رواية خدعتني بحبها الفصل التاسع 9 - بقلم سلمي تامر

"بابا مات ياحبيبة..بابا راح وسبنا" بعد ما منار قالت الكلمة دي، وقفت حبيبة تبصلها بصدمة وعقلها رفض يصدق اللي قالته. اتكلمت بعصبية: _إيه التخلف اللي بتقوليه ده انتِ كمان؟ بابا فين؟ قرب منها عمها ببكاء وحزن وهو بيحاول يهديها: _ادعيله بالرحمة يابنتي، هو دلوقتي بقى في مكان أحسن. _لا.. لا انتوا بتكدبوا عليا صح؟ قولوا إنكم بتكدبوا عليا.

صرخت ببكاء لما لقيتهم كلهم ساكتين وبيعيطوا. جريت على الأوضة اللي واقفين جنبها وفتحت الباب. لقيت أبوها نايم على السرير ووشه متغطي. قربت ببطء وهي بتترعش وشالت الغطا من عليه. دموعها نزلت بوجع واتكلمت بهمس وهي بتحضنه: _بابا علشان خاطري قوم.. انت عارف إني مليش غيرك بعد ماما. عايز تسيبني انت كمان!

أنا مش هقدر أعيش من بعدك والله ما هقدر على حاجة زي دي. علشان خاطري قوم. انت طول عمرك بتدلعني ومغرقني بحبك وحنانك.. ليه عايز دلوقتي تبقى أناني وتاخد كل ده وتمشي؟ طب خدني معاك.. أنا مبقاش ليا لازمة في الحياة من بعدك. خدني معاك علشان خاطري.

دخل سيف وعمها وهما بيحاولوا يتحكموا في نفسهم ومينهاروش علشان يقدروا يسندوها. حاول سيف يبعدها بس هي فضلت تصرخ بقهر علشان يسيبها. وبعدها استسلمت للدوامة السودا اللي هاجماها وفقدت الوعي. تاني يوم كرم فاق ولقى سهيلة جنبه. مسك دماغه بوجع شديد وبص حواليه بتوهان: _صباح الخير ياحبيبي. _صباح النور.. هو إيه اللي حصل امبارح ورجعت البيت إزاي؟

أنا آخر حاجة فاكرها إن أنا وصلتك لبيت أهلك وقعدت معاكم شوية ومشيت. ومن بعدها كل حاجة اتمسحت. بصتله بابتسامة في سرها بخبث وردت بمكر: _مش عارفة والله ياحبيبي.. أصل أنا جيت لقيتك نايم على الأرض وملقتش حبيبة في البيت. وافتكرت عملت فيك حاجة وترعبت عليك. _نعم! هي حبيبة مش في البيت؟ هزت دماغها بتأكيد وانتصار. طلع تليفونه علشان يتصل بيها، لقاه مقفول. نفخ بعنف وقلق. سهيلة لاحظته وبصتله بضيق وغيره: _فيه إيه ياكرم؟

مالك قلقان كده ليه؟ _سهيلة سبيني دلوقتي الله يكرمك علشان دماغي هتنفجر أصلاً وحاسس بحاجة غلط حصلت. _طيب ياكرم.. هروح أعملك حاجة تاكلها. طلعت من الأوضة وهي بتبتسم بخبث. انتصار وهي بتفتكر لما حطت له حبوب في العصير تخليه يفقد وعيه قبل ما ينزل من عندها ويتصرف تصرفات غريبة ومش في طبعه. وخمنت إن طالما حبيبة مشيت من البيت يبقى أكيد خطتها نجحت.

خرج كرم من أوضته لمح ورقة غريبة في الأرض. مسكها وقراها ولقاها شيك بمليون جنيه من سيف. هنا فهم إن فيه كارثة حصلت امبارح وطلع من البيت بسرعة وهو مقرر إنه يروح بيت حبيبة ويفهم إيه اللي حصل بالظبط بدل ما هو تايه كده. وصل بعد شوية ودخل لقى فيه عزا في البيت. قرب بعدم فهم للي بيحصل. وأول ما شافه سيف سحبه من إيده بسرعة ووقفوا في حتة فاضية. واتكلم سيف وهو بيحاول يمسك أعصابه: _انت إيه اللي جابك هنا بعد اللي عملته امبارح؟

_عملت إيه وفين مراتي؟ _مراتك! جماعة أنا عايزة أقول حاجة علشان شفت كومنتات غريبة على الفصل اللي فات. هو أنا قولت إمتى إن حسان تعب لما عرف إن كرم بيحاول يغتصب حبيبة؟ أنا قولت إنه تعب في الاجتماع وراح المستشفى وتليفونه كان مع سيف وهو اللي رد على حبيبة وراح لها أول ما سمع اللي قالته. يعني حسان مات وهو ميعرفش حاجة عن كرم وحبيبة. واحدة واحدة الأحداث هتوضح للكل.