رواية محبوبتي طفلة الفصل السابع عشر 17 - بقلم رحمة سامي

روح: سكت يعني يا حمزة؟ إيه؟ كنت فكرك مش هعرف ولا إيه؟ رد عليا، قول لي أي حاجة وبلاش سكوتك ده. حمزة: حاضر يا روح، أنا هحكيلك كل حاجة.

من سنة جت نسمة تشتغل عندي، بصراحة كانت عجباني، بس كان شكلها محترم أوي. حاولت أبعد نفسي عنها على قد ما أقدر، بس هي كانت مصممة تفضل قريبة مني. جت سفرية تبع الشغل وكان لازم حد يطلع معايا، وساعتها نسمة هي اللي وقع عليها الاختيار، لأنها كانت جديدة ولازم تثبت نفسها. وسافرنا أنا وهي، الشغل كان هياخد يومين ويخلص. حجزت لها أوضة وليا أوضة، وخلصنا كل الاجتماعات اللي ورانا وكان فاضل يوم ونرجع. وهي كانت عايزة نخرج ونشتري شوية

هدايا، وعشان هي كانت غريبة عن المكان روحت معاها. ودخلنا ديسكو وقولنا نشرب شوية، وأهو نحتفل بالعقد الجديد. بس ساعتها أنا تقلت في الشرب أوي لدرجة إني محستش بنفسي غير تاني يوم وأنا في الأوضة ونسمة نايمة جنبي. اتصدمت وصحيتها وسألتها إيه اللي حصل، لأني فعلًا مش فاكر أي حاجة. لاقيتها فضلت تعيط وبتقول إني بعد ما شربت اعترفت لها بحبي وخدتها أوضتي وحصل اللي حصل، وإني ضيعت مستقبلها، ودلوقتي عايز أتخلى عنها. وأنا مش كده يا روح،

أنا مستحيل أتخلى عن مسؤوليتي مهما حصل. وطبعًا عشان الفضيحة وعشان أهلها، قررت إني أتجوزها فترة وأطلقها والموضوع ينتهي. بس بعد كده ظهرتي إنتي واتجوزتك وحبيتك يا روح ونسيت موضوع نسمة خالص. صدقيني أنا مش بكذب عليكي، أيوه أنا فيا عيوب كتير أوي، بس أنا بتغير عشانك وعشان بحبك وعايزاك، وعايز أصلح حياتنا عشان ابننا.

روح: ليه خبيت عليا يا حمزة؟ ليه خليت الشيطان يدخل بينا؟ أصدقك إزاي دلوقتي وأنت من يوم ما عرفتك وأنت بتخبي عليا؟ حمزة: صدقيني يا روح، دي الحقيقة، وأوعدك خلاص مش هخبي تاني وهحكيلك كل حاجة. اديني فرصة، خلينا نحاول تاني، وأوعدك مش هخذالك أبداً. روح بدموع: لو سمحت يا حمزة، أنا عايزة أروح. حمزة: بس يا روح... روح: بعد إذنك يا حمزة، أنا محتاجة أكون لوحدي شوية. لو سمحت روحني. حمزة بحزن: حاضر يا روح، يلا بينا. ***

عند زياد ومنه... زياد: مبسوطة يا حبيبتي؟ منه بكسوف: أكيد مبسوطة، بس... زياد: بس إيه؟ اتكلمي، أنا معاكي. منه: أنا قلقانة على "أبيه" وروح أوي. بيحبوا بعض بس بيعندوا، معرفش ليه. زياد: حمزة غلط كتير يا منه، وعدى كل الحدود، ولازم يتغير ويعرف قيمة روح عشان ما يكررش غلطه تاني. منه: بس هو صعبان عليا، هو بيحبها.

زياد: أنا مقولتش إنه بيكرهها، بس هو فاهم الحب غلط. الحب مش معناه إهانة ومعايرة وذل وضرب وعافية، لأ خالص يا منه. الحب احترام وتفاهم ومودة ورحمة. الحب يعني أكون ليكي السند والضهر. الحب يعني إنك تهربي من الدنيا كلها ومني ليا أنا، مش أخليكي تكرهيني وتخافي مني وتبعدي عني. الحب يعني إنك مهما غلطتي متخافيش وتيجي تحكيلي ونتفاهم براحة ونتكلم، مش أرعبك مني وأخليك تزيدي في غلطك أو تلجئي لحد غيري، وفي الآخر أعاتب عليكي. الحب

يعني تبقي حبيبتي وأمي وبنتي وأختي وصحبتي ومراتي وكل حياتي، مش تبقي على مزاجي كدا وخلاص ومش مهم مشاعرك أو إحساسك أو إنتي عايزة إيه. الحب يعني ثقة وراحة وأمان، مش قلق وخوف وشك وبهدلة. صدقيني الحب حاجات كتير أوي، وأخوكي لازم يتعلمها، لأنه كدا هيخسر كل حاجة.

