رواية مصائر مجهولة الفصل الثالث 3 - بقلم سما محمد

زين اتصل على جده وقال: أنا اخترت هتجوز مين. جده: تمام يا ابني تعال البيت وكلمني وربنا يعمل اللي فيه الخير. زين: تمام أنا في الطريق. جده قفل وفهم هو هيختار مين، وبص للي قاعدين وقال: زين دلوقتي جاي وكمان اختار هيتجوز مين، مش عاوز واحدة تزعل لأن نصيبها أكيد هيجيلها سواء كان زين أو واحد تاني، فاهمين. علا وملك: فاهمين يا جدو. عند فريدة يدوب دخلت لقت شاب بيقرب منها، مشيت بعيد سمعت صوته بيقولها بحزن: مبروك على الخطوبة.

فريدة اتخضت وبصتله، لقته كمل وقال: كنت أتمنى تكوني ليا وحلمت بيكي كتير، بس النصيب قرر إننا مش مناسبين. فربنا يوفقك بشخص أحسن مني ويوفقني بواحدة أحسن. ومشي وهو جواه كسر كبير. فريدة مفهمتش قصده إيه بخطوبة، بس زعلت من كلامه وحست بزعله. دخلت السكشن وفي دماغها ألف حاجة وألف سؤال. جليلة بصت لبناتها وقالت بهمس:

بصوا بقى، مش مشكلة هيختار أنهي واحدة فيكوا، المهم يتجوز واحدة منكوا وخلاص. مش عاوزة واحدة تغير من التانية، وتعرف إنه هيبقى جوز أختها وتلم نفسها عشان المصلحة مش تطير. ملك: مصلحة؟ جليلة: طب اسكتي دلوقتي عشان جدك واخد باله. جليلة بصت لجدهم وقالت: إلا فين زين على كده؟ جدهم لسه كان هيقول في الطريق، لقي زين وراهم وقال: أنا وصلت أهو. جليلة: حمدلله على السلامة. زين فهم طريقتها وقال: الله يسلمك يا مرات عمي. زين بص لجده وقال:

ممكن دقيقتين في المكتب؟ جده: ماشي. قام معاه ودخلوا المكتب وزين قفل الباب كويس وقعد. جده بمكر: ها، علا ولا ملك؟ زين: لا دي ولا دي، أنا اخترت فريدة. جده ضحك وقال: وأنت فاكرني مش عارف أنت هتختار مين في الآخر. زين: يعني حضرتك عارف من الأول؟ جده: أكيد، أنتوا أحفادي وعارفكوا واحد واحد. زين: طب وإيه رأيك؟ جده: أنا من الأول شايف إن انتوا مناسبين لبعض، بس المهم رأيها، ولاحظت إنها كانت رافضة. زين: ما هي دي المشكلة.

جده: صحيح، أنت قولت هتاخد كام يوم كده، إشمعنى قررت بسرعة كده؟ زين: الصراحة، في واحد وأنا رايح أوصل فريدة طلب أيدها مني، حسيت إني بغلي وعاوز أقتله، وساعتها مستحملتش وقررت أتجوزها. جده ابتسم وقال: دي الغيرة وعمايلها، أسأل مجرب. زين: هو حضرتك مجرب ولا إيه يا جدو؟

جده بابتسامة: جدتك الله يرحمها كانت أجمل واحدة في الدنيا، كل البنات بتغير منها ومن جمالها، وكان كل شوية يجيلها عريس وأنا كنت ببقى بغلي كده. وعاوز أقولك إن فريدة كلها جدتك، عشان كده أنا بحبها أكتر من الكل. زين بسرحان: هي فعلاً زي القمر وحلوة. جده: بس بس، أنت بتتغزل فيها قدامي. زين: احم، أنا آسف. كمل يا جدو.

جده: المهم، كل شوية كنت أقولها عاوز أتقدملك، متردش عليا، لأنها كانت متدينة جداً وغير إنها بتتكسف موت، سبحان الله زي فريدة شكلاً وشخصية. مكانتش بتديني وش، كنت بزعل إنها مش بتحبني، بس قررت إني أتقدملها وتيجي زي ما تيجي. وروحت واتقدمت، كانت هي رافضة في البداية، بس يدوب قولتلها إني بحبها ومش قادر على بعدها أو إني أحب غيرها، حسيت قلبها مال ليا وفي الآخر وافقت. ساعتها عرفت إن قلبها رقيق أوي، بكلمة واحدة حلوة تخليها طايرة، وحبة حنية تدوبها. إنما القسوة والكلمة الوحشة بتكسر قلبها الرقيق. فمن ساعة ما وافقت عليا وأنا خدت عهد على نفسي إني عمري ما أزعلها مني أبداً، ولحد آخر يوم في حياتها مزعلتهاش.

وتعرف، لما كانت شيرين حامل في فريدة، قالتلي: "سموها فريدة زي اسمي". طبعاً أنت استغربت إن جدتك اسمها فريدة مش فرح، بس فرح كان دلعها. وفي الآخر فريدة طلعت زي اللي اتسمت عليها وخدت مكانه في قلبي كبيرة. ساعتها لو جيت عليها يبقى جيت على أغلى واحدة عندي، ومش هتعرف إيه اللي هيحصل لك. زين ابتسم وقال:

مش تقلق، أنا مستحيل أزعلها مني، بس هي توافق عليا وأنا هكون مبسوط، لأن من ساعة ما وصلت وأنا حاسس إن حبي ليها القديم رجع تاني ورجع أكتر من الأول، وده اللي كنت عاوزك تعرفه يا جدو، أنا بحبها من زمان. جده ابتسم وقال: ما أنا عارف. زين: هو مفيش حاجة أنت مش عارفها خالص كده؟ جده ابتسم وقال: أنا جدو. يلا. زين ضحك. جده: يلا نطلع أحسن يقولوا اتأخرنا ليه. زين: يلا. طلعوا وقعدوا في الصالة. جليلة بلهفة: ها، قررتوا إيه؟

جدهم بحزم: لما كل أفراد العيلة تكون هنا هنتكلم. جليلة: مش ناقص غير فريدة وشيرين في المطبخ وجاية. جدهم: يبقى نستناهم. جليلة: ماشي. شيرين طلعت وقالت: أنا أهو. الجد بص لقي عياله مصطفى ووليد وعلي قاعدين، فقال: القرار اللي هيتقال مش يفرق بينكم كأخوات، اللي هيتطلب إيديها الباقي ميزعلش. وبص لعلا وملك وقال: مفيش زعل. الجد: شوية وفريدة جاية، هنستناها عشان متعودناش نقول حاجة وفرد من العيلة ناقص. بابتسامة: أنا جيت. جدها

بص لها وخدها في حضنه وقال: نورتي يا حبيبتي، اقعدي يلا. فريدة: ماشي يا جدو. زين باصص لها بحب وحاسس إن قلبه بيرفرف. الجد بص لفريدة وقال: زين اختار هيتجوز مين. فريدة: طب كويس، ملك ولا علا؟ الجد: زين اختارك انتي يا فريدة. فريدة اتصدمت وقالت: إيييه؟