رواية مكالمة منتصف الليل الفصل الخامس 5 - بقلم عادل عبد الله

: ما انت كنتي هتقتلي جوزك معايا؟ : لأ تفرق كتير. خيري عذبني وبهدلني وشفت معاه الويل. : والرجل ده كمان لو فضل عايش هتشوفي الويل أكتر، وممكن جوزك يموتك أو هتدخلي السجن تضيعي شبابك فيه. : لأ، لأ خلاص. أنا موافقة. اتصلت لولا على نور، وتفاجأ نور بمكالمتها. : ألو. : ألو، مين؟ : أنا اللي كلمتك من يومين مكالمة بالخطأ بالليل. : أيوه أيوه، عاوزة إيه؟ : أنا بكلمك علشان أشكرك. : تشكريني؟ تشكريني على إيه؟

: على إنك فوقتيني في الوقت المناسب. : إزاي يعني مش فاهم؟ : لما كلمتك وعرفت سري، خفت أوي لتفضحني وقررت إني أنهي علاقتي بالشخص اللي كنت أعرفه. : فوقتك! أنتي بتشتغليني ولا بتتكلمي جد؟ : أنا بكلمك بجد ومن قلبي. أنا كنت ماشية في طريق غلط وكانت آخرته وحشة أوي، لكن الحمد لله فوقت في الوقت المناسب، وده بسببك أنت. : آخرته وحشة! ده أنتي كنتي هتقتلي جوزك يا هانم. : لا لا لا، مين قالك كده؟ أنت فهمت غلط. : فهمت غلط إزاي؟

: أنا ما كنتش هأقتل جوزي. أنا ما أقدرش أقتل عصفورة. أنا كنت هأقابل الرجل اللي كنت بأحبه بس، علشان كده حطيت المنوم لجوزي علشان ما يصحاش وهو موجود. : ووصلت بيكي الجرأة إنك تقابلي عشيقك في بيت جوزك؟ وهو موجود كمان؟ ده أنتي جريئة أوي. : أنت ما تعرفش حاجة. قسوة جوزي عليا هي اللي خلتني أعمل كده. : مهما كان، ما فيش مبرر للي بتعمليه ده. كنتي اطلبي الطلاق منه لو مش عاوزة تعيشي معاه. : طلبت منه الطلاق كتير وهو بيرفض.

: كنتي اعملي خلع. بصي ما فيش مبرر للي بتعمليه مهما قولتي. : عندك حق أنا عارفة كويس، لكن الشيطان بقى هو اللي غواني. وعمومًا خلاص الموضوع ده انتهى خلاص. : أتمنى يكون فعلًا انتهى. : بس أنا كنت عاوزاك توعدني إنك ما تقولش لجوزي. أنت ما تعرفش ممكن يعمل فيا إيه. : خلاص أوعدك. بس أنتي أوعديني أنتي تنسي اللي كنتي بتعمليه ده وتعيشي حياتك صح. ولو مش قادرة تعيشي مع جوزك اطلقي أو اخلعيه. : أوعدك. بس عاوزاك توعدني وعد تاني.

: إيه هو؟ : توعدني إنك تفضل جنبي وتسأل عني ولو ضعفت تفوقني. : ما لوش لزوم. : أرجوك. كمل الخير اللي عملته معايا. : خلاص موافق. أوعدك.