رواية قمر بنت الصعيد الفصل السابع 7 - بقلم حنين عادل

فجأة عربيات سودا بتيجي عليهم وبتحاوطهم. ناصر: دا بينه هايبقي مرار طافح! ارمحي يابت! طلع يجري زي عادته وقمر وراه. والعربيات وواحد طلع منها وطلع مسدس وضرب طلقة. ناصر نط من الخضة والشنطة وقعت منه. وكي يجيبها لقا الطلقة التانية جمب رجله. ساب الشنطة وكمل جري. ناصر: فيه إيه؟ نخرج من نقرة لضحضيرة! والله عال، والله اتبهدلت يا ناصر. قمر: أنا كنت فاكرة زمان إنك نحس يا ناصر. ناصر: ودلوقتي؟ قمر بصوت عال: اتأكدت!

هانموت شهداء يا ناصر. في نفس اللحظة الشنطة بتنفجر في العربيات وناصر وقمر بيطيروا من شدة الانفجار. قمر: يا بووووووي. ناصر: يااااارب دخلني الجناااااااه. وقعوا علي الأرض وناصر مسك دراعه اللي وقع عليه اللي كان أخد فيه الطلقة ولسه مارقش 100%. بص علي قمر: انتي كويسة؟ اتعدلت قمر وبصت عليه: الحمد لله. إيه مالك فيك إيه؟ ناصر: لأ مافيش. بصوا علي العربيات اللي كانت لسه مولعة فيها النار والناس بدأت تتلم.

اللي في البيتين تلاتة اللي في الشارع. قام ناصر وقمر نفضوا هدومهم ومشوا يعرجوا وأخدوا حاجتهم. قمر: الشنطة اللي كنت ماسكاها طلعت قنبلة يا ناصر. ناصر: آه، الحمد لله قدر ولطف. قمر: مش عارفة غبائك ده هايودينا فين لسه يا ناصر. ناصر: غبائي ولا انتي اللي نحس شكلك. قمر وقفت وفتحت بوقها: أنا اللي نحس!

ناصر: أيوه نحس، جاتك خيبة. كنتي اتجوزي الراجل المليونير وريحينا. ماقالولك سنة ولا اتنين ويفيق وبعدين عاودي دوسي علي رقبة التخين فيهم. ما أصل الفلوس بتقوي! قمر: زعلان أوي كده؟ روح اتجوزه انت. ناصر: يا ريت! حد يقول للجلع لأ. أنا لو لقيت واحدة الصبح تتجوزني وتصرف عليا أنا موافق. قمر: وهاتبقى قدام نفسك مرتاح أما تبقي جوز الست؟

ناصر: طول ما جيبي مليان ومطمن على حساباتي في البنك هاكون مرتاح. انتي بس فاهمة الدنيا غلط مستواكي. إنما أنا فاهمها صح. كوركت! مشت قمر وهو جمبها لحد ما وصلوا لمكان فيه استراحة وكنبة. ناصر: أنا تعبت، نقعدوا نرتاح شوية بقا. وانتي لو عاوزة تأيلي على الكنبة دي نامي. ماتقلقيش. قمر: هاقلق ليه وأنا معايا سبع رجال في بعض. غضنفر. ناصر بابتسامة: لولا إني واثق في قدراتي كنت قولت إنك بتتمسخري عليا! قمر: معلوم طبعًا، واثق أوي!

قعدت قمر وشنطتها جمبها وسندت على الكنبة بأيديها وريحت دماغها وهي بتبص على ناصر اللي حط بؤجته ونام عليها وهو باصص ناحية الشارع. ناصر بابتسامة من غير ما يبص لها: تصبحي على خير يا قمر. قمر: وانت من أهله، تصبح على خير. ناصر بصوت واطي: وانتي من أهلي. *** نااااااصر نااااااصر. بيصحي ناصر وبيص حواليه. قاعد في فيلا. بيقوم وبيلاحظ مراية. بيبص لنفسه في المراية. ناصر: وه يا سنة سوخة يا ولاد! مين مز المزازيز ده؟

كان شاب طول بعرض بارتفاع شعره سايح بني وعينه خضرا. ناصر: انت مين انت؟ جن أعوذ بالله من الشيطان الرجيم. بعد عني يخربيتك أنا غلبان بالله. إيه دي؟ معقول كده؟ انت بتتحرك زيي ليه! رفع إيده يمين وشمال وحط إيده على شعره وفتح بوقه: ده أنا إيه ده؟ أنا فين؟ ناصر؟ طب بالذمة معقول الشكل دهون يكون اسمه ناصر؟ ده مهند لؤي غيث! قرب ناحية الكوميدينو لما لفت نظره خاتم. راح لبسه. مشي إيده عليه طلع منه شعاع خلاه يتفزع.

وفجأة ظهرت بنت جميلة عالسرير. رجع لورا بخوف: أعوذ بالله من الشيطان الرجيم. أعوذ بالله. لا تؤذيني ولا أؤذيكي. البنت: ما تخافش. أنا مش هاأذيك. بالعكس أنا خدامتك. الخاتم اللي انت لابسه ده هبة كبيرة. ناصر: أنا مالي إن كان هبة ولا وفاء. انت مين؟ البنت: الخاتم ده سحري بيحول أي حاجة تشاور عليها لبنت جميلة. ابتسم ناصر وبص لها وبعدين بص على المراية. وفي نفس الوقت اتحولت لبنت جميلة.

