكل والله. أخلص بس من الناس اللي برا وبعد كده نشوف حوار الأكلة. هزت دماغها بموافقة وطلعت قدامه وفضلت بصاله سرحان وعشق. لاحظتها مرات عمها وابتسمت بفرحة واتكلمت في سرها. _طب يارب يكون اللي في بالي، وإنك تكوني بتحبيه يامنار وتبقي من نصيبه. وفجأة ملامحها اتحولت بضيق.

_بس طول ما ست حبيبة موجودة مش هيشوف غيرها. فكرت شوية وابتسمت بخبث. _وما له.. أخلص منها بطريقتي. كرم كان في عربيته وحب يطلع تليفونه لقاه مش في جيبه. نفخ بضيق وافتكر إنه نساه في أوضة حبيبة. رجع تاني ووصل البيت وشاف مشهد خلى قلبه يقع في رجليه. حبيبة واقفة على السطح وبتبص للأرض وحس إنها ناويه تنتحر.