رواية ليل الفصل الثالث 3 - بقلم اروى مدحت

قال حمزه بوجع والدم بينزل من مناخيره: -قولتلك معرفش حاجة عن اللي بتتكلم عنها!! العنوان غلط والله!! كانوا ماسكينه على الجسر وبيضربوه. فجأة مسك الراجل رأس حمزه بعصبية وقال: -انت بتهزر!! انت اللي عاوز تضحك علينا... إحنا مسكنا أبوك وهو هرب قبل ما يدينا الفلوس.. وآخر حاجة قالها لما كان معانا إنه سايبلك انت كل الفلوس. الراجل ضربه بوكس تاني في وشه. حمزه قال بألم كبير: -يعم أُوعى بقولك!!

أنا أبويا كان مسافر مصر ولسه مجاش ومعرفش انت بتتكلم عن إيه وربنا!!! -يعني مش هتعترف؟ -أنا لو أعرف حاجة كنت قولتها بدل الوجع اللي أنا فيه ده. كان فيه اتنين ماسكين حمزه والتالت بيضرب فيه. فجأة جه صوت عربيات الشرطة. الرجالة سابوا حمزه بسرعة وجروا من على الطريق. كان حمزه واقع على الأرض مش قادر يتحرك خالص. الظابط وصله وشاور للعسكريين اللي معاه إنهم يدوروا على اللي هربوا. الظابط قومه وقال: -انت كويس؟

قال وهو كان مغمض عين ومفتح التانية بألم لأن عينه وارمة: -كويس إيه حضرتك بس انت شايف اللي حاصل فيا وبتسألني.. أبوس إيدك دور عليهم واسجنهم أنا مش ناقص يلاقوني ويضربوني تاني! -هم مين دول؟ -صدقني أنا لو أعرف هقولك. -طب ضربوك ليه؟ -معرفش. -يبني قول عشان أقدر أساعدك. -حضرتك أنا مش في وقت تقدروا تستجوبوني فيه.. أبوس إيدك وديني المستشفى عشان أنا بنزف وتعبان أوي!! الظابط سنده عشان يوديه المستشفى.

الدكتور كان بيضمد وشه اللي مليان جروح في كل مكان. قال وهو بيتألم: -حرام عليك يا بابا أذيتك في إيه أنا!!! -انت بتكلمني؟ -هكلمك انت ليه يا دكتور بكلم أبويا. -لا حول ولا قوة إلا بالله يبني انت بتكلم نفسك... -دكتور.. أبوس إيدك أنا كده كويس.. اطلع بره عشان أنا مش طايق نفسي ومستحمل بالعافية. الدكتور سابه وطلع بره فعلاً. وهو كان قاعد يتألم. -هروح الامتحان بكرة إزاي أنا!! .. والأستاذ هيطردني لو غبت.. ده مريض وربنا.

حمزه مكانش مصاب كلياً. هو وشه اللي متبهدل جامد. قام من مكانه وقرر يمشي. هو مش طايق القعدة هنا أصلاً. رجع البيت. استقبلته والدته بقلق وخضة. -مالك يبني إيه اللي عمل فيك كده!! قعد على الكنبة بتعب: -ونبي يا ماما خليكي بعيدة عن وشي لإنني مش مستحمل حد يلمسه. -طب قولي يبني فيه إيه! انت اتخانقت تاني يا حمزه! -بابا... -أبوك؟ أبوك جوا.. ماله يا حمزه ضربك؟ انت بتشرب سجاير يا حمزه!! بتكلم بنات؟؟؟

-يا ماما اهدى ونبي أبوس إيدك.. ما أقصدش أبويا اللي جوا.. أقصد أبويا الحقيقي. -أيمن؟ -آه. -إيه اللي رجعه بعد السنين دي كلها!! -هو مرجعش أصلاً.. أنا فيه ناس اتلموا عليا وضربوني وقالوا إن ليهم فلوس عنده وهو بلغهم عني قبل ما يهرب.. بس. -حسبي الله ونعم الوكيل يبني.. مش بيجي من وراه غير المصايب.. بعد السنين دي كلها نسمع خبر عنه.. طب ووالدتك الحقيقية كمان شوفتها ولا حاجة؟

