رواية مكالمة منتصف الليل الفصل التاسع 9 - بقلم عادل عبد الله

تمام. فين الكوفي شوب ده؟ مفيش مكان محدد. أنا بقولك أنت شوف كوفي شوب بس يكون بعيد. المكان اللي تحدده أنت. وفي اليوم التالي، استأذن نور ومشي بدري من الشغل وراح قابل لولا. أول ما شاف لولا اتصدم صدمة قوية جدًا! لولا كانت جميلة جدًا بدرجة مكنش متخيلها. كمان عمرها واضح إنها في بدايات العشرينات. أول ما شافها سلم عليها وقالها: على فكرة بجد حرام عليكي. استغربت لولا وردت: حرام عليا إيه، مش فاهمة.

حرام عليكي تبقي حلوة كده وتعملي اللي كنتي بتعمليه ده. خلاص بقى. صدقني أنا خلاص اتغيرت على إيدك. كان ضعف بسبب ظروفي مش أكتر. مهما كانت الظروف يا لولا. يا نور أنا أمي ماتت وهي بتولدني واتربيت بين أبويا ومراته اللي كانت قاسية عليا أوي وشوفت على إيديها الويل. حتى أبويا كان قاسي عليا ودايمًا يبقى في صفها. مشفتش حنية ولا حد اهتم بيا إلا ناصر. ولما اتجوزت جوزي طلع قاسي عليا أكتر من أبويا ومراته.

وناصر دلوقتي هتعملي معاه إيه؟ مش كنتي بتحبيه؟ ناصر خلاص مبقاش الإنسان اللي حبيته في البداية. في الأول كان طيب وحنين عليا إنما بعد ما أبويا رفضه وجوزني لخيري اتغير أوي وشرب مخدرات وبقى إنسان تاني غير اللي حبيته. وهتعملي إيه مع جوزك؟ أنا كلمته في موضوع الطلاق تاني وهو في الأول رفض وبعدين قالي اديني فرصة أفكر. وتفتكري هيطلقك؟ لا. لكن حتى لو مش طلق أنا هعمل خلع وأتطلق منه. ممكن أسألك سؤال محرج شوية؟

اسأل براحتك. أنت من حقك عليا تسألني عن أي حاجة. أنتي وناصر حصل بينكم حاجة؟ بلاش السؤال ده بعد إذنك. اتغيرت ملامح نور وظهر عليه الحزن. حاولت لولا تغيير الموضوع وابتسمت وسألته: وأنت بقى أخبار الحب معاك إيه؟ مش فاهم! يعني أنت مرتبط وبتحب دلوقتي؟ لا. ليه كده؟ ولا عمرك حبيت قبل كده؟ حبيت قبل كده بنت قريبتي من العيلة لكن هي اتجوزت لأن أنا كان لسه المشوار قدامي طويل ومش جاهز للجواز. ونسيتيها بسهولة ولا لسه بتحبيها؟

لا طبعًا. لكن ما دام مش من نصيبي واتجوزت كنت لازم أنساها. والحمد لله نسيت الموضوع بعد وقت مش طويل. وهنا رن تليفون لولا وظهر عليه اسم ناصر! استأذنت لولا من نور علشان ترد على الموبايل وقامت وقفت بعيد.