رواية مكالمة منتصف الليل الفصل الثامن 8 - بقلم عادل عبد الله

: خلاص أنا هشوف الوقت المناسب وهقولك قبلها بيوم. نور كلم صديقه هاني وقاله: دبرني يا صديقي مش عارف أعمل إيه؟ : في إيه يا نور؟ مالك؟ : مش عارف أعمل إيه؟ خايف أفضل أكلمها وأقابلها زي ما هي عايزة يطلع ملعوب كبير عليا. وفي نفس الوقت خايف أبعد تضعف هي وترجع تمشي في الغلط ويبقى ذنبها في رقبتي. مش عارف أعمل إيه. : وأنت هتحمل نفسك ذنبها ليه؟

المفروض إن أنت أصلًا بعيد عن الموضوع خالص. هي بقى تمشي صح أو تمشي غلط هي المسؤولة عن نفسها وسلوكها. : أنا عارف بس أنا حاسس إنها صادقة معايا ومش بتكدب عليا. ومدام القدر وقعها في طريقي يبقى أنا عليا جزء من المسؤولية في إني أكون سبب إنها تبعد عن الحرام. : لا يا نور. أنت كده بتضحك على نفسك. ابعد يا نور أنا بعتبرك أخويا مش صاحبي وبقولك ابعد عن الموضوع ده آخرته وحشة وأنا خايف عليك.

ورغم اقتناع نور بكلام صديقه هاني إلا أنه ظل بداخله شيء يدفعه في اتجاه لولا ومتابعتها. وبالفعل بعدها بيومين اتصل نور على لولا. : ياااه أنا مش مصدقة نفسي!!! : ليه؟ : مش مصدقة إن أنت اللي بتتصل بيا. أنا دايماً اللي بتصل بيك. : خلاص بلاش أوعدك مش هتصل تاني. : لا لا لا أنا بهزر. : عاملة إيه وأخبارك إيه؟ : الحمد لله. : فاضية بكرة نتقابل؟ ضحكت لولا أوي وقالت: لا لا مش ممكن. أنا كده أمي داعيالي. : تاني أنتي!! طيب بلاش.

: إيه يا عم أنت. بتقفش ليه على طول كده؟ أنا بهزر معاك من فرحتي. : طيب إيه ظروفك بكرة هينفع ولا مش هينفع؟ : ينفع طبعًا ما دام مناسب معاك. : يبقى تمام نتقابل بكرة الساعة ٥ بعد العصر؟ : تمام. : تحبي نتقابل فين؟ : شوف أنت؟ : معرفش المكان اللي يبقى مناسب ليكي. : بلاش الأماكن المفتوحة أوي علشان مفيش حد يشوفني. شعر نور بالقلق من الجملة اللي قالتها لولا وسألها بقلق: أومال هنتقابل فين؟ : مالك يا نور صوتك واضح فيه القلق؟

: لا لا أبدًا. مفيش حاجة. : طيب خلاص نتقابل في كوفي شوب بعيد شوية علشان محدش يشوفني. : تمام. فين الكوفي شوب ده؟ : مفيش مكان محدد. أنا بقولك أنت شوف كوفي شوب بس يكون بعيد. المكان اللي تحدده أنت.