رواية قمر بنت الصعيد الفصل الثامن 8 - بقلم حنين عادل

ضحكت البنت وقومته من غير ما تتكلم وخدته على أوضة مجهزة بأجهزة طبية. ناصر بص لها وابتسم: ياااااه صحيح الدنيا لسه بخير. هتعملي لي تحليل شامل متكامل تطمنيني بيه على صحتي. ياااه أنا خلاص لقيت الطبطبة بعد الضرب بالمركوب. البنت ردت بابتسامة: Yes, of course, what is your name? ناصر: ها.... ايم فايم ثانكيو! .... أههيهيهيهي! لأ ما يغركيش الجلابية أنا معايا لغات أجنبية والنبي أنافس محمد رمضان.

ضحكت البنت وهي بتتكلم مع حد من اللي واقفين، وناصر واقف يضحك وهم بياخدوا منه دم. ناصر: ااااه عاملني بحنية ده مامي الحاجة تعبت فيا. بعد ما خلصوا الدكتور عمل له بإيده: بيرفكت! ناصر: ما أكيد بيرفكت ولو أنا مش بيرفكت مين حيبقى برفكت يعني؟ نوح مثلاً. أهيهيهيهي. *** كانت واقفة قمر وبثينة بره. قمر: يلا ننقذه.. بسرعة ده عبيط يغرق في شبر ميه. قمر مشت بسرعة ولكن بثينة وقفتها من إيدها. قمر: إيه؟ بثينة: إيه أنتِ جون سينا؟

هتقدري على اللي جوه لوحدكِ. قمر: ما أنتِ معايا وه! بثينة: آه ندخلهم ونقولهم إحنا جينا برجلينا أهو صيدة سهلة! قمر: وه أومال هنعملوا إيه إياك! بثينة: أنا جاية من الصعيد وسايبة حالي ومحتالي عشان واحدة غبية كيفك قالتلي الحقيني نلحقوا. وأخد أغبي! أكيد هانكلموا البوليس! قمر: بس أنا خايفة يعملوا فيه حاجة! بثينة بضحك: يبقى نصيبه بقى هو كده مرزوق. *** الدكتور قرب من ناصر وفي إيده الحقنة.

ناصر بخوف: بلاش حقن بلاش ارجوك أنا بخاف منها قوي عاااااا. البنت قربت من ناصر ومسكت إيده: بلييز. ناصر: وه يا كارستين خايفة عليا للدرجة دي؟ ده أنا عشانك شاشي شاشي أعدي البحر ولا أتبلاشي. أه ه ه صوح انتي اسمك إيه؟ خد ناصر الحقنة وهو بيبص للبنت اللي سماها لأنه مش فاهم منها أي حاجة. وفجأة بدأ يدوخ: اااه آثار الحب بدأت تبان عليا. هو كده الحب كافر يا ولاد الحقوني. الحقيني يا كارستين. وفجأة أغمي عليه. ضحكت

البنت وهي بتبص للدكتور: شوف شغلك. مسك الدكتور المشرط في نفس الوقت دخلت الشرطة. وقمر وبثينة معاهم. رفع الدكتور والبنت إيدهم. جرت قمر تتطمن على ناصر بخوف. قمر بصت عليهم بعصبية: انتوا عملتوا فيه إيه؟ الدكتور: إحنا لسه ما عملناش لسه هانعمل. مسكهم الظابط ومعاه العساكر وشكروا قمر إنها قدرت تساعدهم في القبض عليهم. وساعدهم العساكر إنهم يدخلوه العربية بعد ما اتطمنوا إنه متخدر. ساقت بثينة العربية وهي بتضحك ولاحظتها قمر.

قمر: في إيه يا بثينة. بثينة: لاحظتي القلق اللي كنتي فيه؟ قمر: ما طبيعي أقلق عليه واحد ما فكرش في أي حاجة وساعدني وما فكرش في نفسه ولا خاف. لو كان واحد مكانه كان فكر قبل ما يهوب ناحية نوح أو كان باع عشان شوية فلوس. بثينة: يعني ده السبب بس؟ قمر: أكيد وهايكون إيه غيره. فجأة عربيتين حاوطوا عربية بثينة وما عدتش عارفة تتحرك. ونزل منها رجالة بسلاح. وقمر وبثينة بصو لحد ما ضربوهم على راسهم فقدوا الوعي. ***

ناصر بيكون واقف قدام قمر. ناصر: اييييييييه هنا سأسكت قليلا احتراما وتقديرا لهذا الجمال. قمر: انت مين! ناصر: وه ما تعرفنيش إياك يا قطة؟ أنا أقولك أنا ناصر راجل، سينغو تاجر مخدرات. تلاقي تاجر آثار، تاجر ألماس. ومالقتش جوهرة أحلى منك أسرقها. قمر: انت مجنون. ناصر: مجنون بحبك. مسكها من إيدها وراح ناحية أوضة مليانة صور ليها. ناصر: أنا المجنون في حبك مش لاقي دوا. أنا اللي النظرة في عيونك تخلي قلبي يرتوي. أنا الهوا!

