رواية خدعتني بحبها الفصل السادس عشر 16 - بقلم سلمي تامر

دخل لقى مراته بتنزف من بقها ومناخيرها وقاعدة بصعوبة وجنبها خالها وواحد شكله غريب. المأذون اتكلم بغضب وصراخ: _نهار اللي خلفوكم أسود… انت بتعمل ايه يا *** انت وه؟ انتفضوا كلهم بغضب وخضة، ما عدا حبيبة اللي بصت لكرم بدموع وعدم تصديق أنه قدامها بجد وهينقذها منهم. جريت منار على أختها بعياط وأخدتها في حضنها. قرب مهران من كرم بحدة: _انت مين وإزاي تدخل بيتي بالطريقة دي؟ رد عليه بغضب جحيمي:

_أنا جوز اللي عايزين تجوزوها غصب عنها وخطفوها من بيتها. اتصدم مهران وبص لحبيبة اللي في حضن أختها، وبعدها رجع يبص لكرم واتكلم بعدم تصديق: _جوزها إزاي يعني؟ هي حبيبة متجوزة؟ دخلت جميلة بحده وهي بتبص لكرم: _كانت متجوزة يا مهران، لكن حالياً اتطلقت يعني ينفع تتجوز عثمان عادي.

_حبيبة مراتي وأنا مطلقتهاش، لأن لما رميت عليها اليمين مكنتش في وعيي. وكون أنكم عايزين تجوزوا واحدة متجوزة وفوق ده تخطفوها من بيتها دي جريمة وهحاسب اللي خلفوكم عليها دلوقتي. سابت منار أختها المنهارة وقربت من مهران وكلمته بقوة وغضب: _انت عملت في أختي إيه؟ وصلتها للحالة دي إزاي يا مهران؟ انفعل مهران بنفس الغضب:

_مرات عمك ياهانم اتصلت بيا وقالتلي إن حبيبة عيارها فلت وبقت بتشرب وأخلاقها باظت. جبت ولدي وجيت على إسكندرية لقيتها أو*خ من اللي قالتله مرات عمك، عشان كده أخدتها من عندكم وجبتها هنا علشان أربيها وكنت هجوزها دلوقتي لعثمان يستر عليها ويعلمها الأدب. كرم ومنار وسيف اللي واقف وراهم اتصدموا بعنف من اللي اتقال، وإن سميحة قدرت تعمل الخطة الشيطانية دي على حبيبة بمنتهى القسوة. صرخت فيه منار بشدة وبكاء:

_أنا أختي أشرف من الشرف وبابا الله يرحمه مربينا كويس ولا يمكن نعمل حاجة زي كده. وبعدين انت مالك بينا أصلاً؟ هو احنا شوفناك من بعد موت أختك ولا حتى سألت علينا بالتليفون؟ انت خال انت! وحتى لو بنت أختك كده بدل ما تعالجها تضربها وتعمل كده في شعرها وتجوزها بالعافية كده انت بتربيها؟ وقف كرم قدامه واتكلم بتوعد:

_انت مديت إيدك على مراتي وواضح إنها شافت العذاب ألوان، عشان كده أنا هاخد حقها دلوقتي وقدام كل الحاضرين والدكر فيهم يوقفني عن اللي هعمله. بعد آخر كلمة، هجم كرم على مهران بغل وفضل يضرب فيه بعنف وهو مش شايف قدامه غير منظر حبيبة اللي كسر قلبه لأشلاء. اتدخل سيف وعثمان يبعدوا عنه قبل ما يروح في إيده. جميلة صرخت ببكاء وترجي لكرم: _سيبه… سيبه هيروح في إيدك. خدها وامشوا ملناش دعوة بيكم بعد كده بس سيبه.

كرم مكنش سامع حد حواليه وكان بيطلع كل غله في مهران ومحدش قادر يوقفه، عشان كده قامت حبيبة بضعف وتعب وقربت ناحية كرم ومسكت إيده وهي بتنادي عليه بخفوت: _كرم… ساب مهران اللي وقع على الأرض بعنف وبصلها بلهفة. مقدرتش تقول كلمة زيادة واستسلمت لكل اللي بيحصل فيها ده وفقدت الوعي قدام عينيه. مسكها قبل ما تقع وهو بيصرخ بإسمها برعب وشالها بسرعة وجرى بيها على عربيته ووراه منار وسيف. بس قبل ما يمشي بص لهم كلهم بتوعد وغضب جحيمي:

_أي حد أذى مراتي بأي شكل من الأشكال هدمره هو واللي جايبينه. حسابي معاكم لسه مخلصش وقابلوا اللي هيحصلكم بقى لأنكم وقعتوا مع كرم العزايزي. *** فاقت بعد كام ساعة لقيت منار نايمة على الكنبة قدامها وكرم قاعد جنبها ماسك إيديها. وأول ما فاقت اتكلم بإبتسامة جذابة: _حمد الله على سلامتك يا حبيبة.

بصتله بشرود وهي سرحانة في عينيه وابتسامته اللي مليانة حب وحنان ليها. افتكرت لما ضرب خالها عشانها وأنقذها من إيديهم. وافتكرت لما أنقذها من الانتحار وكان جنبها لما والدها اتوفى. وافتكرت برضه لما مكنش بيخرج من عقلها اليومين اللي فاتوا وكانت حاسة إنه هييجي ينقذها في أقرب وقت وإنه بقى مصدر الأمان بالنسبة لها بعد كل اللي بيعمله معاها وبقت في وجوده مطمنة من كل قلبها. فاقت على صوت كرم القلقان: _ساكتة ليه انتِ كوي..

قطع كلامه لما لقاها اترمت في حضنه بعنف وهي بتمسك في قميصه وبتعيط بصوت واطي. اتصدم من حركتها وحس بمشاعر كتير داخلة في بعضها. فاق من صدمته بسرعة وبادلها الحضن بحضن أكبر. اتكلم بهمس وبكاء: _شكراً يا كرم… أنا مش عارفة لو مكنتش موجود في حياتي أنا كان إيه اللي هيحصل فيا. مسح على شعرها واتكلم بحنان وهو بيبعدها عنه: _انتِ تخصيني يا حبيبة ومينفعش أشوفك في مشكلة ومساعدكيش.

ابتسمت برقة وبصتله بنظرة مختلفة ولأول مرة تحس بمشاعر ناحية كرم مقدرتش تفسرها. فسر كرم النظرات دي على أنها امتنان وشكر عشان كده ابتسم بحزن واتكلم بهدوء: _أنا عارف يا حبيبة إنك أكيد اتصدمتي واتضايقتي لما عرفتي إنك لسه على ذمتي لأنك مش بتحبيني وبعد اللي عملته معاكي لما كنت مش في وعيي كرهتيني أكتر. عشان كده أنا هحررك مني ومش هفرض نفسي عليكي، بس في نفس الوقت هفضل في ضهرك وقت ما تحتاجيني.

اتضايقت جداً من كلامه عن الفراق لكن مقدرتش تنطق بكلمة وتمنعه، لأن حتى لو كرم بيحبها مستحيل ينسى إنها خدعته قبل كده وهمت إنها بتحبه عشان تنتقم من ابن عمها. وفي نفس الوقت خمن كرم سكوتها ده على موافقة على الطلاق. غمض عينيه بحزن وبعدها فتحهم وبصلها واتكلم بصعوبة: _حبيبة انتِ…