منه: ياااه يا زياد، أنت طلعت حنين أوي. ربنا يباركلي فيك يا حبيبي. زياد: الله الله، ما إحنا بنعرف نقول كلام حلو اهو. أمال ليه وش الجحيم اللي لابسه دايماً ده؟ منه بكسوف: بس يا زياد، بطل رخامة. أنا بحافظ عليك وعلى حبنا عشان يبقى كله في حلال ربنا وعشان يتبارك في حياتنا سوا. زياد: ربنا ما يحرمني منك يا روح قلبي. *** في مكان تاني على كافيه... خالد: ها يا نهى، عملتي إيه؟ طمنيني.

نهى: خلاص يا خالد، أنا مش هعمل حاجة. أنا هسيبهم في حالهم. الحب مش بالعافية. أنا غلط كتير وكفاية لحد كدا. خالد: إنتي اللي حصلك إيه؟ ليه بتقولي كدا؟ مش بتحبي حمزة وعايزاه؟ إيه اللي جد دلوقتي؟ نهى: أنا فوقت، وحمزة ومستحيل يحبني. هو بيحب روح ومش هيحب غيرها. وأنا عشان بحبه هبعد عنه وهتمناله السعادة. خالد باستهزاء: يا حنينة وجاية تفوقي دلوقتي؟ يلا مش مشكلة. بيكي من غيرك أنا هكمل اللعبة، وروح محدش هياخدها مني مهما حصل.

نهى: كفاية يا خالد، روح هي كمان بتحب حمزة. أنت مش هتكسب حاجة من كل ده. خالد: اخرسي خالص. روح مش بتحب غيري، إنتي فاهمة؟ وهتكون ليا أنا وبس. نهى: حرام عليك يا خالد، اتقي ربنا يا شيخ وسيبهم في حالهم. خالد: بقولك إيه، متوجعيش دماغي. وروحي توبي في حتة تانية يا قطة. يلا من هنا. نهى: ماشي يا خالد، بس صدقني هتندم وهتقول نهى قالت. خالد: يلا في داهية. قال أندم قال. وطلع تليفونه واتصل بحد وقال... خالد: إيه يا حبيبتي؟ فينكم؟

مجهولة: موجودة يا حبيبي. اتأخرت كدا ليه؟ خالد: معلش يا قلبي، كان ورايا شوية شغل ولسه مخلص. مجهولة: وحشتني أوي يا روحي. هشوفك امتى بس؟ خالد: قريب أوي. بس يلا، نفذي اللي اتفقنا عليه دلوقتي، عايزها تولع. مجهولة: أنت تأمر يا روح الروح. خالد: أحبك يا جامد إنت. يلا سلام. روح ليا أنا وبس، ومستحيل حد ياخدها. أنا هوريك يا حمزة إزاي تقرب لحاجة تخصني. هتشوف. ***

وصل زياد منه البيت، وطلعت تنام. وبعد شوية وصل حمزة وروح، ومجرد ما نزلوا من العربية، روح لاقت نسمة بتجري في حضن حمزة. نسمة: حمزة، اوعى تسيبني. أنا محتاجك أوي. خليك معايا، أرجوك. حمزة بعدها عنه: في إيه يا نسمة؟ إيه اللي جابك هنا دلوقتي؟ في إيه؟ نسمة بعياط: حمزة، أنا حامل. روح بصدمة: نعم؟ حامل؟ إزاي يعني؟ حمزة، هو أنت مش قلتلي إن الكلام ده من سنة؟ إيه حامل يعني؟ حمزة: إنتي بتقولي إيه يا نسمة؟ حامل إزاي؟

أنا مقربتش ليكي غير مرة من سنة، إزاي جايه دلوقتي تقوليلي حامل؟ ردي عليا. نسمة بعياط: أنت بتقول إيه يا حمزة؟ أنت نسيت اللي حصل قبل جوازك؟ عايز تتخلى عني دلوقتي؟ حمزة بغضب: إنتي هتجننيني ولا إيه؟ بقولك مقربتش منك. إنتي عايزة إيه بالظبط؟ وإيه اللي حصل محصلش، أي حاجة. إحنا علاقتنا شغل وبس. مش كفاية الليلة اللي مش فاكرها دي. نسمة: حرام عليك يا حمزة. طب اللي في بطني ذنبه إيه؟ ليه بتعمل كدا بس؟ أنا مش هسكت.