-لا.. ولا سمعت عنهم هما الاتنين من ساعة ما سابوني زمان. -إيه المصايب اللي بتتحدف علينا دي بس.. قوم يبني ريحلك شوية.. ألف سلامة عليك يا ضنايا. -فعلاً هقوم أنام يا ست الكل.. صحيني بدري عشان عندي امتحان في الدرس ولو مروحتش هتطرد. -تروح إيه بس بحالتك دي!! كلم الأستاذ اعتذرله. -حاضر هروح أهو. دخل أوضته وقفل الباب. كان تعبان جداً. اترمي على السرير ومسك الفون. -الو. -أيوه يا سي حمزه.. خير مصحيني من النوم ليه؟!!!

أماب زن زن زن زن.. آخر ما زهقت فتحت عليك.. عاوز إيه بقى!!! -آآآه.. معلش يا مستر على الزن.. أصل بكلم حضرتك عشان مش هقدر أجي امتحان بكرة. -طيب الحمد لله تبقى ريحتني منك السنة كلها.. متجيش تاني بقى. -استنى يا مستر انت هتقفل!! أنا أقصد إني مش هاجي بكرة بس هاجي بعدين.. أنا تعبان أوي والله ولازم أغيب.

-لا.. صوتك كويس أهو ده مش صوت واحد تعبان.. لو مجيتش الامتحان متجيش يا فاشل يا حرامي الواجب.. ابقى حل واجبك بنفسك تاني مرة ها؟ ولا تلاقيك هتغيب عشان ابن خالتك مش معاك طبعاً.. يا فاش... حمزه قفل الخط في وشه بعصبية ورمى الفون. مضطر يروح بقى. ما هو لو باقي حد شاطر غيره كان سابه من زمان. بس هو كده. كل مدرسين ثانوي شايفين نفسهم وزراء مش مدرسين. -هو إيه اللي حصله؟؟ -والله ما أعرف!!

هو من ساعة ما جه الدرس وهو بالمنظر ده ومكلمش حد.. وربنا منظره يضحك.. يستاهل. -حرام عليكي يا ليل!! الواد شكله واخد علقة معتبرة.. ده مش عارف يفتح عينه التانية أصلاً ماشي بعين واحدة!! فضلو يضحكوا هما الاتنين. -بت بت!! ده بيبص لنا اعدلي وشك.. عرف إننا بنضحك عليه! دخل المستر وفي إيده كوباية القهوة. وعينه جت على حمزه. حط الكوباية بخضة على الطرابيزة. -بسم الله الرحمن الرحيم!! إيه يبني منظرك ده؟؟ قال ببرود:

-والله قلتلك مجيش امبارح قولتلي متجيش خالص.. وأنا بالحالة دي. -أيوه بس مكنتش أعرف إن دايس عليك قطر للدرجة دي!! المجموعة كلها ضحكت ما عدا هو كان متعصب جامد. -روح امشي يبني ربنا يسهلك.. وابقى تعالا الحصص عادي لو فيك صحة. -لا همتحن.. ما أنا جيت أهو. -هتمتحن بعين واحدة إزاي بس يبني! المجموعة كلها ضحكت تاني. -عاجبك يا مستر الضحك ده!! -ما بصراحة يا حمزه الواحد مش عاوز يتنمر.. بس منظرك يضحك. كلهم ضحكوا تاني وهو قال في سره:

-أبو أم ظرافتك يا شيخ. قال بصوت أعلى: -طيب أنا ماشي.. ابقى أجي مرة تانية يا مستر... لما أخف.. سلام. -استنى بس احكيلي اللي حصلك يبني!! يمكن أضحك تاني.