ضحك ناصر ومشي يحول أي حاجة لبنات. حتى الكوباية ما سلمتش منه. البنت: وبعدين! ناصر: وبعدين إيه؟ البنت: محول أكتر من 70 بنت. هاتتجوزهم إزاي كلهم؟ ناصر بصدمة: وهو أنا لازم أتجوزهم؟ لأ هههه. أنا صحتي على قدي. أنا مش بتاع جواز. البنت: يبقى هاتتعاقب. ناصر: والعقاب هايكون عسير. اتلم البنات عليه وهو خايف وكل واحدة بتشد في دراع ورجل وكانوا هايقطعوه. دخلت قمر وهي ماسكة البندقية ولابسة لبس صعيدي: بعدي عني يا بت منك ليها.

بعدت البنات عنه وجري ناصر عليها وهو بيعيط والبنات وراه. جرت قمر ومعاها ناصر لحد ما وصلوا لطبق مكرونة بالكبدة وركبوه وساقته قمر وهربت منهم. وفي نفس الوقت ناصر كان بياكل في المكرونة لحد ما شرق. صحي ناصر وهو بيكح وبيص حواليه وبيكتشف إنه حلم. ناصر زعل إنه رجع لشكله: ياااه، مش كان فاتني لؤي دلوقت. أعمل إيه في أحلامي الغريبة دي؟ أنا كنت راكب في طبق مكرونة بالكبدة. معقول؟ يخرب بيتك يا عقلي الباطل.

بص ناصر على قمر اللي كانت نايمة وابتسم. كان لسه حاجة بسيطة والنهار يطلع. اتسند على الكنبة وهو بيبص للسما وبيفتكر الحلم: غبي، كنت اتجوزهم. حد طايل حتى في الأحلام. غبي! بس دخلتها كانت جامدة صوح. دي ساقت الطبق ولا أجدع سواقة! *** في الصباح. صحت قمر لما الشمس ضايقتها. قامت تتاوب وتبص حواليها. مالقتش ناصر بس بؤجته موجودة. قمر: راح فين ده؟ وهيكون نوح عمل فيه حاجة؟ بس نوح مش هايعوزه لوحده.

في نفس الوقت ناصر بيكون واقف على عربية فول وطالع فوق الناس لحد ما أخد طبق فول وطعمية وعيش وبصل. لقا واحدة أجنبية. مشي وراها يغني: مصر بلدنا بلد سواح، فيها الأجانب تتسوح. شافته قمر على بعيد وقفت تضرب كف في كف. لفت البنت له وابتسمت وطلعت بخاخة ورشتها على وشه. ناصر بضحك واحول قبل ما يغمي عليه: ماما نحلة عشان تجيب ال. واغمي عليه. عربية سودا جت وقمر ساعة ما شافت كده طلعت تجري عليه. بس قبل ما توصل ركبوه في العربية ومشوا.

فضلت قمر تجري ورا العربية لحد ما شافت توك توك. ركبته وقالت له يمشي وراه. قمر بخوف: ياترى دي تبع مين؟ نوح ولا صاحب الشنطة ولا حد تالت؟ منحوس من يومك يا ولد عمي. منحوووووس. فضلت العربية ماشية وقمر وراها وخايفة وقلقانة. لحد ما وقفت قدام بيت قديم. التوك توك وقف بعيد عنهم شوية. نزلت منه قمر ومشت. واستخبت ورا عربية وهي بتراقبهم. نزلت الأجنبية والسواق واتنين رجالة شايلين ناصر اللي كان متخدر ودخلوه البيت.

قمر: أعمل إيه أنا دلوقتي؟ دلني يارب. أدخل وراه؟ لأ كده مش هاعرف أساعده. هو أنا فاندام عشان أقدر على كل دول؟ أكلم بثينة صحبتي؟ لأ بردك مش نافع. أنا أعرف دول مين وعاوزين منه إيه؟ عاود تكون عصابة أعضاء ولا مخدرات ولا هباب أزرق على دماغهم ودماغ اللي خلفوهم. ادي آخرة قلة الحيا عشان يبقي يمشي يغازل البنات أوي. بصت قمر على البيت وكأنها بتحاول تحفظ شكله وبعدين مشت. فاق ناصر بمية بتتكب عليه. فتح عينيه لقى البت الأجنبية قدامه.

ناصر بابتسامة: أكيد أنا مت وروحت الجنة وانتِ من الحور العين يا عسل صح. ضحكت البنت وقومته من غير ما تتكلم وخدته على أوضة مجهزة بأجهزة طبية. ناصر بص لها وابتسم: ياه، صحيح الدنيا لسه بخير. عاتعملي لي تحليل شامل متكامل تتطمني بيه على صحتي. البنت ردت بابتسامة: Yes, of course, what is your name? ناصر: ها.... I'm fine, thank you!