رواية ليان الزعيم الفصل التاسع 9 - بقلم ايه عيد

ليان بانهيار ودموع ومش قادرة تاخد نفسها: أنا... أنا لقوني هيخلصوا عليا. مشيت الخادمة. اسر قرب من ليان وحضنها. ليان بدموع وهي في حضنه: يا اسر أرجوك متسبنيش، أنا هسمع كلامك والله بس متسبنيش. اسر بصلها: متنسيش إني قولتلك هحميكي منهم. تعالي معايا يلا. ليان بخوف: لا مش هنزل تحت، أرجوك مش عايزة أنزل. اسر قومها ومسك إيدها وبصلها بنظرة كلها أمان: أنا معاكي. *** تحت في الصالة. مسعود ورحاب عمالين يبصوا للقصر وهما مبهورين.

والعيلة مستغربة مين الناس دي وعايزين إيه من ليان. رحاب لمسعود بحقد: شوف البت المحظوظة عايشة فين واحنا عايشين فين. مسعود: محظوظة طول عمرها البت دي. نزل اسر علي السلم بكل هيبته ووراه ليان اللي ماسكة فيه ومخبية نفسها ورا ضهره. رحاب أول ما شافتهم قامت من مكانها. رحاب بفرحة مصطنعة: لياااان حبيبتي وحشتيني، بقي كل دا متساليش عننا. وقربت عشان تروح عندها وتحضنها. بس اسر وقفها بكف إيده. اسر بحدة: عايزة إيه؟

رحاب بخوف: ي يابيه دي بنتنا وأنا جيت أطمئن عليها، بعد ما عرفت إنها اتجوزت. وقربت تمد إيدها لليان. ليان انكمشت في اسر وبدأت تبكي. رحاب بغضب بس مش مبينها وهي بتجز على سنانها: تعالي يا حبيبتي. مسعود: انتي خايفة ليه كدا، هو احنا هناكلك. تعالي هنا يا بت. وقرب عشان يشد ليان. اسر بصله بحدة ومسك إيديه ولفها خلاها تتكسر. اسر بحدة: تفكر مليون مرة قبل ما تقرب لحاجة تخص اسر السيوفي. مسعود وقع على الأرض من الألم.

اسر أخرج مسدسه ووجهه ناحية رأس مسعود. مسعود رفع راسه ليه وهو خايف. رحاب واقفة خايفة ومش عارفة تعمل إيه. والعيلة مصدومة، وأكترهم ليان اللي شافت المسدس في إيد اسر. ليان بخوف من منظر اسر: ا اسر. اسر لمسعود بنظرة كلها شر: أنا أقدر أنهيك من الوجود دلوقتي ومحدش هيسأل عليكم. مسعود وهو بيبكي: لا يا بيه أنا آسف سامحني، متقتلنيش. رحاب بخوف وهي بتبلع ريقها: ي يابيه مينفعش كدا، إحنا آسفين والله. إحنا كنا جايين نطمن عليها.

اسر بصلها بحدة: اطلعي برا. ولو عرفت إنها شافتك بالصدفة، يبقى تخلصي على نفسك قبل ما أوصلك. رحاب وهي بتشد مسعود بخوف: حاضر يا بيه مش هتسمع اسمي من هنا ورايح. يلا قوم يا ضنا. وبالفعل طلعوا. واسر حط مسدسه مكانه. أميرة باستغراب: مين دول يا اسر؟ اسر ببرود: شوية مجانين. سيا واقفة بعيد و هتتجنن إزاي خطتها منجحتش. سميرة: وكانوا عايزين ليان ليه. وليان مالها واقفة كدا بتعيط.

اسر بص لليان اللي بتعيط وبترتعش ومش قادرة تقف على رجليها. اسر: دول المسؤولين في الملجأ اللي كانت فيه ليان، كانوا عايزين ياخدوها. سميرة: ياخدوها فين دول ما هي تمت السن القانوني، والمفروض خلاص ملهاش مكان في الملجأ ده. أميرة قربت من سميرة: تعالي معايا وأنا هفهمك. وبصت لاسر. اللي بصلها نفس النظرة. وخدتها على الأوضة. أما اسر قرب من ليان اللي كانت بتبكي بصوت مكتوم ودموعها على وشها. شالها وطلع بيها على فوق وهي تشبثت فيه.

سيا بغضب: متخلفين معرفوش حتى يعملوا اللي جم عشانه. كريمة باستغراب: هما مين دول، ومالك مضايقة كدا. سيا: أنا اللي جبتهم يا ماما. كريمة: إزاي. تعالي هحكيلك كل حاجة بس مش هنا. وأخدتها على الجنينة. سيا: ليان دخلت الملجأ بسبب عمو كمال. كريمة بصدمة: إيه؟

سيا: أيوا زي ما بقولك كدا، وأنا سمعت اسر وطنط أميرة وهما بيتكلموا. عمو كمال قبل ما يتوفى كان كاتب وصية لاسر وقال فيها. إنه خلص على ناس بريئة بسبب طمعه في الماس، ووالد ليان كان بيشتغل معاه ومرديش يعمل معاه صفقة، فخلص عليه هو ومراته ورمى ليان في الملجأ. وبعدين ندم عشان كدا كاتب في وصيته لاسر بعد ما عدا 17 سنة، إنه يجيب البنت دي ويتجوزها ويعوضها عن اللي حصلها. كريمة بصدمة: إيه؟ بقى كمال يعمل كل ده.