حمزة: اعملي اللي تعمليه. اللي في بطنك ده مليش علاقة بيه، وبسهولة هنثبت ده. نسمة بتوتر: ماشي يا حمزة، أنا هوريك ومش هسيب حق ابني. سلام. روح: استني عندك يا نسمة. راحة فين بس؟ نسمة: عايزة إيه إنتي كمان؟ روح: ليه بس بتكلميني كدا؟ مش إحنا صحاب؟ لا وضراير كمان. تعالي بس هقولك. حمزة: روح، إنتي بتعملي إيه؟ روح بغمزة: مالك يا حمزة؟ إنت كمان؟ دي حامل في ابنك إزاي هنسيبها تمشي يعني؟ مين هيهتم بيها؟ هي هتفضل معانا هنا.

نسمة بتوتر وخوف: هفضل فين؟ لأ طبعاً. أنا همشي. إنتوا عايزين تموتوا ابني؟ مستحيل أقعد معاكم. روح: نموت مين؟ إنتي اتجننتي؟ ويا ستي متقلقيش، أنا كمان حامل، وهاكل من نفس أكلك. يلا يا حلوة، بقينا. نسمة: ماشي يا روح. روح وصلت نسمة أوضتها ونزلت راحت لحمزة أوضة المكتب. حمزة: ممكن أفهم إيه اللي عملتيه ده؟ روح: عملت إيه يعني؟ أنا معملتش حاجة. حمزة: إزاي تخليها تفضل هنا وإنتي عارفة إنها كدابة؟ ولا إنتي مصدقاها؟ ولا إيه حكايتك؟

روح: أنا مابصدقش حد غير بالدليل. وهي لازم تفضل هنا لحد ما نتأكد إنها مش حامل منك. حمزة: يا روح، إنتي كدا بتولعيها. روح: متقلقش، أنا عارفة بعمل إيه كويس. وعلى فكرة، أنا امتحاناتي الأسبوع الجاي، ولازم أروح. حمزة: هتروحي إزاي؟ إنتي محضرتيش ولا رحتي خالص. روح: عادي. هذاكر الأسبوع ده وربنا يكرم. حمزة: ماشي. ولو احتاجتي أي حاجة قولي لي. روح: إن شاء الله. أنا هطلع أنام. حمزة: تمام. واقفلي على نفسك كويس. تصبحي على خير.

روح: وإنت من أهله. *** أما عند نسمة، فكانت بتتكلم في التليفون، وروح سمعتها بتقول: نسمة: ينفع كدا؟ اديني اتحبست هنا. هعمل إيه دلوقتي؟ مجهول: متقلقيش، أنا معاكي وهحل كل حاجة يا حبيبتي. نسمة: ما كفاية لحد كدا، أنا تعبت. مجهول: لسه شوية. ولا إنتي مش عايزة تكوني معايا؟ نسمة: لأ طبعاً يا حبيبي. أنا بس خايفة لنتكشف. مجهول: متخافيش، طول ما أنا معاكي يا قلبي. نسمة: ماشي يا حبيبي. تصبح على خير. ***

مشيت روح على أوضتها وهي بتفكر هتعمل إيه، وإن نسمة مخبية حاجات كتير ومستحيل تكون حامل من حمزة. في سر، وياترى كانت بتكلم مين وبتقوله يا حبيبي؟ بس قطعها تليفونها وهو بيرن. روح: إيه يا حبيبي؟ عامل إيه؟ مجهول: تمام يا قلبي. طمنيني عليكي. عملتي إيه؟ روح: نفذت كلامك وكلمت حمزة وقالي... بس يا سيدي، وانتهت بأنها جت وبتقول إنها حامل منهم. مجهول: البت دي كدابة. وأشك إن حمزة لمسها أصلاً من البداية، وإن دي كلها لعبة.

روح: أنا كمان حاسة بكدا، ولازم نتأكد. مجهول: متقلقيش، أنا هحاول أتصرف. وإنتي خلي عينيك عليه. روح: ربنا يخليك ليا. مش عارفة من غيرك كان ممكن أعمل إيه. مجهول: عادي، كنتي هتغرقي في شبر مية يا شبر ونص إنت. روح: تصدق إني غلطانة إني بتكلم معاك. يلا يا عم، من هنا. مجهول: ماشي. وشدّي حيلك بقى عشان الامتحانات. روح: إن شاء الله يا حبيبي. تصبح على خير. *** قفلت روح وقامت تاخد حمام وتصلي وتقرأ قرآن، وبعد كدا نامت.

تاني يوم صحيت ونزلت عشان تحضر الفطار. روح: صباح الخير. منه: صباح النور يا قلبي. عاملة إيه؟ روح: الحمد لله. بس قطعها صوت حاجة اترزعت، وجريت تشوف وكانت الصدمة.