رواية صاحب مفتاح الشقه الفصل السادس 6 - بقلم عمرو راشد

تقبلي تتجوزيني؟ تقبلي تكوني تحت أمري أنا؟ أمجد العطار صاحب مفتاح الشقة. = بس أنت متجوز. ومالو، تبقي الرابعة. = هو أنت متجوز تلاتة؟ أيوا، بس محدش يعرف. = ومنال؟ ملكيش دعوة بمنال، أنا عايز رد منك. = طب سيبني أفكر، أنا محتاجة وقت. الجنة مبتستناش حد يا شهد، أنا عارف إن عندك طموح وحلم كبير عايزة توصليله. = ومنال مش هتزعل؟ متخافيش منها، وميبقاش عندك قلق منها، منال مكانها في النار، وإحنا لينا الجنة، الجنة معايا أنا وبس.

= طب أرجوك سيبني أفكر، أنا محتاجة وقت. وأنا مش هضغط عليكي، براحتك خالص. الإغراء للبني آدم شيء عظيم، تقدر تخليه يعمل أي حاجة. وأي حاجة هنا مقصود بيها أي حاجة حرفيًا. يعني تخيل لو جبت واحد من الشارع وقولتله اعمل حاجة معينة ومقابلها مبلغ كبير من المال، تفتكر هيعمل إيه؟

طبعًا هيوافق من غير تفكير. ما بالك بقى لو قولتله هخليك تملك كنوز الأرض، تعيش في الجنة طول عمرك ومش أنت بس، أنت وولادك وأحفادك كمان، يبقى طبعًا لازم يوافق. في اليوم دا أنا رجعت البيت لقيت منال نايمة، بس لحسن حظي إن حماتي العزيزة كانت صاحية وتعبانة كالعادة. كانت لسة خارجة من الحمام. قربت عليها ومسكت إيدها عشان تتسند عليا بعد ما رسمت وش المسكين. الف سلامة عليكي يا حماتي. ردت عليا وروحها غايبة عنها. الله يسلمك.

= عارفة أنتِ علاجك إيه؟ إيه؟ = لمون، كوباية لمون من إيدي هتخليكي زي الفل. أنا مليش نفس. = اسمعيني بس وصدقيني هتبقي كويسة. مشيت بسرعة من قدامها من غير ما أسمع منها رد وروحت على المطبخ وبدأت أعمل كوباية اللمون وحطيت جرعة السم بتاعتها ورجعت بيها تاني، وشوفتها وهي بتشربها قدامي وبتشكرني بعدها، ودي حاجة جميلة إنك تقدم خدمة جميلة لبني آدم زي دا، خدمة هتريحه من تعب الحياة وترحمه من تعبه.

بعد ما حماتي شربت اللمون دخلت تنام تاني، وأنا كمان دخلت أنام بعدها. بس لما صحيت تاني يوم لقيت الحالة زادت أكتر وأكتر على حماتي، لدرجة إنها بقت راقدة في السرير، مش قادرة، وواضح إن تعطيل الوظائف في جسمها بدأ يشتغل. منال شافتني وأنا بلبس عشان أنزل، جات وقفت وعنيها جواها شر. هو أنت رايح فين؟ = نازل عندي شغل. أنت عايز تنزل وماما تعبانة؟ = طب أنا هعمل إيه يا حبيبتي؟ إحنا روحنا بيها للدكتور وكتب علاج، إيه المطلوب تاني؟

ماهي لو دي أمك كنت اتصرفت. = أنتِ عارفة إني بعتبر أمك زي أمي بالظبط. بس مش أمك. = أنتِ عايزة إيه يا منال؟ مش عايزة حاجة، أنا هتصرف. = هتتصرفي تعملي إيه يعني؟ ملكش دعوة، انزل شغلك وملكش دعوة بيا نهائي. = برضو. أمجد بقولك إيه، ابعد عني وسيبني خالص دلوقتي. = أسيبك؟ صرخت في وشي وقالتلي: امشي! ابعد عني قولتلك، سيبني بقا.

