رواية مكالمة منتصف الليل الفصل السادس 6 - بقلم عادل عبد الله

ارجوك. كمل الخير اللي عملته معايا. خلاص موافق. أوعدك. خلص نور المكالمة مع لولا، وبعدين دخل أبوه يسأله كان بيكلم مين. حكى نور لوالده عن مكالمة لولا له وكلامها معاه. أبو نور حذره إنه يكلم الست دي تاني؛ لأنها ممكن تلعب بيه أو تأذيه. وقاله سواء كانت الست دي صادقة أو كدابة، كفاية أوي كده على الموضوع ده وينساه كأنه محصلش.

وكلم نور هاني صديقه وقاله عن مكالمة لولا له، وحذره هاني نفس تحذير والده له. بدأ يقتنع نور بكلامهم، وفعلاً مرت عدة أيام حتى اتصلت لولا بنور مرة تانية. يعني مش اتصلت تطمن عليا زي ما اتفقنا! معلش كنت مشغول. وبعدين اتصالي ملوش لزوم. لا. اتصالك مهم أوي. أنا عاوزاك جنبي خصوصاً الأيام دي. حاضر. هحاول. على فكرة الإنسان اللي كنت على علاقة بيه بيحاول يكلمني. وكل شوية يتصل بيا. وإنتي عملتي إيه؟

أنا اتهربت كتير من اتصالاته، وفي الآخر رديت عليه وقولتله إني مش هرجع أكلمه تاني خلاص. بس أنا خايفة أوي. خايفة من إيه؟ خايفة أضعف وأرجعله تاني. قربي من ربنا وتوبي بجد هتلاقي ربنا يساعدك إنك تبعدي عن أي حاجة غلط. أنت طيب أوي يا نور. أول مرة أقابل حد طيب كده. مش طيب أوي يعني. الدنيا مليانة بالخير وفي ناس أطيب مني بكتير. أنا نفسي أشوفك بجد. صورتي موجودة على الواتساب. لا. أنا نفسي أشوفك حقيقي مش في صورة. ليه؟

لسببين. أول سبب أشوف الإنسان اللي فوقني وغير حياتي للأحسن بعد ما كنت ضايعة. والتاني؟ خليها مفاجأة أحسن. مش بحب المفاجآت. قولي. معايا هدية ليك. ليا أنا؟ أيوه. بمناسبة إيه؟ بمناسبة اللي أنت عملته معايا. لا. أنا معملتش حاجة. هو القدر والنصيب اللي عمل. برضه أنا مش هنسى شهامتك ورجولتك وموقفك معايا. صدقيني أنا معملتش حاجة. لكن أنا حاسة إنك عملت معايا أحسن حاجة حصلتلي في حياتي.

طيب سيبي الموضوع ده للظروف؛ لأن أنا ظروف شغلي الأيام دي صعبة أوي. يعني أفهم من كلامك إنك رافض تشوفني أو تاخد هديتي؟ لا بلاش تفهمي كلامي بالمعنى ده. يبقى لازم أشوفك. إن شاء الله في أقرب وقت. إمتى؟ نبقى نتفق، لكن اليومين دول صعب أوي. أنهى نور مكالمته مع لولا وقعد يفكر. يا ترى هي صادقة في كلامها معايا واتغيرت بجد؟ ولا تكون بتكدب وبتلعب لعبة عليا؟ مش عارف أعمل إيه؟ خايف..