رواية وجهي المسروق الفصل الرابع 4 - بقلم مصطفى جابر

متقفلش السكه يا فهد. أنا بتصل عشان خاطر أقولك حاجة مهمة بخصوص تسنيم. فهد بغضب: تسنيم اللي خبت عليا الحقيقة واشتركت معاهم في المصيبة اللي كانوا هيعملوها دي؟

حبيبة مقاطعة: غصب عنها. أنت مش متخيل حجم الكسرة اللي في قلبها. واحدة نامت وصحيت لقيت وشها متشوه وبتشوف وشها مش زي الأول. واحدة أمها وأختها بيذلوا فيها كل ساعة وكل دقيقة. واللي أنت شفته ميجيش ربع اللي بيعملوه معاها. تخيل كده ترجع البيت تلاقي أهلك ادوا حبيب عمرك لحد تاني وقالوا إنه هو. تخيل كده أهلك نفسهم بدل ما يكونوا سندك وعزوتك يكسروك. تسنيم أهلها كسروا ثقتها في نفسها يا فهد، عاوزاها تعمل إيه ها؟

فهد لاقى إن كلامه كله صح. دموعه نزلت بحزن: عندك حق. حبيبة بدموع: تسنيم بتعشقك يا فهد. متخسرهاش. أنت النور الوحيد اللي هي عايشة عشانه. متخذلهاش يا فهد. فهد مسح دموعه: عندك حق. أنتي بجد أجمل أخت وصديقة لتسنيم. عملتي اللي هي وأختها ما بيعملوهوش. أوعدك إني مش هسيبها ولا هبعد عنها وهيرجع لها ثقتها تاني. بيفوق من شروده وبيوصلوا المول وبيدخلوا سنتر الفساتين. أول ما بيدخلوا المدينة بتستقبلهم. المديرة بابتسامة: إزيك يا فهد؟

إزيك يا عروسة؟ بإذن الله أنتي هتكوني أحلى عروسة عندي هنا. ولعلمك بقى أنا بنفسي اللي هصمملك فستانك مخصوص. أنا أطول أصمم للقمر ده. وعلى فكرة ده مش كلام مجاملة ولا حاجة. أنتي فعلًا حلوة وعيونك عسل قوي. تسنيم فرحت بكلامها: متحرمنيش من كلامك ده بجد. فهد طول السكة يكلمني عليكي ويقولي إنك أحلى مصممة فساتين في مصر. فهد بحب: مش هوصيكي عليها بقى يا مدام شروق. عايزك تجهزيها كده وتخليها أجمل عروسة طالعة من عندك.

المديرة بابتسامة: باين على فهد بيحبك قوي يا قمر. ربنا يهنيكم ببعض ويفرحكم يا رب. يالله تعالي معايا علشان آخد مقاساتك. عند خلود: البيه خدها وراحوا يجيبوا الفستان. أنا مش هسكت ولازم نتصرف. الشاب: هتعملي إيه يعني يا خلود؟ خلود بغل: هخليها تكرهه وتسيبه. هخليها تشك في فهد وأشوفني وأنا في شقته وهطلع له بليل. محمد بصدمة: تطلعي لفهد بليل إزاي يعني؟ خلود بغمز: أنت فاهم بقى. محمد بذهول: أنتي مجنونة؟

أنتي هتعملي في نفسك كده عشان خاطر تذلي أختك؟ عايزة تشوهي سمعتك؟ خلود بجمود: ميهمنيش. أنا هعمل كل حاجة أقدر عليها عشان فهد يكون ليا. بعد شوية. في السنتر. فهد كان قاعد بملل. بيرفع عينه لقاها باطل عليه وهي لابسة فستان أبيض. فهد بانهيار: بسم الله ما شاء الله تبارك الرحمن. إيه الجمال ده. المديرة بابتسامة: ده تجربة بس مش المرحلة النهائية. إيه رأيك؟