سيا بشر: آه للأسف وكل ده وقع على دماغنا إحنا. كريمة بغضب: طب وهنعمل إيه دلوقتي. سيا: إحنا هنعرفها الحقيقة بس مش دلوقتي وساعتها هي اللي هتغور من حياتنا بمزاجها. كريمة: طب افترضي اسر بيحبها، مش مستحيل يخليها تبعد عنه. سيا بثقة وبشر: لا هو اتجبر عليها مش أكتر ومش بيحبها. ولو هي حبته بقي يبقى مبدهاش أخلص عليها بقى. دخل عليهم سامي. سامي وباين عليه السكر: أهلاً بالناس الحلوة. كريمة بغضب: انت اتجننت افترض اسر شافك.

سامي بصوت عالي: ما يشوف هو أنا خايف منه يعني. سيا بغضب: انت كنت فين. سامي: كنت بستمتع. كريمة: يلا يا سيا نطلعه فوق قبل ما اسر يشوفه دي هتبقى كارثة. وبالفعل طلعوه قبل ما اسر يشوفه. *** فوق عند اسر بيحاول يهدي ليان اللي دخلت في نوبة عياط هستيري. ليان بدموع: م ممكن ياخدوني. هيعذبوني وهيدمروا مستقبلي. أنا خايفة. اسر خدها في حضنه: قولتلك محدش هيقدر يمسك طول ما أنا موجود. ليان حست بالأمان معاه وبدأت تنام.

ليان: ا اسر متسبنيش. اسر مسح على شعرها: مش هسيبك. ليان نامت وهو نيمها على السرير وغطاها كويس وقام راح البلكونة وعمل مكالمة. اسر بغضب: مشرفة الملجأ هي ومساعدها، يكونوا في إيدي. حازم: أوامرك يا باشا، بليل هيكونوا عندك. وهنعملهم عزومة مشرفة في المخزن. وقفل معاه. اسر دخل وقعد على الكرسي اللي جنب السرير وهو باصص على ليان وفتح اللابتوب وقرر إنه ميروحش الشركة وهيشتغل في البيت النهاردة. *** في الملجأ.

رحاب دخلت بعصبية بعد ما راحوا للدكتور عشان إيد مسعود وقعدت على مكتبها. مسعود: هنعمل إيه يا بله إحنا كنا فاكرينه هيسكت لكن ده طلع بيتكلم بس بإيده. ده أنا إيدي لحد دلوقتي لسة واجعاني. رحاب تلفونها رن وردت. سيا بعصبية: انتوا متخلفين هو ده اللي اتفقنا عليه. رحاب: ممكن تعرفيني انتي مين طيب، وعرفتي إزاي باللي حصل. معقول تكوني واحدة منهم. سيا: مش مهم واحدة منهم ولا لا المهم إني عايزة أخلص من البنت دي في أسرع وقت.

رحاب كانت لسه هتتكلم دخل عليهم رجالة ملثمين وأخدوا مسعود. رحاب بغضب وخوف: انتوا مين وعايزين إيه؟ الرجالة خدوا هي كمان. وسيا على الخط واستغربت اللي بيحصل. بس قفلت على طول أحسن الرجالة يشوفوا الرقم ويوصلولها. *** في القصر. صحت ليان وهي مرعوبة وكانت بتحلم بكابوس. اسر قام وقعد جمبها وجابلها مياه. ليان شربت وأخدت نفسها وبصت ل اسر: شكراً. اسر وهو بيحط الكوباية: على إيه. لف ليها وليان قامت وحضنته ولفت إيدها حوالين رقبته.

ليان: على كل حاجة. اسر حضنها هو كمان ومش عارف إزاي. ليان بصتله بطفولية: أقولك سر ومتقولش لحد. اسر: قول. ليان بكسوف: أنا مش ندمانة إني اتجوزتك. اسر بصلها كتير. ليان: أنا مكنتش متخيلة إني هحس بالأمان ده مع أي حد. ليان بكسوف أكبر وهي باصة في عينيه بحب: مستعدة. ادي لجوازنا فرصة. اسر بعد عنها بسرعة وقام وقف وهي استغربت. اسر بص الناحية التانية وقال بحدة: انتي هنا عشان تكملي تعليمك وبس غير كده مفيش، وبعد كده هطلقك.

ليان اتصدمت ودموعها نزلت.