الانهيار بيكون صعب جدًا على أي بني آدم، بالذات لو شخص زي منال. حالة منال دي مش غضب، بالعكس، دي بداية كسر ضلع منال، بداية الانهيار ليها. ودي حاجة أنا مستمتع بيها جدًا الصراحة، حاجة مستنيها من زمان. وصلت بيت ناهد وطلعت الشقة وفتحتها ودخلت لقيتها خارجة من المطبخ. حمدالله على سلامتك يا حبيبي. = الله يسلمك، أنتِ بتعملي إيه؟ كنت بحضر الأكل. = طب سيبي الأكل وتعالي عشان عايزك. مشيت ورايا وجات وقعدنا على الكنبة.

أنتِ عملتي إيه مع منال؟ = من يوم عيد الميلاد متكلمناش. أنا قولتلك أكتر من مرة إني عايزك تبقي أقرب واحدة ليها. = مانا مش عايزها تشك في حاجة. ولو شكت هتعملي إيه؟ = مش عارفة. إزاي مش عارفة؟ منال لو شكت فيكي لازم تثبتيلها إنك معاها وبتحبيها. لازم منال تعرف وتحس وتبقى متأكدة إنك أقرب واحدة ليها. دورك إنك تطمنيها، فهمتي؟ = أنا حاسة بخوف.

مرات أمجد العطار مينفعش تخاف، مينفعش لأي سبب. أنتِ لازم تبقي قوية، مفيش أي حاجة تقدر تأثر فيكي. = طب أنت عملت إيه امبارح بعد ما مشيت من هنا؟ روحت لـ شهد. = شهد مين؟ واحدة جديدة. = هتتجوزها؟ آه. = اشمعنى دي؟ أولًا شهد جيران منال يعني ضربة هتكسرها، وثانيًا البت دي غريبة، عينيها فيها حاجة غريبة، عندها طموح كبير أوي، عايزة توصل بأي شكل، وأنا هعرف أستغل دا كويس. = وكدا نقدر نقول مبروك لـ صاحب مفتاح الشقة.

لسة لما الموضوع يتم، متستعجليش. = طب ونورا؟ خدت منها الموافقة امبارح. = أنا نفسي أعرف أنت متجوزها ليه؟ نورا دي كنز وكنز لا حصر له، هي نور فعلاً نازلة من السما. بني آدمة صافية جدًا من جواها، وهو دا سبب جوازي منها. لما بشوفها بحس إني وسخ أوي، عشان كدا مش بروحلها عشان عايز أكمل في اللي أنا بعمله، مش عايز أقف نهائي. = بتفكر ترجع؟ لو رجعت يبقى مستاهلش الجنة، مستاهلش اللي أنا وصلتله.

= أنت عايز توصل لكل حاجة يا أمجد، ودا مش صح. وأنا هاخد كل اللي أنا عايزه من الدنيا، أصل أنا مش خسران حاجة، معنديش حاجة أخسرها ولا أخاف عليها. لازم دايما عشان تعرف تعيش تمشي على مبدأ: يا إما تعيش أو تموت. لازم تتعامل مع كل لحظة في حياتك إنها آخر لحظة عشان تعرف تستمتع بيها وتعيشها صح. = ومش ممكن تخسر؟ الجبان هو اللي بيخسر، وأنا مش جبان. = والشاطر ممكن يقع يا أمجد. ومين قال إني شاطر؟

أنا بحارب ضد الدنيا وأنا عارف إني هكسب. = أنا أهم حاجة عندي إنك تبقا معايا. يبقى تسمعي كلامي وتنفذي أوامري بالحرف الواحد، وتشلي الخوف من جواكي دا لو عايزة تبقي معايا فعلاً. كنت قاعدة مش عارفة أعمل إيه، أمي بتموت قدامي ومش عارفة أعمل حاجة. وسط ما أنا قاعدة بفكر لقيت جرس الباب بيرن، قمت فتحت ولقيت صلاح جوز أختي، دخل وقفل الباب وراه. حماتك عاملة إيه دلوقتي؟ = مش كويسة خالص يا صلاح، أمي مبقتش قادرة تتحرك.

طب اسمعي، في موضوع مهم لازم تعرفيه. = موضوع إيه؟ فاكرة المحفظة اللي وقعت من الحرامي اللي اتهجم عليكي؟ قمت وقفت بسرعة. لقيته. = ومش بس كدا، دا أنا كمان عرفت مين اللي بعته. مين؟ = أمجد العطار جوزك!!