رواية رهينة تحت تهديد السلاح الفصل الثاني عشر 12 - بقلم نور احمد

عادل: أيوه يا بيه، بس عايز أقابلك عشان أتكلم معاك على رواقة. الألفي: طيب قابلني في مكتبي الساعة 9 بالليل. عادل: تمام يا بيه. وقفل، والألفي اتنهد براحة وفرحة واتصل على مراد. مراد: ألو يا جدي، خير في حاجة؟ الألفي: مراد عندي ليك خبر هيفرحك. مراد: إيه هو؟ الألفي: عارف المحامي عادل؟ مراد بتذكر: أيوه فاكره. الألفي: اتصل من شوية وقالي إنه لقي ولاد عمك ممدوح المختفيين. مراد بصدمة: ولاد عمي لقيهم بجد؟

الألفي: أيوه وهفهم منه الموضوع بالليل في الشركة وعايزك تيجي هناك على الساعة 9. مراد: تمام يا جدي. في الجنينة: غزل: إيه مالك مخضوضة كده ليه؟ جنات: أنتي بنتهم بجد؟ غزل: أيوه ليه؟ جنات: لإن بابا زمان كان ليه عداوة مع أبوكي. غزل: مع بابايا؟ إزاي وليه؟ جنات: أنتي متعرفيش بجد؟ زينب: الله البنت لو تعرف كانت هتسألك ليه؟ ما تقولي وتخلصي عايزة أعرف أنا كمان.

جنات: زمان بابا كان صاحب فوزي وأغز أصدقاءه، بس فجأة بقي بيكره فوزي وفوزي بيكرهه وبقي بينهم عداوة بسبب إن فوزي زمان غدر بيه، وبعدين خطف منه أغلى حاجة وهي ماما، لإنه كان عايز يحرق دم بابا عشان بابا زمان كان السبب في قتل أبو فوزي...

بس بابا قدر يرجع ماما منه بس العداوة والكره لسه بيناتهم، ولإن فوزي كان الحقد والغل عموه قتل أمي، وبابا كان عايز ياخد حقه بأي ثمن، بس للأسف بابا مات في حادثة غريبة عشان كان بيسكر كل ليلة برا البيت بسبب فراق ماما ليه. غزل بتفكير: آه عشان كده هو دخل بيتنا بسلاح ورجالة. جنات: إزاي ده؟ غزل حكت من أول ما دخل مراد بيتهم بالسلاح لحد ما قابلت نيرة أول يوم. غزل: بس أنا مش مصدقة إن بابا قتل مامتك.

زينب: حبيبتي متزعليش الأمور هتتصلح إن شاء الله. جت سلوى وبنتها نيرة. جنات: خير يا مرات عمي، جاية تقعدي معانا؟ سلوى بتكبر: لا مليش في اللمة اللي جوها زي الزفت. جنات: أومال جاية ليه؟ نيرة بغيظ: أنتي مالك؟ ولا عشان هو بيتكم تتحكمي فينا وتقوليلنا جايين ليه اقعدوا ومتقعدوش؟ اتكلمي معانا باحترام دي قد أمك. جنات: بس أنا شايفة إنها ولا تطولها في حاجة من حنانها وبراءتها. سلوى بغل: أنتي بتقللي مني يا بنت سلفتي؟

جنات بهدوء: أنا مقولتش حاجة تقلل منك. نيرة: بطلي شرك ده يا جنات أنا عارفة إنك مش مرحبة بيها هنا. جنات باستفزاز: البيت بيتها. زينب: كفاية يا جماعة بلاش خناقة كده. سلوى: اسكتي يا ولية أنتي ملكيش دعوة. نيرة بقرف: جايبة واحدة من الشارع ومقعداها عندنا وكمان بتدخلها في مشاكلنا ناقصة كمان تاخد الورث مننا. جنات بغضب: اخرسي يا نيرة. نيرة بعصبية: أنتي بتزعقيلي يا بت؟ جنات: أيوه بزعقلك... ومش خايفة منك ولا من أمك.

سلوى بغيظ: الظاهر إن جدك وأخوكي مربوكيش ودلعوكي زيادة وخلوا لسانك طويل. جنات: ملكيش دخل في تربيتي أنا متربية أحسن تربية وأحسن من تربية بنتك دي. سلوى: أنتي بتقارني نفسك ببنتي يا بت؟ جنات بسخرية: ليه كنت ناقصة رجل ولا دراع ولا هي بنت الملوك؟ سلوى بكره: أنتي بنت ناقصة تربية فعلًا... وأنا هوريكي التربية دي. ومشيت سلوى ودخلت القصر بغيظ.

نيرة بتكبر وقرف: ولمي الزبالة اللي جايباهم من الشارع دول وراميهم برا القصر اللي زيهم ملهمش مكان هنا. ومشيت بتكبر وغرور وغيظ. جنات بصت لغزل وزينب بضيق: أنا آسفة والله على اللي قالوه. زينب: تمام... عن إذنك. ودخلت هي كمان بحزن، يبدو أنها محدش عايزها في المكان ده. جنات: وأنتي كمان داخلة؟ غزل: أيوه. جنات: يلا بينا. في منزل فوزي: كان ياسين نايم على سريره وبيبص للسقف وسرحان. ياسين: أنا يتيم معنديش لا أب ولا أم...

يعني خلاص أنا هسيب البيت ده وأروح مكان جديد لا أعرف اللي فيه ولا هما يعرفوني... لكن هبقى جنب أختي وغني... لا متتغرش بنفسك يا ياسين... الأغنياء قلوبهم حجر زي مراد كده... بس هو أنا ممكن أكون زيهم؟ معتقدش. جاء الليل والألفي راح الشركة ومراد بعده. في القصر: نيرة اتسللت وخرجت من القصر وركبت عربيتها ومشيت متجهة لفيلا كبيرة فدخلتها وكان في شاب باين عليه مستنيها فراحتله وحضنته بدلع. نيرة بدلع: حبيبي يا زيزو وحشتني أوي.

زيزو: وأنتي أكتر يا قلب زيزو. نيرة بمياعة: قد إيه؟ زيزو بخبث: تعالي أوضتي وأنا هقولك قد إيه. وأخدها لغرفة وأغلق الباب وراه. الألفي: ها يا عادل قول هما فين؟ عادل: مع فوزي. الألفي ومراد بصدمة: إيه؟