رواية مكالمة منتصف الليل الفصل العاشر 10 - بقلم عادل عبد الله

وهنا رن تليفون لولا وظهر عليه اسم ناصر! استأذنت لولا من نور علشان ترد على الموبايل، وقامت وقفت بعيد. ناصر: أخبارك إيه يا قلبي؟ لولا: الحمد لله كويسة. ناصر: عملتي إيه مع الراجل اللي اسمه نور ده؟ لولا: لسه يا ناصر، كلمته كذا مرة بيتهرب، وآخر مرة البارح قالي إنه مسافر في شغل، ولما يرجع هيبقي يشوف هنتقابل ولا لأ. ناصر: آه. مسافر! ماشي. لما أشوف آخرتها إيه. المهم بقى أنتي وحشاني أوي وعاوز أشوفك.

لولا: لا لا لا مش هينفع خالص. ناصر: ليه بقى؟ لولا: علشان خيري الأيام دي بيكلمني كتير على الخروج من البيت. فمش هقدر أخرج وأقابلك، ده حتى ممكن يكون بيراقبني. ناصر: إيه ده! بيراقبك مرة واحدة كده؟ ده عمره ما عملها قبل كده! لولا: معرفش ماله. واضح كده إنه قلبه حس بحاجة. أنا خايفة حتى يكون اللي اسمه نور ده كلمه وقاله. ناصر: لا معتقدش إنه كلمه وقاله. عمومًا كل حاجة هتبان يا لولا. طيب نتقابل في البيت عندك، إيه رأيك؟

لولا: لا لا مش هينفع خالص. هو كمان الأيام دي بيرجع كتير بدري في أوقات مختلفة كل يوم. مش هينفع خالص. ناصر: ماشي يا لولا. بس خلي بالك يا لولا أنا مش هسيبك لحد تاني. يعني لو عرفت في يوم إنك بتخونيني هنسى حبي ليكي وهدوس على قلبي ومش هسيبك تعيشي على وش الأرض يوم واحد. لولا: إزاي تقول كده يا ناصر! أنا عمري ما عرفت ولا هعرف حد غيرك وأنت عارف كده كويس. ناصر: هنشوف يا لولا هنشوف.

خلصت لولا مكالمتها ورجعت قعدت مع نور، اللي قعد يبصلها أوي وهو شايف تعبيرات الخوف والقلق واضحة عليها. نور: مالك يا لولا؟ تحبي نقوم نمشي؟ لولا: لا لا خالص. نور: شايفك زي ما تكوني قلقانه بعد المكالمة! لولا: لا لا. ده خيري كان بيكلمني واتخانقنا كالعادة في التليفون. صحيح كنت هنسى... غمض عينيك كده. استغرب نور وسألها: أغمض عينيا ليه؟ لولا: غمض بس علشان المفاجأة. نور: حاضر. غمض نور عينيه. بعدها قالت له: فتح عينيك بقى.

فتح نور عينيه لقي لولا بتديله علبة. فتح نور العلبة لقي فيها ساعة غالية جدًا. نور: ليه كده يا لولا. ده واضح إن الساعة دي غالية أوي. لولا: متغلاش عليك. كفاية شهامتك ورجولتك معايا بالدنيا كلها. نور: ما أنا قولتلك ملوش لزوم الهدية وإن أنا معملتش حاجة أستاهل عليها الهدية. لولا: يعني هترفض هديتي؟ نور: لا طبعًا مقدرش أزعلك.