فهد بابتسامة: طول عمرك جميلة وأنا محظوظ إنك في حياتي. عارفة إني مستني الوقت يعدي بسرعة عشان أتجوزك وتكوني على اسمي. ونخلف عيل صغير حلو كده شبهك. تسنيم عينها دمعت من الفرحة وحدودها احمرت من الخجل واكتفت بابتسامة. المديرة بابتسامة: يالله يا تسنيم نكمل. عن إذنك يا فهد. بعد شوية بيخلصوا وفهد بياخدها ويطلعوا على مطعم في المول. فهد بابتسامة: أطلب لك بيتزا ولا كريب؟

تسنيم بضحك: بيتزا وكريب إيه بس. أنا عاوزة بانيه ومكرونة بشاميل ونص فرخة تكون چوسي كده. فهد بضحك: أنتي عازمة حد معانا ولا إيه؟ إيه كل الأكل ده؟ ههههه. : إيه ده تسنيم. بصت لمصدر الصوت باستغراب: مين. عماد بابتسامة: مش فاكراني؟ أنا عماد زميلك أيام الكلية. تسنيم بتذكر: آها عماد. إزيك عامل إيه؟ فهد كور إيده بغيرة وغضب. تسنيم بابتسامة: الحمد لله. أنت عرفتني إزاي؟

عماد بابتسامة: الوشوش الحلوة مش بتتنسي. ألف سلامة عليكي بجد. زعلان على اللي حصل. كان نفسي أجيب الشلة ونيجي نزورك بس معرفناش للأسف. تسنيم بتوتر من رد فعل فهد: الله يسلمك. ولا يهمك. آه صح مبروك خطوبتك من ناني. عماد بهدوء: لا ما أنا فسختها. بصراحة يعني مرتحتش معاها. فهد بعصبية حاول يداريها ويتكلم بهدوء: ما خلاص بقى. عماد بانتباه: آسف جداً لحضرتك. ما أخدتش بالي من وجودك. فهد بغضب: ليه شفاف أنا؟

عماد باستغراب: حضرتك متضايق كده ليه؟ فهد حط إيده على كتف تسنيم: لأن الهانم خطيبتي وكتب الكتاب والفرح بعد يومين. عماد باحراج: آسف جداً. مقصدتش حاجة. دي زي أختي والله. فهد ببرود: تمام. اتفضل. عماد مشي وتسنيم بصت لفهد باستغراب: مالك يا فهد. فهد بغضب من شدة الغيرة: هو أنا كيس جوافة قاعد جنبك إزاي يتكلم معاكي كده؟ وبعدين أنت مالك خطب ولا لأ؟ ما يولع. تسنيم بخبث: إيه ده. أنت غيران؟

فهد بغيظ: أيوه زفت غيران. وعايزك تفهمي بقى عشان نبقى على نور. من هنا ورايح لا تضحكي ولا تهزري مع حد غيري. مفهوم. تسنيم بضحك: بس كده. حاضر. أنت تأمر. فهد بيقلد عماد: قال الوشوش الحلوة مش بتتنسي. نينيني. أبو تقِل دم أمك عيل سئيل رخيم. تسنيم ضحكت على أسلوبه وفضلت تتريق عليه. فهد بغيظ: ما خلاص بقى. بدل ما أقوم أبوظلك وشك ده أكتر ماهو م... حط إيده على بقها وسكت. تسنيم بجمود: أكتر ماهو بايظ مش كده يا فهد؟

فهد بإدراك وخوف: والله ما كنت أقصد. أنا كنت منفعل وكنت بتكلم بعيد. مقصدتش حاجة والله. سابته وجريت وهو فضل يشتم نفسه في سره وجري وراها. مسك إيديها وهي بتعيط. تسنيم بعياط: ابعد عني. فهد بحنان: والله ما كان قصدي. أنا غبي وحيوان. عاقبيني وأنا راضي. تسنيم بدموع: أعاقبك بإيه؟ أعاقب مين ولا مين؟

أنا مليش ذنب في كل اللي في وشي ده. مش بمزاجي والله. أنا تعبت يا فهد. تعبت. محدش رحمني. الناس همها الشكل وبس. كله عاوز الشكل والروح تغور في داهية. فهد طلع تليفونه بابتسامة: اسمعي طيب علشان تعرفي إن فرج الله قريب وإن الله لا يضيع أجر الصابرين. فتح الواتس وشغل ريكورد من رقم أجنبي.

