رواية مكالمة منتصف الليل الفصل الثالث 3 - بقلم عادل عبد الله

: وهو أنت تعرفني؟ أنت لحد دلوقتي ما قلتش أنت مين؟ : أنت كنت بتعاكس خطيبتي من شوية في التليفون. : أنا؟!! : أيوة أنت. : آآآه. هو أنت بقى عشيق الست اللي كنتوا ناويين تقتلوا جوزها. : أنت بتقول إيه ياض أنت. لو ما اتعدلتش في كلامك هزعَّلك. : طيب اخلص وقول عاوز إيه؟ : عاوزك ما تتصلش على خطيبتي تاني. ويا ريت لو شايف نفسك دكر خليني أشوفك وأنا أعرفك مقامك. : أنت بتعمل كده علشان تداري على سركم اللي انكشف! صح؟؟

ما تخافش السر اللي بينكم بكرة كل الناس هتعرفوا وأولهم جوزها. : يا ابن ....... قفل نور المكالمة بعد ما بدأ ناصر يشتمه بأبشع الألفاظ. عرف نور إن المكالمة الغلط اللي جات له ممكن تكون سبب لكوارث كبيرة ممكن تحصل له. طلع نور بيته وأول ما دخل لقى باباه كان صاحي علشان يصلي الفجر. استغرب جداً لما شاف ابنه نور راجع من بره في الوقت ده!!! : أنت كنت فين يا نور؟ أنا لما نمت كنت أنت في أوضتك!! نزلت ليه من البيت في الوقت ده؟

وكنت فين؟ بص نور لأبوه وقال له: صلي يا بابا الفجر ونام والصبح إن شاء الله هاحكيلك على كل حاجة. : لأ. أنا مش هرتاح ولا أعرف أنام إلا لما أعرف حصل إيه؟ حكى نور لباباه كل اللي حصل من أول المكالمة الغلط لحد مكالمة العشيق. أبو نور شجعه على إنه حاول ينقذ الزوج المسكين اللي كان ممكن يقتلوه المجرمين.

وإنه بلغ الشرطة وهي قادرة تتصرف لكنه حذره إنه لازم يخلي باله على نفسه خصوصاً إنه بعد ما كشف سرهم ممكن يحاولوا يأذوه أو يتخلصوا منه. نور طول الليل ما عرفش ينام لحد ما طلع نور الصباح وملأ الدنيا. ونور بيفكر إزاي يوصل للناس دي خصوصاً إنه حس من كلام العشيق إن نيتهم فيها شر. نور فطر ولبس ونزل يروح شغله وطول الطريق بيفكر في نفس الموضوع. وأخيراً افتكر حاجة مهمة أوي وقال لنفسه:

: إزاي كان غايب عن بالي. الواد هاني صاحبي شغال في شركة محمول. أنا هتصل بيه وأعرف منه عنوان سكن الست دي من تليفونها ومن العنوان هوصل لجوزها وأنبّهه وأعرفه اللي بيحصل من وراه قبل ما يغدروا بيه. وكمان أعرف اسم وعنوان العشيق ده وأشوف هاقدر أعمل معاه إيه. على الأقل ممكن أساعد الزوج الغلبان ده.

اتصل نور بصديقه هاني وطلب يقابله ولما قابله عرفه باللي حصل وطلب منه إنه يساعده في معرفة اسم وعنوان هذه السيدة وعشيقها. لكن صديقه قال له إنه مش هيقدر يعطيه أي معلومات لأن المعلومات دي مش بتخرج إلا بإذن..