قمر حاولت تهرب وتجري منه. مسكها بقوة وضرب إيديه في الحيطة وقعد يكسر كل حاجة حواليه. في نفس الوقت قمر وبثينة فاقوا. لاقوهم متربطين وناصر جنبهم وما فيش حد. قمر: إحنا فين ومين اللي خطفنا؟ لاحظوا تشنجات ناصر والأصوات اللي بيطلعها. وفي نفس الوقت ناصر بيكسر كل حاجة حواليه: افهمي بقى انتي ملكي ملكي أنا وبس. قمر: مش بحبك أنا بحب نوح. فتح ستارة بالريموت وكان فيها نوح متربط على كرسي. ضحك ناصر بشر: بتحبي ده؟

وأنا هامحيه من على وش الدنيا. طلع مسدسه وهو بيفرغ طلقاته في نوح وبيضحك. ناصر: بيو بيو بيو بيو موت بقى بيو بيو بيو هاهاهاهاها أنا الكبير! قمر: ماله ده فيه إيه؟ بثينة بضحك: هههههه يظهر بيقتل في الحلم. ماشوفتيش بيو بيو بيو دي! قمر: ناااااصر فووووووق نااااااصر. بدأ يفتح عينيه: أيه... بص حواليه وبص لهم: يخربيت الهندي واللي يتابعه. بتصحيني لييييه منك لله دا كان حلم جميل دا أنا كنت فيه مدمر!

قمر: حلم إيه أنت داري بالوضع اللي إحنا فيه؟ بثينة: هههه هو داري بنفسه. بص ناصر ليها بعصبية: إيه العسل ده! بثينة: من عند أمك! ناصر تجاهلها وبص حواليه: وه إحنا فين؟ أنا آخر حاجة فاكرها إن كارستين بتعملي تحاليل تطمن على صحتي. بثينة: هههههه تحاليل. ناصر: أيوه يا ظريفة. قمر: كارستين بتاعتك كانت بتخدرك عشان تسرق أعضائك. ناصر بصدمة: نهين؟ قمر: أعضائك. ناصر: حتى ده مستخسرينه فيا يا ولاد الكلب.

قمر بضحك: كل أعضائك مش حاجة واحدة. ناصر: يعني كانوا هايشفوني كيف الجاموسة! بثينة: بالظبط. ناصر: طب إحنا فين دلوقت مين اللي عمل فينا كده. _أنا... بصوا على مصدر الصوت لقوه نوح. ناصر: يا وقعة مربربة دا بينه هايبقى مرار طافح. نوح: اصبر على رزقك هو انت لسه شوفت حاجة! ناصر: صابر طول عمري. قمر: مش ناوي تهملنا لحالنا يا شيخ. نوح شد كرسي وقعد عليه. نوح: كده كفاية وكل اللي الكلب ده عمله ها يطلع على جته. ناصر: أنا مش مطمن!

نوح: حقك! حقك ما تطمنش واصل. أنا لو منك أخاف لأني ناوي أعمل فيك البدع. ناصر: ده بينه هتبقى ليلة سوخة يا ولاد. بثينة: هو انت فاكر البلد ما فيهاش قانون يحمينا منك؟ نوح: أنا القانون. ناصر: ههههه فكرتني بمشهد الأستاذ المبدع أحمد السقا في فيلم الجزيرة. من النهاردة ما فيش حكومة أنا الحكومة أنا الحكومة. نوح: أضحك شوية قبل ما تموت. ناصر بخوف: الأعمار بيد الله بقى. قمر بعصبية: انت فاكر نفسك مين ربنا وهاتتحكم في حياتنا؟

أنا مش خابرة كيف كنت أحبك! نوح طلع مسدسه. ونـاصر وبثينة وقمر مصدومين. ناصر بخوف: السلاح يطول بالله عليك يا شيخ تستهدي بالله فك نوح. ناصر عمال يعيط: يا صغير ومحير عالموت يا ناصر يا سوادك يا ناصر بالله عليك يا شيخ هملني أعيش. وقف نوح قدام ناصر وابتسم ابتسامة صفرا: هاهملك تعيش بشرط. ناصر بفرحة: أشرط يا باشا الصعيد أكيد أغور من سحنتكم صوح. نوح: لأ عاوز تعيش تخلص عليهم. ناصر: بس كده ده .... انت قلت إيه؟

نوح اداله المسدس: زي ما سمعت تخلص عليهم. ناصر: قصدك بثينة يعني عاديبثينة: طول عمرك واطي. نوح: لأ بثينة وقمر. قمر كانت مصدومة من اللي بتسمعه. نوح: قدامك عشر دقايق تقرر هاتعمل إيه! ناصر: أنا مقرر قبليها. قمر ابتسمت بس اتصدمت لما سمعت كلام ناصر. ناصر: أنا أسف يا بنات بس العمر غالي وأنا عندي حاجات كتير لسه ما عملتهاش. رفع مسدسه وهو حزين و....