رواية لهيب عشقه الفصل الثالث 3 - بقلم سلمى تامر

الحقني يا يونس أنا مش لاقية المجوهرات بتاعتي. مراتك سرقتهم وهربت. قالتها شهد ببكاء لأخوها اللي كان قاعد مصدوم ومش بينطق ولا كلمة. لمحت ورقة في إيده، أخدتها وقعدت. صرخت بغيظ: الزبالة.. يعني سابتك وهربت مع عشيقها وسرقتنا كمان قبل ما تمشي! أدي آخرة إنك تتجوز واحدة مش من مستواك. اطلعي بره. شهد بصدمة: بتطردني يا يونس؟ بصلها بحدة وصراخ: اطلعي بره مش عايز ولا كلمة... بره. طلعت شهد بخوف منه ومن صراخه. مسك يونس

الورقة واتكلم بغل ووعيد: قسماً بالله هدمرك يا بيسان على اللي عملتيه فيا وفي قلبي اللي حبك. وهروبك من بيتي بابني اللي في بطنك اللي كنت مستنيه ييجي على وش الدنيا بفارغ الصبر. مسح الدمعة اللي نزلت من عيونه وطلع تليفونه واتكلم بجمود: عايزك تقلب الدنيا على بيسان وتعرف مكانها حتى لو تحت الأرض. *** عدى ست شهور ويونس قالب الدنيا على بيسان لكن مش لاقيها. وشهد مستغلة ده وبتفضل تقوله كلام كل يوم علشان يزود شكوكه وكرهه ليها.

على الناحية التانية بيسان كانت بطنها كبرت جداً ووصلت للشهور الأخيرة في حملها. وكانت قاعدة في شقة استأجرتها في منطقة شعبية في إسكندرية. خبطت على الباب بنت شكلها مش كويس وملامحها خبيثة. فتحت بيسان ليها واتكلمت البنت بطريقة سوقية: إيه يا حبيبتي مش ناوية تدفعي الإيجار ولا إيه؟ حاضر هدفع اصبري عليا شوية. لا يا ماما ولا أصبر ولا مصبرش. أنا عايزة فلوسي كلها، يا إما تسيبلي المكان وتمشي من هنا.

ملامح بيسان اتحولت للحزن والهم وفوق كل ده تعبانة من حملها. البنت بصتلها بتقييم وفكرت شوية وبعدها بصتلها بخبث: بصي أنا عندي ليكي حل.. فيه ست عيشتها مرتاحة محتاجة واحدة تطبخ لها. لو ليكي في الطبيخ تعالي وهتديكي فلوس حلوة تعرفي تدفعي بيها الإيجار وتكفي مصاريف ولادتك. بيسان مفكرتش كتير ووافقت بالعرض المغري ده. تاني يوم راحت معاها البيت واول ما اتفتح لقيت بنات شكلهم غريب قاعدين ولابسين هدوم مكشوفة جداً.

بت يا فراولة والله ليكي وحشة. مين القمر اللي معاكي دي؟ قلقت بيسان من نظرات الست اللي بتتكلم ليها. واتكلمت فراولة بنبرة عادية: دي بت غلبانة جوزها سابها وهي حامل ومن غير فلوس. كنت جايباها تيجي تطبخلك زي ما طلبتي. وماله ميضرش... خشي يا حبيبتي المطبخ قدامك اهو وهتلاقي أكل اعمليه. دخلت بيسان بتردد وهي حاسة بحاجة غلط في البيت. وبصت الست لفراولة بتفكير: البت حلوة أوي... أنا عايزاها تشتغل هنا معانا.

يختي اصبري واحدة واحدة وهنقنعها.. أكيد مش هقولها تعالي اشتغلي معانا في بيت دعارة مرة واحدة يعني. فجأة الباب خبط جامد ودخل البوليس والصريخ ارتفع في المكان واخد كل اللي في البيت حتى بيسان اللي كانت مستغربة اللي بيحصل. *** الو.. يونس بيه معايا؟ آه أنا مين؟ إحنا بنكلمك من قسم (... وبنبلغك إننا لقينا مرات حضرتك في... في بيت دعارة.