(استاذ فهد الحالة دي آه من الصعب علاجها من مرة واحدة. لكن نقدر بعمليتين إننا نرجعها زي ما كانت وأحسن. ونسبة نجاحها كبيرة لأنها بتاخد علاج من فترة. وحضرتك تقدر تجيبها في أي وقت تكون هي مستعدة فيه وهنعالجها في أسرع وقت.) تسنيم بصدمة: إيه ده. فهد بابتسامة: دكتور أمريكي كبير. قدرت أتواصل معاه وبعت له تقرير بحالتك. وده كان رده بعد الترجمة. تسنيم بفرحة: بجد يا فهد؟ يعني فيه أمل أرجع زي ما كنت؟

فهد بحب: وهترجعي أجمل بكتير. مع إنك في كل حالاتك جميلة. تسنيم حضنته وهو طبطب عليها بحنان. بعد ساعة. دخلت تسنيم بيتها وهي طايرة من الفرح. أمها ابتسمت. سعاد بحنان: غيرتي رأيك يعني وجاية فرحانة مع فهد؟ تسنيم بسعادة: فهد قدر يغير كل حاجة يا ماما. سعاد بحزن: حقك عليا إني كنت هضيعك مني. تسنيم بحنان: سيبك من اللي فات بقى. المهم فين خلود؟ سعاد بابتسامة: قالت هتبات عند صاحبتها وهتيجي بكرة. تسنيم بهدوء: ماشي. هروح أرتاح بقى.

سعاد بحنان: روحي يا حبيبتي. ربنا يسعدك. بست دماغها وتسنيم راحت ترتاح. عند فهد. دخل شقته ووقف مستغرب من شكل الشموع والنور مطفي. ولع النور ووقف مصدوم. فهد بصدمة: خلود. أنتي بتعملي إيه هنا؟ خلود كانت لابسة فستان لحد الركبة وحاطة ميكاب كتير: أنا هنا عشانك يا فهد. فهد ببرود: إيه قلة الأدب دي؟ البسي هدومك واطلعي برا يا خلود أحسن ما أوديكي في داهية.

خلود قربت منه بدلع: مش هبعد عنك. والنهارده بالذات يا فهد. أنت النهارده ملكي أنا. فهد ضربها بالقلم وزقها. وقعت على الأرض: أنتي رخيصة. امشي. اطلعي برا بقولك. خلود بغيظ: طالما مش هتستجيب ليا بالطريقة السهلة يبقى أنت اللي اخترت بقى. استغرب كلامها وفجأة حد جه من وراها و ضربه على دماغه. وقع فقد وعيه. خلود بخبث: هاتيه يا محمد يلا وصوري اللي هقولك عليه. محمد بجمود: ماشي. يلا. تاني يوم الصبح.

بيفوق فهد لقى نفسه في أوضته ومصدع. قام وقف بدوخة. كان هيقع قعد تاني. فهد بتعب ودوخة: حصل إيه؟ آه دماغي. افتكر اللي حصل وزعق بغضب: خلوووود. قام بغضب نزل تحت عندهم. عند سعاد. سعاد: افتحي الباب يا تسنيم. شوفي مين بيخبط. تسنيم فتحت لقت فهد. فهد بغضب: فين خلود يا تسنيم؟ تسنيم باستغراب: مش موجودة. بايته عند صاحبتها من امبارح و... وإيه الروج اللي على رقبتك ده يا فهد؟ : هقولك أنا. بصوا لقولها خلود جاية من ناحية شقة فهد.

خلود بابتسامة: أنا وفهد حبيبي اتجوزنا امبارح. والنهاردة صباحيتنا أنا وهو. تسنيم بصدمة.